القوات المسلحة اليابانية .. عود الإمبراطورية ملفوف.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/vesyevmjh3w8

فيه مواضيع في الدنيا لما بتيجي تفهمها بتلاقي نفسك بتهرش في شعرك و إنت حاسس إنك .. سوري في الكلمة يعني .. حمار مش فاهم حاجة .. و إنت بتحاول تفهم بتلاقي نفسك بتقول هو المنطق و العقل بيقولوا حاجة بس اللي أنا شايفه قدامي ده حاجة تانية خالص .. القوات المسلحة اليابانية بتتحط ضمن المواضيع دي .. أي دولة في الدنيا بتبني قواتها المسلحة علي حسب التهديد اللي هي عايشاه من اللي حوليها .. إسرائيل مثلاً شايفه نفسها متحاطة بشوية ذئاب بشرية اللي هم المفروض الدول العربية و بالتالي هي بتبرر عدوانها علي العرب بإنها ماشية بمبدأ أتغدي بيهم قبل ما يتعشوا بيا .. إسرائيل بلد عايشة فعلياً في حالة حرب مستمرة .. كل مواطن إسرائيلي بيتعلم من و هو صغير إن في أي لحظة الحرب ممكن تقوم .. كل حاجة في إسرائيل متشكلة علي هذا الأساس .. إنفاقهم العسكري .. سياساتهم الخارجية .. مناهج المدارس .. لو حتيجي تبص علي اليابان تلاقي حالها ميفرقش كتير عن إسرائيل .. إذا كانت إسرائيل بتبيع للعالم فكرة إن العرب دول شوية وحوش و هي لازم تحمي نفسها مع إنهم ولاد كلب كدابين فالمفروض يعني إن اليابان فعلياً بلد متحاطة بشوية بلطجية سواء بتتكلم عن كوريا الشمالية أو الصين.

المنطق بيقول إن لازم اليابان متبقاش تكون بتفكر في حاجة إلا إزاي تحمي نفسها من الغزو الصيني لأرضها اللي ممكن يحصل في أي لحظة و كمان تحمي نفسها من المجنون إبن المجنونة بتاع كوريا الشمالية .. بس ده مبيحصلش .. اليابان من بعد الحرب العالمية الثانية و هي و أنا مش بهزر و بتكلم جد دستورها بيمنعها إنها ترفع السلاح علي حد .. طب خد التقيلة بقي .. اليابانيين لما بيوصفوا حال بلدهم اللي محدش فاهمه ده بيقولوه أصل بلدنا اسم النبي حارسك و صاينك Pacifist .. عارف فيلم Hacksaw Ridge؟ .. عارف لما البطل مكنش عايز يقتل حد ولا يرفع سلاح علي حد؟ .. أهو ده حال اليابان دلوقتي .. مؤخراً اللي هو من 2018 بدأ رئيس الوزراء الياباني (شينزو أبي Shenzo Abe) وقتها يحاول يقنع اليابانيين هو مش جه الأوان إن بلدنا تبقي بلد طبيعية زي بقية بلدان البني أدمين اللي ساعة الغلط بتحدف زلط؟ .. بالمناسبة يعني (شينزو أبي) إتقتل بالرصاص خلال حملته الإنتخابية للترشح للرئاسة الوزراء يوم 8 يوليو 2022.

عشان أطلعك من المقالة دي فاهم هو فيه فإحنا محتاجين مع بعض نجاوب علي سؤالين .. سؤال فيهم بخصوص الماضي و هو إزاي اليابان حالها إتشقلب كده من بلد عماله تدوس علي وش خلق الله لبلد بيصعب عليها تأذي حد؟ .. السؤال الثاني له علاقة بالمستقبل و هو الإنفاق العسكري الياباني رايح علي فين؟

البداية كانت يوم 15 أغسطس 1945 .. في اليوم ده صحي اليابانيين علي خطاب إذاعي مسجل بصوت الإمبراطور (هيروهيتو Hirohito) بيعلن فيه إستسلام الإمبراطورية اليابانية .. خطاب 45 دقيقة شقلب حال اليابانيين .. قبل الخطاب ده اليابان كانت حماده و بعده اليابان بقت حماده تاني خالص .. يابان ما قبل الخطاب هي اللي سنة 1904 بلطجت علي الإمبراطوريه الروسية في حرب تعتبر أول هزيمة لإمبراطورية أوروبية علي يد إمبراطورية تانية من بره أوروبا خلاص إنتهت .. يابان ما قبل الخطاب اللي سنة 1910 خدت شبه الجزيرة الكورية وضع يد و اللي مش عاجبه يشرب من أي خرارة ماتت .. يابان ما قبل الخطاب اللي في ديسمبر 1937 بدأت غزوها للصين و اللي خلال أول 6 أسابيع فيه إرتكبت قواتها جرايم حرب في مدينة نانكينج Nanking مات فيها أكتر من 300,000 صيني و أُغتصبت فيها أكتر من 80,000 ست صينية خلاص معادتش ليها وجود .. يابان ما قبل الخطاب اللي في ديسمبر 1941 قتلت 2,400 أميريكي في غارة واحدة علي قاعدة بيرل هاربور البحرية في هاواي خلاص بح .. بعدها الدستور الياباني الجديد إتكتب.

عارف لما تكون بتاخد درس خصوصي مع مدرس دمه تقيل و يديك مسألة تحلها و مع كل خطوة غلط تعملها يقوم رازعك بالألم علي قفاك .. أهو المدرس البايخ ده كان الجنرال (دوجلاس ماك أرثر Douglas MacArthur) قائد عام القوات المسلحة الأميريكية في المحيط الهاديء و اللي تقريباً هو اللي كتب الدستور الياباني الجديد بعد الحرب .. دستور كامل إتكتب في اسبوع .. إنت ممكن تبص للدستور ده و تطلع فيه كمية نقاط تخليك بتشد في شعرك زي مثلاً إن الدستور بيقول إن مش من حق اليابان إنها تنشر قوات برية ليها بره حدودها .. الدستور بيقول إن مش من حق اليابان تعمل أي تحالفات عسكرية يعني مثلاً لو أميركا اللي تعتبر أهم صاحب لليابان إتعرضت لهجوم عسكري فمش من حق اليابان إنها تبعت قوات عسكرية لمساعدة أميركا .. يمكن أكتر فقرة في الدستور الياباني تعتبر غريبة أوي هي الفقرة التاسعة و اللي بتقول إن اليابان مش حتخش حرب تاني خالص إلا إذا كانت للدفاع عن النفس .. الدستور قال كمان إن اليابان مش حيبقي عندها لا قوات جوية ولا قوات بحرية .. و فعلاً ده اللي حصل .. لسنين بعد إستسلام اليابان هي مكنش عندها جيش بالمعني اللي إحنا عارفينه لكلمة جيش .. مجرد قوات شرطة لحفظ الأمن الداخلي مش أكتر .. و لإن زي ما إحنا عارفين الواحد مننا بيقوم الصبح مش عارف هو حيروح في معاده ولا حيسهر في شغله ففي سنة 1950 حصل تاني موقف خلي اليابان أو خليني أقول أميركا تغير من موقفها إن اليابان يكون عندها جيش.

في السنة دي قامت الحرب الكورية .. عشان مطولش عليك في أحداثها اللي أنا حكيتها قبل كده فاللي حصل إن القوات الكورية الشمالية اللي كان بيحكمها وقتها (كيم إيل سونج Kim Il Sung) اللي يبقي جد إبن المجنونة اللي بيحكم كوريا الشمالية دقولتي قرر إنه يغزو كوريا الجنوبية .. هوبا كل القوات الأميريكية اللي كانت قاعدة في اليابان من بعد الحرب العالمية الثانية ما إنتهت إتقالها إتحركي بسرعة علي كوريا الجنوبية عشان تحميها .. فجأة أميركا إتحطت قدام سؤال يخوف .. طب دلوقتي قواتنا اللي بتحمي اليابان راحت كوريا الجنوبية طب مين اللي حيحمي اليابان؟ .. هنا أميركا قالت لليابان إنسي خالص اللي أنا كتبتهولك في الدستور بتاعك إن مينفعش يبقي عندك جيش .. في وقت قياسي اليابان سنة 1954 أسست حاجة إسمها إحتياطي البوليس الوطني اللي بعد كده إتسمت إسمها اللي الناس كلها عارفاه  قوات الدفاع عن النفس Self  Defense Force أو SDF و دي قوات كان قوامها وقتها 75,000 مقاتل.

مجرد إن اليابان تعمل SDF خلي البلد تعيش أزمة دستورية كبيرة .. علي إيدك اليمين ناس قالت هو يا جدعان مش دستورنا قال إن مينفعش يبقي عندنا جيش؟ أومال مين الناس دي؟ .. علي إيدك الشمال الحكومة اليابانية قالت لا بقي SDF مش جيش .. مفهوم كلمة جيش هي ناس عندها سلاح تقدر في أي لحظة الحكومة بتاعتهم تبعتهم عشان يحتلوا أو يحاربوا أي دولة تانية .. SDF مش كده .. الناس دي أساساً مش مسموح لها إنها تطلع بره حدود اليابان و بالتالي هم مينفعش يتقال عليهم جيش .. سنة 1959 المحكمة الدستورية العليا في اليابان طلعت قرار بإن أيوه SDF مش جيش و مينفعش نتعامل معاهم قانوناً بإنهم جيش .. بس برده الشارع الياباني بص لكل ده و قال و أنا مالي بالصداع ده .. اليابان من وجهة نظر المواطن الياباني مش محتاجه جيش .. اليابان عندها قاعدة جوية و بحرية أميريكية فلو حصل أي حاجة أميركا حتيجي تجري تلحق اليابان .. يبقي ليه نصرف دم قلبنا علي جيش بدل ما إحنا ممكن نركز علي إقتصادنا؟

مع الوقت حصل حاجتين غيروا الطريقة اللي المواطن الياباني بيبص بيها للقوات المسلحة بتاعته أو SDF زي ما بيسموها:

• أول حاجة كانت الإحراج اللي حس بيه اليابانيين خلال حرب الخليج الثانية سنة 1991 اللي إنت عارفها بإسم حرب تحرير الكويت .. دلوقتي اليابان حليفة لأميركا .. صح .. طب إزاي لما أميركا راحت تطلع (صدام حسين) الله يرحمه من الكويت اليابان فضلت واقفه تتفرج؟ .. صحيح اليابان تبرعت ب13 مليار دولار للمجهود الحربي و لعملية إعادة إعمار الكويت بس ده مش كفاية .. كل ما حد من الأمريكان يتكلم مع اليابانيين بكلمتين يسموا البدن فاليابانيين يردوا عليه بيعني هو إحنا اللي كتبنا دستورنا ما أنتوا اللي كاتبينه و اللي أنتوا محرجين علينا منطلعش بره بلدنا شايلين سلاح .. المؤسسة العسكرية اليابانية كانت شايفه الموضوع بشكل مختلف شوية .. أي مؤسسة عسكرية في الدنيا عايزه تحس بالإحترام و موقف اليابان إنها تكتفي بإنها تبعت فلوس بس مكنش بيدي المؤسسة العسكرية اليابانية الإحترام اللي هي عايزاه .. الحل كان إن اليابان تلف من ورا دستورها و تبعت قوات بره أرضها بس ضمن قوات حفظ السلام التابعة للأمم المتحدة .. سنة 1992 اليابان بعتت قوات لكامبوديا و دي كانت أول مرة اليابان تبعت قوات مسلحة بره أرضها من بعد الحرب العالمية الثانية و من ساعتها و القوات المسلحة اليابانية بتخدم في حتت كتير في العالم .. الحقيقة إن دي كانت ضربة معلم لإن مش بس مع الوقت القوات المسلحة اليابانية كسبت إحترام العالم إنما كمان المواطن الياباني بدأ يحس تاني بإنه رجع يحترم مؤسسته العسكرية.

• تاني حاجة حصلت كانت يوم 11 مارس 2011 لما ربنا إبتلي اليابان بزلزال قوته 9 ريختر ضرب الساحل الشرقي لليابان و كان السبب إن موجة تسونامي إرتفاعها 15 متر تضرب الساحل بعد ساعة من أول هزة للزلزال و طبعاً أنتوا عارفين قصة مفاعل فوكوشيما اللي إتضرب جامد وقتها .. المهم إن الكارثة دي كانت السبب في موت 22,000 بني أدم بس في نفس الوقت كانت أول مرة تحصل تعبئة عامة لأكتر من 100,000 فرد من القوات المسلحة اليابانية عشان يساهموا في عمليات الإنقاذ .. المواطن الياباني لما شاف قوات جيش بلده بتعمل المستحيل عشانه بدأ يشوفهم بشكل مختلف .. بعد الكارثة مركز الإحصائيات المشهور أوي Pew Research Center حسب إن 95% من اليابانيين شافوا إن القوات المسلحة بتاعتهم عملت اللي عليها و زيادة.

هنا يجي دور الكلام عن أهم شخصية في القصة اللي بنحكيها .. رئيس الوزراء (شينزو أبي) .. ده رجل زي ما تقول كده صعيدي كان بيرأس حزب إسمه الحزب الديموقراطي الليبرالي بس ده يوريك إن الليبرالية دي حاجة شبه المكرونة كده بتتعمل بطرق كتير و بتتاكل بكذا طريقة و ليها كذا طعم بس في الأخر لسبب ما يعني محدش فاهمه بيتقال عليها ليبرالية .. الرجل ده حكم اليابان عشر سنين و بعد كده خسر الإنتخابات و بقي المعارضة لمدة 3 سنين و بعد كده كسب الإنتخابات تاني سنة 2012 وسنة 2017 وقدم استقالته سنة 2020 و إتقتل زي ما قلنا في 2022 بس هو كسب الإنتخابات بتاعة 2017 دي علي كتاف وعدين:

• الوعد الأول إنه حينط النطة الفشيخة بالإقتصاد الياباني .. لو إنت عايش في اليابان فإنت غالباً بتقول إن الرجل ده عمل اللي وعد بيه و في نفس الوقت مش أوي يعني .. هو الإقتصاد الياباني بينمو بس مش بالشكل الفشيخ اللي هو قال عليه و إن كان الرجل الصراحة عمل شوية إصلاحات صادمة شوية زي مثلاً لو إنت مواطن مش ياباني و رايح تشتغل في اليابان فإنت بقي من حقك تقدم علي فيزا خمس سنين بس محدش قال إن عشان تاخدها فعلاً الموضوع سهل .. حاجة تانية إنه بدأ يسهل شوية علي الست اليابانية إنها تلاقي حضانة تحط فيها عيالها لحد ما هي ترجع من الشغل.
• الوعد الثاني هو إن اليابان حتبدأ تعض أي حد يمد إيده عليها و الكلام هنا زي ما إنت توقعت علي الصين .. قدام الناس الخناقة بين الصين و اليابان بتتلخص حولين شوية جزر إسمهم سينكاكو زي أي خناقة بين دولتين علي ترسيم الحدود بس الموضوع أكبر من كده .. الخناقة فعلاً هي بين رؤيتين للمستقبل .. الصين شايفة المستقبل في مبادرة حزام واحد طريق واحد One Belt One Road و اللي إتكلمنا عنها قبل كده .. اليابان شايفة المستقبل مبادرة تانية إسمها Free and Open Indo-Pacific يعني الطريق المفتوح بين المحيطين الهاديء و الهندي و الطرفين شايفين إن الإنفاق العسكري هو الحل في إن كل طرف يفرض مبادرته علي التاني.

بس النقطة اللي أنا واقف قدامها جداً هي إن الدستور بيقول مينفعش اليابان تصرف علي القوات المسلحة أكتر من 1% من إجمالي الناتج الوطني أو GDP .. عشان أحطك في الصورة فأميركا و الصين مثلاً بيصرفوا حوالي 3% من GDP بتاعهم علي الميزانية العسكرية .. هنا يجي دور السؤال بتاع المستقبل .. هو الإنفاق العسكري الياباني رايح فين؟ .. الحقيقة إني مبحبش أعيش دور العراف اللي بيبص للبلورة السحرية و يهبد هو المستقبل رايح فين بس اللي أقدر أقوله ليك هو إن الحاضر اللي إحنا عايشينه بيرسملنا مستقبل عامل إزاي؟

في سبتمبر 2019 طلع تقرير من الحكومة اليابانية قال إن وزارة الدفاع طلبت إن ميزانيتها للسنة المالية 2019 تكون 48 مليار دولار .. برده الرقم ده محتاج يتحطلك في صورة تخليك تقدر تستوعبه .. الرقم ده يعتبر زيادة حوالي 7.2% في الإنفاق العسكري الياباني عن سنة 2018 .. مش بس وزارة الدفاع اليابانية قالت هي عايزه فلوس قد إيه دي كمان قالت هي حتصرفها في إيه و مجرد إنك تبص علي Shopping List بتاعتهم تحسسك إنك ماشي في كارفور مع مراتك و يكون المرتب لسه نازل فتاخد الفيزا بتاعتك و هاتك يا بعزقة في الفلوس :

• اليابانيين عايزين يعملوا عمرة كاملة لإسطول طيارات F-15 بتاعهم بحيث يركبولهم أنظمة حرب أليكترونية جديدة.
• بدل ما كانوا زمان قالوا إنهم حيشتروا 42 طيارة F-35A من شركة لوكهييد مارتن Lockheed Martin فدلوقتي الكلام إنهم عايزين 153 طيارة بحيث حياخدوا 6 طيارات في 2019 و الباقي حيستلموهم خلال خمس سنيين.
• فيه 2.7 مليار دولار حيروحوا في شراء منظومة الدفاع الجوي الأميريكية إيجيس أشور  Aegis Ashore.
• أنا لسه مخلصتش إنت رايح فين .. اليابانيين عايزين يشتروا طيارات RQ-40 Global Hawk و دي طيارات بدون طيار Drones معمولة مخصوص للإستطلاع و التجسس .. اه كنت حنسي .. اليابانيين عايزين يصنعوا غواصة و مدمرتين بحيث يخلوا إجمالي القطع البحرية اللي تحت إيدهم 44 قطعة بحرية.
• عايزين يشتروا طيارة تزويد بالوقود بس لسه مقرروش هي إيه .. عايزين طيارتين نقل طراز C-2 .. عايزين 6 طيارات هليكوبتر UH-X لنقل عناصر القوات الخاصة بتاعتهم.
• عندهم حاملة طائرات بس للطيارات الهليكوبتر عايزين يعدلوا في تصميمها بحيث ينفع تشيل طيارات F-35 من اللي هم حيشتروها من شركة لوكهييد مارتن و بعد كده يبنوا حاملة طائرات جديدة.

الإنفاق العسكري الياباني اللي عمال يزيد يوم عن يوم ده بيخليني أبص لمنطقة جنوب شرق أسيا و أحس إني قصاد نفس الوضع في أوروبا في السنين اللي قبل الحرب العالمية الأولي .. الصين وصلت لمرحلة إنها بتصنع الطيارات و الدبابات زي ما بتصنع علب التونة .. مش كده وبس .. الصين شغالة جامد في سياسة إنها تبني جزر صناعية في بحر الصين الجنوبي و تبدأ تبني مطارات و قواعد عسكرية في الجزر الصناعية دي كنوع من أنواع وضع اليد علي طرق التجارة .. كوريا الشمالية ماسكها واحد أهبل .. روسيا بتحلم باليوم اللي ترجع فيه مجد الإمبراطورية السوفيتية .. كل ده مخلي اليابان معندهاش حل غير إنها تصرف أكتر علي تسليحها .. عاجلاً أم أجلا وسط التسليح ده كله حد حيغلط .. حد حيضرب أول طلقة .. و زي ما حصل في الحرب العالمية الأولي فمحدش حيعرف يوقف قطر الدمار من إنه يدوسنا كلنا.

المصادر:

• مقالة بعنوان Japan accelerate its defense buildup نشرت في مجلة The National Interest و ده لينك المقالة الأصلية:
  https://nationalinterest.org/feature/japan-accelerates-its-defense-buildup-41277
• مقالة بعنوان The rise of Japan militarism نشرت في مجلة Vox و ده لينك المقالة الأصلية:
  http://://www.vox.com/2019/4/30/18100066/japan-shinzo-abe-sdf-emperor-china