سلاح الجو الإيراني .. تاريخ مليان بالصبر ومزيد من الصبر ثم الكثير من الصبر.

لينك التسجيل الصوتي للمقالة علي ساوند كلاود:
https://on.soundcloud.com/aMQ1Q

المفروض إن الكلام اللي حتسمعه من أي حد بيقول علي نفسه فاهم شوية في مجال التسليح إن أهم فرع من أفرع القوات المسلحة في أي بلد في الدنيا هم سلاح الجو .. دول الناس اللي قاعدين علي الحجر .. يمكن في مصر الموضوع كان أوفر أوي لإن لمدة 30 سنة كان بيحكمنا الرئيس الراحل (محمد حسني مبارك) اللي هو كان قائد القوات الجوية فالموضوع كان عامل زي ما تكون طالب في مدرسة ويجيبولك خالك يبقي الناظر .. الكلام ده حتحطه علي جنب علي أساس إنك تبله وتشرب ميته فيما يتعلق بالبلد الغريبة اللي إسمها إيران .. إيران بلد غريبة وبقت اغرب بعد ما قامت فيها الثورة الإسلامية سنة 1979 بس يمكن كلامنا النهاردة حيركز شوية عن سلاح الجو بتاعهم بس قبل ما نبدأ إنت مهم تبقي فاهم هو أنا أساساً يعني إخترت الموضوع ده ليه؟ .. لو تفتكر كنا إتكلمنا قبل كده عن طيارة مقاتلة روسية إسمها سوخوي-35 فلانكر Su-35 Flanker وكنا قايلين إن مصر تعاقدت مع روسيا عشان تشتري 24 طيارة منها .. جم الأمريكان ضغطوا علينا وزي ما تقول كده قالولنا زي ما بنشوف في الأفلام العربي بتاعة زمان لو إشتريتوا الطيارات دي فلا أنتوا ولادي ولا اعرفكوا .. طبعاً إحنا إترعبنا وقولنا للروس يفتح الله .. الروس فضلوا يدوروا علي مشتري للطيارات دي والإيرانيين قالوا إحنا حنشتري .. بس برده مش ده سبب إني حبيت أتكلم عن سلاح الجو الإيراني برده .. الفكرة إن طلع خبر بعدها إن فيه خناقة بين قيادة القوات القوات الجوية الإيرانية وبين الحرس الثوري الإيراني علي مين حيبقي من حقه يطير بالطيارات دي وهو ده السبب إننا عايزين نتكلم عن الكيان الغريب والمريب اللي إسمه سلاح الجو الإيراني .. يعني إيه بلد يبقي ليها سلاحين جو؟

طيارة Su-35 Flanker روسية بتهبط في قاعدة حميميم الجوية في محافظة اللاذقية شمال سوريا يوم 4 مايو 2016.

عشان تبدأ تفهم إجابة السؤال ده واللي يبدوا غريب أنا عارف لازم الأول أعرض ليك بسرعة أوي تاريخ سلاح الجو الإيراني من بعد ما قامت الثورة الإسلامية لإن تاريخ إيران كله قبل الثورة دي حمادة وبعد ما قامت بقي حمادة تاني خالص .. شوف .. من أول يوم للثورة والنظام الإسلامي في إيران مش بيثق في المؤسسة العسكرية الإيرانية بكيس شيتوس حتي .. حاول تفهم إن إيران زيها زي مصر في حتة إن طول عمرها بيحكمها رجل واحد في حالة إيران كان لقبه الشاه وأخر شاه يحكم إيران كان (محمد رضا بهلوي) الله يرحمه واللي مات في مصر علي فكرة ويمكن دي قصة نبقي نحكيها في وقت تاني .. (محمد رضا بهلوي) زيه زي باقي شاهات إيران اللي حكموا البلد من قبله كانوا قاعدين علي الكرسي بحماية المؤسسة العسكرية .. زي مصر .. الفكرة إن لما الثوار الإسلاميين قعدوا علي الكرسي هناك مقالوش زي ما قال الثوار عندنا في مصر بعد ثورة يناير إن الجيش والشعب إيد واحدة .. لا خالص .. مبدأ تعامل النظام الإسلامي مع المؤسسة العسكرية كان تخلص من حمامك القديم وأخص بالذكر سلاح الجو .. الطيار المقاتل من دول يا بيتعدم .. يا بيتحبس وبيعذبوه .. ولو إبن حلال وأمه دعياله بيطردوه بره الجيش .. ده كان السبب ورا إن ظهر الإختراع اللي إسمه الحرس الثوري الإيراني واللي في يوم وليلة بقي مسئول عن ترسانة عسكرية محترمة محدش فيهم تعب عشان خاطر يجيبها.

فكر فيها إن الحرس الثوري الإيراني ده هو هو الحرس الجمهوري في مصر مثلاً .. الحرس الجمهوري بياخد أوامره من رئيس الجمهورية شخصياً مش من وزير الدفاع .. الحرس الجمهوري الهدف منه هو إستمرار وبقاء مؤسسة الرئاسة .. الحرس الثوري الإيراني كده برده هدفه هو الدفاع عن بقاء النظام الإسلامي مش بقاء الدولة الإيرانية لإن فيه فرق كبير أوي بين الإتنين .. الحرس الثوري الإيراني هو جيش جوه الجيش .. مؤسسة عسكرية مستقلة تحت أمر المرشد الأعلي للثورة الإسلامية مباشرة .. كيان مسلح بيتكون من شوية طيارات وشوية سفن علي كام ألف مقاتل من مختلف الأفرع الرئيسية للقوات المسلحة .. فكرة كان محتوم عليها الفشل .. مخلوق مسخ ملوش معني وغالباً مكنش حيؤدي لشيء غير إنهيار المؤسسة العسكرية الإيرانية كلها وكان الإنهيار حيحصل والشروخ بدأت تظهر لحد ما طيب الذكر (صدام حسين) الله يرحمه أنقذه لما هبد هبدته التاريخية لما هاجم إيران عشان تبدأ حرب الخليج الأولي سنة 1980 وإستمرت لحد سنة 1988.

عشان برده تبقي فاهم ومستوعب والأهم تبقي مقدر .. خلينا نبقي متفقين إن ال100 مليون مصري مش كلهم مؤيدين بشكل كامل للرئيس (عبدالفتاح السيسي) اللي زيه زي أي حاكم في الدنيا له ناس بتموت فيه وناس مش طايقاه .. السؤال بقي .. لو بكره الصبح إسرائيل هجمت علينا فهل تتخيل إن رأيك في الأدء الإقتصادي لحكومة الرئيس (السيسي) حيخليك مش مستعد تموت عشان خاطر تدافع عن بلدك؟ .. بالتأكيد لا .. ده اللي حصل في إيران .. (روح الله الخميني) اللي كان وقتها المرشد الأعلي للثورة الإسلامية الناس كانت مقسومة عليه .. ناس مستعدة تموت عشانه وناس عايزه الفرصة إنها تموته بس لما (صدام حسين) هاجم إيران فكل ده إترمي من الشباك .. صحيح إني مش عايز (الخميني) يحكم بس في نفس الوقت أكيد يعني مش حبدله ب(صدام حسين) .. حرب الخليج الأولي أجبرت النظام الإيراني إنه يوقف عملية حل المؤسسة العسكرية وخصوصاً سلاح الجو لإنهم إكتشفوا إنهم معندهمش طيارين .. عدد الطيارين اللي في الحرس الثوري مش مكفيين ومضطرين نعصر علي نفسنا إنتاج إيران كله من الليمون ونحتفظ بشوية الطيارين اللي حيلتنا.

صحيح إن إيران والعراق كانوا دول معاها فلوس من بيع البترول بس خلينا نبقي منطقيين برده إن الحروب بتخرب بيت أي بلد .. في الثمانينات عشان إيران تعوض شوية الخساير في الطيارات بتاعتها ملقوش قدامهم غير إنهم يشتروا شوية طيارات صيني طراز شينجدو إف 7 أو Chengdu F-7 .. سنة 1990 بعد الحرب ما خلصت مش بس إيران اللي كانت مفلسة دي روسيا كمان كانت بتدور علي حد يشتري سلاح منها .. في السنة دي روسيا عرضت علي إيران إنها تبيعلها 27 طيارة MiG-29 و 24 طيارة MiG-31 و 36 طيارة Su-24 اللي هو تحسه أوفر من أوفرات كارفور بتاعة عيد الأم .. إيران قالتلهم إيه ده كله بقولكوا لسه طالعة من حرب خربت بيتي فمعرفتش غير إنها تشتري 18 طيارة ميج 29 فولكروم MiG-29 Folcrum و 12 طيارة سوخوي 24 فينسر Su-24 Fencer وشكراً علي كده .. لك أن تتخيل أن من سنة 1990 لحد 2023 يعني بتتكلم عن 33 سنة إيران مشترتش فيهم طيارة واحدة يتيمة جديدة .. منطقي إنك تسأل نفسك ليه؟ .. معقوله إيران معهاش فلوس .. طب ما إحنا معناش فلوس وبنشتري سلاح برده عادي جداً .. عشان تفهم المنطق ورا ده لازم تفهم إن الإجابة مقسومة نصين:

طيارة MiG-29 تابعة لسلاح الجو الإيراني من ضمن 18 طيارة إشترتهم إيران من روسيا سنة 1990.

النص الأولاني هو مرحلة ما بين سنة 1990 لحد ثورات الربيع العربي سنة 2011 .. في النص ده إيران كانت لسه بتفوق من كارثة حرب الخليج الأولي فكانت في الأول معهاش فلوس بس واحدة واحدة أرباح البترول كانت بتخليهم يقدروا يقوموا علي رجلهم بس تقدر تقول إن حد كان باصصلهم في الصفقات اللي عايزين يعملوها .. في أواخر سنة 1990 إيران قدمت طلب رسمي عشان تشتري 48 طيارة MiG-29 و 24 طيارة MiG-31 بس صادف إن دي السنة اللي إنهار فيها الإتحاد السوفيتي فمحدش في روسيا كان فاضي لوجع الدماغ بتاع بيع السلاح عشان كانت عندهم مصايب أكبر من كده .. سنة 1992 إيران حاولت تاني وقدمت طلب رسمي لروسيا عشان تشتري 48 طيارة MiG-29 و 24 طيارة MiG-27 و 24 طيارة MiG-31 و 12 طيارة Tu-22 ودي قاذفات علي فكرة مش طيارات مقاتلة وكمان طيارتين إستطلاع A-50 اللي هو زي ما تقول كده لستة ال طلبات اللي مراتك بتديهالك عشان تروح تشتريها من كارفور في أوفر عيد الأم بس أميركا المرة دي اللي وقفت في الصفقة وبفكرك إن في الوقت ده الحكومة الروسية مكانتش بتعمل حاجة غير بموافقة أميركا .. سنة 2001 إيران حاولت لتالت مرة إنها تشتري 24 طيارة MiG-31 والمرة دي كمان عرضت علي روسيا إنها تدفع جزء من الصفقة مقدم وكاش وعلي الطرابيزة بس كلاكيت تاني مرة الأمريكان حشروا مناخيرهم في الصفقة اللي بدل ما باظت فهم وافقوا إن روسيا تدي إيران 30 بطارية Pantsyr-S1 ودي صواريخ أرض- جو مضادة للطيارات .. مفيش سنة بتعدي غير وإيران تقدم طلب ويترفض.
النص الثاني من بعد ما ثورات الربيع العربي ولعت والحرس الثوري الإيراني شافها فرصة كويسة إنهم يخربوها ويقعدوا علي تلها .. فيه موقف عشان أحكيهولك حرجعك لسنة 2015 .. في السنة دي قيادة القوات الجوية الإيرانية كانت حتبوس إيد (أية الله علي خامنئي) مرشد الثورة الإسلامية لحد دلوقتي إنهم محتاجين 30 طيارة سوخوي 30 عشان بس يستروا بيهم نفسهم بس الطلب إترفض من الحرس الثوري الإيراني .. ليه؟ .. الفكرة إن الحرس الثوري الإيراني فاتح كذا جبهة .. عندك اليمن اللي الحوثيين فيها بياخدوا دعم من الحرس الثوري .. عندك سوريا اللي الحرس الثوري واقف فيها في صف (بشار الأسد) .. عندك لبنان واللي حزب الله يبقي دراع الحرس الثوري هناك .. 3 جبهات مفتوحة كلهم عايزين فلوس فمش وقته خالص إننا نجيب طيارات .. فيه حاجات أهم.

سنة 1988 يدوبك بعد ما حرب الخليج الأولي خلصت الإتحاد السوفيتي عرض علي إيران إنها تشتري 36 طيارة Su-24MK بس وقتها إيران مكنش عندها السيولة الكافية إنها تمول صفقة بالحجم ده فقبلت بس إنها تشتري 12 طيارة إتسلموا ليها سنة 1992.

اللي غير رأي النظام في إيران إن جه الوقت إنهم فعلاً يشتروا طيارات جديدة هو لما شافوا بعنيهم طياراتهم القديمة وهي بقت بتقع لوحدها خلال طلعات تدريبية مش لسبب غير إنها طيارات قديمة .. الطيارات اللي تحت إيد سلاح الجو الإيراني هي طيارات أمريكاني من أيام ما كان الشاه (محمد رضا بهلوي) بيحكم علي شوية الطيارات اللي إشتروها من الإتحاد السوفيتي سنة 1990 .. تخيل إن الطيارة تبقي شبه عربيتك القديمة .. مين فينا مجاش عليه وقت وهو بيدور عربيته الصبح وهو رايح الشغل بيدعي ربنا إنها متعطلش بيه وهو ماشي .. عشان برده أحطك في الصورة بص كده علي حوادث سقوط الطيارات المقاتلة اللي تحت إيد إيران وخد بالك من تواريخ الحوادث:

يوم 24 مايو 2022 إتنين طيارين إيرانيين ماتوا لما وقعت بيهم طيارتهم Chengdu J-7 الصيني علي بعد 186 كيلومتر من قلب مدينة أصفهان.
في فبراير 2022 إتنين طيارين إيرانيين برده ماتوا لما طيارتهم F-5 الأمريكاني وقعت بيهم جوه مدرسة في مدينة تبريز وكمان فيه مواطن كان معدي جنب المدرسة لما الطيارة وقعت ومات هو كمان.
يوم 1 يونيو 2021 طيارة F-5 برده وقعت جنب مدينة إسمها دسبول والإتنين طيارين اللي فيها ماتوا.
في ديسمبر 2019 وقعت طيارة MiG-29 علي الحدود بين إيران وأذربيجان .. الطيارة دي كانت لسه طالعه من الورشة بعد ما إتعملها عمرة كاملة والطيار خد بيها لفة يجربها فوقعت بيه.
يوم 26 أغسطس 2018 طيارة F-5 لتالت مرة تقع المرة دي وهي بتهبط في قاعدة ديسبول الجوية والطيار مات فيها.

طيارة F-5 تابعة لسلاح الجو الإيراني بتهبط في قاعدة تشابهار الجوية ضمن مناورة عسكرية حصلت يوم 23 يونيو 2009.

وشوف رغم كل الكوارث دي إلا إن أنا شخصياً شايفها طبيعية جداً .. مبدأياً أي قوات جوية في العالم أيا كان جنس ملتها إيه عادي إن يقع ليها طيارات بس اللي بيخلي القوات الجوية الإيرانية في حتة تانية خالص هو إنها بتشتغل مع طيارات بقالها أكتر من 40 سنة في الخدمة يعني طيارات المفروض تتكهن وتطلع معاش .. لسنين وسنين زي ما حكينا فضل العمود الفقري للقوات الجوية الإيرانية هي طيارات أمريكاني قديمة من أيام الشاه .. طيارات زي F-4 و F-5 خلاص بقي مكانها المتحف بس يمكن ده وقت نجيب سيرة موضوع علي جنب كده لما بيبقي عندك فكرة عنه بيتعرف إنك شبح في مجال التسليح ده .. زمان أيام الشاه (محمد رضي بهلوي) إيران إشترت 80 طيارة F-14 Tomcat إستلمت منهم 79 .. لمن لا يعلم يعني الطيارة F-14 Tomcat كانت هي بطلة فيلم Top Gun الأولاني وهي برده بطلة الجزء الثاني اللي شفتها في الDogfight الأخرانية في فيلم Top Gun: Maverick اللي سبحان الله يعني وقعت طيارتين Su-57 بس مش دي القضية دلوقتي .. القضية إن الطيارة F-14 Tomcat واحدة من أهم عيوبها إنها عايزه طقم ميكانيكية وكهربائية قاعدين ليها .. هي طيارة حلوة أوي بس صيانتها كتير ورخمة وبتحرق قطع غيار زي ما إنت بتحرق في كياس مناديل لما يكون عندك دور برد .. لما قامت الثورة الإسلامية كل المهندسين الأمريكان اللي كانوا في إيران عشان يدربوا المهندسين الإيرانيين علي صيانة الطيارات دي مشوا من البلد فتقريباً وقتها كل ما تسأل محلل عسكري يقولك إيران مقدمهاش حل غير إنها تبيع ال79 طيارة F-14 Tomcat خردة لإنهم لا حيعرفوا يصحلوها ولا حيعرفوا يجيبولها قطع غيار بعد ما أميركا فرضت حظر بيع أسلحة علي إيران .. رغم كل ده المهندسين الإيرانيين في القوات الجوية عرفوا مش بس يحافظوا علي الطيارات دي إلا إنها لسه في الخدمة لحد دلوقتي .. صدقني لو قلتلك إن واحدة من أهم أسباب إن إيران صمدت قدام العراق في حرب الخليج الأولي هو سرب طيارات F-14 Tomcat ده.

طيارات F-14 Tomcat تابعة لسلاح الجو الإيراني بتشارك في عرض عسكري ضمن فعاليات العيد القومي للجيش الإيراني يوم 17 إبريل 2012.

مهم أوي تبقي فاهم إن قرار إيران إنها تشتري 24 طيارة Su-35 Flanker مش سببه إن فجأة كده وبدون مقدمات الحرس الثوري وقيادة سلاح الجو بقوا حبايب خصوصاً إن علي عكس رغبة الحرس الثوري فالطيارات الجديدة حتبقي تحت تصرف قيادة القوات الجوية ودي حاجة منرفزاهم جداً لإن أساساً سبب إن الصفقة دي مشيت هي إن الحرس الثوري الإيراني عمل جميلة في روسيا إنه سلفها مئات من الطيارات بدون طيار Drones اللي الروس محتاجينها في حربهم اللي مش عايزه تخلص في أوكرانيا .. بس تبقي النقطة اللي الناس كلها في إيران مقتنعة بيها إن ال24 طيارة دول مش كفاية .. بالميت خالص القوات الجوية الإيرانية محتاجة 60 طيارة من جيل 4.5 عشان تبدأ يتقال عليها قوات جوية بحق ربنا وعشان كده فيه كلام إن إيران حتطلب حبة طيارات تانيين بس يمكن عشان روسيا معندهاش القدرة إنها تبني العدد ده من الطيارات فممكن إيران تقترح إنها هي اللي تصنع الطيارات برخصة من روسيا وده هو هو الإتفاق بالكربون اللي روسيا مضته قبل كده مع الهند وخلي الهنود يصنعوا 140 طيارة Su-30 بإيديهم.

بنتين إيرانيتين بيتفرجوا علي طيارتين Su-27 روسيتين ضمن فريق الأكروبات الروسي اللي شارك في معرض طهران الجوي يوم 16 نوفمبر 2016.

خليني أختم بنقطة وهي إنك تبقي فاهم إن يمكن جه الوقت إن القيادة الإيرانية وأنا هنا بتكلم عن القيادة السياسية بقت شايفة إن أيوه سلاح الجو عنده حق .. إحنا لسنين وسنين والحرس الثوري عمال يسحب في مصاريف وخارب الميزانية .. صحيح إن من وجهة نظر المصلحة الإيرانية فالحرس الثوري شايف شغله وبيعمل المطلوب منه بس برده إنت شايف بعنيك وإنت البساط بيتسحب من تحت رجلك وأنا هنا مش بتكلم عن إسرائيل علي فكرة أنا بتكلم عن دول الخليج كمان .. زمان كانت سيرة سلاح الجو الإيراني بترعب الخلايجة بس دلوقتي الوضع إختلف خالص يا لينا .. السعوديين تحت إيدهم دلوقتي حوالي 80 طيارة F-15SA ودي نسخة متعدلة من طيارات F-15E Strike Eagle الأمريكاني بتقدر تشيل لحد 12 صاروخ جو- جو طراز AIM-120 AMRAAM بعيد المدي .. الإماراتيين تحت إيدهم أسطول محترم من طيارات F-16E/F Block 60 اللي هي من أحدث النسخ اللي نزلت من الطيارة الرائعة F-16 Fighting Falcon وكمان الإماراتيين دافعين فلوس 80 طيارة Rafale F4 الفرنساوي وحيستلموهم بداية من 2027 .. نقطة تانية مش عايزك أدخلك في تفاصيلها أوي إن حتي طيارات Su-35 اللي إيران حتاخدها فيها رادار من اللي بيتسموا PESA ودي إختصار Passive Electronically Scanned Array في حين إن سواء طيارات F-15SA أو F-16E/F Block 60 أو حتي Rafale F-4 فيهم رادار عفي شوية بيتسمي AESA ودي إختصار Active Electronically Scanned Array .. فاللي أنا عايز أقوله إن حتي لو إيران بقي تحت إيدها فعلاً 60 طيارة Su-35 فبرده سلاح الجو بتاعها حيبقي متأخر أوي عن سلاح الجو السعودي أو الإماراتي وطبعاً الإسرائيلي.

المصادر: