موضوعنا اللي حنتكلم عنه النهاردة هو Cruise Missiles أو الصواريخ بعيدة المدي .. عشان نبدأ ندخلك في الموضوع خلينا نبدأ بإننا نتخيل للحظات إن قيادة القوات المسلحة المصرية قررت إنها تدمر سد النهضة في أثيوبيا بعمل عسكري .. سيناريو فيه خيال علمي أنا عارف بس استحملني شوية .. عشان جنرالات الجيش المصري ينفذوا المهمة دي فيه عندهم حلين:
- الحل الأول إنك تبعت سرب مقاتلات F-16 Fighting Falcon أو Rafale متحملين بصواريخ جو-أرض عشان يدمروا السد في غارة واحدة .. مشكلة الحل ده إنك لازم تعمل حسابك إيه اللي ممكن يحصل لو مقاتلة واحدة من السرب اللي حتبعته وقعت سواء تم إسقاطها أو حصلها عطل فني .. إزاي حتبعت فرقة إنقاذ عشان ترجع الطيار؟ .. كمان لازم تعمل حسابك إن المقاتلات دي يبقي فيها كمية وقود تكفي رحلة الذهاب والعودة ولو حصل والقوات الجوية الأثيوبية إعترضت المقاتلات المصرية بسرب مقاتلات MiG مثلاً .. ساعتها حيحصل إشتباك جوي بين الطرفين وساعتها المقاتلات المصرية حتحرق وقود زيادة .. فهل فيه مقاتلات حتقع من الجو لمجرد إن الوقود بتاعها خلص؟ .. عشان كده فكرة الغارة الجوية ده حل معقد ومحتاج تخطيط وتنفيذه مش سهل خالص علي فكرة خصوصاً بسبب عامل مهم أوي هو إن أثيوبيا نفسها بعيدة عن مصر.
- الحل الثاني إنك تبعت مدمرة أو فرقاطة عليها صواريخ Cruise Missiles بعيدة المدي سواء صواريخ توماهوك Tomahawk الأميريكية أو صواريخ كاليبر Kalibr الروسية وتقدر تدمرلك سد النهضة وعلي فكرة المدمرة ممكن تطلق الصواريخ دي وهي لسه جوه المياه الإقليمية المصرية .. ده معناه إنك حتحقق المطلوب من غير ما تبعت مقاتلات ولا تخاف علي طيارينك ولا تقعد تحسب يا تري يا هل تري الوقود حيكفي ولا لا.
فكرة إنك يبقي عندك هدف عايز تدمره والهدف ده بعيد عنك بس بدل ما تبعت سرب مقاتلات في غارة جوية وتخاطر إن ممكن مقاتلة منهم تقع وتقعد تحسب في تكاليف وخطط إنقاذ محتملة وصداع وهم ما يتلم تقوم باعت سفينة أو غواصة تطلق شوية صواريخ Cruise Missiles تدمرك الهدف اللي إنت عايز تدمره وإنت حاطط رجل علي رجل قد تكون مغرية بس علي فكرة قديمة .. الأمريكان من التسعينات وهم بيستخدموا صواريخ Tomahawk واستخدموها تقريباً في كل الحروب اللي دخلوها سواء في الشرق الأوسط أو شمال أفريقيا أو يوغوسلافيا أو أفغانستان .. يعني جيل سنة 1990 اللي ملحقش يشوف مصر في كأس العالم شاف أميركا وهي بتضرب اللي هي عايزاه بالصواريخ دي .. المميز أوي في صواريخ Cruise Missiles دي إنها بتقدر تدمرلك أكثر من هدف معادي علي بعد 1500 كيلومتر والصاروخ من دول بيطير بسرعه تعدي 900 كيلومتر في الساعة يعني تقريباً نفس سرعة طيارةنفاثة.
زي ما قلتلك إحنا في مصر عندنا لو حبينا نشتري صواريخ Cruise Missiles يا إما نروح لصواريخ توماهوك Tomahawk الأميريكية أو صواريخ كاليبر Kalibr الروسية .. ولإن الإنترنت مليان بالكلام عن صواريخ Tomahawk فإحنا في المقالة دي حنحاول نركز شوية كلامنا عن صواريخ Kalibr الروسية واللي تعتبر صواريخ Cruise Missiles متجربة قبل كده .. وخليني بسرعة أوي أقولك إيه هو الCV بتاع الصواريخ الروسية دي:
- يوم 7 أكتوبر 2015 فيه فرقاطة روسية من طراز Gepard-Class اسمها داجستان Dagestan ومعاها 3 فرقاطات أصغر من طراز Buyan-Class Corvette بيبحروا في بحر قزوين أطلقوا 62 صاروخ Kalibr .. الصواريخ دي اللي طول الواحد فيها حوالي 9 متر قدروا يطيروا مسافة 1500 كيلومتر .. يعني بتتكلم عن 62 صاروخ طاروا مع بعض فوق المجال الجوي الإيراني وعدوه ودخلوا المجال الجوي العراقي وعدوه عشان ينزلوا علي أهداف تابعة لداعش والجيش السوري الحر في قلب سوريا .. صحيح وزارة الدفاع الأميريكية قالت إن فيه 4 صواريخ من ال62 وقعوا في السكة فوق المجال الجوي الإيراني بس ده ميمنعش إن ده يعتبر نجاح كبير للصواريخ الروسية دي.
- في نوفمبر 2015 الفرقاطة داجستان Dagestan برده أطلقت 18 صاروخ Kalibr فوق أهداف في سوريا.
- يوم 9 ديسمبر 2015 فيه غواصة روسية شغالة بمحركات ديزل من طراز Kilo-Class اسمها روستوف نا دونو Rostov-na-Donu أطلقت هي كمان عدد من صواريخ Kalibr Cruise Missiles فوق أهداف في سوريا.
- خلال سنة 2016 فرقاطات روسية المرة دي في البحر المتوسط نفذت غارات كتير أوي فوق مدينتي إدلب وحلب بصواريخ Kalibr Cruise Missiles.
أنا هنا مش بدافع ومش بشجع ومش بهلل للي بتعمله روسيا في سوريا لإن اللي بتعمله القوات المسلحة الروسية من قصف للمدنيين السوريين يعتبر جريمة حرب .. اللي عايز أوصله ليك إن في الحالات الأربعة اللي ذكرتها فيه حاجة لازم تاخد بالك منها .. فعلياً الروس ليهم قاعدة جوية في سوريا يقدروا بسهولة يبعتوا سرب مقاتلات سواء ميج MiG أو سوخوي يدمروا الأهداف اللي هم عايزينها .. في المرات اللي الروس إستخدموا فيها صواريخ Kalibr ضد أهداف في سوريا كان أسهلهم وأرخصلهم إنهم يبعتوا مقاتلات لتدمير الأهداف دي بس هم قرروا يستخدموا الصواريخ دي كنوع من الدعاية .. جزء من السبب اللي الروس في سوريا عشانه هو مجرد حملة Marketing أو دعاية للتكنولوجيا العسكرية الروسية .. بس في حالة إنك فعلاً مهتم بصواريخ Kalibr فخلينا نكلمك عنها شوية:
الروس بسم الله ما شاء الله عاملين أكثر من 12 نسخة من الصواريخ دي .. النسخ دي مختلفين عن بعض في المدي وطريقة الإطلاق وسرعة الطيران وطبيعة الهدف اللي بتستهدفه وبينهم إختلافات حتي في طول الصاروخ نفسه .. النسخ دي أطوالها بتترواح من 6 ل9 متر .. بس المشترك بينهم كلهم هو إن صواريخ Kalibr الثابت فيها إنها بتقدر تشيل شحنة متفجرة كتلتها 400 كيلوجرام أو بتقدر تشيل رأس نووي .. بس عشان الدنيا متوسعش مننا فخلينا نقسمهم ل4 أقسام:
- صواريخ Kalibr المضادة للسفن.
- صواريخ Kalibr المضادة للأهداف الأرضية.
- صواريخ Kalibr المضادة للغواصات .
- صواريخ كلوب Klub ودي النسخة اللي ممكن تتصدر من صواريخ Kalibr.
خلينا نبدأ بصواريخ Kalibr المضادة للسفن:
دول حلف شمال الأطلسي NATO بيسموا النسخة دي SS-N-27 بس الروس بيسموا صواريخ Kalibr اللي بتطلق من علي السفن 3M54T وبيسموا صواريخ Kalibr اللي بتطلق من علي الغواصات 3M54K .. النسخ دي ملهاش مدي طيران كبير يعني أخرهم 430-760 كيلومتر ومصممين بحيث يطيروا علي إرتفاع منخفض أوي من سطح البحر عشان الرادارات متلقطهمش .. المميز أوي في النسخ دي إنها لما بتقرب من الهدف بتاعها مش بتطير في خط مستقيم إنما بتعمل مناورة عشان تتفادي أنظمة الدفاع الجوي علي السفن المعادية .. اللي بيحصل إن الصاروخ من دول بمجرد ما بيقرب من السفينة اللي رايح يدمرها سرعته بتزيد من 0.8 ماخ لحد ما تبقي 3 ماخ يعني 3 أضعاف سرعة الصوت وبيبدأ ينزل لتحت بحيث يطير علي إرتفاع 4.6 متر بس من سطح البحر.
صواريخ Kalibr المضادة للأهداف الأرضية:
دول NATO بيسموا النسخة دي SS-N-30A بس الروس بيسموهم 3M14T و 3M14K والفرق بينها وبين النسخ المضادة للسفن حاجتين: الأولي إن النسخ دي لما بتقرب من الهدف سرعتها مش بتزيد ل3 ماخ .. الثانية إن النسخ دي من الصواريخ ليها مدي طيران ممكن يعدي 3000 كيلومتر.
صواريخ Kalibr المضادة للغواصات:
الروس بيسموا النسخ دي 91RT و 91RE والصواريخ دي بيتركب فيها طوربيدات مضادة للغواصات مدي الواحد فيهم حوالي 65 كيلومتر.
صواريخ كلوب Klub Cruise Missiles:
الصواريخ دي تعتبر نسخة طبق الأصل من صواريخ Kalibr بس الفرق إن مدي طيرانها مبيعديش 250 كيلومتر والسبب في كده إن فيه حاجة اسمها Missile Technology Control Regime ودي عبارة عن معاهدة دولية بتراقب صفقات بيع الصواريخ والطائرات بدون طيار والمعاهدة دي مش بتجبر الدول المصدرة للسلاح علي حاجة ومش بتفرض عقوبات بس ليها قواعد بتقول إن مينفعش دولة زي روسيا أو أميركا تبيع لدولة زي مصر مثلاً صواريخ Cruise Missiles مداها أكثر من 300 كيلومتر .. صواريخ Klub دي حالياً دول كتير إشترتها من روسيا زي الصين والجزائر وفيتنام والقوات البحرية بتاعة الدول الثلاثة بتستخدم الصواريخ دي من علي متن غواصات من طراز Kilo-Class اللي إشتروها من روسيا برده .. إيران فيه كلام إن عندها الصواريخ دي .. الهند بقي اللي مركباهم علي غواصات Kilo-Class وكمان الفرقاطات ال6 من طراز Talwar-Class اللي بتمتلكهم الهند.
المصدر:
- مقالة بعنوان Why Russia’s Enemies Fear the Kalibr Cruise Missile نشرت في مجلة The National Interest وده لينك المقالة الأصلية:
http://nationalinterest.org/blog/the-buzz/why-russias-enemies-fear-the-kalibr-cruise-missile-19129?page=2
