الطيارة B-52 Stratofortress .. ترلة طايرة في الجو.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/b-52-stratofortress?si=a9f656d964614f23bc6f2febb9e2fb11

لو إنت ليك واحد صاحبك قالك إنه بيفكر يشتري عربية فإنت قلتله بااااس ليك عندي عربية تحفة عمرك ما حلمت بيها .. فسألك هي موديل سنة كام؟ .. جيت إنت قلتله موديل 1952 والمصنع بطل ينتجها سنة 1962 يعني عربية من أيام الملك (فاروق) ومن أيام (أم كلثوم) الله يرحمهم وأقدم من العربية السيات 127 .. تفتكر حيكون رد فعله معاك إيه؟ .. الحقيقة إن الطيارة اللي عندك في الصورة دي هي اللي أنا بتكلم عنها .. الطيارة دي بتتصنف علي إنها قاذفة أو Bomber وحنفهم يعني إيه قاذفة كمان شوية واسمها بي-52 ستراتوفورتريس B-52 Stratofortress والطيارين الأمريكان طلعوا عليها إسم الدلع باف BUFF ودي إختصار Big Ugly Fat Fucker بس سيبك كمان من اسمها واسم الدلع بتاعها .. الطيارة دي إتصنعت لأول مرة سنة 1952 والمصنع اللي بيصنعها بطل يعملها سنة 1962وده حقيقي .. القوات الجوية الأميريكية معندهاش منها دلوقتي إلا 76 طيارة في الخدمة حالياً .. الطيارة دي في عمر جدك مش أبوك حتي ولسه بتطير وشغالة زي الفل لحد دلوقتي .. أظن بعد المقدمة دي بدأت تفهم إن الB-52 تستحق إننا نتكلم عنها في مقالة لوحدها.

في الخمسينات لما الأمريكان فكروا يصنعوا الB-52 كان فكرهم إنهم يعملوا طيارة بتقدر تشيل قنابل نووية وترميها فوق الإتحاد السوفيتي زي ما إنت تكون واقف في البلكونة وتحدف واحد صاحبك واقف تحت بيتكوا بكيس مياه .. عشان كده إتسمت قاذفة أو Bomber .. في الستينات بعد ما الأمريكان صنعوها إكتشفوا إن المهمة اللي هي إتصنعت عشانها مبقتش تنفع لإن أنظمة الدفاع الجوي السوفيتية بقت متطورة لدرجة إنهم حيوقعوا الB-52 قبل حتي ما تدخل المجال الجوي السوفيتي .. المنطق بيقول إن خلاص المفروض إنهم يوفروا علي نفسهم فلوس تصنيعها وصيانتها ويطلعوها بره الخدمة .. لكن ده محصلش .. الB-52 فضلت في الخدمة وبقت مهمة لدرجة إن القوات الجوية الأميريكية مبقتش متخيلة إنها ممكن متعتمدش عليها تاني .. حضرتك الB-52 شاركت في كل الحروب اللي أميركا دخلتها من ساعة حرب الخليج الثانية سنة 1990 لحد دلوقتي .. أظن السؤال اللي بياكل دماغك دلوقتي هو ليه؟ فيها إيه يعني الطيارة دي عشان الأمريكان يعشقوها بالشكل ده؟ .. ليه قيادة سلاح الجو الأميريكي عامله زي (عمرو دياب) اللي دايب في (دينا الشربيني)؟ هو يعني شايف فيها إيه؟

الحقيقة إن الB-52 فيها ميزتين ملهمش تالت .. الميزة الأولي إنها بتقدر تشيل كم صواريخ وقنابل كبير .. الميزة الثانية إنها بتقدر تشيل الصواريخ والقنابل دي لمسافات بعيدة بحيث إن الطيارة الواحدة بتقدر تطير 13,200 كيلومتر قبل ما تحتاج إنها تتفول بنزين وعلي فكرة هي ليها القدرة إنها تتفول بنزين في الجو زي ما إنت شايف في الصورة .. بإختصار شديد الأمريكان بيتعاملوا مع الB-52 علي إنها ترلة بتشيل قنابل وصواريخ لمسافات بعيدة .. حيطلعلي حد رخم يسألني طب يا سيدي إفرض إن الأمريكان مثلاً عايزين يضربوا مصر فإحنا عندنا منظومة دفاع جوي تقدر توقع الB-52 قبل ما تطير فوق أراضينا .. يعني حتي دلوقتي إنت متقدرش تستخدم الB-52 عشان ترمي علينا كياس مياه من البلكونة  .. في الحالة دي حقولك عندك حق وساعتها الأمريكان بيركبوا عليها صواريخ AGM-86 Air Launched Cruise Missiles ودي صواريخ بعيدة المدي ليها القدرة علي إنها تشيل رؤوس نووية يعني ممكن طيارة B-52 من دول تدمر كل الأهداف الحيوية اللي في مصر من غير ما تكون طايرة فوق المجال الجوي المصري أصلاً.

أنا بس عايزك تمتع عنيك بترسانة الذخيرة اللي الطيارة B-52 بتقدر تشيلها عشان تعرف ليه أنا قلت عليها عاملة زي الترلة وفي صورة عندك لواحدة منهم مفروش قدامها كل الصواريخ والقنابل اللي هي بتقدر تشيلها:

• بتقدر تشيل 12 قنبلة بيتقال عليها JDAM GPS-Guided Bombs ودي قنابل بتترمي علي الهدف وبتتوجه بالGPS .. مش عايز تستخدم GPS أو الأقمار الصناعية فيها مشكلة .. ولا تشغل بالك هي بتقدر تشيل ما بين 4 ل10 قنابل GBU-Laser Guided Bombs ودي قنابل بتتوجه بالليزر .. الميزة إن الترلة دي تقدر تفضل طايرة فوق سماء المعركة مستنيه بس أي حد يقولها إرمي حمولتك علي أي هدف .. صحيح إنت ممكن تخلي طيارة زي F-16 Fighting Falcon تعمل نفس المهمة بس الB-52 بتشيل قنابل أكتر بكتير وبتقدر تطير لوقت أطول .. بفكرك إن سنة 2001 لما أميركا ضربت أفغانستان كانت طيارات B-52 وأختها B-1 بتطلع من أميركا وتعدي المحيط الأطلنطي وتعدي أوروبا وتركيا والعراق عشان ترمي قنابلها فوق أفغانستان وترجع تاني أميركا لإن وقتها أميركا مكنتش لسه ليها قواعد جوية قريبة من أفغانستان مسموح ليها إنها تستخدمها في القصف.
• في حالة إنك شايف إن الهدف اللي حتدمره مش مستاهل ترمي عليه قنبلة موجهة الليزر أو شايف إنك محتاج تعمل حاجة إسمها Carpet Bombing يعني زي ما بنقول كده تنفض الهدف اللي إنت عايز تدمره زي ما الست الوالدة بتنفض السجادة بتاعتكوا في ترويقة العيد الكبير فالB-52 بتقدر تشيل 51 قنبلة عادية حمولة ما بين 5 كيلوجرام و 3 كيلوجرام .. أو تقدر تشيل 40 قنبلة عنقودية Cluster Bomb .. فيه صورة عندك لطيارة B-52 بتعمل Carpet Bombing فوق أفغانستان يعني عماله ترمي في قنابل صغيرة بكميات كبيرة.
• لإن الB-52 بتقدر تطير لمسافات بعيدة فهي بتستخدم أحياناً للإستطلاع بس يمكن مشكلتها إن مفيهاش أنظمة المراقبة والإتصالات والSensors زي باقي الطيارات اللي إتصممت مخصوص عشان الاستطلاع بس هي فيها أنظمة رادارات جامدة أوي إسمها Dragon’s Eye أو عين التنين.
• لو مثلاً B-52 وهي بتطير فوق بحر أو محيط لقطت أسطول معادي فهي بتقدر تشيل 8 صواريخ AGM-184 Harpoon ودي صواريخ مضادة للسفن ليها مدي بيوصل 240 كيلومتر.

طب أزيدك من الشعر بيت .. فيه حاجة الأمريكان شغالين عليها دلوقتي وهي لسه مجرد نظرية بس اسمعها للأخر .. إفرض مثلاً الأمريكان بعتوا سرب طيارات F-35 Lightening II عشان يضرب أهداف في مصر والسرب ده إتلقط وطلعنا عليه أسراب من مقاتلات F-16 Fighting Falcon .. دلوقتي الF-35 لقت نفسها في معركة مع عدد كبير من مقاتلات معادية وصواريخ جو-جو بتاعتهم مش حتكفي .. الحل إن يبقي عندك ورا طيارة B-52 شايلة صواريخ جو-جو إستبن بحيث كل اللي طيار الF-35 محتاج يعمله إنه ينشن هو علي طيارة F-16 معادية ولما يتك علي الزرار اللي في الJoy Stick بتاعته يخلي الصاروخ اللي متركب علي B-52 يطلع .. هي لسه نظرية زي ما قلتلك بس هم شغالين عليها دلوقتي.

اللي منكوا بيتابعوا الصفحة وبيشتغلوا مهندسين لازم تنحنوا إحتراماً لفريق المهندسين اللي صمم B-52 .. دي ناس صممت وصنعت طيارة بتكنولوجيا الخمسينات وقدرت تكمل معانا لحد دلوقتي والقوات الجوية الأميريكية متوقعة إنها تفضل في الخدمة لحد 2040 .. فيه خطة معمولة دلوقتي إنهم يعملوا عمرة جديدة في أسطول B-52 عشان يركبولها مخزن ذخيرة جديد بيقدر إنه يزود حمولة الطيارة بحيث إنها تقدر تشيل إما 8 قنابل إضافية من نوعية JDAM أو يتركب صواريخ Miniature Air Launched Decoy أو MALD ودي صواريخ لما بتنطلق أنظمة الدفاع الجوي زي S-400 بتتلخبط فيها وبتعتبرها طيارات معادية فتصطادها بصواريخها بس MALD دي صواريخ فشنك .. أو إنك حتي تركب منظومة تشويش علي أنظمة الرادارات المعادية.

هي المشكلة الحقيقية اللي بتواجه أسطول B-52 هي حاجتين:

• أنظمة الإتصالات والملاحة الجوية اللي بتتسمي Avionics يعني بتتكلم عن الأنظمة والكابلات وحتي الSoftware اللي B-52 إتبنت عليها إحتاجت إنه يتعملها عمرات مش عمرة واحدة خلت القوات الجوية الأميريكية تصرف علي أسطول الB-52 اللي عندها أكتر من مليار دولار .. زي بالضبط لما يبقي عندك عربية قديمة شوية وكل فترة تروح للكهربائي تدفع دم قلبك عشان تضبط السنتر-لوك والكشافات وشغل الكهرباء.
• تاني مشكلة وهي إن المحركات بتاعتها TF-33 Turbofan الEfficiency أو الكفاءة بتاعتها واقعة أوي .. المحرك الواحد حوت بنزين بيستهلك 3000 جالون بنزين في الساعة .. طبعاً القوات الجوية الأميريكية نفسها تغير المحركات دي بس مش لاقيه فلوسها أصلك حتغير 8 محركات في 76 طيارة يعني بتتكلم عن 608 محرك زود عليهم 608 موتور زيهم يبقوا إستبن أو Standby فدي فلوس بالهبل .. فيه فكر دلوقتي إن القوات الجوية الأميريكية تلاقي شركة قطاع خاص تغير المحركات بحيث حتدفعلهم فلوسهم من فلوس البنزين اللي أسطول الB-52 حيوفره كل شهر يعني الشركة اللي جايه تغير المواتير دي كلها حتاخد فلوسها بالتقسيط.

رغم المشاكل دي إلا إن القوات الجوية الأميريكية شايفة إنها متقدرش تستغني عن الB-52 .. سنة 2015 فيه طيارة منهم وقعت وتحطمت في حادثة فقيادة القوات الجوية صرفت 13 مليار دولار عشان تجيب طيارة قديمة B-52H اللي هي الجيل الأقدم من B-52 وكانت مرمية خردة في مستودع الخردة بتاع القوات الجوية وعملولها عمرة كاملة عشان تحل محل الطيارة اللي وقعت .. ليه هم عملوا كده؟ .. عشان بحسبة بسيطة إكتشفوا إن ال13 مليار دولار دول أقل بكتير من المبلغ اللي هم حيدفعوه لو كانوا صنعوا طيارة B-52 جديدة .. علي فكرة لسه فيه 12 طيارة B-52H مرميين خردة معتبرينهم إستبن للأسطول اللي في الخدمة دلوقتي.

فيه منكوا دلوقتي عنده سؤال حياكل دماغه وهو يعني إنت عايز تقنعني إن الأمريكان بكل قوتهم وصرفهم وإمكانياتهم مش عارفين يعملوا طيارة تحل محل الطيارة اللي شغاله بالزلموكة دي؟ .. الحقيقة هم عندهم .. عندهم قاذفتين قنابل محترمين أوي واحدة إسمها B-2 Spirit ودي اللي إحنا بنسميها الشبح والثانية اسمها B-1 Lancer .. بس هي المشكلة إن كل واحدة فيهم فيها عيب بيخليها بالورقة والقلم مينفعش تحل محل الB-52:

• خد عندك الB-2 Spirit مثلاً اللي هي زي ما قلتلك بنسميها إحنا في مصر الطيارة الشبح .. دي طيارة بيتقال عليها Stealth يعني ليها القدرة علي التخفي من الرادارات زيها زي الF-35 فده جميل جداً لو إنت ناوي تستخدمها لضرب هدف عنده منظومة دفاع جوي محترمة .. المشكلة إن الأمريكان معندهمش منها إلا 20 طيارة بس في الخدمة والواحدة فيهم عشان تشغلها بتصرف عليها 135,000 دولار في الساعة ودي تعتبر ضعف تكلفة ساعة الطيران بتاعة الB-52 .. ده بيخلينا نقول علي الطيارة الشبح إنها مبتطلعش إلا للناس الغاليين .. دي تتحط في النيش كده متطلعش إلا لما يكون عندنا ضيوف وضيوف مهمين كمان .. غير كده الB-52 رخيصة وبتستحمل وزي الفل.
• حتي الB-1 Lancer اللي الطيارين الأمريكان مطلعين عليها اسم الدلع Bones أو العظمة بسبب شكلها .. دي طيارة بتقوم بنفس الوظيفة بتاعة B-52 .. بتقدر تشيل ذخيرة أكتر من B-52 .. سرعتها أكبر ب25% من الB-52 يعني بتقدر تطير بسرعة بتوصل 1245 كيلومتر في الساعة .. أصعب في إنها تتلقط علي الرادارات المعادية من الB-52 .. بس لو إنت ناوي تبعتها عشان تضرب هدف عنده منظومة دفاع جوي محترمة فهي مش طيارة يتقال عليها Stealth ولو إتلقطت فهي مش سريعة أوي عشان تقدر تهرب من الصواريخ أرض-جو أو تهرب حتي من الطيارات المعادية اللي عايزه تعترضها .. عشان كده إنت لو في إيدك القرار تبعت طيارة B-1 Lancer ولا B-52 فإنت بتلاقي نفسك بدون تردد بتقول لا نبعت B-52 خصوصاً إن الأمريكان معندهمش إلا 63 طيارة B-1 Lancer بس في الخدمة.

أخر حاجة عايز أختم بيها المقالة دي إني أعرضلك بسرعة علي الناحية الثانية إيه هي القاذفات اللي بتستخدمها روسيا .. إحنا إتكلمنا بما فيه الكفاية عن القدرات الجوية الأميريكية بس أظن كام كلمة سريعة عن إمكانيات القاذفات الروسية مش حتؤذي حد .. مبدأياً إنت محتاج تكون عارف إن زي ما أميركا عندها 3 أنواع من القاذفات اللي هم B-52 Stratofortress و B-2 Spirit و B-1 Lancer فالروس كمان عندهم 3 أنواع من القاذفات اللي هم القاذفة السريعة Tu-22M3 Backfire .. القاذفة الأسرع منها Tu-160s Blackjack .. والثالثة هي Tu-95 Bear بس ولا واحدة فيهم ينفع يتقال عليها Stealth زي الطيارة الشبح اللي عند أميركا:

• القاذفة Tu-22M3 Backfire سرعتها أعلي ب70% من القاذفة الأميريكية B-1 Lancer بس في المقابل مبتقدرش تشيل حمولة كبيرة لا من الذخيرة ولا من الوقود .. ده غير إن السرعة العالية مش شرط إنها تحميها من أنظمة الدفاع الجوي المعادية لإن سنة 2008 الدفاع الجوي الجيورجي وقع طيارة منهم.
• القاذفة Tu-160s Blackjack متفرقش كتير عن الB-1 Lancer الأميريكية .. بتقدر تطير بسرعة ماخ 2 يعني ضعف سرعة الصوت و بمدي طيران أعلي من الB-1 Lancer و بتقدر تشيل نفس حمولة الذخيرة زيها زي B-1 Lancer .. دي حتي زيها زي الB-1 Lancer غالية أوي في تصنيعها و صيانتها و روسيا عندها منها 16 طيارة بس .. و زيها زي B-1 Lancer برده صعب تتلقط بالرادرات المعادية بس زي ما قلتلك مينفعش تقول عليها Stealth.
• أخيراً و ليس أخراً القاذفة Tu-95SM Bear و أختها Tu-142 Bear و دول يبقوا النسخة الروسي من B-52 .. الثلاثة ليهم نفس التصميم الخمسيناتي .. التلاتة أول رحلة طيران ليهم كانت سنة 1952 .. الثلاثة ليهم نفس الوظيفة و الثلاثة بيعملوها كويس .. يمكن الفرق إن الطيارتين الروسي سرعتهم أقل و بيقدروا يشيلوا حمولة تعتبر نص حمولة الB-52.

المصدر:

• مقالة بعنوان Why North Korea, Russia and China all fear America’s B-52 bomber يعني ليه كوريا الشمالية و روسيا و الصين كلهم بيخافوا من القاذفة الأميريكية B-52 نشرت في مجلة The National Interest و ده لينك المقالة الأصلية:
  https://nationalinterest.org/blog/the-buzz/why-north-korea-russia-china-all-fear-americas-b-52-bomber-22506