موضوعنا اللي حنتكلم عنه النهاردة هو مقاتلات F-35 اللي حتستلمها إسرائيل .. بما إننا بقينا من القلائل اللي شايفين إن إسرائيل هي العدو الأبدي للعرب و إن عمر ما إسرائيل حتبقي حليفة أو صديقة لينا فحتبقي فرصة كويسة إننا نتكلم شوية عن أحدث مقاتلة تدخل الخدمة في سلاح الجو الإسرائيلي .. شهر ديسمبر 2016 إسرائيل إستلمت أول مقاتلتين F-35 و إتعمل إحتفال رسمي بوصول المقاتلتين دول لقاعدة جوية إسرائيلية في صحراء النقب و فيه عندك صورة لوزير الدفاع الإسرائيلي (أفيجادور ليبرمان Avigador Lieberman) و هو متصور جوه قمرة القيادة و علي وشه إبتسامة بلهاء و باين عليه إنه سعيد سعادة الفيل اللي بيبلبط في الطين .. أول شهر مايو 2017 إسرائيل إستلمت 3 مقاتلات جداد و برده إسرائيل عملت إحتفال رسمي ليهم وهم بيهبطوا في قاعدة نيفاتيم Nevatim الجوية .. بكده إسرائيل بقي عندها لحد دلوقتي 5 مقاتلات F-35 و دول الأساس بتاع ما يسمي سرب النسر الذهبي Golden Eagle Squadron اللي هو سرب كامل من مقاتلات F-35 حيخدم في سلاح الجو الإسرائيلي.
لمعلوماتك إسرائيل ناوية تشتري من أميركا 45 مقاتلة F-35 إضافية بحيث إن Golden Eagle Squadron ده في الأخر يشمل 50 مقاتلة و كل كام شهر إسرائيل حتستلم كام مقاتلة لحد ما التسليمة تخلص .. بس مش دي المشكلة .. المشكلة مش في إن إسرائيل حيبقي عندها 50 مقاتلة F-35 و مفيش ولا دولة عربية حتمتلك مقاتلة إمكانياتها قريبة من إمكانيات المقاتلات دي .. المشكلة الحقيقية إن المقاتلات اللي حتستلمها إسرائيل حتبقي مختلفة شوية عن باقي مقاتلات F-35 اللي حتبقي شغالة في أي حتة في العالم.
المقاتله F-35 من تصنيع شركة Lockheed Martin الأميريكية و الشركة دي صنعت 3 نسخ مختلفة من المقاتلة اللي هم F-35A و F-35B و F-35C .. الF-35A دي النسخة التقليدية و العادية خالص و حرف A بيرمز للقوات الجوية Air Force يعني النسخة دي من مقاتلات F-35 حتروح للقوات الجوية الأميريكية و تقدر أي دولة من اللي معندهاش حاملات طائرات إنها تشتريها و حتبقي زي الفل .. اللي حيحصل إن ال50 مقاتلة اللي حتشتريهم إسرائيل حيبقوا F-35A و ده لإن إسرائيل فعلاً معندهاش حاملات طائرات .. لحد دلوقتي الكلام منطقي .. مقاتلات F-35A ليها القدرة علي الإقلاع و الهبوط العمودي زيها زي أي طيارة هليكوبتر بس القدرة دي إلي حد ما تقليدية و مفيهاش Options كتير زي مثلاً اللي موجودة في النسخة F-35C و اللي حتروح لسلاح مشاة البحرية الأميريكية US Marine Corpse و عشان كده مقاتلات F-35A بيتقال عليها Conventional Takeoff and Landing و إختصاراً CTOL.
إسرائيل حتدفع علي المقاتلة الواحدة 110 مليون دولار يعني المفروض إنها حتدفع 5.5 مليار دولار .. لكن .. و خلي بالك أوي من الكلام اللي جاي .. إسرائيل فعلياً مش حتدفع ولا مليم من الفلوس دي كلها و السبب إن قبل ما الرئيس الأميريكي (باراك أوباما) يمشي من منصبه وقع علي إتفاقية معونة عسكرية بقيمة 38 مليار دولار علي مدي 10 سنين و الكونجرس وافق فعلياً علي الإتفاقية دي .. يعني إسرائيل حتستلم 50 مقاتلة F-35 من غير ما تدفع فيهم ولا مليم .. بعد ما إسرائيل تستلم المقاتلات هي حتبدأ تشيل و تحط في مكونات معينة بحيث إن في الأخر خالص النسخة اللي حتدخل الخدمة في سلاح الجو الإسرائيلي حيبقي إسمها F-35I و حرف الI ده بيرمز لIsrael أو إسرائيل و اللي الإسرائيليين حيسموها Adir أو عدير و دي كلمة عبري معناها العظيمة بالعربي.
شركة Lockheed Martin قعدت سنين تصنع في المقاتلة F-35 و عشان تقدر توصل للمنتج النهائي ده إتعاونت مع 8 دول تانية من ضمنهم إسرائيل و اليابان و كوريا الجنوبية .. طبعاً كل الدول الثمانية اللي إشتغلت في تصنيع و تطوير الF-35 ناويين يشتروا منها بس حتي فيه دول تانية زي بلجيكا مشتركتش في تصنيعها بس قالت إنها ناوي تستبدل أسطول مقاتلات F-16 القديم بتاعها بأسطول جديد من مقاتلات F-35 … لحد دلوقتي و لحد اللحظة اللي انت بتقرأ فيها المقالة دي شركة Lockheed Martin صنعت و باعت أكثر من 200 مقاتلة F-35 و شغالين دلوقتي علي تسليم حوالي 700 مقاتلة و علي فكرة ال700 دول لدول تانية غير أميركا لإن أميركا لوحدها ماضية عقد مع Lockheed Martin عشان تشتري منها 2443 مقاتلة F-35 .. جمع الإتنين علي بعض تلاقي نفسك بتتكلم عن مقاتلة حيتباع منها 3100 حول العالم و ده علي أقل تقدير .. فيه عندك جدول ل13 دولة باين فيه كل دولة ناوية تشتري كام مقاتلة F-35 .. بس عايزك تاخد بالك من كندا في الجدول:
دلوقتي الكنديين عايزين أو خلينا نقول كانوا عايزين يشتروا 63 مقاتلة F-35A بس هم ناويين يرجعوا في كلامهم و يشتروا 63 مقاتلة F/A-18 Super Hornets من تصنيع شركة Boeing .. المشكلة إن لو كندا عملت كده فشركة Lockheed Martin حتلاقي إن في الأخر بدل ما كانت حتبيع 714 مقاتلة لدول غير أميركا و حتبيع 2443 مقاتلة لأميركا يعني بتتكلم عن 3156 فلو الكنديين إنسحبوا فكده مبيعات المقاتلة F-35 حتبقي 3093 بس وده ممكن يعمل مشكلة كبيرة .. الأمريكان لوحدهم حيشتروا 78.5% من إجمالي مقاتلات F-35 اللي حتتصنع فأميركا لوحدها شايلة جزء كبير من تكلفة المشروع بس لو كندا إنسحبت فكده تكلفة المشروع مش حتقل زي ما كانت شركة Lockheed Martin بتقول .. الفكرة بمنتهي البساطة إنك لما تبيع كتير حتكسب كتير فانت ممكن تقلل من سعر المنتج بتاعك .. بس لو فجأة حد كان ناوي يشتري منك و قالك مش شاري فانت كده أرباحك حتقل جامد و مش حيبقي عندك القدرة إنك توفي بوعدك إن تقلل السعر .. الكلام إن فيه دول تانية ممكن تخش تقول إنها عايزه تشتري مقاتلات F-35 زي بلجيكا و إسبانيا أو سويسرا.
المصدر:
مقالة بعنوان Look Who’s Buying Lockheed Martin’s F-35 Now! نشرت في Website إسمه The Motley Fool وده لينك المقالة الأصلية:
https://www.fool.com/investing/2017/05/07/look-whos-buying-lockheed-martins-f-35-now.aspx
