لينك التسجيل الصوتي علي ساوند كلاود:
https://on.soundcloud.com/xSCVq
ألمانيا دولة مش صغيرة .. ألمانيا دولة متقدمة وغنية جداً بس تحسها شبه دحيح الدفعة اللي مقضي حياته كلها بيذاكر فتلاقيه مليان حبتين ولابس نظارة قعر الكوباية من كتر المذاكرة ولا له في العراك ولا له في الخناق .. هي دي ألمانيا علي الأقل دلوقتي .. دولة شاطرة جداً بس مبتعرفش تتعارك أو خليني أبقي دقيق شوية وأقول هي بقت مبتعرفش تتعارك .. خليني أديلك مثال عشان بس تفهم حجم المشكلة اللي هم فيها.
في نوفمبر 2018 المستشارة الألمانية (أنجيلا ميركل Angela Merkel) كانت مسافره العاصمة الأرجنتينية بيونيس أيريس علي طيارتها طراز Airbus A340 التابعة لسلاح الجو الألماني اللي بيسموه لوفت-فافي Luftwaffe .. المفروض إن الطيارة دي هي الطيارة الرئاسية اللي سواء هي أو رئيس الدولة الألمانية بيركبوها عشان يسافروا وفي الخدمة بقالها أكتر من 20 سنة .. لسه الطيارة بتطلع من مطار برلين إذا بأنظمة الملاحة بتاعتها كلها بتطلع بره الخدمة والطيار مش بيلاقي حل غير إنه يهبط إضطراري في مطار كولون عشان (ميركل) تركب طيارة مدنية تبع شركة لوفتهانزا Lufthansa ودي تبقي مصر للطيران بتاعة ألمانيا رايحه بيونيس أيريس .. هنا إنت محتاج تقف وتضرب كف علي كف .. تخيل لو الرئيس (عبدالفتاح السيسي) بقي شايف إنه عشان يسافر أي حتة في الدنيا أحسنله إنه يركب طيارة مدنية تبع شركة مصر للطيران من إنه يركب الطيارة الرئاسية اللي بتشرف عليها القوات الجوية .. تفتكر ده بيقولك إيه عن الحالة اللي تصعب علي الكافر اللي وصلت ليها القوات المسلحة الألمانية أو زي ما الألمان بيسموها بونديز-فير Bundeswehr؟
فيه ناس إحتمال تشوف ده وتقول إنت ايه التفاهة اللي إنت فيها دي .. إفرض يا أخي (أنجيلا ميركل) عارفه إن الطيارة قديمة بس مش عايزه تبان قدام شعبها إنها بتصرف من قوت يومهم علي طيارة رئاسية جديدة ودي حاجة كويسة مش وحشة .. حلو .. جتلي في ملعبي .. سلاح الجو الألماني معندوش غير 128 طيارة من طراز Eurofighter Typhoon مش شغال فيهم إلا 40 طيارة بس والباقي عطلان .. برده سلاح الجو بتاعهم معندوش إلا 130 طيارة هليكوبتر مفيش منهم شغال إلا 30 طيارة بس .. ومش بس سلاح الجو .. القوات البحرية بتاعتهم عندها 6 غواصات مفيش منها شغال إلا غواصة واحدة والخمسة الفاضلين مركونين مينفعش ينزلوا المياه .. سلاح المدرعات الألماني معندوش غير 244 دبابة Leopard نصهم بس اللي ينفع تحارب بيه بكره الصبح والباقي عطلان .. إيش جولك بجي يا اللي كنت بتتكلم من شوية؟
في حالة إنك بتسأل عن سبب كل ده فالسبب معروف والناس كلها عارفاه سواء في ألمانيا أو في أوروبا كلها .. السبب مش سر .. لما الحرب العالمية الثانية كانت بتخلص الأمريكان بدأوا عملية غزو ألمانيا من الغرب والإتحاد السوفييتي بدأ غزو ألمانيا برياً من الشرق .. الحقيقة إنه كان سباق سرعة خلص بإن السوفييت والأمريكان دخلوا العاصمة الألمانية برلين سوا ولقوا نفسهم قدام سؤال غريب أوي .. هو يا تري بقي نقسم التورتة دي إزاي؟
قالك بسيطة إحنا نجيب خريطة ألمانيا وبالقلم الفلوماستر نقسمها نصين: النص اليمين يبقي تبع السوفييت وحنسميه ألمانيا الشرقية والنص الشمال حنسميه ألمانيا الغربية وحيبقي تبع أميركا .. الخط اللي بالفلوماستر ده بعدها بكام سنة قطع العاصمة برلين في نصها ومكان الخط ده إتبني سور إتسمي سور برلين .. لو إنت الصبح كنت عايش في شارع في شرق برلين وأخوك عايش في شارع تاني في غرب برلين فلما السور ده إتبني أنتوا صحيتوا علي حقيقة إنك بقيت عايش في بلد وأخوك عايش في بلد تانية رغم إن فعلياً برلين كلها علي بعضها بتقع جوه النص الشرقي من ألمانيا .. سنة 1990 سور برلين ده إتهد وألمانيا إتوحدت تاني .. من 1990 لحد الوقت اللي إنت بتقرأ فيه المقالة دي فالحكومة الألمانية ماسكه أجنة وشاكوش .. لا أجنة وشاكوش إيه قول هيلتي من بتاع بوش Bosch ده وعماله تكسر في القوات المسلحة وتخفض في عددها وتقلل في تسليحها .. ليه؟ .. زي لما تكون بتدخن كتير وكنت حريقة سجاير لحد ما جاتلك سكتة قلبية وعملت عملية قلب مفتوح ولما ربنا شافاك بقيت حالف ميه يمين إنك ما إنت ماسك سجارة تاني ولا حتي حتعدي جنب قهوة.
سيبك من ألمانيا دلوقتي .. ألمانيا دلوقتي زيها زي الصين وزيها زي اليابان بلد نموها الإقتصادي الرهيب ده إتبني علي فكرة إنهم بيصنعوا وبيبيعوا .. زمان عظمة الإمبراطورية الألمانية إتبنت بقوة السلاح .. أقرب مثال هو الفُجر اللي عمله (أدولف هتلر) في أوروبا كلها في الحرب العالمية الثانية .. من ساعتها وألمانيا حالفة ميه يمين إنها ما حتسمح لنفسها إنها يبقي عندها قوات مسلحة قادرة علي غزو أوروبا تاني .. ده كان معناه إن لأكتر من 30 سنة والحكومة الألمانية عماله تخفض في الميزانية العسكرية .. سنة 2011 لغوا التجنيد الإجباري للقوات المسلحة .. قللوا عدد أفراد القوات المسلحة من 340,000 مقاتل والكلام ده كان سنة 1998 لحد ما بقوا 180,000 دلوقتي .. زي ما قلتلك هي أقرب ما تكون لفكرة إنك تحلف مش حتمسك سجارة ولا حتقعد علي قهوة ولا حتقعد مع حد صاحبك بيدخن لإن اللي إنت شفته وقت ما كنت بتعمل عملية القلب المفتوح مش شوية.
الفكرة إن ده مش بس توجه حكومي إنما كمان رأي الشارع .. رغم إن الحكومة الألمانية بقالها سنين بتسجل إنها عندها فائض في الميزانية إلا إن المواطن الألماني رافض فكرة إن الفلوس دي تتصرف علي الجيش وشايف إنها تتصرف علي الطرق والمدارس والمستشفيات أحسن .. لو أنا مرشح نفسي في الإنتخابات البرلمانية في ألمانيا وقلت إني بقترح زيادة الميزانية العسكرية فده معناه وش إني مش حكسب الإنتخابات .. ده بالضبط زي لما حد مرشح نفسه في الإنتخابات عندنا يقولك أنا موافق إن يحكم مصر رجل مسيحي أو واحدة ست .. ده رأي ممكن ينسف الCareer لأي سياسي في ألمانيا.
أنا فعلياً أقدر أفهم موقف الألمان وأقدر أفهم سبب إحراجهم من ماضيهم ودي حاجة كويسة إن ضميرهم بيأنبهم .. حط كل ده علي جنب بقي قصاد إن الأمريكان وخصوصاً الرئيس (دونالد ترامب) بيشدوا في شعرهم من اللي بيعمله الألمان .. زي ما شرحتلك ليه الألمان مش ناويين يشيلوا سلاح تاني فبرده خليني أفهمك هو ليه الأمريكان ضغطهم بيعلي كل ما حد يجيبلهم سيرة القوات المسلحة الألمانية.
دلوقتي فيه حاجة إسمها حلف شمال الأطلسي North Atlantic Treaty Organization أو NATO إختصاراً .. الحلف ده بيتكون من أميركا ومعاها باقي دول أوروبا الغربية وزود عليهم تركيا .. ده حلف عسكري أساساً إتعمل عشان لو لا قدر الله السوفييت إتخبطوا في دماغهم وقرروا يغزوا أوروبا فيقدروا يصدوهم .. بس دلوقتي الإتحاد السوفيتي وقع وحلف NATO مبقاش وراه لا شغلة ولا مشغلة غير إنه يستقوي علي الدول الإسلامية الضعيفة بحجة الإرهاب بس مش دي قضيتي دلوقتي .. لو جيت بالورقة والقلم تشوف مين أقوي دولتين إقتصادياً في الحلف ده حتلاقي نفسك قصاد حقيقة إن تاني أقوي دولة في الحلف بعد أميركا هي ألمانيا .. يعني المفروض إن المنطق بيقول إن ألمانيا يبقي ليها دور شوية في إنها تشيل مسئولية الصرف علي الحلف .. تاني لو لا قدر الله بكره الصبح الروس قرروا إنهم يغزوا أوروبا عسكرياً فالمفروض إن اللي يتولي مهمة الدفاع عن أوروبا كلها هي ألمانيا .. المنطق بيقول كده.
سنة 2014 إتعملت قمة لدول NATO في ويلز والقمة دي إتعملت بعد ما روسيا إحتلت شبه جزيرة القرم من أوكرانيا .. يعني تاني .. القمة دي إتعملت بعد ما الروس عملوا الحاجة اللي الحلف أساساً إتعمل عشانها هي إن أوروبا كلها تتجمع وتقف إيد واحدة قصاد الغزو الروسي .. في القمة دي دول أوروبا كلها إتفقت علي إنها حتصرف حوالي 2% من الدخل القومي بتاعهم علي القوات المسلحة .. تفتكر بقي ألمانيا عملت إيه؟ .. تاني أكبر دولة في الحلف بسم الله ما شاء الله سنة 2018 يعني بعد القمة ما إتعملت ب4 سنين الإنفاق العسكري بتاعها مجاش حتي 1.24% من الدخل القومي .. حتي لما تيجي سنة 2025 الإنفاق العسكري الألماني مش حيوصل غير ل1.5% من الدخل القومي .. عشان بس أحطك في الصورة .. الأمريكان بيصرفوا 3% من الدخل القومي بتاعهم علي الإنفاق العسكري .. كل ما حد يسأل (ميركل) هو حضرتك بالصلاة علي النبي مش ناويه تحسي علي دمك وتنفذي الكلام اللي وعدتي به سنة 2014 تلاقيها بتقولك إتقل تاخد حاجة نظيفة.
ألمانيا بتزود صرفها العسكري بالفصال .. سنة 2014 الميزانية العسكرية كانت 38 مليار دولار بس .. سنة 2018 الميزانية العسكرية الألمانية كانت 44 مليار دولار .. السنة اللي وراها اللي هي 2019 الرقم زاد شوية بقي 48.5 مليار دولار وإن شاء الله سنة 2025 حيوصل 67 مليار دولار .. يمكن سبب الزيادة البطيئة دي هو إن إستطلاع رأي عمله موقع YouGov قال إن أكتر من 60% من الألمان مش عايزين أي زيادة في الميزانية العسكرية فالحكومة ماشيه معاهم بمبدأ مشيها براحة عشان محدش يحس .. ومش بس الشارع .. علي فكرة (ميركل) ووزيرة الدفاع بتاعتها (أورسولا فون دير لاين Ursula von der Leyen) لو في إيدهم بكره الصبح يمضوا قرار زيادة الإنفاق العسكري زي ما هي وعدت سنة 2014 كانت عملت كده بس المشكلة إنها مش بتحكم لوحدها .. هي بتحكم ضمن تحالف بين حزب المحافظين اللي هي بتقوده مع حزب يسار الوسط الإشتراكيين الديموقراطيين وده إسم كبير الصراحة فخليني أسميه زي ما هم بيحبوا يقولوا عليه SPD .. الحزب ده بصفته حزب يساري يعني إنهم يقتلوا عيل من عيالهم أحسنلهم من إنهم يصرفوا مليم علي حاجة ملهاش لازمة فهم ضد أي خطوة لزيادة الميزانية العسكرية.
أظن اللي أنا عايز أختم به هو إن (ميركل) فعلاً بتعافر .. هي بتزود في الميزانية العسكرية رغم إعتراض مش بس الشارع إنما كمان حلفاءها في الحكم .. إشترت 3 طيارات جداد Airbus A350 عشان تنقلات أعضاء الحكومة رغم إعتراض ملوش أي معني من المعارضة .. (ميركل) أخر سنة ليها في منصبها هي السنه دي وغالباً اللي حيجي وراها مش حيقدر يعمل أكتر ما هي عملت .. تقديري الشخصي إن لسنين وسنين و سنين جايه حيفضل الإنفاق العسكري الألماني عامل زي الزمالك كده .. زي ما بنقول الزمالك قادم فعسكر ألمانيا قادمون .. إمتي؟ .. يدينا ويديلك طولة العمر.
المصدر:
- مقالة بعنوان Germany Faces an Awkward Struggle to Build and Maintain its Armed Forces .. نشرت في جريدة Los Angeles Times الأميريكية وده لينك المقالة الأصلية:
ps://www.latimes.com/world/la-fg-germany-armed-forces-20190213-.html
