واحده من اكتر الافكار المتاخده عن المؤسسه العسكريه الصينيه انهم شويه حراميه في بعض .. وجهه النظر اللي ناس كتير مقتنعين بيها ان الترسانه العسكريه الصينيه دي كل اللي بتعمله في حياتها انها تشوف الغرب وحتي الروس بيعملوا ايه جديد .. يجيبوا السلاح ده يفكوه و يعرفوا بيشتغل ازاي و يبدأوا يعملوا زيه .. ده في الهندسه بيسموه Reverse Engineering او هندسه عكسيه .. للناس اللي مش فاهمه اوي يعني ايه Reverse Engineering لنفترض ان انا عايز اصنع موبايل Smartphone .. الحل الاولاني اني اجيب حد بتاع تصميم موبايلات عشان يصمملي شكل الموبايل من بره و يكون User-Friendly و شكله حلو كده و انيق .. و بعد كده اجيب مهندس اتصالات عشان يبدأ يصمملي اجزاء الموبايل الاساسيه و يشوف حتركب ازاي علي التصميم اللي اتعمل .. و بعد كده نروح لمصنع شاشات و لسه حنروح نشوف Software حيتعمل ازاي .. و بعد ده كله نختبر الموبايل و ليله كبيره اوي سعادتك .. طب ما فيه حل اسهل من كل وجع القلب ده .. احنا نروح لاي محل موبايلات نشتري احدث موبايل منزلاه Samsung او Apple .. حناخد الشكل الخارجي هو هو مش حنلعب فيه و نروح لموردين قطع الغيار ناخد منهم القطع اللي شبه الموجوده في الموبايل اللي احنا جبناه .. هوبا بقي عندنا موبايل تصنيع محلي .. صحيح هو شبه Samsung .. بس هو مش Samsung .. امكانياته اضعف شويه .. غالبا حيبوظ بسرعه لان احنا مختبرناش القطع اللي احنا عملناه بيها .. بس مش مشكله .. المهم ان عندنا موبايل تصنيع محلي .. ده اسمه Reverse Engineering .. هي طريقه حلوه اوي لو انت مستعجل .. طريقه حلوه لو انت مش هامك اوي الكفاءه قد ما هامك انك تنتج كتير و كتير اوي كمان .. المنتج اللي انت عملته مش حيبقي له نفس امكانيات المنتج اللي انت مقلده .. بس اهو شغال بيؤدي الغرض.
ده الاساس اللي الصناعات العسكريه الصينيه كانت معتمده عليه و لسه شغاله به شويه لحد دلوقتي .. مع الوقت المهندسين بتوعهم بقوا عندهم ما يسمي Know-How او انك تعرف سر الصنعه .. بس ده خد منهم سنين تعب و مذاكره و تجربه .. يا عيني صفه انهم حراميه دي لزقت في الصينيين من غير ما حد يسال نفسه طب هم ايه اللي خلاهم يعملوا كده؟ .. امتي كانت البدايه؟ .. و الاهم .. هي الطريقه دي كانت بتجيب معاهم نتيجه علي طول؟ .. طب هم جربوها في كل الاسلحه اللي القوات المسلحه الصينيه معتمده عليها دلوقتي؟ .. الحقيقه ان البدايه كانت سنه 1989 .. في السنه دي حصلت حادثه مشهوره اوي اسمها مذبحه ميدان تيانامين Tiananmen Square Massacre.. ده مش وقت ولا مجال اني اشرح ايه البتاعه دي بس اقرب تشبيه ليها هي انها كانت النسخه الصيني من اللي حصل في رابعه العدويه .. بعد اللي حصل ده الغرب فرض حظر تصدير اسلحه علي الصين و ده اللي خلي الصين تدوس جامد في سكه Reverse Engineering في الصناعات العسكريه .. النهارده انا حبب اتكلم عن 5 اسلحه .. الخمس اسلحه دول الصين عملتهم بالطريقه دي .. فيه اسلحه كانت جامد جدا .. فيه اسلحه تانيه مكانها الزباله .. فيه منها مع انه معمول بReverse Engineering الا انه تفوق علي السلاح الاصلي اللي الصين قلدته .. وفيه منها سلاح الصين نفسها شافت انها مينفعش تعتمد عليه .. من غير ما اطول عليك اكتر من كده خلينا نتكلم عن الاسلحه الخمسه.
الهوفركرافت Type 726:
سنه 1987 الاخوه بتوع القوات البحريه الاميريكيه خلوا العالم يهرش في شعره وهم بيقدمولنا اختراع غريب و اسمه اغرب .. اسمه Landing Craft, Air Cushion واختصارا سموها LCAC ودي معناها مركبه الهبوط و المخده الهوائيه .. البتاعه دي اسمها هوفركرافت Hovercraft .. الهوفركرافت ده عباره عن انك تجيب لوح الخشب اللي (كايت وينسليت Kate Winslet) في فيلم Titanic كانت قاعده عليه و الطياره الهليكوبتر تضربهم في الخلاط مع بعض .. في الصور حتلاقيه عباره عن لانش بس حاطين ورا مروحتين كبار .. المروحتين دول دورهم زي المروحه الاساسيه في اي طياره هليكوبتر انها تولد قوه رفع او Lift بحيث تخلي المركب يحوم فوق وش المياه و فوق الارض وعشان كده كلمه Hovercraft ترجمتها للعربي حوامه .. فعليا الهوفركرافت مش بيعوم في المياه و مفيهوش عجل عشان يدوس علي الرمله .. هو بيفضل متعلق في الهواء علي بعد مليمترات من سطح الارض اوسطح المياه بسبب قوه Lift دي .. المركبه LCAC الي الامريكان عملوها دي بتقدر تشيل حموله وزنها 54-64 طن بحيث تنقلها من اسطول جوه المياه للشط وهي بتجري بسرعه 74 كيلومتر في الساعه .. ده معناه انك لو تحت ايده شويه Hovercrafts من دول فانت تقدر تنقل معدات قوات كامله من دبابات و مدفعيه و عساكر و ذخيره و اكل و شرب من سفن الاسطول في المياه لحد الشط .. من ساعتها و اي قوات مسلحه في العالم عندها قوات بتنفذ عمليات برمائيه زي عندنا كده في الصاعقه البحريه فلازم تروح تشتري مركبات LCAC من اميركا .. بس الصين مشت في سكه تانيه شويه.
الصين عملت نسخه طبق الاصل من LCAC بس سموها Type 726 وليها اسم دلع يويي Yuyi يمكن الفرق الوحيد بين الاصل الامريكاني و الصوره الصيني هي الحجم .. المركبه Type 726 اصغر شويه وده معناه انها بتشيل حموله اقل .. هي اخرها تشيل 54 طن وده تقريبا نفس وزن الدبابه الصينيه Type 99 ودي الدبابه الاساسيه في سلاح المدرعات الصيني .. ليه الصينيين فكروا يبقي تحت ايدهم اسطول من الهوفركرافت؟ .. الصين قواتها المسلحه بقت بتنفذ و بتفكر تنفذ عمليات برمائيه كتير .. هم ليهم قواعد عسكريه كتير متوزعه في جزر في بحر الصين الجنوبي .. الجزر دي عشان تنقل معدات تقيله بينهم و بين بعض حيبقي اسهل حاجه ليك ان يبقي عندك هوفركرافت .. بلاش دي .. لو بكره الصبح الصين قررت تغزو تايوان بريا فنقل سلاح المدرعات الصيني للساحل التايواني حتبقي مهمه تقيله اوي و اللي حيقوم بيها غالبا هو اسطول مركبات Type 762 اللي تحت ايد الصين .. الهوفركرافت Type 726 مثال لازاي طريقه Reverse Engineering جابت نتيجه مع الصين .. صحيح كامكانيات هو مش زي LCAC بس بيؤدي الغرض و شغال زي الفل.
البندقيه الاليه CQ:
لما القوات المسلحه الامريكيه بدات تدوس جامد في حرب فيتنام اكتشفوا انهم خزوقوا نفسهم لما اختاروا ان البندقيه M-14 تبقي هي البندقيه الاليه الجديده اللي العساكر الامريكان يعتمدوا عليها .. هم كانوا عارفين ان بندقيه M-1 Garand اللي الامريكان اعتمدوا عليها في الحرب العالميه الثانيه خلاص قدمت ولازم تترمي في الزباله ولازم يلاقوا حاجه احدث .. الحاجه دي كانت M-14 واللي اثبتت انها خازوق خصوصا لما اتجربت قصاد البندقيه AK-47 اللي كانت مع الفيتناميين .. عشان الامريكان يلحقوا الموقف فهم خدوا تصميم بندقيه تانيه اسمها AR-15 صممها واحد اسمه (ايوجين ستونر Eugene Stoner) والرجل كان مقدم تصميمه قصاد M-14 بس وزاره الدفاع اختارت M-14 .. وقتها وجهه نظرهم ان التصميم بتاع AR-15 فيه حاجات كتير اول مره تتجرب لدرجه انهم شافوا البندقيه Risk اوفر الصراحه .. كانت اول مره تتعمل بندقيه اليه خفيفه اوي كده متصنعه من البلاستيك .. كانت اول مره بندقيه اليه تستخدم طلقات عيار صغير زي 5.56 مليمتر .. بس البندقيه نجحت و عجبت الامريكان و غيروا اسمها بقت M-16 و بقوا ينزلوا منها نسخ كتير زي M-4 Carbine و التصميم بتاع AR-15 بقوا الاساس اللي جيل كامل من البنادق الاليه الغربيه اتبني عليه .. الصينيين شافوا البندقيه M-16 وزيهم زي دول كتير قالوا لنفسهم انا عايزه من ده يا حزمبل.
شركه صيني اسمها NORINCO او China North Industries Corporation يعني شركه شمال الصين الصناعيه خدت البندقيه M-16 و بشويه Reverse Engineering عملوا بندقيه طبق الاصل منها اسمها CQ .. الحقيقه انك لو حطيت البندقيه CQ و البندقيه M-16 قدامك فانت حتتلخبط مين فيهم مين بس يمكن الفرق الوحيد بينهم هو مقبض ضرب النار .. في بندقيه CQ المقبض لسبب ما محدش عارفه شبه مقابض المسدسات القديمه بتاعه افلام الويسترن الاميركاني بتاعه الكاوبويز و الهنود الحمر دي .. محدش عارف ليه الحقيقه .. السبب اللي خلي شركه NORINCO تفكر اساسا تعمل البندقيه CQ هي انهم كانوا عايزين يبيعوها .. البندقيه دي متعملتش عشان تخدم في القوات المسلحه الصينيه .. البندقيه دي اتعملت عشان لو انتي دوله نفسك يبقي معاكي بنادق M-16 بس علاقتك باميركا مش ولابد ومش راضيين يبيعولك البنادق فانتي ممكن تشتري التقليد بتاعها من الصين .. لكن .. يقال ان القوات الخاصه الصينيه و قوات مكافحه الارهاب بتاعتهم بيستخدموا نسخ مطوره من CQ بس انا اقدر اقولك ان البندقيه دي تعتبر مثال لازاي Reverse Engineering مجابتش نتيجه اوي .. هي قدمتلك سلاح تقليد امكانياته اضعف او علي الاقل مسمعش مع الناس زي السلاح الاصلي .. اظن كده النتيجه 1-1.
العربيه العسكريه EQ2050 Mengshi:
من بعد حرب فيتنام و الامريكان بيفكروا ان جه الوقت ان العربيه الاسطوريه Jeep تطلع بره الخدمه .. هي صحيح عربيه حماله قسيه و شافت كتير بس خلاص احنا محتاجين حاجه احسن و اقوي .. سنه 1984 الافرع الرئيسيه للقوات المسلحه الاميريكيه كلهم بلا استثناء بقوا عاملين زي البنات لما بتحضر حفله ل(تامر حسني) لما شركه AG Motors نزلت العربيه هامفي Humvee او اللي انت عارفها بالاسم المدني بتاعها H3 Hammer .. دي كانت عربيه 4×4 بتقدر تمشي في اي حته و تشيل اي حاجه .. علي فكره الامريكان حاولوا يصدروا العربيه دي للصينيين وده طبعا كان قبل فرض حظر تصدير السلاح للصين اللي اتطبق سنه 1989 بس الصينيين معجبتهمش .. وجهه نظرهم ان العربيه كانت كبيره اوفر .. يمكن هم شافوا ان العساكر الصينيين اجسامهم صغيره مش محتاجين عربيه واسعه اوي كده .. بس حرب الخليج الثانيه سنه 1991 غيرت رايهم .. هم بقوا محتاجين يبقي عندهم عربيه عسكريه زي الهامفي.
يقال ان فيه دوله ادتلهم واحده هديه و فيه كذا رجل اعمال صيني اشتروا النسخه المدني بتاعتها .. المهم ان المهندسين الصينيين في شركه دونج- فينج Dongfeng فكوا العربيات دي كلها و بشويه Reverse Engineering طلعوا في الاخر النسخه الصيني من الهامفي .. اسمها EQ2050 واسم الدلع بتاعها مينجشي Mengshi ودي كلمه صيني معناها المحارب الشجاع .. فضلت مشكله الموتور .. الصينيين مش عارفين يعملوا Copy للموتور بتاع الهامفي .. الحل ان شركه Dongfeng راحت لشركه ِAmerican Cummings Corporation الاميريكيه مضت معاها عقد .. العقد كان ان الشركه الامريكاني حتصنع مواتير ديزل 4 سلندر عشان الشركه الصيني حتركب المواتير دي في عربيات صيني تصنيع محلي .. شركه Dongfeng خدت المواتير دي و ركبتها علي عربيات Mengshi وهوبا الصين بقي عندها النسخ الصيني من الهامفي .. الصينيين من وجهه نظرهم ان العربيه دي كامكانيات هي احسن من الهامفي ولو حنصدق كلامهم فخلاص نقدر نعتبر النتيجه 2-1 لطريقه Reverse Engineering.
الطياره الهليكوبتر Z-20 :
سبحان الله يا اخي حرب فيتنام دي اقنعت الامريكان ان لازم اغلب سلاحهم اللي فضلوا معتمدين عليه سنين يرموه في الزباله .. من ضمن الاسلحه دي كانت الطياره الهليكوبتر الاسطوريه UH-1 اللي اسم الدلع بتاعها هيوي Huey .. الطياره دي كانت هي الطياره الهليكوبتر الاساسيه لنقل الجنود الامريكان طول الحرب بس جه الوقت انهم زي ما بنقول يتخلصوا من حمامهم القديم .. الطياره اللي حلت محلها كانت طياره اسطوريه هي كمان UH-6 اللي انت عارفها باسم الدلع بتاعها بلاك هوك Black Hawk .. اول مره الامريكان يجربوها كانت في عمليه غزو جرانادا سنه 1983 .. بعدها جربوها تاني في عمليه غزو بنما سنه 1989 .. الطياره دي اتسحلت في حرب الخليج الثانيه سنه 1991 بس يمكن سمعتها كاسطوره بدات تسمع في دماغ الناس بعد دورها في العمليه الانسانيه لانقاذ الصومال و اللي تجسدت في معركه الصقر الاسود Black Hawk Battle سنه 1993 .. لسه لحد دلوقتي القوات المسلحه الاميريكيه بتعتمد علي الطياره دي بشكل كبير وده اللي خلي الصين برده تقول لنفسها انا عايزه بلاك هوك يا ابراهيم.
يقال ان قبل فرض حظر تصدير الاسلحه للصين الامريكان باعولهم 24 طياره هليكوبتر S-70C ودي كانت النسخه الاولانيه خالص من Black Hawk .. الصينيين خدوا الطيارات دي فكوها حتت و بشويه Reverse Engineering عملوا الطياره الهليكوبتر Harbin Z-20 .. هو انت لو حطيت صوره Black Hawk و Z-20 قصاد حد ماشي في الشارع فممكن يتخيل انهم نفس الطياره بس الحقيقه هم بينهم اختلافات .. شكل قمره القياده مختلف .. شكل ديل الطياره مختلف .. اذا كانت Black Hawk مروحتها فيها 4 شفرات فالطياره Z-20 مروحتها فيها 5 شفرات .. رغم كل ده القوات المسلحه الصينيه معتمدتش علي الطياره Z-20 .. اهي مركونه عندهم ولا سلاح الجو ولا حتي الشرطه الصينيه بتفكر تعتمد عليها .. ده اظن بيخلي النتيجه 2-2.
المدمره Type 052D:
مفيش قطعه بحريه بيرفيكت في كل حاجه طلعت من تحت ايد البحريه الاميريكيه في الكام سنه اللي فاتوا زي فئه المدمرات الري بيرك Arleigh Burke-Class Guided-Missile Destroyer وده حقيقه سببه في الطريقه اللي المدمره دي اتصنعت بيها .. اي قطعه بحريه انت الاول بيبقي عندك شاسيه المركب و بتبدأ ترص المعدات و الاسلحه بتاعتك علي حسب المساحه المتاحه .. فئه المدمرات دي مشيت بالعكس .. هم كان عندهم نظام قتالي جديد لانج اسمه ايجيس Aegis Combat System وده حاول تتخيله انه شبه منظومه الدفاع الجوي S-400 الروسي كده .. بيبقي عندك رادار قوي جدا و حجمه كبير اسمه SPY-1D و متوزع علي جسم المدمره كذا حساس او Sensors بحيث انهم يعملوا شبكه مراقبه شبه الناموسيه اللي كنا بنحطها زمان علي الاطفال وهم نايمين .. اي طياره معاديه تخش جوه حدود الناموسيه فنظام Aegis حيلقطها و يبدأ ينشن عليها ومش مطلوب من طاقم المدمره غير انهم يدوسوا Enter علي Keyboard عشان النظام يتعامل بنفسه مع الطياره المعاديه .. جسم او شاسيه المدمره اتبني عشان يحتوي نظام Aegis .. عشان كده الفئه دي من المدمرات اتبني منها 62 واحده و تعتبر العمود الفقري للبحريه الاميريكيه بعد حاملات الطائرات .. المدمرات دي انت تقدر تبعتها لاي مهمه تخطر علي بالك .. دفاع جوي ماشي .. صيد غواصات وماله .. ضرب اهداف ساحليه مش حتقول لا .. متوقع ان اسطول المدمرات ده يفضل في الخدمه لعلي الاقل خمسين سنه كمان .. نجاح الفئه دي من المدمرات خلي الصين تقول لنفسها هو احنا يعني ناقصين ايد ولا رجل عشان منعملش واحده زيها؟
الحقيقه ان هنا غشيتك شويه .. المدمره Type 052D الصينيه مش معموله بReverse Engineering بالمعني الحرفي للكلمه .. هم بس بصوا علي Specs بتاعه المدمرات طراز Arleigh Burk-Class و قالوا لنفسهم يلا نعمل زيهم .. نفس الفكره يلا نجيب رادار ضخم و نبني عليه جسم السفينه .. منظومه الدفاع الجوي بتاعه المدمره معتمده علي صواريخ محليه اسمها HQ-9 .. فيها صواريخ مضاده للسفن و تقدر تستخدمها لصيد الغواصات .. المدمره Type 052D فعليا الصينيين هم اللي تعبوا فيها و عملوها بايديهم وحبقي ظالم في حقهم لو اتهمتهم بانهم سرقوا تصميمها من الامريكان لان ده مش حقيقي.
المصادر:
مقاله بعنوان China’s military is stealing its way to superpower status نشرت في مجله The National Interest وده لينك المقاله الاصليه:
https://nationalinterest.org/blog/buzz/chinas-military-stealing-its-way-superpower-status-127072
مقاله بعنوان Harbin Z-20 medium transport helicopter نشرت علي موقع Military Today وده لينك المقاله الاصليه:
/www.military-today.com/helicopters/z20.htm
مقاله بعنوان Here’s our best look yet at China’s Black Hawk clone, the Z-20 نشرت في موقع The Drive وده لينك المقاله الاصليه:
http://www.thedrive.com/the-war-zone/5884/heres-our-best-look-yet-at-chinas-black-hawk-clone-the-z-20
مقاله بعنوان A black Dongfeng ‘Hummer’ police car in China نشرت في موقع Car News China وده لينك المقاله الاصليه:
http://rnewschina.com/2011/05/13/a-black-dongfeng-hummer-police-car-in-china/
مقاله بعنوان Chinese special forces competing with AR-15 rifles نشرت علي موقع The Firearm Blog وده لينك المقاله الاصليه:
//www.thefirearmblog.com/blog/2013/06/23/chinese-special-forces-competing-ar-15-rifles/
