موضوعنا النهاردة اللي حنتكلم عنه هو الدبابة الألمانية ليوبارد-2 أو Leopard-2 ودي تبقي الBMW بتاعة الدبابات .. إحنا عارفين إن الألمان بيعرفوا يصنعوا مكن و عربيات و عارفين إن دي مش بس شغلتهم دي لعبتهم .. لما الألمان حبوا يدخلوا مجال صناعة الدبابات فالناس دي عملت دبابة صف أول .. دبابة متقلش حاجة عن الدبابة M1 Abrams الأميريكية أو Challenger 2 البريطانية و زي ما قلتلك الألمان صنّعوا الدبابة دي كأنهم بيصنّعوا عربية ملاكي .. فكرة إنها في ساعات الليل بتبقي فعلاً صعب أوي إنك تلقطها .. الألمان نفسهم لما بدأوا ينتجوا الدبابات دي قالوا إنهم عملوا دبابة متفرقش كتير عن الAbrams الأميريكية اللي هي تعتبر مثلاً العمود الفقري لسلاح الدبابات المصري .. مجرد بصة سريعة للحاجات المشتركة بين الLeopard-2 و الAbrams و حتبدأ تقدر ده أوي:
- الدباباتين تقريباً وزنهم واحد 60 طن و ليهم محركين بيدوك نفس الHorsepower اللي هو 1500 حصان و الدبابتين أقصي سرعة ليهم 64 كيلومتر في الساعة و الدبابتين برده ليهم نفس المدفع الرئيسي عيار 120 مليمتر من تصنيع نفس الشركة اللي هي راينميتال Rheinmetall وعلي فكرة دي برده الشركة اللي بتصنع الدبابة Leopard.
- الدبابتين ليهم القدرة علي تدمير الدبابات الروسي سواء من علي مسافات قريبة أو بعيدة و الإتنين يقدروا يستحملوا ضربة مباشرة من دانة دبابة روسية يكون عيار مدفعها هو كمان 120 مليمتر.
حتي الإختلافات بين الدبابتين مش سببها إن واحدة فيهم أحسن من التانية قد ما هي مجرد إختلافات في فلسفات التصميم .. زي بالضبط الفرق بين العربيات الأمريكاني و الألماني .. محدش يقدر يقول صراحة كده إن الBMW أو Mercedes أحسن من Cadillac بس اللي نقدر نقوله إن التصميم الهندسي لBMW مبني علي فلسفة مختلفة شوية عن تصميم الCadillac .. يعني مثلاً:
- الأمريكان بيحبوا العربيات اللي صوتها عالي وده حتي إنعكس في تصميمهم للدبابات لإن الAbrams فيها موتور صوته عالي أوي زي ما قلت بيديك 1500 حصان وده أساساً موتور تربيني أقل ما يقال عنه إنه حوت بنزين ولإنه موتور بنزين مش ديزل فلما بيجي يدور بيدور بسرعة زيه زي أي عربيه ملاكي .. العكس بقي في Leopard لإن الألمان حطوا فيها موتور ديزل بيديك Range أكبر يعني الدبابة الLeopard-2 بتمشي مسافات أكبر من الAbrams علي نفس التفويلة.
- سمعة الAbrams إنها دبابة محصلتش جت أساساً من إن الأمريكان حطولها دروع من اليورانيوم المستنفذ وحتي الدانات بتاعتها هي كمان مصنوعة من اليورانيوم المستنفذ .. الألمان قفلوا كل المفاعلات النووية بتاعتهم و رافضين فكرة إن يتحط علي دباباتهم أي حاجة ليها علاقة باليورانيوم من قريب ولا من بعيد .. عشان الألمان يعوضوا العيب ده تلاقي إن موديل Leopard 2A5 نزلوا البرج بتاعه عريض شويه عشان درعه يبقي سميك و يقدر يستحمل ضربة دانة مباشرة و الموديل الأحدث منه Leopard 2A6 زودوا فيه مدفع رشاش عيار 55 مليمتر لمجرد إنهم يزودوا القوة التدميرية و كمان زودوا الدروع بتاعة الدبابة.
بس اللي حنحكيه النهاردة هو إزاي الأتراك لبسوا في الحيط جامد لما إستخدموا الموديل الغلط من الLeopard-2 في المكان الغلط (اللي هو سوريا) ضد العدو الغلط (داعش و الأكراد) وده خلي العلاقات التركية الألمانية تبقي زي الزفت مع العلم إن البلدين المفروض إنهم أعضاء في حلف شمال الأطلسي NATO يعني المفروض إنهم حبايب و ولاد عم و جيران كمان .. خلينا نبدأ الحكاية بإني أقولك إن مشكلة الألمان إن ضميرهم لسه بيأنبهم من اللي عملوه في الحرب العالمية الثانية و عشان كده رغم إن الألمان بيصنعوا سلاح حلو إلا إنهم مش بيبيعوه لأي حد زي ما الأمريكان أو الفرنسيين أو الروس بيعملوا .. يعني مثلاً الدبابة Leopard-2 دي في الخدمة حالياً في 18 دولة منهم دول أعضاء في NATO بس لما السعودية حبت تشتري عدد من الدبابات دي كان ما بين 400 ل800 دبابة ورغم إن صفقة زي دي حتدخل فلوس حلوة أوي للألمان إلا إن ردهم كان سوري إحنا مش بنبيع سلاح لناس بتنتهك حقوق الإنسان و بتقتل مدنيين في اليمن .. ده حصل فعلاً .. وعشان كده السعوديين خدوا بعضهم و راحوا إشتروا دبابات Abrams أميريكية لإن الأمريكان مبيفرقش معاهم يبيعوا سلاح لمين طالما الزبون حيدفع رغم إن السعودية فعلياً عندها أسطول من دبابات Abrams بيتقدر بحوالي 400 دبابة بس تقول إيه اللي معاه قرش و محيره يروح يشتري دبابات و يحطها في المخازن لحد ما تعفر.
في بدايه الالفينات استلم حكم تركيا طيب الذكر (رجب طيب أردوغان) .. في البدايات خالص كانت العلاقات بين الأتراك و الألمان حاجة كده مش زي السمن علي عسل لا دي كانت زي النوتيلا و الأيس كريم .. في الوقت ده تركيا إشترت من ألمانيا 354 دبابة Leopard 2A4 اللي وقتها كانت طلعت بره الخدمة في القوات المسلحة الألمانية .. بقول تاني .. لما الأتراك إشتروا الدبابات دي كانت طلعت بره الخدمة في ألمانيا .. رغم إنك ممكن تستغرب إن إزاي الأتراك يشتروا دبابات قديمة كده بس أحب أقولك إن وقتها كان الأتراك معندهمش غير دبابات M60 Patton الأميريكية اللي الأمريكان إستخدموها في الحرب العالمية الثانية .. عشان أشبهالك خليني أقولك إن الأتراك كانوا عايشين علي عربية فيات 128 و إشتروا عربية Mercedes موديل الثمانينات .. صحيح هي عربية مستعملة و قديمة بس تعتبر نقلة كبيرة عن الفيات 128 .. بس مش دي المشكلة .. المشكلة إن يقال إن جزء من الصفقة إن الألمان إشترطوا علي الأتراك إن الدبابات دي متستخدمش في العمليات العسكرية اللي بتعملها القوات المسلحة التركية ضد الأكراد .. مش بقولك الألمان ضميرهم ناقح عليهم .. يمكن عشان كده الأتراك خدوا ال354 دبابة دول نشروهم علي طول حدودهم مع روسيا .. بس تاني بقول إن يقال إن الكلام ده حصل و مفيش أي دليل يؤيد أو ينفي ده.
سنه 2016 الأتراك غيروا رأيهم و بدأوا يودوا دبابات Leopard 2A4 دي لسوريا عشان تشارك في عملية درع الفرات وده كان الإسم بتاع العملية اللي شنتها القوات المسلحة التركية ضد داعش .. أحد أسباب إن الأتراك غيروا رأيهم إن في بداية العمليات خالص إتدمرت أكثر من 12 دبابة تركية من طراز M60 Patton علي إيد صواريخ سواء كردية أو داعشية لإن زي ما قلتلك الدبابات دي هي الفيات 128 بتاعة الدبابات اللي من أيام الحرب العالمية الثانية فكان أمل الأتراك إنهم لما يستخدموا Leopard 2A4 فخسايرهم حتقل جامد .. بس الأمل ده إتحول لصداع نصفي في راسهم.
لما الألمان صمموا الLeopard 2A4 كان في دماغهم إنهم يصنعوا دبابة سريعة تقدر تقف قدام غزو سوفيتي كاسح لألمانيا الغربية أيام الحرب الباردة .. دي دبابات إتصممت عشان تقف قدام الدبابات الروسي في حرب مفتوحة و عمر ما الألمان تخيلوا إنها حتستخدم في حرب عصابات ضد ناس معهاش غير عبوات ناسفة و صواريخ محمولة علي الكتف و في حرب الإعلام مركز عليها أوي لدرجة إن خبر تدمير دبابة تركية واحدة كفيل إنه يدي لأي حد إنطباع إن وكأن العملية العسكرية كلها فشلت .. دروع الLeopard 2A4 أضعف من إنها تستحمل قذيفة مباشرة لصاروخ محمول علي الكتف .. في ديسمبر 2016 الأتراك إكتشفوا الحقيقة المرة لما حبوا يدخلوا قرية الباب السورية اللي كانت وقتها تحت سيطرة داعش .. جريدة دير شبيجيل Der Speigel الألمانية نقلت عن قادة عسكريين أتراك إن الخسائر اللي تعرضت ليها دبابات Leopard 2A4 جابتلهم صدمة .. في المعارك بتاعة قرية الباب دي الأتراك خسروا 10 دبابات منهم 5 دبابات إتدمروا بصواريخ محمولة علي الكتف و إتنين إتدمروا بعبوات ناسفة و واحدة إتدمرت بقذيفة هاون و إتنين إتعرضوا لمشاكل تقنية أدت لتدميرهم.
الحقيقة إن الأتراك لبسوا جامد أوي لدرجة إنهم عشان يعالجوا مشكلة الدبابات Leopard-2 بتاعتهم عرضوا علي الألمان إنهم يفرجوا عن معتقل سياسي تركي معاه الجنسية الألمانية في مقابل إن ألمانيا تاخد كل الدبابات Leopard 2A4 اللي عند تركيا و تطورها بسبب الخسائر الفادحة اللي إتعرضت ليها الدبابات دي و اللي وصلت لمرحلة إن فعلاً كده عيب و ميصحش بس يوم 24 يناير 2017 لما الخبر إتعرف في ألمانيا إن الحكومة بتتفاوض مع الأتراك عشان تطورلهم أسطول دبابات Leopard 2A4 عشان يستخدموها في العمليات العسكرية ضد الأكراد في مدينة عفرين السورية حصلت مظاهرات جوه ألمانيا أجبرت الحكومة الألمانية إنها ترجع في كلامها.
تاني .. مهم إني أقول إن التجربة التركية مع Leopard-2 كانت قاصرة علي 2A4 اللي هو الموديل اللي كان طلع بره الخدمة أساساً لما الأتراك إشتروه .. النسخ الحديثة سواء 2A5 أو 2A6 فيها إجراءات أمان ضد العبوات الناسفة و الألغام و الصواريخ المضادة للدبابات و الدبابات دي إتجربت في أفغانستان و أثبتت كفاءة محترمة وحتي الألمان دلوقتي شغالين علي إنتاج النسخة الأحدث Leopard 2A7 .. فخليني أقولك إن تجربة الأتراك مع الدبابة ليوبارد هي مجرد السلاح الغلط في المكان الغلط ضد العدو الغلط.
المصدر:
مقالة بعنوان Germany’s Leopard 2 Tank Was Considered One of the Best (Until it Went to Syria) نشرت في مجله The National Interest وده لينك المقالة الأصلية:
http://nationalinterest.org/blog/the-buzz/germanys-leopard-2-tank-was-considered-one-the-best-until-it-24234
