لما فرقة كرة قدم بتلعب وحش و بتيجي تفكر هو يا تري إيه السبب؟ فإنت غالباً بتروح لحاجة من إتنين: يا إما اللاعيبه مبقتش عايزة تلعب تحت إيد المدير الفني و مبقاش عارف يحمسهم .. أو إن الSystem اللي اللاعيبه المفروض يلعبوا به محدش فاهمه و المدير الفني مش عارف يوصله ليهم .. زي بالضبط لما طالب درجاته تبقي وحشة في الإمتحانات .. يا إما هو مش عايز يذاكر فمهما كان المدرس كويس هو مش حيحل .. أو هو عايز يذاكر بس مش قادر يفهم حاجة من المدرس اللي بيشرحله فبالتالي برده مش حيعرف يحل .. لما تيجي تبص علي تشيلسي و أداءهم اللي زي الزفت في الماتشات الأخيرة بتلاقي نفسك بتروح ناحية إن المشكلة في الSystem .. المشكلة في المدير الفني (المدرس) .. أصل معلش تشيلسي دي عامله زي الطالب الدحيح اللي إتعود يطلع من اوائل الفصل فلما تشيلسي يشيل 4-0 من بورنموث و يشيل 6-0 من مانشستر سيتي يبقي أكيد اللاعيبه مش قادرة تفهم المدير الفني بتاعها و لإنها مبقتش قادرة تفهمه فهي مبقتش قادرة تنفذ تعليماته .. مع الوقت الSystem اللي (ماوريسيو ساري Maurizio Sarri) بيحب يلعب به و اللي الناس بتحب تسميه Sarri-Ball فرقع في وشه مع إن في أول 3 شهور له في إنجلترا مكنتش فيه قعدة علي القهوة أو في البلاي-ستيشن إلا و كانت عن إزاي تشيلسي بيلعب كرة قدم نظيفة أوي تحت إيد (ساري) و فيه ناس أنا أعرفهم شخصياً أول ما جه من نابولي قالوا عليه (بيب جوارديولا Pep Guardiola) الجديد.
تقدر تقول إن اليوم اللي Sarri-Ball إتقتلت فيه رسمي كان يوم 24 نوفمبر 2018 في ماتش توتنهام و تشيلسي .. في الماتش ده (ماوريسيو بوتشتينو Mauricio Pochettino) المدير الفني لتوتنهام كلف (ديلي ألي Dele Ali) اللي المفروض إنه صانع الألعاب بتاع توتنهام إن أول ما الكرة تتقطع من الفرقة يجري علي (جورجينو Jorginho) اللي المفروض إنه لاعب الإرتكاز بتاع تشيلسي و يفضل لازقله بحيث يطلعه بره اللعب .. أهي اللعبة البسيطة دي هي اللي جابت أجل Sarri-Ball .. في ماتش أرسنال (أرون رامزي Aaron Ramsey) عمل نفس الدور و بقي ماسك (جورجينو Jorgingo) مان-تو-مان .. في ماتش برونوث اللي تشيلسي خسروه 4-0 الدور ده قام به لاعب ويلزي إسمه (ديفيد بروكس David Brooks) يدوبك عنده 21 سنة .. كان المفروض إن اللي حصل في ماتش بورنموث ده يبقي بداية إن (ساري) يقعد مع نفسه و يبتدي يفهم إن فيه حاجة غلط .. أصل معلش لما لاعب يدوبك الCareer بتاعته فيها 21 ماتش أساسي يمسك فرقة تشيلسي كلها من رقبتها و يخلي فرقة زي بورنموث اللي ولا لاعيب فيها ينفع تقارنه بمستوي لاعيبه تشيلسي دايسين علي وشهم يبقي أكيد فيه حاجة غلط في الSystem .. السؤال اللي كان محيرني أنا شخصياً و مش لاقيله إجابة: هو ليه الناس جوه تشيلسي صابره علي اللي بيحصل؟ الإجابة أيها السيدات و السادة هي حاجة إسمها الإحصائيات.
فيه بدعة بدأت تنتشر في أندية كرة القدم إن بقي كل مدير فني معاه ناس ماسكين Laptop و عمالين يبصوا في شيتات Excel و يرسموا رسومات بيانية لأداء كل صغيرة و كبيرة في الفرقة .. فعلياً الناس دي مقتنعة و مؤمنة بإنهم عملوا اللي متعملش قبل كده في كرة القدم .. لو إتكلمت مع الناس دول تلاقيهم مقتنعين فعلاً إنهم بيعملوا ثورة في كرة القدم و مهما حاولت تقولهم إن اللي بتعملوه ده فنكوش مش حيصدقوا .. و الحقيقة يصدقوني ليه و كل الكلام اللي بتطلعه الإحصائيات و الجرافات و الرسومات البيانية بتقول إن تشيلسي عموماً و (جورجينو) خصوصاً من أحسن لاعيبة أوروبا بلا منازع و يمكن أحسن من (لوكا مودريتش Luca Modric) و (ديفيد سيلفا David Silva) كمان إيه رأيك بقي؟ .. يصدقوني ليه و إنجازات (جورجينو) الموسم ده لازم تتعلق علي عتبة الFIFA بإعتباره لاعب خط النص اللي مجابتوش ولادة .. (جورجينو) الموسم ده هو أكتر لاعب إستحوذ علي الكرة .. أكتر لاعب مرر كرات صح في كل الدوريات الأوروبية .. الرجل ده عمل 2,136 تمريرة ناجحة في 23 ماتش يعني بتتكلم إنه في المتوسط بيعمل 92.8 تمريرة في الماتش .. (جورجينو) ده اللي يعبر عنه فعلاً هو الأية بتاعة ولا تقربوا الصلاة .. نص الأية بتقولك يا عم متصليش بس كمل الأية لاخرها .. إحصائيات (جورجينو) بتتقول إنه لاعيب مجاش زيه بس كمل الاحصائيات لأخرها.
بالنظر للطريقة اللي Sarri-Ball بتشتغل فالمفروض إن (جورجينو) هو المحبس اللي كل الكور بتعدي عليه .. هو اللي بيقرر الكرة تروح فين؟ و هو اللي بيقرر رتم اللعب .. دايماً هو اللاعيب اللي تبصله لما تتزنق و اللي لو إنت عايز الكرة لازم تروحله عشان يديهالك .. ده معناه إن الرجل ده عامل زي الكرتة علي طريق السفر يعني كل هجمات تشيلسي لازم تعدي عليه تاخد الختم الأول و ده السبب إنه اكتر لاعيب في أوروبا عمل تمريرات صح .. إذن المنطق بيقول إن (جورجينو) بحكم الJob Description بتاعه تقدر تعتبره لاعيب خط نص هجومي بس مش ده اللي بيحصل .. إنت بتتكلم عن لاعيب عمل 2,136 تمريرة صح في 23 ماتش منهم 530 تمريرة بس لقدام عشان يبني هجمة يعني أقل من 25% من إجمالي التمريرات اللي طلعت من تحت إيده بس كانت عشان تشيلسي يعمل هجمة .. الباشمهندس عامل 270 تمريرة لورا للمدافعين و لحارس المرمي و عامل 209 تمريرة طايشة عشان مكنش لاقي حد يديله الكرة فخاف تتقطع .. بس الرقم الأهم هو إنه عامل 1,127 تمريرة بالعرض لا لورا ولا لقدام .. من هذا الكم الرهيب من التمريرات (2,136 تمريرة) الباشمنهدس معملش إلا 15 فرصة خطيرة علي المرمي و ده بيخليه بيحتل المركز ال460 كأخطر لاعبي كرة القدم السنة دي في أوروبا .. يمكن الإحصائية اللي بتجيب أجل أسطورة (جورجينو) هي إن الأستاذ لحد دلوقتي معملش ولا تمريرة حاسمة.
مش عايزك تفهم من كلامي إني قاسي أوي علي (جورجينو) و بعتبره لاعيب فاشل لإنه طبعاً مش فاشل .. أنا كل اللي بقوله إننا لسه لحد دلوقتي مشفناش (جورجينو) بتاع نابولي لإن لسه قدامه وقت عشان لوحده يشيل حمل تنفيذ Sarri-Ball علي كتافه في دوري يعتبر أقوي و أسرع بكتير من الدوري الإيطالي .. لإن في نفس الوقت لما (ساري) جاب (جورجينو) هو مكنش جايبه عشان يبقي (كيفين دي بروينه Kevin De Bruyne) .. هو مش جاي عشان يعمل 20 تمريرة حاسمة في الموسم .. هو جاي عشان يبقي هو الموتور اللي بيمشي تشيلسي .. بس السؤال دلوقتي إيه العمل لما مدير فني زي (إيدي هاو Eddie Howe) بتاع بورنموث أو (بوتشتينو) بتاع توتنهام يلعب علي تشيلسي بإنه يعين لاعيب يمسك (جورجينو) مان-تو-مان؟
هل (ساري) مدرب عبقري؟ الله أعلم بس في نفس الوقت هو ليه مش عارف يخلي (ديفيد لويز David Luiz) يركز في الماتشات؟ ليه مش عارف يخلي (ويليان Willian) يلعب زي ما كان بيلعب تحت إيد (جوزيه مورينيو Jose Mourinho)؟ ليه مش عارف يخلي (نجولو كانتي N’Golo Kante) يلعب في مركزه الطبيعي؟ و معلش نقطة (كانتي) دي بالذات معصباني أوي .. أنا عمري ما شفت لاعيب عينه مليانة زي الواد ده .. ده لاعيب أيام ما كان بيلعب في ليستر سيتي مكنش عنده عربية .. تدري ليش؟ .. عشان كان بيقول أنا ساكن جنب النادي و جنب الإستاد فمش مستاهلة .. عارف لما بقي في تشيلسي و عايش في لندن راكب عربية إيه؟ ميني كوبر يعني اللادا بتاعة بره .. ده لاعيب كان مكسوف يشيل كأس العالم رغم إنه شال منتخب فرنسا كله علي كتافه طول البطولة .. إذا كان (ساري) مدرب بيفهم أوي ليه بيحسسني إنه عامل زي صاحبك اللي بتلعب معاه بلاي-ستيشن اللي بيلعب بنفس الفرقة بنفس التشكيلة بنفس طريقة اللعب كل مرة و مهما خسر أو كسب أو إتعادل مبيغيرهاش زي ما يكون مبيعرفش يلعب غيرها؟ اللي إدارة تشيلسي خايفة منه هو إن (ساري) يطلع نسخة بالكربون من (لويز فيليبي سكولاري Luiz Felipe Scolari) .. للناس اللي لسه بدأت تتابع كرة قدم قريب و ميعرفوش مين هو (سكولاري)؟ و إيه قصته مع تشيلسي؟ فأنا بس عايزك تجيب فشارك و إزازة البيبسي بتاعتك و تعالي أحكيلك قصة بتجيب تبول لا إرادي لأي مشجع تشيلساوي قديم شوية.
يحكي إن سنة 2008 تشيلسي جابوا مدير فني برازيلي إسمه (سكولاري) هو هو نفس الرجل اللي خد بمنتخب البرازيل كأس العالم سنة 2002 في كوريا الجنوبية و اليابان و هو هو نفس البني أدم اللي شال 7-1 من ألمانيا في كأس العالم 2014 في البرازيل .. المهم إن فرقة تشيلسي في أول 13 ماتش في الدوري تحت إيد الرجل ده كانوا شوية و يطلعوا نار من بقهم .. من 13 ماتش لعبوهم خسروا ماتش و إتعادلوا ماتش و كسبوا الباقي .. الفرقة كلها كانت بتلعب حلو .. يوم 5 أكتوبر 2008 كان عندهم ماتش في الدوري ضد أستون فيلا اللي كان بيمرنهم وقتها (مارتن أونيل Martin O’Neill) و الفرقة كانت بتلعب في بطولة كأس أوروبا و كانوا قبلها كاسبين توتنهام و داسوا علي وش مانشستر سيتي و جابوا فيهم 6 جوان .. الماتش ده خلص 2-0 لتشيلسي بس كان ممكن يخلص 10-0 مستريح رغم إن (ديديه دروجبا Didier Drogba) مكنش بيلعب عشان كان مصاب .. (فرانك لامبارد Frank Lampard) لو كل الفرص اللي صنعها في الماتش ده جت جوان كان زمانه عامل 4 تمريرات حاسمة لوحده .. (مايكل بالاك Michael Balack) كان بلطجي في نص الملعب و تقريباً ده كان أحلي ماتش لعبه (أشلي كول Ashley Cole) مع تشيلسي .. تشيلسي كان عالي أوي في الماتش ده لدرجة إن (سكولاري) طلع رأس الحربة (نيكولاس أنيلكا Nicolas Anelka) بين الشوطين عشان يريحه .. مش بيفكرك بحاجة الوضع ده؟
جه يوم 22 نوفمبر 2008 و تشيلسي يتعادل علي أرضه مع نيوكاسل و بعدها بدأت سلسلة نتايج زي الزفت لتشيلسي بإنه لعب 8 ماتشات كسب فيهم ماتشين بس و إتعادل أو خسر الباقي .. يوم 9 فبراير 2009 إتعادل تشيلسي مع هال سيتي بدون أهداف و بعد الماتش قرر (رومان إبراموفيتش Roman Abramovic) رئيس النادي إنه يمشي (سكولاري) لإنه وصل لمرحلة إنه بقي خايف إن لو الرجل ده كمل في منصبه فتشيلسي مش حيعرف يعدي من يوفينتوس في دور ال16 من بطولة Champions League .. لما تيجي تبص علي حياة (سكولاري) و حياة (ساري) مع تشيلسي تلاقيهم نسخة بالكربون .. بداية زي الفل لمدرب بيلعب بطريقة معينة مبيغيرهاش مهما حصل و فجأة النتايج تقلب و الفرقة مبتكسبش ..الفرق إن (سكولاري) إتشال بس (ساري) لسه .. فلسفة (سكولاري) في اللعب في الأول كانت غريبة علي الإنجليز فكانت ناجحة جداً لحد ما إتفهم.
الرجل كان بيلعب 3-5-2 بس يمكن لإن الإنجليز في 2008 مكنوش يعرفوا إيه هي 3-5-2؟ أو كانت إتمسحت من ذاكرتهم فكانوا متخيلين إنها 4-1-4-1 يعني أربعة في خط الظهر و قدامهم (جون أوبي ميكيل John Obi Mikel) كلاعب إرتكاز و قدامه 4 لاعيبة خط نص مهاجمين .. اللي كان بيحصل في الملعب إن تشيلسي عنده إتنين قلوب دفاع اللي هم (جون تيري John Terry) و (بيرانيسلاف إيفانوفيتش Branislav Ivanovic) و إتنين باكات اللي هم (أشلي كول) و (جوزيه بوسينجوا Jose Bosingwa) .. بس (ميكيل) كان بيسقط بين (تيري) و بين (أيفانوفيتش) عشان يبقي ليبرو لما الكورة تتقطع و يتقدم يبقي لاعب إرتكاز لما الكرة تبقي معاهم و ده نفس الدور اللي كان (جيلبيرتو سيلفا Gilberto Silva) بيعمله مع منتخب البرازيل لما خدوا كأس العالم 2002 .. لما الخطة دي إتفهمت الفرق بقت بتضغط أوي علي الوينجين (كول) و (بوسينجوا) و طبيعي إن (ميكيل) بيسيب خط النص و يسقط ورا كليبرو فالفرق الثانية بتمسك خط النص من تشيلسي .. فكر (ساري) ميفرقش كتير عن فكر (سكولاري) .. (جورجينو) هو المحبس اللي بيتحكم في رتم اللعب و ده نفس الدور اللي كان بيعمله مع (ساري) في نابولي بس لما الفرق التانية بدأت تلعب عليه فده خلي (ايدن هازارد Eden Hazard) محبوس لإن الكرة مبقتش تجيله و مشاكل تشيلسي بدأت تبان.
المشكلة في رأيي إن فيه ناس مقتنعة إن اللي بيحصل دلوقتي إن فيه جيل جديد من المديرين الفنيين زي ما تقول كده عملوا اللي مبيتعملش و جم بفكر محدش فكر فيه قبل كده .. جيل زي (بيب جوارديولا) و (ساري) و (بوتشتينو) و (توماس توخيل Thomas Tushel) .. بس مع كامل إحترامي للناس اللي بتعشق (بيب جوارديولا) و اللي شايفين إنه عمل اللي مبيتعملش لما بدأ يعلم حراس المرمي بتوعه إنهم يباصوا الكرة للمدافعين عشان يبدأوا الهجمة و ميطفشوش الكرة لقدام و إنه إزاي مشي (جيمس هارت James Hart) واحد من أحسن حراس المرمي في تاريخ إنجلترا عشان مبيعرفش يمرر الكرة بس الحقيقة إن اللي عمله (جوارديولا) هو هو اللي عمله واحد إسمه (مالكوم أليسون Malcom Allison) كان شغال مدرب حراس مرمي و من 50 سنة بدأ يعلم الحراس بتوعه إنهم يمرروا الكرة للمدافعين بدل ما يطفشوها برجلهم .. لما (لوكا مودريتش Luka Modric) كسب الBallon d’Or مكسبهاش بفضل توجيهات مدير فني إبن إمبارح زي (زين الدين زيدان) .. لا خالص سوري في الكلمة يعني .. هو خدها عشان كان فيه مدير فني عجوز إسمه (هاري ريدناب Harry Redknapp) كان بيمرنه في توتنهام و هو اللي علمه كل حاجة يعرفها و خلاه (مودريتش) بتاع دلوقتي .. المشكلة إننا تخيلنا إن (ساري) حيجي بمعجزة بس مفتكرناش إننا قلنا كده علي (جوارديولا) لما جه السيتي .. المشكلة اللي فيها (ساري) إنه لو متخيل إن لو إدارة تشيلسي حتصبر عليه يبقي غلطان.
الدوري الإنجليزي هو أقوي دوري في العالم .. فكك من أسامي اللاعيبة بص علي أسامي المدربين اللي بيلعبوا فيه .. (مانويل بيليجريني Manuel Pellegrini) اللي بيدرب ويستهام هو المدير الفني الوحيد من أميركا الجنوبية اللي قدر يكسب الدوري لما كان بيدرب مانشستر سيتي .. (يورجين كلوب Jurgen Klopp) قدر ياخد الدوري الألماني من بين سنان بايرن ميونيخ .. (جوزيه مورينيو) الله يمسيه بالخير بس الرجل ده كسب الدوري في 4 دوريات مختلفة و كسب الChampions League مرتين .. (ماركو سيلفا Marco Silva) اللي بيدرب إيفرتون دلوقتي كسب الدوري اليوناني قبل كده مع أوليمبياكوس .. (بوتشتينو) مدرب ريال مدريد بيحلم يجيبه .. بلاش ده حتي (نونو إسبريتو Nuno Espirito) اللي بيدرب وولفرهامبتون الفرقة اللي لسه صاعدة الموسم ده عمل فرقة تمتعك و إنت بتتفرج عليها .. عايز تفهمني إن مدربين من العيار ده لم يشوفوا ثغرة في طريقة لعب تشيلسي مش حيستغلوها؟ .. و الأهم إن (ساري) مبيعملش أي مناورة في الملعب تحسسني إنه فهم إن المدربين التانيين فهموا طريقة لعبه .. البعيد جبلة مبيفهمش.
المصادر:
- مقالة بعنوان If Sarri-Ball Needs Time, He’s at the Wrong Club. Time is the One Luxury Chelsea Managers Never Get .. لو طريقة لعب (ساري) عايزة وقت فهو في النادي الغلط لإن الوقت هو الحاجة الوحيدة اللي مش بتبقي متاحة لأي حد يدرب تشيلسي .. نشرت في جريدة The Daily Mail البريطانية وده لينك المقالة الأصلية:
https://www.dailymail.co.uk/sport/football/article-6654813/MARTIN-SAMUEL-Sarri-ball-needs-time-hes-wrong-club.html - مقالة بعنوان Maurizio Sarri Could be Another Luiz Felipe Scolari, not Chelsea’s Pep Guardiola clone .. (ماريسيو ساري) ممكن يكون (لويس فيليبي سكولاري) جديد مش إستنساخ (بيب جوارديولا) في تشيلسي .. نشرت في جريدة The Daily Mail البريطانية وده لينك المقالة الأصلية:
https://www.dailymail.co.uk/sport/football/article-6468873/Sarri-Scolari-not-Chelseas-Guardiola-clone.html
