تعديل بتاريخ 4-12-2020 هو إن (دونالد ترامب) خسر الإنتخابات الرئاسية الأميريكية في 2020 و (جو بايدن) بقي هو الرئيس الأميريكي الجديد.
موضوعنا النهاردة اللي حنتكلم عنه هو كوريا الشمالية .. عشان بس نكون متفقين إحنا لا حنتكلم عن الأهبل إبن الأهبل اللي إسمه (كيم يونج أون Kim Jong Un) اللي بيحكمها دلوقتي .. ولا حنتكلم عن نظام الحكم الكوري الشمالي و عن الأساطير اللي بتتقال عنه إن إزاي (كيم يونج أون) أعدم وزير عشان راح إستاد لقي إن الكراسي مش متربطة كويس .. إحنا مش حنتكلم عن كل ده .. اللي حنتكلم عنه النهاردة هو سؤال واحد بس: هو إيه اللي يحصل لو الولايات المتحدة غزت كوريا الشمالية؟
مشكلة كوريا الشمالية هي برنامجها النووي .. محدش عارف بالضبط هي بتمتلك كام رأس نووي؟ بس اللي إحنا عارفينه إن كوريا الشمالية عندها صواريخ باليستية اللي هي صواريخ عابرة للقارات و تقدر تحط عليها رؤوس نووية و تطلقها علي أي حد حتي أميركا .. ده إحنا عارفينه .. اللي إحنا مش عارفينه أو اللي الأمريكان مش عارفينه هو إزاي يخلصوا من التهديد ده؟ .. في الإسبوع الأول من شهر نوفمبر 2017 حصلت جلسة إستماع في البرلمان الأميريكي اللي بيسموه الكونجرس لقادة وزارة الدفاع الأميريكية اللي بيسموها بينتاجون Pentagon .. في الجلسة دي الإخوة بتوع وزارة الدفاع قالوا إن والله عشان ندمر الترسانة النووية الكورية الشمالية و إحنا متؤكدين بنسبة 100% إننا مسبناش ولا رأس نووي من غير ما ندمره فمفيش حاجة نضمن بيها ده غير إننا نغزو كوريا الشمالية برياً .. ده الحل الوحيد .. الغارات الجوية مش حتجيب نتيجة ولا حتي إن الأمريكان يبعتوا فرق قوات خاصة لتدمير المنشأت النووية الكورية الشمالية حيحقق حاجة .. كوريا الشمالية ملهاش حل غير إنها تنضم للعراق و أفغانستان اللي هي الدول اللي أميركا دفعت دم قلبها عشان تحتلها برياً.
إنك تحتل دولة برياً مش موضوع سهل .. أميركا عشان تدخل العراق عملت تحالف دولي شمل أكثر من 20 دولة .. و عشان تجتاح كوريا الشمالية برياً معندهاش برده غير إنها تشكل تحالف دولي علي الأقل فيه كوريا الجنوبية و اليابان و يكون مستعد إنه يضحي بالالاف من جنوده عشان يتم إسقاط النظام الكوري الشمالي .. بس حتي لو ده حصل .. لنفترض جدلاً إن التحالف ده إتعمل .. إزاي تجتاح كوريا الشمالية برياً؟ لإن ده هو اللي إحنا حنتكلم عنه النهاردة.
في الأول تعالي نديك شوية معلومات عامة عن كوريا الشمالية مهم إنك تكون عارفها .. كوريا الشمالية دولة مساحتها 120 ألف كيلومتر مربع يعني بتتكلم عن دولة تقريباً في مساحة القاهرة الكبري .. عاصمتها إسمها بيونج يانج بيعيش فيها حوالي 10% من إجمالي تعداد سكان الدولة و باقي السكان عايشين في مدن و قري متوزعة علي الساحل اليمين و الشمال لكوريا الشمالية و بيفصل بينهم طبيعة جبلية وعرة شوية .. لو بصيت علي الخريطة اللي عندك في الصور حتلاقي إن كوريا الشمالية غربها بيطل علي خليج غرب كوريا و اللي فيه ناس بتسميه البحر الأصفر .. شرقها فيه بحر اليابان و اللي فيه ناس برده بتسميه البحر الشرقي .. شمال كوريا الشمالية ليها حدود طولها حوالي 1320 كيلومتر مع الصين و ليها شريط حدودي صغير مع روسيا .. جنوب كوريا الشمالية بقي حتلاقي حدودها مع كوريا الجنوبية .. فيه شريط بيفصل بين كوريا الشمالية و كوريا الجنوبية و الشريط ده طوله حوالي 3.75 كيلومتر و بيسموه DMZ و ده إختصار De-Militarized Zone أو المنطقة منزوعة السلاح.
جيش كوريا الشمالية بيسموه جيش الشعب الكوري و ده جيش تعداده 1.2 مليون مقاتل و الجيش ده مقسوم ل12 قسم كل قسم منهم عدده ما بين 20,000 ل 40,000 مقاتل و ده بيخلينا نقدر نقول إن الجيش الكوري الشمالي مقسوم ل12 فيلق Corps و ال12 فيلق دول متقسمين كالأتي:
- عندك 3 فيالق قوات مشاة برية.
- عندك 4 فيالق مدرعات.
- عندك فيلق واحد بس مشاة ميكانيكي.
- عندك فيلق واحد مدفعية.
- فيلق إسمه قيادة الدفاع عن بيونج يانج و ده تقدر تعتبره إنه الحرس الجمهوري بتاع كوريا الشمالية.
- فيلق إسمه قيادة الصواريخ الموجهة و ده من إسمه اللي مسئول عن إطلاق الصواريخ الباليستية و بالتالي هو المسئول عن البرنامج النووي.
- فيلق إسمه المشاة الخفيفة و ده تقدر تعتبره الدفاع الشعبي اللي هم خط الدفاع الأخير في حالة إنهيار القوات المسلحة كلها.
عندك فيه 3 فيالق مشاة برية و فيلق مدرعات و الفيلق الوحيد مشاة ميكانيكي و الفيلق الوحيد مدفعية يعني بتتكلم عن حوالي 50% من إجمالي الجيش الكوري الشمالي كله متوزع علي طول الDMZ اللي هي الحدود المشتركة بين الكوريتين .. ده بيخليك تقول إن لو حاولت تجتاح كوريا الشمالية برياً من الوسط من داخل كوريا الجنوبية يبقي إنت كده بتنتحر .. ده بيخلينا نروح للمكتبة نطلع كتب التاريخ و نذاكر إيه اللي حصل في الحرب الكورية الأولي ؟
الحرب الكورية الأولي تعتبر مرجع مهم أوي لازم يتذاكر كويس لأي حد ناوي يحط خطة عسكرية لإجتياح كوريا الشمالية و ده لسبب بسيط جداً هو إنها كانت حرب تقليدية زي الحرب اللي حتحصل في حالة إن اميركا إجتاحت كوريا الشمالية و الأهم إنها كانت ضد نفس العدو و علي نفس الأرض .. الدرس بتاع الحرب الكورية بيقول إنك لو ناوي تجتاح كوريا الشمالية فإنت حلك الوحيد هو عملية إنزال برمائية علي الساحلين الشرقي و الغربي لكوريا الشمالية و تنسي خالص إنك تقتحم الشريط الحدودي بين الكوريتين .. ركز بقي معايا عشان دي الخطوات اللي حتتعمل في حالة إن لا قدر الله و حصل فعلاً غزو أميركي لكوريا الشمالية:
خطوة رقم واحد .. السيطرة علي مدينة وونسان Wonsan:
خطوة رقم واحد هي إنك تحدد المكان اللي حيتم فيه إنزال قواتك البرمائية .. مش كل ساحل كوريا الشمالية ينفع إنك تنزل قواتك عليه بس فيه أماكن كتير أوي مناسبة .. لو حبيت تنقي مكان لعملية الإنزل البرمائية دي علي ساحل كوريا الشمالية علي بحر اليابان فمش حتلاقي مكان مناسب أكثر من مدينة وونسان Wonsan .. الفكرة إن مدينة وونسان بتقع علي نفس خط العرض بتاع العاصمة بيونج يانج و كمان فيه طريق سريع بيربطهم ببعض .. بمعني .. إن لو قواتك البرمائية نزلت في وونسان و سيطرت عليها فإنت سكتك سالكة لحد العاصمة بيونج يانج من غير حد يقدر يوقفك .. الكوريين الشمالين مش هبل و عارفين ده كويس .. عشان كده فيه فيلق مدرعات و فيلق مشاة برية وظيفتهم هو حماية بيونج يانج في حالة إن الأمريكان عملوا إنزال بري في وونسان .. اه حتبقي معارك شرسة و اه حيبقي فيها ضحايا كتير بس وونسان ميزتها إن فيها ميناء و مطار فلو الأمريكان سيطروا عليها فيقدروا ينتشروا منها لكوريا الشمالية كلها.
اللي غالباً حينفذ عملية الإنزال البرمائية دي هي قوة من مشاة البحرية الأميريكية US Marines قوامها ما بين 2000 ل5000 مقاتل يعني بتتكلم عن قوة بحجم لواء Brigade و هم فعلياً متاحين و جاهزين و معسكرين في القواعد البحرية الأميريكية في جزيرة أوكيناوا اليابانية و جزيرة هواوي الأميريكية .. حيبقي معاهم كمان غطاء جوي من حاملة الطائرات يو إس إس رونالد ريجان USS Ronald Reagan و اللي حالياً موجودة في المحيط الهاديء.
خطوة رقم إتنين .. عملية عسكرية لإجتياح الشريط الحدودي بين الكوريتين:
الخطوة دي حتتم في نفس التوقيت اللي الإنزال البرمائي الأميريكي بيحصل في مدينة وونسان .. اللي حيحصل إن قوات خاصة من كوريا الجنوبية حتعمل برده عملية إنزال برمائية خلف خطوط العدو حول الDMZ .. العملية حتبقي شبه إنتحارية بس مهمة جداً عشان يصيبوا قيادة القوات المسلحه الكورية الشمالية بالعجز لإنهم حيبقوا بيواجهوا هجوم بري كاسح من جبهتين .. اللي إنت عايز توصله إنك تخلي القوات الكورية الشمالية اللي متوزعة علي طول DMZ يلاقوا نفسهم متحاصرين و معندهمش حل غير إنهم ينسحبوا للشمال بإتجاه العاصمة بيونج يانج و هنا يجي دور القوات الجوية.
خطوة رقم ثلاثة .. غارات جوية عشان يصطادوا القوات المنسحبة:
القوات الجوية الأميريكية ليها قواعد جوية في كوريا الجنوبية و جزيرة أوكيناوا اليابانية و جزيرة جوام الأميريكية .. حيتم تنفيذ غارات جوية شبه مستمرة عشان يصطادوا القوات الكورية الشمالية اللي بتنسحب من الDMZ بإتجاه بيونج يانج .. الطبيعة الجبلية لكوريا الشمالية حتخلي الموضوع صعب بس الخطوة دي حتكون أهم خطوة في إن القوات المسلحة الكورية الشمالية تتعرض لخسائر فادحة تخليها تفكر جدياً في الإستسلام .. الأهم من كل ده إن القوات الجوية تأمن عملية إن القوات الأميريكية اللي بتتقدم بإتجاه بيونج يانج من وونسان تقابل القوات الكورية الجنوبية اللي بتتقدم بإتجاه بيونج يانج من الDMZ .. مهم أوي إن القوتين يقابلوا بعض و يحاصروا بيونج يانج مع بعض و في نفس التوقيت لإن في الحرب الكورية الأولي الجيش الثامن الأميريكي مقدرش يقابل الفيلق العاشر اللي كان بيتقدم من كوريا الجنوبية و ده في النهاية كان سبب من أسباب إن أميركا تخسر الحرب.
خطوة رقم أربعة .. القوات الخاصة الأميريكية تشن غارات علي المنشأت النووية و الكيميائية الكورية الشمالية و يدمروها:
الخطوه دي حتبقي سباق مع الزمن .. نظام (كيم يونج أون) حيبقي عايز يستخدم الأسلحة النووية ضد أميركا لإن ده مبدأ عليا و علي أعدائي .. هو عارف إن لو الصين متدخلتش لنجدته فهو حيخسر الحرب و نظامه حيقع فحيحب إنه يؤذي الأمريكان قد ما يقدر و دي حتبقي مشكلة كبيرة قدام القوات الخاصة الأميريكية اللي حتبقي مسئولة عن تدمير البرنامج النووي الكوري الشمالي.
خطوة رقم خمسة .. و دي الخطوة اللي يا إما حتخلي الأمريكان يكسبوا الحرب أو يخسروها و هي تأمين الحدود الكورية الشمالية مع روسيا و الصين:
اللي حصل في الحرب الكورية الأولي إن لما الصينين لقوا إن الأمريكان وصلوا لحد العاصمة بيونج يانج بدأوا عملية عسكرية ضد القوات الأميريكية لنجدة كوريا الشمالية .. ده إحتمال كبير يحصل تاني .. إنت ممكن القوات الأميريكية فجأة تلاقي نفسها معرضة لهجوم كاسح صيني أو روسي عشان يلحقوا كوريا الشمالية .. حل تاني إن الصين تعمل منطقة عازلة علي طول حدودها مع كوريا الشمالية عشان تمنع أي لاجئين إنهم يدخلوا أرضها .. حتي لو ده حصل ده بيشكل مشكلة كبيرة لإن ساعتها الكوريين الشماليين حيلاقوا نفسهم متحاصرين من كل إتجاه و ساعتها الله أعلم ممكن يعملوا إيه؟ .. الأهم إنك متعرفش الصين أو روسيا ممكن يعملوا إيه؟ .. هل الصين حتدخل في مواجهة عسكرية مع أميركا و تبقي دي بداية حرب عالمية ثالثة؟
خطوة رقم ستة و دي مبنية علي فرض إن الصين متدخلتش أو علي الأقل إكتفت إنها تعمل منطقة عازلة بينها و بين كوريا الشمالية:
في الحالة دي النصر البري الأميريكي تقريباً بقي شبه مضمون و مفاضلش فاضل غير إن الأمريكان يسحقوا أي بقايا من الجيش الكوري الشمالي عشان يمنعوا نفس السيناريو اللي حصل في العراق لما بقايا الجيش العراقي عملوا كتائب فدائيي (صدام حسين) الله يرحمه و دي سببت خسائر رهيبة في الأرواح للقوات الأميريكية فأخر حاجة الأمريكان عايزينها هي إن الكوريين الشماليين يعملوا كتائب فدائيي (كيم يونج أون).
خطوة رقم سبعة و دي حتبقي فعلاً سباق مع الزمن .. إنقاذ الشعب الكوري الشمالي من المجاعة:
أساساً شعب كوريا الشمالية جعان و فقير و مش لاقي ياكل و عايش علي الأكل اللي الحكومة بتديهوله و اللي أحياناً كتير مبيجيش .. فلما حكومة بيونج يانج تقع فالشعب ده فعلاً حيموت من الجوع .. دور القوات الأميريكية هنا مش بس هزيمة الجيش الكوري الشمالي إنما كمان إنقاذ دولة كاملة من المجاعه إنها توفرلهم أكل و شرب و بسرعة.
أنا ليه كتبتلك المقالة دي؟ .. أي عملية عسكرية برية ضد كوريا الشمالية حتبقي معقدة و صعبة أوي وحيقع فيها ضحايا كتير من المدنيين و العسكريين من الطرفين علي فكرة .. فيه كمية حاجات ممكن تحصل غلط إنت لا تتخيلها .. لو وحدة قوات خاصة أميريكية واحدة فشلت إنها تدمر منشأة نووية واحدة من ضمن مئات المنشأت النووية اللي تحت إيد كوريا الشمالية فممكن (كيم يونج أون) يطلق صاروخ باليستي ضد جزيرة جوام أو ضد اليابان أو ضد كوريا الجنوبية و ساعتها ملايين ممكن تموت .. إيه اللي ممكن يحصل لو الصين تدخلت؟ .. حتبقي حرب عالمية ثالثة .. حتي لو الصين متدخلتش و حتي لو العملية مشت زي السكينة في الجاتوه و كل حاجة زي الفل فعملية عسكرية زي دي حتبقي فعلاً كابوس لوجيستي إنك تعمل شبكة إتصالات و تنسيق بين مش بس قواتك الجوية و البحرية و البرية إنما بين قواتك و بين القوات اليابانية و الكورية الجنوبية .. ملايين التفاصيل الصغيرة مجرد التفكير فيها حيجيبلك صداع بس فوق ده الإرادة .. مش حتفرق التفوق التكنولوجي العسكري أو العددي الأميريكي قد إيه؟ .. مش حتفرق إنت عندك كام حاملة طائرات؟ .. الأهم من ده كله إنك تقنع دول زي كوريا الجنوبية و اليابان إنها ترمي شعوبها في التهلكة في عملية عسكرية جريئة أوي زي ده .. الموضوع شبه مستحيل إنه يتعمل .. بس اللي يخوف إنك بتتعامل مع إتنين رؤساء سواء (كيم يونج أون) أو (دونالد ترامب) معندهمش الحد الأدني من العقل و التفكير المنطقي اللي يخليهم يعرفوا إن الحرب ملهاش معني.
المصدر:
مقالة بعنوان Why an Invasion of North Korea is the U.S. Military’s Ultimate Nightmare نشرت في مجلة The National Interest و ده لينك المقالة الأصلية:
http://nationalinterest.org/blog/the-buzz/why-invasion-north-korea-the-us-militarys-ultimate-nightmare-23077
