لينك التسجيل الصوتي علي ساوند كلاود:
https://on.soundcloud.com/GXqp8
اللي حنتكلم عنه النهاردة هو خبر إتقال علي السوشيال ميديا و خليني أقولك زتونة الخبر في الأول كده إن مصر بتتفاوض حالياً مع كوريا الجنوبية عشان إحنا مش بس نشتري إنما ناخد رخصة تصنيع الدبابة الكورية الجنوبية كيه-2 بلاك بانثر K-2 Black Panther .. لحد هنا الخبر خلص .. الحقيقة إن الموضوع ده لو إنت مش قاري شوية في حتة الأسلحة و التكنولوجيا العسكرية فإنت غالباً رد فعلك علي الخبر ده حتلاقيه ما بين أقصي اليمين اللي هو تقول لنفسك هو إحنا لاقيين ناكل عشان نجيب سلاح و ما بين أقصي الشمال اللي هو تحيا مصر 3 مرات و ده منطقي .. الناس العادية عموماً بتبص للأمور من خلال النظارة اللي هي بتشوف بيها الدنيا .. لكن .. لو إنت من الناس اللي عندها شوية معلومات و مهتمة حبة بالأسلحة و التكنولوجيا العسكرية فإنت غالباً حتبدأ تهرش في شعرك لما تسمع الخبر ده .. مش لإنك معترض .. لإنك عايز تفهم .. بإختصار إنت مخك حيموت و يفهم الإجابة عن السؤال بتاع ليه؟ .. ليه الناس كلها طايرة بالدبابة K-2 Black Panther؟ .. و الأهم ليه مصر أصلاً عايزه تجيبها؟ .. أومال الدبابات الإبرامز Abrams اللي مترمية في المخازن دي بتهبب إيه؟ .. واضح من المقدمة إن الموضوع فيه طبقات كتير و نقط كتير محتاجة تتشرح و عشان كده المقالة دي حتحاول تجاوب علي كذا سؤال:
- هل الدبابة K-2 Black Panther جامدة زحليقة أوي كده؟
- هل فيه ناس تانية عايزه الدبابة دي ولا إحنا بس؟
- ليه مصر فكرت تروح تجيب الدبابة دي بالذات؟
خلينا نبدأ بالسؤال الأول و نحاول نفهم إيه هي مراحل التطور الطبيعي للدبابة دي .. كان يا مكان كان فيه حرب محدش بيتكلم عنها كتير إسمها الحرب الكورية و إحنا هنا إتكلمنا عنها كتير بس مفيش مانع نصنفر شوية الصدأ اللي إتجمعوا حولين الموضوع ده لإن زي ما قلت من شوية محدش بيتكلم عنه كتير .. خلال الحرب العالمية الثانية الإمبراطورية اليابانية إحتلت شبه الجزيرة الكورية و لما الحرب خلصت كوريا حصلها نفس اللي حصل في ألمانيا بالضبط اللي هي إتقسمت نصين .. بدل ما ألمانيا إتقسمت نص شرقي كان تحت إيد الإتحاد السوفيتي و نص غربي كان تحت إيد الأمريكان فشبه الجزيرة الكورية إتقسمت نص شمالي مسيطر عليه السوفييت و نص جنوبي بيسيطر عليه الأمريكان .. سنة 1950 الحرب الكورية بدأت لما النص الشمالي المدعوم من الإتحاد السوفيتي بدأ عملية إجتياح بري للنص الجنوبي .. الأمريكان راحوا للأمم المتحدة و دي كانت أول مرة إن الأمم المتحدة توافق علي إن الدول الأعضاء تشارك في عملية عسكرية مشتركة لإجبار كوريا الشمالية إنها تنسحب من كوريا الجنوبية.
الحرب الكورية إستمرت من سنة 1950 لحد سنة 1953 و خلال ال3 سنين دول الحرب عدت علي 3 مراحل .. المرحلة الأولي إن الكوريين الشماليين كانوا بيدوسوا علي وش الكوريين الجنوبيين قبل ما الأمريكان يتدخلوا عسكرياً .. المرحلة الثانية لما الأمريكان إتدخلوا و ساعتها كانوا بيكنسوا الكوريين الشماليين من قدامهم لحد ما الأمريكان دخلوا فعلياً العاصمة الكورية الشمالية بيونج يانج .. المرحلة الثالثة لما الصين تدخلت عسكرياً و أجبرت الأمريكان إنهم ينسحبوا تاني بره كوريا الشمالية .. خلال ال3 سنين دول و خلال الخبط و الرزع ده كله كانت الدبابة الرئيسية اللي بتخدم مع القوات الأميريكية كانت دبابة علي الله حكايتها إسمها M24 Chaffee اللي كانت كل ما تخش مواجهة ضد الدبابات T-35 السوفيتية كانت بتاخد علي قفاها و مكنش بيلحقها غير التدخل الجوي من الطيارات الأمريكاني .. المهم .. لما الحرب خلصت كوريا الجنوبية طلبت من أميركا إنها تشتري منها دبابات إلي حد ما يعني تقدر تقف علي رجلها قصاد الدبابات السوفيتية في حالة إن الحرب قامت تاني .. فضلت المفاوضات بين الكوريين الجنوبيين و الأمريكان مش جايبة نتيجة .. الخمسينات عدت .. الستينات مشيت .. جت السبعينات.
في السبعينات كوريا الشمالية إستلمت من الإتحاد السوفيتي دبابات T-62 و دي دبابة المدفع بتاعها وقتها كان جاحد عيار 115 مليمتر قصاد إن أحسن دبابة تحت إيد القوات المسلحة الكورية الجنوبية كانت الأمريكاني M-48 Patton أم مدفع عيار 90 مليمتر بس .. الكوريين الجنوبيين كان فاضلهم شوية و يبوسوا رجل الأمريكان يدوهم دبابات أحسن شوية و الأمريكان رافضين .. هنا الكوريين الجنوبيين قالوا لنفسهم هو إحنا يعني ناقصين إيد ولا رجل .. ما نعمل إحنا الدبابات بتاعتنا.
في أواخر السبعينات كان الأمريكان بدأوا شغلهم علي مشروع XM1 اللي بعد كده إتولدت منه الدبابة M1 Abrams .. في الثمانينات الكوريين الجنوبيين خدوا التصميمات الأولانية خالص بتاعة المشروع بعد زن رهيب فوق ودن الأمريكان علي أساس إن الأمريكان قالوا لنفسهم إيه المشكلة يعني لما ندي الكوريين الجنوبيين شوية لوح قال يعني هم عندهم العلم ولا الخبرة ولا حتي الإصرار اللي يخليهم يعملوا حاجة من شوية الورق ده بس محدش كان متخيل ولا واثق إن الكوريين الجنوبيين حيعملوا من شوية ورق أول دبابة كورية جنوبية تصنيع محلي و سموها K-1 .. زيها زي النسخ الأولانية خالص من الإبرامز فهي إتعملت بمدفع أساسي عيار 105 مليمتر بس هي كأبعاد كانت أصغر من الإبرامز لدرجة إن العساكر الأمريكان اللي كانوا بيخدموا في كوريا الجنوبية لما شافوها قالوا عليها إنها البيبي إبرامز .. فضلت المشكلة بتاعة إن الكوريين عايزين يعملوا حاجة بتاعتهم .. بمعني .. صحيح إن K-1 بالورقة و القلم تدوس علي وش أجدعها دبابة سوفيتية تحت إيد كوريا الشمالية بس في الأخر هي دبابة تقليد من الإبرامز .. دبابة 80% من مكوناتها بتيجي من بره كوريا الجنوبية .. صحيح برده إن بداية من أواخر الثمانينات و الدبابة دي دخلت الخدمة في القوات المسلحة الكورية الجنوبية و لسه لحد دلوقتي بيطوروا فيها .. عايز أقولك إن سنة 2013 عملوا أخر تطوير ليها سموه K1A2 بس فضلت المشكلة الأساسية .. دي دبابة لو فتحت الكابوت بتاعها مش حتلاقي فيها حاجة ينفع يتقال عليها صنع في كوريا الجنوبية.
علي فكرة حتة الحس الوطني دي مهمة بس مش هي الأساس .. يعني متتخيلش إن الكوريين الجنوبيين قالوا إن لازم يعملوا دبابة تصنيع محلي لمجرد إنهم يمشوا في الشارع يبقوا فرحانين بنفسهم و الناس تقول اللي عملوا دبابة راحوا اللي عملوا دبابة جم .. فيه حاجات تانية بتخش في الحسبة .. إفرض كوريا الجنوبية حبت تصدرها .. عشان الغالبية العظمي من مكونات الدبابة مش متصنعة في كوريا إنما في أميركا فهم لازم ياخدوا موافقة الأمريكان علي كل صفقة تصدير .. المهم .. شوية و الكوريين الجنوبيين قالوا جه الوقت نعمل النسخة الأحدث شوية و سموها K-2 Black Panther .. الدبابة الجديدة إتصممت علي إيد وكالة التطوير العسكري الكورية الجنوبية اللي هي تقدر تقول عليها النسخة الكوري الجنوبي من الهيئة الهندسية للقوات المسلحة المصرية و اللي صنعها كانت شركة هيونداي روتيم Hyundai Rotem و دي واحدة من الشركات اللي تحت شركة هيونداي موتور جروب Hyundai Motor Group .. بس فيه نقطة متنسهاش .. الدبابة K-2 Black Panther مجتش عشان تحل محل الدبابة K-1 .. لا خالص .. هي جت عشان تكمل النواقص بتاعتها و الإتنين يشتغلوا مع بعض و دي نقطة مهم إنك تكون فاكرها لإنها حتفيدنا بعدين.
المشروع بدأ سنة 1995 .. سنة 2007 كوريا الجنوبية بتعمل الPrototype بتاع الدبابة و سنة 2014 بيبدأ الشغل علي تصنيع أول 100 نسخة منها و علي فكرة الخطوة دي إتأجلت 3 سنين كاملة بسبب مشكلة في الفتيس .. اللي حصل إن كوريا الجنوبية كانت مُصرة إن الدبابة تتعمل كلها بتكنولوجيا محلية و كان المفروض إن شركة S&T Dynamics هي اللي تعمل الفتيس بتاع الدبابة .. 6 مرات الفتيس يتجرب و 6 مرات يحصل فيه مشاكل لحد ما في الأخر كوريا الجنوبية إتفقت مع شركة Renk الألمانية إنها تاخد منها رخصة تصنيع الفتيس بتاعها و ده اللي حيركب علي الدبابة و ده التريند اللي أنا عايزك تبقي واخد بالك منه .. الكوريين الجنوبيين عارفين إن فيه حاجات كتير هم معندهمش الKnow-How بتاعتها و ميعرفوش هي بتتصنع إزاي ولا بتتعمل إزاي .. فهم بيروحوا للناس اللي بتعمل الحتة دي يتفقوا معاهم ياخدوا منهم رخصة التصنيع فكده إنت ضربت عصفورين بحجر .. بقي عندك مهندسين شاطرين في تصنيع و تصميم كل حتة من حتت الدبابة .. الأهم إنك بقيت سيد قرارك .. صدر للي إنت عايز تصدرله براحتك.
أي دبابة في الدنيا عبارة عن 3 حاجات عكس بعض .. درع و مدفع و سرعة .. تصميم الدبابة هندسياً هو حاجة شبه الأغنية اللي بتقول يا كل حاجة و عكسها .. إنت عايز دبابة دروعها قوية .. دروعها قوية يعني وزنها حيزيد .. وزنها حيزيد يعني حتقول لنفسك طب ما كده هي مش حتقدر تشيل ذخيرة كتير عشان نقلل من وزنها .. طب لو قلت لنفسك لا مينفعش لازم تشيل ذخيرة فإنت كده ضحيت بالسرعة و الدبابة بقت عبارة عن جاموسة ماشية في الشارع أي حد يقدر يصطادها .. بمعني أخر .. الدبابات الحديثة لازم يبقي فيها كذا خاصية .. لازم تبقي محمية بدروع قوية بس الدروع دي مش تقيلة .. لازم يبقي فيها مدفع قوي يقدر يعور أي حد .. و لازم تبقي خفيفة بما يكفي إنها تبقي مش حقول غزالة بتجري بس علي الأقل تبقي نمر .. قوي بس سريع.
أنظمة الحماية .. تنفع دبابة باتمان:
لما تشوف إزاي المهندسين الكوريين الجنوبيين حموا الدبابة دي حتحس إن تقريبأ المهندس اللي صممها كان متخيل إن إبنه هو شخصياً كان حيبقي واحد من طاقم الدبابة .. دي دبابة دروعها مصنوعة من مادة مٌخلقة بيتقال عليها Composite Material عشان تحميها من دانات الدبابات التانية .. جنب الدرع المكون من Composite Material حتلاقي دروع عبارة عن عبوات ناسفة بتتركب جنب بعضها عشان تنفجر قبل ما الصاروخ المضاد للدبابات يوصل لجسم الدبابة و النوع ده من الدروع بيسموه Explosive Reactive Armor أو ERA .. لسه إنت رايح فين .. الدبابة متركب فيها نظام حماية من طراز Active Protection System زي اللي الإسرائيليين مركبينه علي دبابات الميركافا بتاعتهم .. و أخيراً الدبابة دي تقدر تعيش وسط ضربة نووية أو كيماوية أو بيولوجية .. اللي هو لو (لوشيوس فوكس Lucius Fox) عملها عشان لما باتمان بليل يركبها مش حيعمل دبابة بالحماية دي كلها.
التسليح .. متفرقش كتير عن الإبرامز الأمريكاني :
السلاح الأساسي اللي بتملكه الدبابة دي يبقي المدفع L/55 عيار 120 مليمتر من تصنيع شركة راينميتال Rheinmetall الألمانية و المدفع ده شركة هيونداي واخدة رخصة تصنيعه محلياً و هي اللي بتصممله و بتصنعه الAutomatic Loader و ده المكنة اللي بشكل أوتوماتيك بتعمر المدفع بحيث بيقدر يضرب ما بين 10-15 دانة في الدقيقة .. المدفع كمان بيقدر يضرب صواريخ تصنيع محلي كوري جنوبي إسمها KSTAM و دي إختصار Korean Smart Top-Attack Munitions و دي علي فكرة شبه الصواريخ اللي بتتضرب من مدفع جافلين Javelin الأمريكاني المضاد للدبابات .. غير المدفع الأساسي فالدبابة K-2 Black Panther فيها مدفع رشاش تقيل عيار 12.7 مليمتر و مدفع رشاش خفيف عيار 7.62 مليمتر .. إذا كان الأمريكان فرحانين أوي بنظام التحكم في ضرب النار Fire Command Control اللي هم حاطينه في الإبرامز فالدبابة K-2 Black Panther فيها نظام ميفرقش كتير عن الأمريكاني .. نقطة بس عايزك تبقي عارفها إن مدفع L/55 ده يبقي أقوي حبتين من مدفع L/44 و ده المدفع المستخدم في كل دبابات الإبرامز الأمريكاني و حتي الدبابة Leopard 2 الألماني.
السرعة .. هي مش غزالة الجري بس حلوة في الطرق الجبلية :
الحاجة المميزة في K-2 Black Panther و كمان لقيتها في الميركافا لما إتكلمنا عنها هي إنهم إتصمموا و إتصنعوا عشان تحقق هدف معين اللي صممها كان عايزه .. بمعني .. شبه الجزيرة الكورية طبيعتها جبلية وعرة مش زي الصحراء هنا في مصر اللي هو مستوي الأرض واحد .. ده معناه إنها دبابة مش بس إتصنعت عشان تجري بسرعة إنما كمان تقدر تمشي في مناطق جبلية يستحيل علي دبابات تانية إنها تهوب ناحيتها .. الموتور بتاعها MTU MB 883 Ka50I و ده موتور ديزل من تصنيع شركة Renk الألمانية و زي ما قلتلك كوريا الجنوبية واخدة رخصة تصنيعه بيقدر يديها 1,500 حصان مستريح بيخلي الدبابة لو ماشية في طريق ممهد تقدر تجري بسرعة حوالي 70 كيلومتر في الساعة .. عارف إن ده رقم مش كبير لو قارنته بالإبرامز بس في نفس الوقت هي بتقدر تجري بسرعة 50 كيلومتر في الساعة في المناطق الجبلية .. طب خد دي كمان .. دي من الدبابات القليلة أوي في السوق اللي متركبلها موتور كامل إحتياطي و هو موتور توربيني زي اللي بيتركب في الإبرامز بيديها 400 حصان و ده في حالة إن الموتور الأساسي باظ و مبقاش ينفع يشتغل ولازم يروح الورشة يتصلح.
حتة إنها دبابة متصممة عشان الطبيعة الجبلية لشبه الجزيرة الكورية خلي الدبابة K-2 Black Panther إتحطلها نظام تعليق أو Suspension System اللي إنت هنا في مصر عارفه بإسم عفشة العربية يعني السوست و المساعدين بتوعها صعب تلاقيه في دبابة تانية .. يعني مثلاً .. لو إنت ماشي في منطقة جبلية بتلاقي المساعدين طلعوا لفوق و رفعوا جسم الدبابة كله عن الجنازير .. ده كده زي ما يكون معاك عربية BMW و تلاقي نفسك حتسوق في حتة مش ممهدة فتتك علي زرار يخلي المساعدين يرفعوا العربية عن الأرض زيها زي الرينو لوجان مثلاً عشان الكارتير ميحكش في الصخر و الحجر و إنت ماشي .. لو الدبابة ماشية علي طريق متسفلت فالمساعدين بينزلوا لتحت عشان الدبابة توطي شوية و ده بيخلي سرعة الدبابة تزيد .. ده يفسرلك ليه الدبابة دي ليها سرعتين علي حسب هي ماشية علي طريق شكله إيه .. مش بس كده .. لو إنت ماشي في طريق منحدر فالمساعدين بتوع الدبابة بيقدروا يميلوا للجنب بحيث الدبابة متتقلبش و في نفس الوقت تقدر تمشي أكنك سايق عربيتك علي عجلتين.
هنا يجي دور السؤال التاني .. هو إحنا بس اللي عايزينها؟ .. مفيش حد تاني قال إنها عاجباه .. الحقيقة فيه .. النرويج مثلاً قواتها المسلحة بتدور دلوقتي علي دبابة جديدة فهم كانوا بيفاضلوا بين الألماني Leopard 2A7 و بين الK-2 Black Panther .. من 2008 الحقيقة و فيه تعاون كبير بين الكوريين الجنوبيين و الأتراك .. الأتراك عاملين دبابة خاصة ليهم إسمها ألتاي Altay من تصنيع شركة أوتوكار Otokar بس ناس كتير متعرفش إن الدبابة التركي دي إتصنعت بنفس التكنولوجيا بتاعة K-2 Black Panther بناء علي عقد بقيمة 540 مليون دولار إتمضي بين Otokar و شركة Hyundai Rotem .. علي فكرة جزء مهم من خوف الناس إنها تقرب منها هو سعرها .. حالياً الدبابة دي هي أغلي دبابة في السوق و الواحدة منها ثمنها 8.5 مليون دولار .. حتة السعر دي كانت السبب في إن سلطنة عمان رجعت في كلامها إنها تشتري الدبابات حتي بعد ما شركة هيونداي روتيم عملت دبابة مخصوص إسمها K-2 Oman إتزودت فيها شوية حاجات عشان تشتغل في البيئة الصحراوية.
هنا يجي دور الكلام عن مصر .. مبدأياً الخبر بتاع إننا بنفكر ناخد رخصة تصنيع الدبابة دي إتقال بعد مؤتمر السلاح 2021 EDEX اللي بيتعمل في القاهرة و هنا لازم نتكلم عن الحتة اللي مخلية ناس كتير من اللي بتفهم في السلاح و مهتمة بيه بتهرش في شعرها بسببه .. ليه؟ .. ليه قررنا أصلاً نعمل كده؟ .. المعلومة اللي عند ناس كتير إن العمود الفقري لسلاح المدرعات المصري هو الدبابات الإبرامز الأمريكاني و أخص بالذكر ال1,360 دبابة M1A1 اللي عندنا بس في نفس الوقت فيه معلومة ناس كتير بتنساها إن مصر كمان عندها دبابات روسي قديمة حبتين طراز T-55 و T-62 و الحقيقة إحنا عندنا عدد محترم منهم .. 1,100 دبابة عشان أبقي دقيق .. عشان بس تبقي معايا في الصورة .. في الثمانينات كان بيتقال علي الدبابات دي إنها كويسة .. إنت متخيل قد إيه هم قدموا؟ .. كان فيه كلام إن مصر تروح لروسيا تشتري منها 500 دبابة T-90 اللي هي النسخة الأحدث عشان تحل محل الدبابات القديمة دي عملاً بالمنطق بتاع بما إننا حنطلع دبابات روسي بره الخدمة يبقي نحل محلها بدبابات روسي برده بس لأسباب كتير الحقيقة الإتفاق ممشيش.
فكرة إنك بدل ما تشتري سلاح تاخد رخصة تصنيعه أنا شايف إنها كويسة جداً و زي ما قللت بتخليك تضرب عصفورين بحجر واحد .. بتخلي عندك الكوادر و الكفاءات من مهندسين و فنيين اللي بيبقوا عارفين كل صغيرة و كبيرة عن السلاح .. الأهم إنها بتديك الحرية إنك تبيع للي عايز تبيعله من غير ما تستني إذن الأمريكان أو حتي الروس.
المصادر:
- مقالة بعنوان K2: The ‘Black Panther’ Might Be The Best Tank on Earth نشرت في موقع 1945 و ده لينك المقالة الأصلية:
https://www.19fortyfive.com/2022/04/k2-the-black-panther-might-be-the-best-tank-on-earth/ - مقالة بعنوان South Korea Moves Forward With Production of 106 New Main Battle Tanks نشرت في جريدة The Diplomat و ده لينك المقالة الأصلية:
https://thediplomat.com/2018/02/south-korea-moves-forward-with-production-of-106-new-main-battle-tanks/ - مقالة بعنوان World’s ‘Most Expensive’ Main Battle Tank: Meet K2 Black Panther-The Ultimate War Machine-That Can ‘Float on Water’ نشرت في جريدة The Eurasian Times و ده لينك المقالة الأصلية:
https://eurasiantimes.com/worlds-most-expensive-main-battle-tank-meet-k2-black-panther/ - مقالة بعنوان Although it has Abrams, Egypt wants to produce K2 Black Panther tanks نشرت في موقع Bulgarian Military و ده لينك المقالة الأصلية:
https://bulgarianmilitary.com/2021/12/01/although-it-has-abrams-egypt-wants-to-produce-k2-black-panther-tanks/
