لينك التسجيل الصوتي للمقالة علي Sound Cloud:
https://soundcloud.com/user-112011687-312727988/5wjrpeqdisri?si=8f713fdf9bec4c88b06a85ed330b3c0e&utm_source=clipboard&utm_medium=text&utm_campaign=social_sharing
أي بلد في الدنيا عايزه تشتري سلاح بتروح للبلد اللي بتصنع السلاح ده و لو البلد اللي بتصنع السلاح من مصلحتها إنها تبيعه للبلد اللي عايزاه فالصفقة عادة بتمشي زي السكينة في الجاتوه .. بيع السلاح ميفرقش كتير عن بيع العربيات المستعملة .. إنت عندك عربية عايز تبيعها و فيه حد عايز يشتري .. إنت عايزه يدفع أكتر ما إنت دفعت فيها و هو مش عايز يتضحك عليه بس أنتوا الإتنين عايزين الصفقة تخلص و ده اللي بيخلي البيعة تتم علي خير .. مشكلة الهند الأزلية إنها لما بتحب تشتري سلاح من أي حد بتبقي زي ما يكون عندك إتنين ولاد إخوات و كل واحد فيهم عايز يشتري عربية أبوهم .. الأب عارف إنه لو رضي يبيع عربيته لواحد من عياله فالتاني حيزعل و حيعتبر ده إهانة له .. لو الهند راحت تشتري سلاح من أميركا أو من أي دولة أوروبية مثلاً إياكش حتي تكون رايحه تشتري منهم سكاكين للمطابخ بتاعة الميس اللي العساكر الهنود بياكلوا فيه فلازم أميركا تسأل نفسها هو يا تري لو بعت السكاكين دي للهند فهل باكستان حتزعل؟
أنا كنت إتكلمت قبل كده عن الخناقة بين الهند و باكستان بخصوص كشمير وده واحد بس من المشاكل اللي بتقابل أي حكومة هندية عايزه تشتري سلاح من بره .. أي بلد بتبيع سلاح للهند دايماً بتسأل نفسها هو يا تري باكستان حتزعل؟ و ده اللي بيعطل صفقات بيع سلاح كتير للهند مع الدول الغربية .. بس يمكن الدولة الوحيدة اللي فعلياً مبتفرقش معاها تبيع سلاحها لمين علي شرط إنه يكون معاه فلوس يدفع هو روسيا .. الروس بيعبدوا الفلوس و أنا مش بيشتمهم ولا بهينهم أنا بس بحاول أوصلك إن الروس معندهومش لا غالي و لا عزيز طالما الموضوع داخل فيه فلوس .. بعد ما فهمت الحكاية دي خليني أكلمك عن صفقة السلاح اللي عايز أحكيها النهاردة اللي هي صفقة شراء الهنود لحاملة الطائرات أي إن إس فيكرام-أديتيا INS Vicramaditya من روسيا .. زي أي صفقة بيع عربية مستعملة خليني أفهمك الأول ليه المشتري عايز يشتري و ليه البايع عايز يبيع و بعد كده نخش في مشاكل البيعة نفسها.
خليني أبدأ إني أفهمك ليه البايع .. اللي هو روسيا .. كان عايز يبيع حاملة الطائرات؟
سنة 1988 كان الإتحاد السوفيتي بيحتفل بدخول حاملة الطائرات باكو Baku للخدمة .. هي متسمية علي إسم مدينة باكو اللي هي دلوقتي تبقي عاصمة دولة أذربيجان و اللي زمان كانت واحدة من الدول اللي بيتكون منها الإتحاد السوفيتي .. المهم إن حاملة الطائرات دي كانت من طراز كييف Kiev-Class و برده الطراز ده من حاملات الطائرات إتسمي علي إسم مدينة كييف اللي هي دلوقتي تبقي عاصمة أوكرانيا و اللي هي واحدة برده من الدول اللي زمان كانت ضمن الإتحاد السوفيتي و حاملة الطائرات باكو واحدة من 4 حاملات طائرات من طراز كييف إتصنعت علي إيد الإتحاد السوفيتي .. اللي بيميز حاملة الطائرات من طراز كييف ده إنك لما تيجي تبصلها تحس إنها فيها حاجة غريبة .. هي سفينة زي أي سفينة في الدنيا بس حجمها ضخم حبتين .. ككتلة هي وزنها بيعدي 40,370,000 كيلوجرام .. تلت حاملة الطائرات الأمامي لما تبصله تحسه مدمرة عادية جداً .. في التلت الأمامي حتلاقي 12 صاروخ SS-N-12 و دي صواريخ فشيخة مضادة للسفن و دي اللي موجودة في الإسطوانات الضخمة اللي عندك في الصورة .. قدام برده في التلت الأمامي حتلاقي 192 صاروخ أرض- جو مضاد للطائرات و مدفعين عيار 100 مليمتر شبه اللي إنت بتشوفهم علي الدبابات .. تلتين حاملة الطائرات الوراني أو الخلفي كان عبارة عن مهبط طيارات هليكوبتر و حتلاقي إن مهبط الإقلاع و الهبوط طالع بجنب كده علي شمال السفينة و كأن السفينة واحدة ست شايلة شنطتها علي كتفها .. زي ما قلتلك حاملة الطائرات دي دخلت الخدمة سنة 1988 بس الإتحاد السوفيتي إتفكك من بعضه سنة 1991 .. دولة روسيا الإتحادية ورثت حاملة الطائرات باكو و اللي غيرت إسمها بقت حاملة الطائرات أدميرال جروشكوف Admiral Groshkov عشان دولة أذربيجان إستقلت و مينفعش روسيا تبقي عندها قطعة بحرية علي إسم عاصمة بلد تانية .. سنة 1996 حصلت حادثة إن إنفجرت واحد من الغلايات Boilers اللي بتشغل الحاملة و من بعدها و طلع قرار من قيادة القوات البحرية إن حاملة الطائرات دي تتركن في الترسانة البحرية لحد ما نشوفلها صرفة.
من حقك تسأل نفسك طب معلش إزاي بلد في حجم روسيا معرفتش تصلح حتة Boiler في سفينة؟ .. ده لو وديته العوايد في إسكندرية أو الحرفيين في القاهرة حلاقي صنايعية حيعرفوا يصلحوه .. المشكلة أعقد من كده بشوية .. حاملة الطائرات باكو أو الأدميرال جروشكوف اللي صنعتها كانت الترسانة البحرية نيكولاييف Nikolayev Shipyard في أوكرانيا فده معناه إن عشان روسيا تصلح الغلاية لازم تجيب الكاتالوجات و العدد و قطع الغيار من أوكرانيا أو توديها أوكرانيا تتصلح و طبعاً حضرتك عارف إن بعد تفكيك الإتحاد السوفيتي و العلاقة بين الروس و الأوكرانيين بقت زي العلاقة بين الأهلاوية و (عبدالله السعيد) كده اللي هو لو مات لا قدر الله محدش فيهم حيمشي في جنازته .. نقطة تانية إن إنفصال الإتحاد السوفيتي كان زي ما تقول كده طلاق بين إتنين متجوزين خلص بإن الزوجة رفعت قضية خلع و مكنش إنفصال ودي متحضر زي اللي بتشوفه في الأفلام الأجنبي فلما روسيا خدت حاملة الطائرات باكو مكنش ينفع تروح لأوكرانيا تقولها هاتي الكاتالوجات و قطع الغيار و العدد اللي حصلح بيها المعدات بتاعة الحاملة.
هنا يجي إنك تفهم ليه المشتري .. اللي هو الهند .. كانت عايزه تشتري حاملة طائرات؟
مبدأياً لازم الهند يبقي عندها حاملة طائرات مش بس عشان تفرض سيطرتها علي المحيط الهندي بس كمان عشان منظر البلد .. الهند بلد بتقول علي نفسها قوة عظمي .. بلد متخانقة مع جارتها باكستان و علاقتها بالصين شبه العلاقة بين أي ست و درتها .. سنة 2000 الهنود قالوا لنفسهم إن دلوقتي إحنا تحت إيدنا حاملة طائرات إسمها أي إن إس فيرات INS Viraat بس هي حتطلع بره الخدمة سنة 2007 و عشان كده إحنا محتاجين نلاقي بديل بس هي المشكلة إن ال3 دول اللي كانوا بيصنعوا حاملات طائرات وقتها اللي هم أميركا و فرنسا و إيطاليا بيصنعوا حاملات طائرات كبيرة بتكاليف أكبر من قدرة الهند إنها تدفع و دي كانت نقطة و النقطة الثانية إن حتفضل مشكلة إن كل واحدة من الدول الثلاثة حتسأل نفسها طب أنا لو بعت حاملة طائرات للهند فهل معني كده إن باكستان حتتقمص و مش حتشتري مني سلاح تاني؟ .. سنة 2004 الهنود ملقوش حل غير إنهم يروحوا للروس و مضوا معاهم عقد إن الهند حتاخد حاملة الطائرات الأدميرال جروشكوف Admiral Groshkov ب974 مليون دولار عشان يستلموها سنة 2008 من شركة ترسانة سيفماش البحرية Sevmash الروسية .. شفت صفقة العمر أهي .. حاملة طائرات كاملة بأقل من مليار دولار في أقل من 4 سنين بس خلي بالك .. حاملة الطائرات نفسها الهند حتاخدها ببلاش .. ال974 مليون دولار دول حيروحوا عشان روسيا تطور من الحاملة و تعملها عمرة كاملة .. لا عمرة إيه .. عارف فيلم لا تراجع ولا إستسلام القبضة الدامية بتاع (أحمد مكي)؟ عارف لما خدوا (حزلقوم) و حولوه ل(أدهم)؟ .. أهو ده اللي الهند كانت عايزه روسيا تعمله.
كان المفروض الهنود يفهموا إن الموضوع مش بالسهولة اللي هم متخيلينها دي .. حاملة الطائرات دي دخلت الخدمة سنة 1988 و طلعت معاش سنة 1996 يعني فضلت تشتغل 8 سنين .. بعد كده الروس سابوها مركونة من 1996 لحد سنة 2004 يعني بتتكلم عن ركنة 8 سنين كمان و ياريتهم راكنينها في حتة نظيفة دي مركونة وسط السقعة و من غير ما حد يفكر يصينها و لا ينظفها حتي .. ده أنا لو راكن عربيتي 8 سنين و جيت أبيعها محدش حيرضي يشتريها .. ياريت الموضوع وقف لحد كده .. حاملات الطائرات من طراز كييف كان ليها شكلها المميز .. زي ما قلتلك تلتها الأمامي مدمرة و تلتها الخلفي مهبط طيارات هليكوبتر .. الهنود كانوا عايزين يغيروا التصميم ده بحيث يخلوا نصها الأمامي يتشال منه المدفعين و الصواريخ و يتبني فيها رامب Ramp زي اللي إنت بتشوفه في المولات عشان تنزل البدروم تركن عربيتك و بدل ما حاملة الطائرات بتشيل طيارات هليكوبتر بس فهي كمان تقدر تشيل 24 طيارة مقاتلة من طراز MiG-29K و كمان تشيل 10 طيارت هليكوبتر من طراز كاموف Kamov.
فتاني .. إنت حتجيب حاملة طائرات إتصممت عشان تشيل طيارات هليكوبتر بس حتغير في تصميمها عشان تخليها تشيل طيارات مقاتلة .. حتركبلها رامب لإقلاع الطيارات المقاتلة و ده لوحده حيخلي طول الحاملة يزيد يبقي 900 قدم (283.5 متر) و عشان بس تتخيل يعني إيه 283.5 متر فعايز أقولك إن برج القاهرة طوله 180 متر بس .. و طبعاً حتركبلها Arresting Wires و دي كابلات بتمسك في الطيارة و هي بتهبط عشان تخليها تفرمل أسرع و دي تصميمها و تركيبها و تدريب المهندسين و الفنيين و الطيارين عليها حوار و صداع لوحده .. طبعاً ال24 طيارة دول مش حيفضلوا كده يتشمسوا علي سطح الحاملة و لازم يتركنوا جواها و بالتالي إنت عايز تعمل أسانسيرات هيدروليك تاخد الطيارة من مكان ركنتها جوه السفينة لحد السطح عشان تطير .. حتعيد فرش 2,700 أوضة .. حتعيد توصيل كابلات الكهرباء كلها في ال22 دور بتاع الحاملة بطول 900 قدم للدور الواحد .. حتركبلها رادارات جديدة بدل الرادارات القديمة بتاعتها .. لا و كمان حتغير اسمها من الادميرال جروشكوف و حتخليه أي إن إس فيكرام- أديتيا INS Vicramaditya .. كل ده و متخيل إنه حيتعمل ب974 مليون دولار؟ .. أنتوا كنتوا شاربين حاجة و أنتوا بتمضوا العقد؟ .. بلاش كل ده .. هو إنت و إنت بتتفرج علي حاملة الطائرات و هي مركونة في الترسانة البحرية مسألتش نفسك هو ليه الروس مصلحوهاش؟ .. معملتش أي Search عشان تعرف إن السبب زي ما أنا قلت في البداية إن اللي صنع حاملة الطائرات دي تبقي ترسانة Nikolayev Shipyard في أوكرانيا؟ .. مجاش في بالك تخش علي Website بتاع شركة ترسانة Sevmash اللي الروس قالولك إنهم هم اللي حيعملولك العمرة علي حاملة الطائرات عشان تشوف إن دي ناس شغالة في تصنيع الغواصات و عمرهم ما إشتغلوا في حاملات الطائرات قبل كده؟
سنة 2007 الهنود فهموا إنهم خدوا أحلي خازوق في حياتهم .. بفكرك بس إن 2007 ده يعني قبل سنة من معاد التسليم .. فجأة وزارة الدفاع الهندية جالها تقرير من شركة Sevmash بيقول و الله إن 974 مليون دولار دول مش مكفيين و إن التكلفة الإجمالية للمشروع حتنط تبقي 2.9 مليار دولار .. التقرير قال إن علي فكرة متفتكروش إن 2.9 مليار دولار دول كتير .. لا خالص .. أنتوا لو رحتوا إشتريتوا أي حاملة طائرات من أميركا أو إيطاليا حتدفعوا مش أقل من 4 مليار دولار .. مش كده و بس .. تكاليف مرحلة التجارب و الإختبارات لوحدها نطت من 27 مليون دولار بقت 550 مليون دولار .. الوضع دلوقتي بقي زي الزفت .. حوالي 40% من شغل Sevmash في حاملة الطائرات خلص و وقفوا شغل عشان خاطر الهند مش راضية تدفع فوق 974 مليون دولار اللي في العقد و علي الناحية الثانية الهنود حالفين ما هم دافعين مليم زيادة عن اللي موجود في العقد .. وزارة الدفاع الروسية من ناحيتها قالت إن و الله لو الهند فسخت العقد فهي مش حتاخد فلوسها و روسيا حتحتفظ بحاملة الطائرات .. فضل الوضع كده من 2007 لحد 2009 .. حاملة الطائرات مركونة و محدش بيشتغل فيها بس الفكرة إن الروس وقتها كان من مصلحتهم إن الموضوع يخلص .. دلوقتي إنت بتتكلم عن سنة 2009 .. بتتكلم عن سنة مبيعات السلاح الروسي فيها وصلت 8 مليار دولار و لو الخبر إتعرف إن صفقة بالحجم ده باظت فمفيش حد حيفكر يشتري سلاح من روسيا تاني لإن الدنيا كلها حتعرف إن الروس دول شوية نصابين حياخدوا فلوس و في نص الشغل يقولك يا تدفع زيادة يا الفلوس اللي إنت دفعتها حتروح عليك .. في يوليو 2009 الرئيس الروسي وقتها (دميتري ميدفيديف Dmitri Mdevedev) راح زار مقر شركة Sevmash و معاه طقم صحفيين و خلاهم يصوروه و هو واخد رئيس الشركة (نيكولاي كاليستراتوف Nikolai Kalistratov) علي جنب بيديله كلمتين في جنابه و بيزعقله علي التأخير اللي بيحصل في تسليم حاملة الطائرات INS Vicramaditya.. في نفس الوقت (دميتري ميدفيديف) إتكلم مع الهنود إنهم لازم يدفعوا زيادة شوية و أقنعهم إنهم يدفعوا 2.2 مليار دولار و ده أقل من 2.9 اللي شركة Sevmash كانت عايزاهم.
زي أي حد مبيشتغلش إلا لما ياخد فوق دماغه فشركة Sevmash حرقت بنزين و خلصت باقي شغلها في أقل من 3 سنين .. بعد ما كان الإتفاق في الأول إن الهند تستلم حاملة الطائرات في 2008 فهي بدأت تخش مرحلة الإختبارات في أغسطس 2012 و دخلت الخدمة فعلياً في القوات البحرية الهندية في نوفمبر 2013 .. لحد هنا كان المفروض إن الهنود يكونوا إستوعبوا الدرس .. أنتوا كنتوا وصلتوا لمرحلة إن فلوسكوا كانت حتروح عليكوا بسبب إن شركة Syvmash دي مش محترمة و مشتغلتش قبل كده في حاملات الطائرات فبالعقل كده أنتوا بعد ما تستلموا السفينة تقولولهم عليا الطلاق ما أنا عايز أشوف وشكوا تاني .. اللي حصل إن الهند مضت مع الشركة إنها هي اللي حتمسك عقد الصيانة بتاعها لمدة 20 سنة .. عارف المشكلة فين؟ .. المشكلة في الConcept اللي شغل المقاولات قايم عليه .. إنت بتبقي شغال في مشروع واخده من الباطن و إنت مش عارف هو مين المالك و مين اللي حيسلم و مين اللي حيشتروا منه قطع الغيار ..إنت شركة مقاولات شغالة مثلاً في توريد كابلات الكهرباء بتاعة الغلايات فإنت بتورد الكابلات و إنت مش عارف إنت بتوردها لمين و فين؟ .. مشروع بناء INS Vicramaditya قدام الناس اللي عملته هي شركة Sevmash .. إسمها هو اللي موجود علي كل اللوح و في العقد بس خلينا نكون صرحاء إن الشركة دي متقدرش لوحدها تشيل مشروع بالضخامة دي و عشان كده فيه 200 شركة إشتغلوا من الباطن في المشروع و الشركات دي من جنسيات مختلفة سواء من روسيا أو كرواتيا أو الدانمرك أو ألمانيا أو إيطاليا أو اليابان أو فنلندا أو فرنسا أو النرويج أو بولندا أو السويد أو حتي بريطانيا .. مشروع حاملة الطائرات ده إتفرق دمه بين القبائل و ده خلق مصيبة.
خليني أحكيلك موقف إن في أول رحلة تجربة للحاملة هي أبحرت من روسيا للهند و هي ماشية حصلت مشكلة في الغلاية اللي بتشغل Arresting Wires اللي بتفرمل الطيارات و هي بتهبط .. لما المهندسين بدأوا يشوفوا المشكلة فين لقوا إن المشكلة كانت في العزل بتاع الغلاية .. جم شافوا هو العزل ده جه منين لقوا إن اللي وردته شركة صينية .. راحوا سألوا الشركة الصينية إكتشفوا إن الشركة أصلاً مكنتش تعرف إن العزل اللي هي وردته راح لمشروع حاملة الطائرات .. إزاي Sevmash حتوفر قطع الغيار دي كلها من 200 شركة؟ الله أعلم و الحقيقة الله يكون في عونهم و عون الهنود.
الهند دفعت دم قلبها و حرقت أعصابها عشان تاخد حاملة طائرات مفيهاش أنظمة دفاع جوي .. يعني لو مدمرة باكستانية ضربت صاروخ علي حاملة الطائرات دي فأخرها تضرب Flares عشان الصاروخ بدل ما هو جاي علي حاملة الطائرات يجري ورا Flares دي لكن حماية الحاملة نفسها لازم يكون عن طريق مدمرات و فرقاطات تانية ماشيه جنبها .. اللي فعلاً يضحك هو كم الإنشكاح و الثقة بالنفس اللي شركة Sevmash راسمة بيه نفسها .. الشركة بتقول إنها حتكمل في سكة بناء حاملات الطائرات و بتفكر تقنع البرازيل إنها تعملها حاملة طائرات .. علي رأي واحد صاحبي .. كل واحد دماغه مريحاه .. بمناسبة كل واحد دماغه مريحاه فإنت لازم تفهم إن شراء السلاح نفسه مش صعب .. إنك تشتري سلاح فده زي إنك تروح تشتري عربية مستعملة بالضبط كل اللي إنت محتاج تعمله إنك تذاكر السوق كويس و تكون فاهم إنت بتبص علي إيه و إنت بتعاين العربية اللي حتشتريها عشان تفهم اللي حتشتريه ده عيوبه إيه و اللي بيبيعلك مغلي سعره ولا لا .. شراء السلاح مش علم ذرة .. هو مش صعب بس سهل أوي تتخزوق فيه.
المصادر:
- مقالة بعنوان India really regrets buying this aircraft carrier from Russia نشرت في مجلة The National Interest و ده لينك المقالة الأصلية:
ps://nationalinterest.org/blog/buzz/india-really-regrets-buying-aircraft-carrier-russia-87051 - مقالة بعنوان Russian aircraft carrier ready in 2012 if India pays $2bin more نشرت في موقع وكالة سبوتنيك الروسية وده لينك المقالة الأصلية:
https://sputniknews.com/russia/20081113118299115/ - مقالة بعنوان Medvedev asks Sevmash to deliver Gorshkov soon نشرت في موقع DNAIndia و ده لينك المقالة الأصلية:
/www.dnaindia.com/world/report-medvedev-asks-sevmash-to-deliver-gorshkov-soon-1280228 - مقالة بعنوان Navy scouts for air defense options for INS Vikramaditya نشرت في جريدة Indian Express و ده لينك المقالة الأصلية:
ps://indianexpress.com/article/india/india-others/navy-scouts-for-air-defence-options-for-ins-vikramaditya/ - مقالة بعنوان INS Vicramaditya: How Russia’s extensively modified a Soviet Kiev class warship to provide India with its first modern aircraft carrier نشرت في مجلة Military Watch Magazine و ده لينك المقالة الأصلية:
https://militarywatchmagazine.com/article/ins-vikramaditya-how-russia-extensively-modified-a-soviet-kiev-class-warship-to-provide-india-with-its-first-modern-aircraft-carrier
