بصوا أنا شخصياً شايف إن مشروع طيارة F-35 ده إتدفع فيه فلوس أوفر علي الفاضي .. أنا شايف و ده رأيي الشخصي إنها كطيارة متستاهلش الشو الإعلامي اللي إتعمل علي حسها و لا حتي شايف إن ثمنها ده مناسب ليها .. و طبعاً فيه ناس شايفة عكس رأيي و ده حقهم و يبقي الفيصل بيني و بين أي حد شايف إن انا غلطان إن يطلع قدام الناس أي حد من أي دولة أيا كانت هي مين يطير بF-35 و يدخل بيها مواجهة جوية إياكش حتي ضد طيارة ورق من اللي بنطيرها علي البحر في الصيف و يوقعها و يمكن عشان كلنا مستنيين أي خبر زي ده فإنت لا تتخيل حجم الحماس و الإهتمام اللي خده خبر إن طيارات إسرائيلي ضربت أهداف في سوريا تابعة لإيران يوم 9 مايو 2018 .. وقتها إتقال إن أكيد الطيارات الإسرائيلي اللي عملت الغارة دي طيارات F-35I Adir اللي إستلمتها إسرائيل من أميركا أصل إزاي يعني طيارات إسرائيلي تضرب هدف فوق سوريا و الدفاع الجوي السوري ميوقعهاش إلا إذا كانت طيارات F-35 من اللي ليها القدرة علي التخفي علي الرادارات؟ .. كده الناس اللي فرحانة بالطيارة دي واحد و أنا صفر.
فضلنا كده لحد ما في يوم 22 مايو 2019 قائد سلاح الجو الإسرائيلي (أميكام نوركين Amikam Norkin) طلع قال أبسطوا يا جماعة إسرائيل هي أول بلد في العالم تستخدم F-35 في عمليات قتالية علي جبهتين مختلفتين و هو في المؤتمر الصحفي شال صورة لطيارة F-35 إسرائيلي و هي طايرة سالانسيه فوق العاصمة اللبنانية بيروت .. طبعاً الناس سألته طب الغارة بتاعه يوم 9 مايو دي معملتهاش طيارات F-35؟ رد قال للصحفيين أنا يا بنتي و التوراة ما حصل .. دي مكنتش الصدمة الأولي للصحفيين .. الصدمة التانية لما فهموا إنك لما تصورلي طيارة F-35 و الطيار بتاعها بيخمس فوق بيروت ده مش معناه إن الطيارة دي فشيخة زي ما الأمريكان بيقولوا و ده اللي أنا ححاول أتكلم عنه النهاردة .. هل إن إسرائيل بقي عندها F-35 يخلينا نترعب كل ما نسمع صوت طيارة في السما؟
مبدأياً كده الطيارة دي من تصنيع شركة أمريكاني إسمها لوكهيد مارتن Lockheed Martin و الشركة دي قالت من بدري إن يا جدعان أنا حعمل الطيارة دي ب3 نماذج اللي هم F-35A و دي طيارة تقليدية عادية جداً زيها زي أي طيارة بتخدم في سلاح الجو المصري و النموذج ده حتستلمه القوات الجوية الأميريكية .. نموذج تاني إسمه F-35B و ده حيستلمه سلاح مشاة البحرية الأمريكاني و حتشتريه اليابان و بريطانيا و ده بيقدر يطير عمودي زيه زي الطيارة الهليكوبتر بالضبط .. نموذج تالت إسمه F-35C و ده حتستلمه البحرية الأمريكيه و ده اللي حيشتغل من علي متن حاملات الطائرات .. من بدري أهو بنقول متجيش دولة تقولي معلش أنا عايزة شوية تعديلات مخصوص علي الطيارات اللي أنا حستلمها عشان ليا إحتياجات خاصة .. كندا كانت ناوية تشتري مننا طيارات F-35 و تزود عليها باراشوت إضافي عشان الطيارة و هي بتهبط في التلج متجريش كتير و كانوا عايزين يركبوا أجهزه تفويل بنزين في الجو مختلفة و كانوا كمان عايزين يغيروا إسم الطيارة يخلوها CF-35 عشان يعني الC الأولانية دي إختصار كندا و لما قلنالهم إحنا مش جايين نحقق حلامكوا هنا خدوا بعضهم و مشيو .. كلمة Lockheed Martin مشت علي الكل .. مفيش دولة جت طلبت إنها تعمل تعديلات مخصوص علي الطيارات F-35 بتاعتها .. إلا إسرائيل.
خناقة لرب السما بين Lockheed Martin و وزارة الدفاع الأميريكية بسبب إسرائيل .. منطق الشركة إن و الله فيه دول حاطه فلوس في مشروع F-35 بس إحنا رفضنا نديلهم نسخ مخصوص منها عشان ده معناه إن فيه خطوط إنتاج حتتعمل مخصوص عشان قطع الغيار و ده معناه إن السعر حيزيد و هو أساساً عالي لوحده و إحنا المصانع بتاعتنا مش قادرة تنتج قطع غيار كافية لكم الطلبات اللي جيالنا .. لو إسرائيل عايزه تركب أسلحة معينة علي الطيارة من عينينا الإتنين و مش لوحدها فيه دول كتير زي النرويج و بريطانيا كانت طالبة إن الطيارات اللي هي حتستلمها تقدر تشيل صواريخ معينة من تصنيع البلدين و قلنالهم عادي مش عيب .. وزارة الدفاع من ناحيتها بتقول والله ما إحنا السبب ده هو (باراك أوباما) اللي حب يعمل واجب مع إسرائيل و عمل تعديلات في برنامج المعونة العسكرية بتاعها و اللي لما تشوف دور الجدعنة اللي عمله (أوباما) مع إسرائيل متقدرش غير إنك تسأل نفسك هو الإسرائيليين ماسكين عليك ذلة ولا حاجة.
بص يا سيدي .. مبدأياً كده إسرائيل حتشتري 50 طيارة F-35 .. حلو .. أجزاء من شاشة العرض اللي حتبقي في خوذة الطيار و حتت من الجناح حتتصنع في إسرائيل بس خطوط الإنتاج و المكن و المرتبات مش إسرائيل اللي حتدفع ثمنها إنما أميركا هي اللي حتتحمل التكاليف دي .. مش كده و بس .. الصيانة زي تغيير الزيت و الفلاتر اللي هي الصيانات الدورية للطيارات F-35 اللي حتستلمها إسرائيل مش حيقوم بيها فنيين و مهندسين من شركة Lockheed Martin و إسرائيل هي اللي حتتحمل تكاليف سفرهم و أكلهم و شربهم .. لا خالص .. اللي حيحصل إن الشركة حتبعت ناس تروح تمرن المهندسين و الفنيين الإسرائيليين عشان يبقوا هم اللي يعملوا الصيانة دي في مصانع و ورش شركة صناعات الطيران الإسرائيلية Israeli Aeronautics Industries و دي تبقي زي ما تقول كده النسخة الإسرائيلي من الهيئة العربية للتصنيع .. السؤال دلوقتي .. عمرك شفت دلع أكتر من كده؟
إسرائيل إستلمت أول 6 طيارات من الخمسين بتوعها يوم 6 ديسمبر 2017 عشان يبقوا بداية ما يسمي السرب 140 النسور الذهبية و دول حيبقي مقرهم قاعدة نيفاتيم الجوية في بئر السبع .. في 2018 إستلمت إسرائيل 6 طيارات كمان فكده بقي عندها 12 طيارة ..الهدف إن يبقي الإسرائيليين عندهم سربين كل واحد فيه 25 طيارة و لما الخمسين طيارة يوصلوا فمن حق إسرائيل إنها تطلب 25 طيارة كمان عشان يبقي عندها سرب تالت حيبقي مقره في حتة تانية غير نيفاتيم بس محدش عارف ولا حد قرر حيبقي فين .. أول 50 طيارة إسرائيل حتدفع فيهم ما بين 110 و 125 مليون دولار للطيارة الواحدة و ده رقم عالي أوي بس متوقع إن الرقم ده يقل خلال السنين اللي جايين بحيث يوصل 85 مليون دولار للطيارة .. أول 19 طيارة من الخمسين حيبقوا نسخة F-35A و دي النسخة العادية خالص و التقليدية بس ال31 طيارة اللي بعد كده حيبقوا النموذج المعمول مخصوص علي حسب طلبات إسرائيل و حيتسمي F-35I Adir و كلمة Adir دي كلمة عبري معناها العظيمة .. بس أنا حابب أوريك إن المشكلة كلها في Operating System بتاع الطيارة و خليني أفهمك قصدي.
لنفترض إنك شغال في شركة و كل أجهزة الكومبيوتر اللي في الشركه شغالة علي Windows 10 .. دلوقتي Windows 10 ده من تصنيع شركة مايكروسوفت الأمريكاني و دي شركة شغال فيها مهندسين بياخدوا فلوس عشان يكتبوا برنامج كومبيوتر طويل عريض عشان في الأخر حضرتك لما تجيب إسطوانة Windows متكركة تشغلها علي الكومبيوتر بتاعك .. شركة مايكروسوفت مش من مصلحتها إنها تعمل زي Google كده لما خلت سر الصنعة بتاع Android Operating System مفتوح للكل يقدر أي حد ياخده يعدل عليه و يطوره أو زي ما بتوع البرمجة بيسموا الحكاية دي Open Source Operating System .. نفس الكلام مع Lockheed Martin .. هي عامله Operating System للكومبيوتر بتاع F-35 .. حضرتك بتشتري الطيارة بالويندوز بتاعها و مش حتعرف تلعب في الويندوز ده عشان تعدل فيه .. لحد هنا حلو.
المشكلة إن إسرائيل عاملة الويندوز بتاعها اللي بيركب علي كل الطيارات بتاعتها و إسمه C4 و دي إختصار Command, Control, Communication and Controlling بحيث كده طيارات F-35 اللي حتستلمها إسرائيل حينزل عليها زي ما بنقول كده إتنين ونيدوز .. طب هم حيستفادوا إيه؟ .. الإسرائيليين مجانين بفكرة إن حيجي اليوم و أنظمة الدفاع الجوي تقدر تلقط طيارات Stealth زي F-35 و عشان كده هم عايزين يحطوا أجهزة تشويش علي الرادار تتركب علي جسم الطيارة من بره و عشان الأجهزة دي تتعرف من كومبيوتر الطيارة لازم يبقي ليهم تحكم في الOperating System بتاع الطيارة .. نفس فكره كده لما تشتري كارتة شاشة أو فيجا جديدة للكومبيوتر بتاعك و تقوم عامل Install لإسطوانة التعريف بتاعتها .. عشان كده طيارات F-35I Adir بتاعتهم كل اللي فيها مختلف إن حيتركب عليها إتنين Operating System واحد هو C4 و ده حيبقي الأساسي و الثاني ملوش لازمة و يبقي بتاع شركة Lockheed Martin.
تاريخ إسرائيل مع الطيارات الأمريكاني طويل شوية و مليان بقصص شبه إنك تجيب صنايعي يعملك حاجة في الشقة فيقولك هو مين الحمار اللي كان شغال في الشقة دي قبلي و يكسرلك في الحيطان عشان الباشمهندس مش عاجبه الشغل و عايز يبدأ علي نظافة .. عندك طيارة زي F-15 واحدة من أكتر طيارات الجيل الرابع إحتراماً لما جم الإسرائيليين يشتروها قالك معلش إنت تغيرلي فيها التسليح و أنظمة الملاحة و التوجيه و الإتصالات و مش كده و بس .. لا أنا عايزاكوا تغيرولي إسمها يبقي F-15I Ra’am يعني الرعد بالعبري .. وقتها فيه ناس إستغربت هو إيه اللي يخلي الأمريكان يوافقوا علي الكلام ده؟ .. الحقيقة فيه نظريات كتير بس لما جت سنة 1981 و الإسرائيليين خدوا طيارات F-15I Ra’am دي و ضربوا بيها المفاعل النووي العراقي فجأة سيرة الطيارة F-15 بقت علي كل لسان .. دول كتير من ضمنها السعودية بعد ما شافت الغارة دي راحت لأميركا و إشترت منها الطيارات دي بفلوس.
واحدة من أكتر الحاجات اللي بتتقال لما تيجي تتكلم عن F-35I Adir هو إن الطيارات دي إسرائيل خدتها عشان تضرب بيها إيران .. و علي فكرة من فترة قريبة إتقال إن إسرائيل نفذت غارة جوية جوه العراق إستهدفت منشأت تابعة للحرس الثوري الإيراني بس لحد دلوقتي محدش من إسرائيل نفي أو أكد هل فعلاً طيارات F-35 أستخدمت في الغارة دي ولا إسرائيل إستخدمت طيارات F-15 زي ما حصل لما ضربت المفاعل النووي العراقي .. لكن .. حط تحت لكن دي شوية خطوط الله يرضي عليك .. واحدة من أهم عيوب الطيارة F-35 هي إن مدي طيرانها قليل يعني لما بتفول تنك البنزين بتاعها مش بتعرف تطير مسافات طويلة و بتفتح بقها عايزة تاكل .. عادي هي لا أول و لا أخر طيارة إستهلاك البنزين فيها حيبقي عالي و عشان كده إخترعوا الطيارات اللي بتفول بنزين في الجو بسيطة يعني .. المشكلة إن عشان إسرائيل تضرب إيران فهي محتاجة الطيارات بتاعتها تقطع الأردن و سوريا و العراق بالعرض قبل ما توصل للمجال الجوي الإيراني أو إنها تخترق المجال الجوي التركي .. و في الحالتين لازم الطيارة يبقي فيها بنزين يكفيها رايح جاي لإن مينفعش إسرائيل تفول طياراتها بنزين فوق سماء سوريا مثلاً .. ده معناه إن عشان إسرائيل تضرب إيران لازم تستخدم طيارة مدي طيرانها كبير سواء بقي بتتكلم عن F-15 أو F-16 .. طب و الحل؟
الحل اللي الإسرائيليين بيتكلموا عنه إن شركة البيت Elbit و دي شركة إسرائيلي صنعت تنكين بنزين بيتركبوا تحت جناح الطيارة بيقدروا يشيلوا 425 جالون بنزين بس ده معناه إن كده إنت حتضحي بقدرة الطيارة إنها تتخفي من الرادار .. إلا إذا .. انت خليت الطيار يستخدم التانكات دي خلال رحلته من إسرائيل لحد إيران مثلاً و بمجرد ما يقرب من المجال الجوي الإيراني يرمي التانكات بالمثبتتات بتاعتها في الجناح عشان يخلي طيارته Stealth .. بس ده معناه برده إن الدفاع الجوي لعلي الأقل 3 دول حيقدر يلقط الطيارات الإسرائيلي و هي فوقه .. تاني .. قد أكون غلطان .. قد أكون بهبد .. بس يمكن الأيام هي اللي حتورينا إيه الصح و إيه الغلط و هي إن الطيارات دي أوفر و مبالغ فيها و ملهاش أي ستين لازمة.
المصدر:
مقالة بعنوان Has Israel Managed to Make the F-35 Even More Deadlier? .. نشرت في مجلة Defense Maven و ده لينك المقالة الأصلية:
https://defensemaven.io/warriormaven/air/has-israel-managed-to-make-the-f-35-even-more-lethal-KLV5gguq4UK6xs1u29tgqg/
