لينك التسجيل الصوتي للمقالة علي Sound Cloud:
https://soundcloud.com/user-112011687-312727988/a2ad
لو إنت بتتابع الأسلحة الروسي و الصيني ومن الناس اللي حاطط صورة منظومة الدفاع الجوي S-400 تبقي Screensaver علي الكومبيوتر بتاعك وصورة (فلاديمير بوتين) كCover لHome Page بتاعة موبايلك فإنت غالباً سمعت قبل كده إسم Anti-Access/Area Denial أو عدي عليك الإختصار ده A2/AD .. في حالة إن لا و دي أول مرة تسمع فيها الإسم ده فبمنتهي البساطة البتاعة دي عامله زي الواد اللي في فيلم الناظر صلاح الدين اللي كان عمال يزعق مفيش حد حيتعلم هنا مفيش حد حيتعلم هنا .. عشان تفهم يعني إيه A2/AD دي؟ فخلينا ناخد مثال لا علي الصين ولا علي روسيا .. تعالي ناخد مثال علي مصر.
لنفترض إن بكره الصبح أميركا جت تغزو مصر .. بما إننا عارفين إن غالباً الأمريكان حيبقي تحت إيدهم حاملة طائرات في البحر المتوسط و حاملة طائرات أختها في البحر الأحمر و بما إننا عارفين إن حاملات الطائرات مش بتبحر لوحدها إنما بيبقي معاها مولد بيتسمي Strike Group أو مجموعة قتال من مدمرات و فرقاطات و غواصات فإنت أول خطوة محتاج تعملها هي إنك تمنع السفن دي كلها إنها تقرب من السواحل المصرية .. لو السفن دي معرفتش تقرب فبالتالي مش حتقدر تطلع طياراتها عشان تضربنا .. السؤال دلوقتي هو إزاي؟ .. إزاي تمنع أسطول كامل إنه يقرب منك؟ .. هنا يجي دور فكرة A2/AD .. لنفترض إن مصر نشرت كذا بطارية صواريخ بعيدة المعدي علي سواحلنا زي مثلاً عند السلوم في البحر المتوسط و عند حلايب و شلاتين علي البحر الأحمر .. الصواريخ دي لو لقطت أي سفينة تروح تجري عليها تدمرها .. نظرياً إنت تقدر تمنع أسطول كامل من إنه يقرب منك بس دي مجرد فكرة .. المشكلة دايماً حتبقي في التنفيذ .. إزاي ده يحصل؟ .. أنهي صاروخ ده اللي حيعمل كده؟
هنا يجي دور منظومة الصواريخ الروسية باستيون- بي Bastion-P .. دي تبقي بنت عم S-400 .. إذا كانت S-400 إتعملت عشان تعمل حاجة شبه الناموسية اللي كنا بنحطها حول الأطفال وهم نايمين عشان نحميهم من الناموس بس هي بتحمي البلد من الطيارات فمنظومة Bastion-P بتعمل نفس الوظيفة بس ضد السفن .. علي فكرة إسمها عند الروس هو اللي Bastion-P لكن الأمريكان بيسموها SS-C-5 Stooge .. مهم أوي تبقي فاهم هي البتاعة دي بتشتغل إزاي لإن مجرد إنك تفهم ده حيخليك من نفسك تقول هو فكرة A2/AD دي حتنفع و جايبه همها ولا لا؟
لما تلاقيني بقولك بطارية صواريخ Bastion-P فده معناه الأتي:
- 4 عربيات K340P لإطلاق الصواريخ بحيث كل عربية بيتقال عليها 8×8 يعني عربية ب8 عجلات بس 8-Wheel Drive زيها زي عربيات 4×4 كده .. كل عربية فيها طاقم من 3 عساكر و كل عربية فيها صاروخين بس من طراز اسمه P-800 Oniks اللي الصاروخ الواحد طوله 8 متر يعني بتتكلم في 8 صواريخ.
- عشان 8 صواريخ ده رقم قليل فكل بطارية بيبقي فيها 4 عربيات K340P تانيين برده كل عربية فيها صاروخين كإحتياطي أو Backup .. يبقي كده لما اجي أقولك بطارية صواريخ Bastion-P فأنا كده بتكلم عن 16 صاروخ P-800 الأسرع من الصوت المضاد للسفن.
- عربية تحكم في الإطلاق و التوجيه K380P و دي عربية بيتقال عليها 6×6 وفيها طاقم من 4 عساكر .. العربية دي مش لازم تبقي جنب العربيات اللي شايلة الصواريخ إنما ممكن تبقي بعيدة عنهم لمسافة بتوصل 24 كيلومتر.
مش عارف إنت أخدت بالك ولا لا بس أنا مجبتش سيرة الرادار ولا حساسات التوجيه Guiding Sensors اللي بتلقط السفن المعادية .. اللي بيحصل إن بطارية Bastion-P ممكن تعتمد علي كذا حد إنه يقولها السفن المعادية فين؟ .. ممكن تركب معاها منصة رادارات Monolith-B Over the Horizon .. تقدر تخليها تلقط إحداثيات العدو من أقمار صناعية أو طيارات بدون طيار أو طيارات عادية حتي .. لنفترض مثلاً إن طيارة إستطلاع زي Tu-142 لقطت مثلاً حاملة طائرات أميريكية فهي بتدي إحداثيات مكان حاملة الطائرات لبطارية صواريخ Bastion-P بنظام إسمه جلوناس GLONASS وده يبقي النسخة الروسي من نظام GPS .. خلال 5 دقايق بيكون صاروخ P-800 إتضرب علي مكان الإحداثيات .. صاروخ P-800 الواحد تقيل .. الصاروخ وزنه حوالي 3 طن .. فزي ما في عربيتك فيها حاجة إسمها المارش اللي بيدي الموتور أول زقة عشان يشتغل فبرده عشان صاروخ P-800 يطلع بيبقي فيه محرك صاروخي شغال بالوقود الصلب .. بمجرد ما الصاروخ بقي في الجو فتانك الوقود الصلب بيترمي و الصاروخ بيبدأ يطير بالوقود السائل بسرعة بتوصل 2.5 سرعة الصوت.
لكن .. حاملة الطائرات هدف متحرك .. إنت عطيت للصاروخ مكانها من 5 دقايق والله أعلم خلال 5 دقايق دول هي إتحركت بقت فين .. و بعدين هو مش حاملة الطائرات عليها مدافع تحميها من الصواريخ و عليها كمان منظومة دفاع جوي تدافع عنها .. إزاي بقي صاروخ P-800 ده بيقدر يدمرها؟
في بداية الرحلة صاروخ P-800 بيطير علي إرتفاع عالي شوية وده بيديله مدي طيران كبير ما بين 300-336 كيلومتر .. ده لو الهدف كان بعيد .. لو الهدف كان قريب فهو بيقدر يطير علي وش المياه بحيث يبقي بينه و بينها حوالي 4.5 متر بس ده بيقلل أوي من مدي طيرانه بيخليه يبقي 120 كيلومتر بس .. بمجرد ما الصاروخ بيقرب من الهدف بتاعه بينزل يطير علي وش المياه و بيبدأ يشغل الرادار بتاعه .. الرادار بيشتغل علي حاجتين .. أول حاجة هي Passive Radar وده من غير ما ندخل في تفاصيل بيستغل رادار السفن المعادية ضدها .. هو بيلقط إشارة الرادار بتاعة السفن المعادية و بيجري وراه .. ثاني حاجة هي Active Radar عشان يلقط لو فيه صاروخ مضاد للصواريخ إتضرب عليه عشان يوقعه .. كون الصاروخ ده بيطير بضعفين و نص سرعة الصوت بيخلي إحتمالات إن صاروخ تاني يوقعه ضعيفة أوي .. غير كده إنه بيشيل رأس متفجر وزنه حوالي 230 كيلوجرام فتقدر تسبب أضرار كبيرة لأي سفينة.
الروس من ناحيتهم مقتنعين إن تحت إيدهم كنز إسمه Bastion-P بس هي المشكلة إن الكلام كله نظري .. نظرياً اه معاك إن روسيا نشرت 3 بطاريات صواريخ Bastion-P في قاعدة نوفايا زيمليا Novaya Zemlya علي ساحل بحر البلطيق فهم يقدروا فعلياً يمنعوا أي سفينة إنها تخش القطب الشمالي من المحيط الأطلنطي .. إتخضيت؟ .. طب إيه رأيك إن روسيا متخانقة مع اليابان علي شوية جزر إسمهم جزر كوريل Kuril Islands في المحيط الهاديء فلو الروس ركبوا بطاريات Bastion-P دي علي الجزر فهم فعلياً يقدروا يقفلوا الساحل الشرقي الروسي بالضبة و المفتاح و يقدروا يرخموا علي الوجود العسكري الأميريكي في اليابان .. مش بس كده .. الروس فعلياً نشروا بطاريات Bastion-P في شبه جزيرة القرم Crimea ودي الحتة من أوكرانيا اللي روسيا خدتها وضع يد سنة 2014 لو تفتكر و قبل كده ناشرين 3 بطاريات في مدينة انابا Anapa علي ساحل البحر الأسود .. فعلياً الصواريخ دي تقدر تضرب أي سفينة تهوب من البحر الأسود و كمان نظرياً تقدر تقفل مضيق البوسفور .. ال3 مواقع دول اللي هم ساحل روسيا علي بحر البطليق و جزر كوريل و شبه جزيرة القرم لو إتحط عليهم بطاريات صواريخ Bastion-P فروسيا نظرياً و حط تحت نظرياً دي كذا خط تقدر تحمي نفسها من أي محاولة للأمريكان إنهم يقربوا منها بأسطولهم.
علي الناحية الثانية فيه ناس عندها مشكلتين مش بس مع بطاريات Bastion-P إنما مع فكرة A2/AD دي كلها و المشكلتين دول كالأتي:
- اللي أهم من الصاروخ هو الرادار و شبكة الحساسات Sensors اللي معاه .. يا فرحتي عندك صاروخ مداه الاف الكيلومترات بس الرادار بتاعه أعور مش بيشوف قدامه .. العيب الرهيب في بطاريات Bastian-P هي إعتمادها بشكل كلي علي حد تاني إنه ينشن علي الهدف اللي هي المفروض تدمره سواء بقي الحد ده كان رادار أو طيارة إستطلاع أو حتي قمر صناعي.
- مش معني إن عندك بطارية صواريخ تقدر تدمرلها كام سفينة إنك تبالغ في قدرتها و تقول إنها تقدر تحميك من أسطول كامل .. انت ممكن ال16 صاروخ P-800 اللي انت فرحان بيهم يروحوا في تدمير مدمرة واحدة ضمن أسطول أميريكي كامل .. طب بمجرد ما الصواريخ خلصت ما انت كده كأنك معملتش حاجة.
في الأخر انت فعلياً متقدرش تحكم علي إن A2/AD دي فكرة ناجحة أو لا لسبب بسيط جداً هي إنها متجربتش بحق و حقيقي .. هي إتجربت في Simulations أو محاكاة وعلي حسب اللي بيعمل Simulations دي بيطلع نتايج وكلهم عكس بعض .. يعني مثلاً .. يوم 7 مارس 2019 إتنشر تقرير من مؤسسة راند Rand Corporation لنتيجة Simulation لو الصين هاجمت تايوان ولو روسيا هاجمت دول بحر البلطيق اللي هم فنلندا و السويد و الدانمرك و النرويج وبقي مطلوب من أميركا إنها تصد الهجومين دول .. في Simulation دي سواء الصين أو روسيا إعتمدوا علي فكرة A2/AD بإنهم عن طريق صواريخ بعيدة المدي بقوا يصطادوا السفن و حاملات الطائرات الأميريكية زي الدبان .. التقرير بتاع مؤسسة راند ده خلص علي إن فكرة A2/AD دي حتخلق فقاعة أو Bubble بتحمي السواحل الصينية و الروسية ضد أي محاولة لأميركا إنها تضربهم .. قبل ما تقتنع بكلام مؤسسة Rand إستني تسمع الوش التاني من الشريط.
بعديها بكام يوم طلع تقرير من مركز أبحاث عسكري سويدي إسمه FOI و التقرير إسمه خرم الفقاعة أو Bursting the Bubble و التقرير ده قال نفس النقطتين اللي انا ذكرتهم كمشاكل لبطارية صواريخ Bastion-P .. مش معني إن عندك صاروخ جامد إن الحساسات و أنظمة الرادار اللي بتوجهه هي كمان جامدة .. وهل انت متخيل يعني إن حاملة الطائرات مش حتعرف تحمي نفسها؟ وده معناه إنك محتاج يبقي عندك سرب جراد من الصواريخ اللي يتضربوا علي الأسطول الأميريكي عشان تقدر تقول بحق ربنا يعني إن A2/AD دي حتجيب نتيجة .. علي فكرة قيادة سلاح البحرية الأميريكية مقتنعة بالرأي ده جداً لدرجة إن بداية من 2016 وهم فرضوا حظر علي إستخدام كلمة A2/AD أصلاً .. فتاني .. أيا كان رأيك في فكرة A2/AD فدايما إفتكر إن الكلام ده نظري .. ساعة الجد الله أعلم إيه اللي ممكن يحصل.
المصادر:
- مقالة بعنوان Sunk: How Russia’s Mobile Anti-Ship Bastion-P Missiles could Wreck Any Warship نشرت في مجلة The National Interest وده لينك المقالة الأصلية:
https://nationalinterest.org/blog/buzz/sunk-how-russias-mobile-anti-ship-bastion-p-missiles-could-wreck-any-warship-134182 - مقالة بعنوان A2/AD: The Phrase that Terrifies the U.S. Military (and China and Russia Love it) نشرت في مجلة The National Interest وده لينك المقالة الأصلية:
https://nationalinterest.org/blog/buzz/a2ad-phrase-terrifies-us-military-and-china-and-russia-love-it-51597
