فيه حاجات في السياسة صدقني مبتتفهمش .. يعني مثلاً .. حاول كده تسأل باباك اللي أكيد كان عايش في فترة الثمانينات و يمكن في السبعينات كمان و شاف بنفسه ما يسمي بالحرب الباردة بين الغرب و بين الإتحاد السوفيتي و قوله ألا قولي يا أبا الحاج هو أنا لو رجعتلك بالزمن في الثمانينات و قلتلك إن بلد زي رومانيا اللي كانت مرمية في حضن السوفييت حيجي عليها اليوم اللي تتطلق منهم و تروح تترمي في حضن عشيقها الجديد حلف شمال الأطلنطي NATO .. و مش كده و بس .. دي كمان حتطلب من أميركا تديها أحدث طيارة مقاتلة في السوق كنت حتصدقني؟ .. بلاش دي .. هل ممكن إن وقتها يكون أصلاً مقبول بالنسبة ليك إن بلد زي تركيا اللي عندها ثاني أكبر قوات مسلحة بعد أميركا جوه NATO ترفض تستلم أحدث طيارة مقاتلة عملتها أميركا في مقابل إنها تروح تشتري صواريخ دفاع جوي روسية؟ .. هل لو أنا رجعتلك بالزمن و قلتلك ده في وقت ما الإتحاد السوفيتي كان لما بيتقال اسمه بس فيه رجاله بتبقي عايزة تعمل بيبي علي روحها كان حيبقي منطقي؟ .. هل كنت حتشوفه كلام ناس عاقلين؟ .. و علي رأي واحد صاحبي كان دايماً بيقول أه يا زمن خليت الأعمي ساعاتي أدي الأيام دارت و بقينا في الوضع ده اللي ما يعلم بيه ربنا.
في إبريل 2023 الحكومة الرومانية أعلنت إنها حتبدأ تخش في مفاوضات مع أميركا عشان تشتري منها طيارات F-35 Lightening II مع إننا لحد دلوقتي مش عارفين هم حيبقوا كام طيارة و رومانيا حتدفع فيهم كام و حتستلمهم إمتي .. كل دي أسئلة محدش عارف إجابتها .. لكن اللي يستحق إننا نقف قدامه هو إزاي سياسة رومانيا إتغيرت ولا تغير موقف والدك لما كان في الأول رافض تربوا قطة في البيت و دلوقتي بقي بيعتبرها أغلي عنده منك إنت شخصياً .. رومانيا كانت شخشيخة في إيد النازيين وقت الحرب العالمية الثانية .. الحرب خلصت بقت شخشيخة في إيد السوفييت .. الإتحاد السوفيتي إنهار سنة 1990 إترمت في حضن الغرب و سنة 2004 إنضمت لNATO .. المبرر ورا قرار رومانيا واضح زي الشمس و هو الغزو الروسي لأوكرانيا .. الرومانيين عايزين يبقي تحت إيدهم سلاح علي الأقل من وجهة نظرهم يخلي الروس خايفين يدوسولهم علي طرف و ده إلي حد ما منطقي .. عايزك تعرف إن خلال الفترة من بداية الغزو الروسي لأوكرانيا في فبراير 2022 و دول NATO زودت من إنفاقها العسكري بحيث ينط من 2% بس من إجمالي الناتج الوطني الإجمالي بتاعها اللي بيسموه GDP و بقي 2.5% خصوصاً لما تعرف إن رومانيا ليها حدود مشتركة مع أوكرانيا بطول 650 كيلومتر .. في مارس 2023 وزير الدفاع الروماني طلع قال إن بلده حتمضي عقد مع شركة جينيرال داينيميكس General Dynamics الأمريكية عشان تشتري دبابات M1A1 Abrams و في ديسمبر 2022 مضت عقد مع شركة البيت Elbit الإسرائيلية بقيمة 418 مليون دولار عشان تشتري طيارات بدون طيار Watchkeeper X .. اللي مش منطقي هو اللي بيعمله الأتراك.
علي الناحية الثانية تلاقي إن الأتراك اللي هم عضو في NATO و علاقاتهم بالروس طول تاريخهم مكنتش أحسن حاجة في الدنيا قرروا يقولوا للأمريكان لو حتخيرونا بين إننا نشتري F-35 و بين إن يبقي عندنا منظومة صواريخ الدفاع الجوي S-400 فإحنا حنختار S-400 و ده غريب لسبب .. لما مشروع F-35 بدأ أصلاً الأتراك كان ليهم دور مش قليل فيه و كان متوقع إن لما المشروع يبدأ يندع و الطيارة تبدأ تتباع الأتراك حيستلموا حبة حلوين منها و فيه ناس كانت بتقول إن تركيا حتستلم 100 طيارة F-35A بس كل ده إتهد بسبب رغبة الأتراك إن يبقي عندهم الحلو من كل حاجة .. يبقي عندهم أحدث طيارة في العالم و يبقي عندهم الصواريخ اللي متصممة عشان توقع الطيارة دي .. الأتراك كانوا بيقولوا إنهم يقدروا يبقي تحت إيدهم الإتنين من غير ما الروس يبقي عندهم طريقة إنهم يحطوا إيدهم علي أسرار تصميم الطيارة بس الكلام ده ميخشش دماغ ناس عاقلين و ده حط الأتراك قدام موقف زي الزفت مع الأمريكان .. يا تدونا الطيارات يا ترجعولنا ال1.4 مليار دولار اللي تركيا صرفتها في تطوير و تصنيع برنامج الطيارة F-35 كدولة من الدول اللي إشتغلت من الصفر في المشروع و دي الحقيقة فرصة كويسة إننا نتكلم شوية عن دور و موقف تركيا جوه NATO و يا تري هي شايفة الحلف إزاي و الأهم هو الحلف شايفها إزاي؟
حلاوة البدايات ثم خوازيق الإنقلابات:
من أول يوم لإنضمام تركيا للحلف و هي بالضبط عاملة زي ما تكون إنت مثلاً عايش في الأرياف في بيت عيلة بحيث سلو العيلة هو إنكوا تتجوزا من بعض و تقوم إنت سلبوتة كده تقرر إن الكلام ده مينفعنيش و أنا حتجوز اللي أنا عايزها تقوم جايبلهم بنت طليانية تقول هي دي اللي أنا حتجوزها و تجيبها تعيش معاك في بيت العيلة .. طبيعي إنها هي حتبقي بنت البطة السودا اللي في وسط البيت و طبيعي إن ده حيخلق مشاكل كتير .. تركيا إنضمت للحلف سنة 1952 في وقت ما الحرب الباردة كانت مولعة .. تركيا بلد جغرافياً خلي إنضمامها للحلف واحد من أكبر الخوازيق اللي لبستها روسيا لإن تركيا بتطل علي البحر المتوسط و علي البحر الأسود يعني بسهولة تقدر تنكد علي الأسطول السوفيتي في البحر الأسود و يكفي إني أقولك إن واحدة من أهم حلقات مسلسل الحرب الباردة اللي هي أزمة الصواريخ الكوبية حصلت لما الأمريكان قرروا ينشروا صواريخ جوبيتر طويلة المدي في تركيا و اللي كانت تقدر تدمر العاصمة السوفيتية موسكو و ده خلي السوفييت يحبوا يردوا الألم علي وش الأمريكان و ينشروا صواريخ متوسطة المدي قادرة علي حمل رؤوس نووية في كوبا .. بس أرجع و أقولك من اليوم الأول لإنضمام تركيا و هي بنت البطة السودا .. ده اسمه حلف شمال الأطلنطي يعني الدول الأعضاء فيه هم أميركا و الدول الأوروبية بس تركيا 3% بس من مساحتها جغرافيا جوه أوروبا و باقي مساحتها جوه القارة الأسيوية .. في الوقت اللي أعضاء الحلف هم كلهم دول أوروبية ديموقراطية تلاقي إن تركيا بلد بسم الله ما شاء الله علاقتها بالإنقلابات العسكرية زي علاقتك التوكسيك ببنت مخلياك مضيع فلوسك عليها في الفسح و الخروجات .. تركيا من سنة 1960 لحد دلوقتي حصل فيها 4 إنقلابات أخرهم محاولة الإنقلاب الفاشلة سنة 2016 و اللي في رأي ناس كتير هي السبب في إن الأتراك أو خليني أقول الرئيس التركي (رجب طيب أردوغان) إن بالنسبة ليه S-400 أولولية أكتر من F-35.
يوم 15 يوليو 2016 كان يوم مهم في حياة كتير من الأتراك .. ده اليوم اللي حصلت فيه محاولة الإنقلاب الفاشلة للإطاحة ب(أردوغان) و اللي جزء من خطتها إن كان فيه طيارة F-16 تابعة لسلاح الجو طاير بيها طيار مقاتل ضمن القوات الجوية المفروض إنه طار ورا الطيارة الرئاسية اللي كان فيها (أردوغان) و الأوامر اللي كانت عنده هو إنه يغتال (أردوغان) و اللي لسبب لا يعلمه إلا الله الطيار مداسش علي زرار إطلاق الصاروخ الجو-جو و ربنا نجي (أردوغان) .. الحقيقة إن كم الحاجات اللي إتغيرت بعد اليوم ده كتير أوي .. من بعده و بدأت الحكومة التركية ما يسمي بالكسح Purge لأي حد يشكوا فيه بس إن ولاءه مش مطلق ل(أردوغان) و لحزب العدالة و التنمية بتاعه .. بدأت عملية طرد كتير من الطيارين المقاتلين الأتراك اللي بيطيروا بأسطول طيارات F-16 لنفس السبب و هو مجرد الشك في ولاءهم .. بس يمكن الحاجة اللي عايزين نتكلم عنها دلوقتي إن القوات المسلحة التركية بدأت تحط كأولوية قصوي ليها تطوير منظومة دفاع جوي محترمة و الأهم تبقي منظومة قادرة علي إسقاط طيارات F-16 الأميريكية اللي سلاح الجو التركي بيعتمد عليها .. الاتراك درسوا يشتروا بطاريات صواريخ باتريوت Patriot الأميريكية و لقوها مش نافعة .. درسوا يشتروا منظومة الدفاع الجوي الصينية HQ-9 و معجبتهمش .. فكروا في منظومة الدفاع الجوي الفرنساوي SAMP/T و برده مجتش معاهم سكة .. منظومة الدفاع الجوي الوحيدة اللي كان فيه شبه إجماع جوه قيادة القوات المسلحة التركية إنها هي اللي حتنفع كانت S-400 الروسية بس كان السر اللي عارفه الناس كلها إن قرار شراء المنظومة دي مينفعش يجي من المؤسسة العسكرية إنما لازم يجي من جوه الرئاسة .. الرئيس هو اللي لازم يتحمل العواقب بتاعة قرار زي ده .. و قد كان .. يوم 12 يوليو 2019 تركيا استلمت أول شحنة من منظومة الدفاع الجوي S-400.
مبرر الأمريكان علي طرد الأتراك من مشروع F-35 بعد ما قرروا يشتروا S-400 كان واضح و سهل يتفهم و مفيهوش جدل الصراحة .. دلوقتي الطيارة F-35 عشان تطير من غير ما تتلقط بالرادار يعني تطير بStealth Mode لازم تبقي إنت كضابط دفاع جوي تركي عارف بصمتها الرادارية إيه و مدخل البصمة دي في الكومبيوتر بتاع منظومة S-400 عشان إنت كضابط دفاع جوي تركي تبقي شايف زميلك الطيار المقاتل التركي برده اللي طاير بطيارة F-35A بس من غير ما حد يلقطه .. بمجرد ما الأتراك يدخلوا البصمة الرادارية دي في كومبيوتر منظومة S-400 بتاعتهم فبسهولة أوي الروس هم كمان يقدروا يعرفوها و بكده يبقي إحنا بالصلاة علي النبي عملنا إيه .. مش معني إن (أردوغان) مش عايز يكرر نفس الغلطة بتاعة إنقلاب 2016 يبقي الثمن هو مشروع الطيارة F-35 كله يتلغي.
مستقبل مليء بالمطبات:
مطب رقم واحد .. اليونان: تبقي واحدة من المشاكل الكبيرة الحقيقة اللي عامله صداع في دماغ المسئولين عن NATO هو العلاقة المتوترة بين تركيا و اليونان .. هو ده مش وقت درس في تاريخ العلاقة بين البلدين بس خلينا نقول إختصاراً إن اليونان كانت لفترة طويلة جزء من الدولة العثمانية ولما الحرب العالمية الأولي خلصت قامت حرب الاستقلال اليونانية و اللي كانت الحقيقة بداية إن (مصطفي كمال أتاتورك) يوصل للحكم كمؤسس لدولة تركيا الحديثة اللي إنت شايفها دلوقتي فملخص الموضوع إن الدولتين بينهم دم .. بس الغريبة إن سنة 1952 البلدين إنضموا لحلف شمال الأطلنطي مع بعض و مهم تفهم نقطة .. خلال الكام سنة اللي فاتوا صحيح فيه توتر في العلاقات بين تركيا و اليونان بس خلينا نكون صرحاء مع بعض إن الحلف عمره ما حيقبل إن دولتين أعضاء فيه يرفعوا السلاح علي بعض .. اللي مخلي الحلف و أخص بالذكر هنا أميركا ساكتة علي اللي بيحصل و مش بتحاول تصلح العلاقات هو إن بسبب التوتر ده فيه سباق تسلح علي الضيق كده بين البلدين و المستفيد الأول و الأخير منه هو شركات السلاح الأميريكية و الأوروبية و حتي الإسرائيلية:
- بسبب إن اليونانيين حاسين إن الأتراك ممكن في أي لحظة يدوهم بالألم علي وشهم فاليونان من الدول القليلة الحقيقة جوه NATO اللي إنفاقها العسكري السنوي أعلي من 2% من GDP بتاعها .. بداية من 2019 و الإنفاق العسكري اليوناني عمال يزيد بشكل مريب .. في 2020 اليونان إشترت 24 طيارة رافال Rafale الفرنساوي و دي طيارة بتتصنف علي إنها من جيل 4.5 و صدقني إن قدرات الرافال أعلي من أجدعها طيارة مقاتلة في سلاح الجو التركي كله.. اليونان طلبت من أميركا إنها تعمل Upgrade لفوق 84 طيارة F-16 عندها في سلاح الجو ده غير إن اليونان قدمت طلب رسمي إنها زي رومانيا تشتري طيارات F-35 .. ده بيحطك قدام حقيقة جديدة إن سلاح الجو التركي واحدة واحدة بيخسر تفوقه علي سلاح الجو اليوناني خصوصاً بعد طرد تركيا من برنامج F-35 و بعد القرار الغريب بتسريح كتير من الطيارين الأتراك اللي بيطيروا بأسطول طيارات F-16 بعد محاولة الإنقلاب الفاشلة في 2016.
- صحيح إن كنسبة مئوية الإنفاق العسكري اليوناني أكبر من التركي بس عشان تركيا إقتصادها حجمه أكبر بكتير من اليونان فالأتراك حتلاقيهم كمبلغ بيصرفوا اكتر و المفروض إنهم من أول 2024 إنفاقهم العسكري السنوي حيزيد و يكفي إني أقولك إن سنة 2023 لوحدها الأتراك متوقع يصرفوا 26 مليار دولار علي تسليحهم.
- اليونان كمان قدمت طلب عشان تشتري 7 طيارات هليكوبتر MH-60R و دي طيارات مضادة للغواصات و عشان تواجه تهديد أسطول الطيارات بدون طيار التركي فاليونانيين أشتروا من الإسرائيليين منظومة الدفاع الجوي القبة الحديدية Iron Dome و ركبوها علي الجزر بتاعتها في بحر إيجة.
- بالنسبة للقوات البحرية فاليونانيين اشتروا من الفرنساويين 3 فرقاطات FDI HN و فيه كلام علي إنهم حيشتروا الرابعة و حالياً بينقوا الموديل اللي هم عايزينه من فرقطات كورفيت عشان يشتروا منه 4 و بكده إنت بقيت بتكلم عن سلاح بحرية إلي حد كبير محترم .. الأتراك هم كمان ناويين يشتروا 4 فرقاطات جديدة .. أه نسيت أقولك .. الأتراك مستنيين يستلموا 6 غواصات Type 214 ألمانية الصنع في الوقت اللي اليونان عندها 4 بس من الغواصات دي.
- كعدد مش كإمكانيات فالقوات البرية اليونانية عندها أكبر سلاح مدرعات ضمن دول NATO و عندها أكبر سلاح مدفعية وسط دول أوروبا كلهم قصاد إن الأتراك عندهم تاني أكبر قوات مسلحة في الحلف بعد أميركا.
مطب رقم إتنين .. فنلندا و السويد: في مايو 2022 فنلندا و السويد قدموا طلب رسمي للإنضمام لحلف شمال الأطلنطي بس المشكلة إن الإتفاقية اللي الحلف إتشكل علي أساسها بتقول إن عشان أي دولة جديدة تنضم لازم كل الدول الأعضاء بالإجماع يوافقوا فطبعاً تركيا طلعت زي الخازوق قالت انا مش موافقة .. طب ليه؟ .. قالك أصل فنلندا و السويد مقعدين عندهم عناصر من حزب العمال الكردستاني اللي الحقيقة تركيا و أميركا بتعتبره تنظيم إرهابي و كمان إن فنلندا و السويد فارضين علي تركيا حظر استيراد أسلحة من بعد التدخل العسكري التركي في سوريا سنة 2019 .. صحيح إن في يونيو 2022 تركيا رجعت في كلامها و سحبت إعتراضها علي إنضمام البلدين و فيه كلام علي إن الأمريكان حيدوا الأتراك حلاوة الموافقة.
مطب رقم ثلاثة .. هو أساسا (إردوغان) مكمل؟ الرئيس التركي اللي بقاله في الكرسي فوق العشرين سنة بيواجه يمكن أكبر تحدي خلال الكاريير بتاعته في السياسة في الإنتخابات اللي حتتعمل يوم 14 مايو 2023 و حيخشها قصاد المرشح المشترك لكل الأحزاب السياسية الستة اللي بتشكل المعارضة التركية و يبقي (كمال قلجدار أوغلي) اللي زيه زي (أردوغان) كبير في السن عنده 74 سنة و قضي حياته كلها كموظف و الحقيقة إن دي يمكن لأول مرة الأتراك يبقي قدامهم خيارين عكس بعض في كل حاجة .. بقاء (أردوغان) في السلطة معناه استمرار الوضع القائم قصاد إن لو (كمال) كسب فهو باني حملته الإنتخابية علي إنه حيلغي النظام الرئاسي و حيرجع تاني النظام البرلماني .. الحقيقة إن ده مش وقت إننا نتكلم عن الفروقات بين أجندة الإتنين بس صدقني لو قلتلك إن الفرق بينهم عامل زي الفرق بين (كاظم الساهر) و (حكيم) .. الإتنين مغنيين محترمين بس ده حمادة و ده حمادة تاني خالص .. الفايز من الإنتخابات الجاية لو كان (كمال) فتوقع إن ملامح العلاقة بين تركيا و بين حلف شمال الأطلنطي حتتغير تماماً عن اللي إنت شايفه و اللي أنا شرحتهولك ده كله.
و شوف رغم كل ده تفضل حقيقة إن NATO محتاج تركيا أكتر ما تركيا محتاجاه .. مش حيفرق إذا كان الأتراك مش عارفين يخشوا الإتحاد الأوروبي مع إنهم بيحاولوا من 2005 بس تركيا فيها تاني أكبر قوات مسلحة في الحلف بعد أميركا .. صحيح الأتراك زعلوا من الأمريكان لما طردوهم من برنامج F-35 بس في نفس الوقت إدارة الرئيس (جو بايدن Joe Biden) وافقت إنها تدي تركيا 259 مليون دولار عشان تطورلها أسطول طيارات F-16 بتاعها و متوقع إن يبقي فيه حلاوة تانية عشان تركيا وافقت علي إنضمام السويد و فنلندا للحلف و الحقيقة إن فيه كذا ملف مفتوحين هم اللي حيحددوا طبيعة علاقة تركيا بالحلف في السنين الجاية بس أهم حاجة إننا نستني لحد ما نشوف هي يا تري الانتخابات التركية الجاية حتخلص علي إيه.
المصادر:
- مقالة بعنوان The F-35 is becoming the most popular fighter jet among NATO militaries-with one ‘baffling’ exception نشرت في مجلة Business Insider و ده لينك المقالة الأصلية:
https://www.businessinsider.in/international/news/the-f-35-is-becoming-the-most-popular-fighter-jet-among-nato-militaries-with-one-baffling-exception/articleshow/99650912.cms - مقالة بعنوان Romania aims to buy F-35 fighter planes to boost air defense نشرت في موقع وكالة رويترز و ده لينك المقالة الأصلية:
https://www.reuters.com/world/europe/romania-aims-buy-f-35-fighter-planes-boost-air-defences-2023-04-11/ - مقالة بعنوان Rising tensions between 2 of NATO’s biggest militaries are driving fears of the first war between alliance members نشرت في مجلة Business Insider و ده لينك المقالة الأصلية:
https://www.businessinsider.com/greece-turkey-tensions-raise-fears-of-war-between-nato-allies-2022-11 - مقالة بعنوان Coup-proofing? Making sense of Turkey’s S-400 decision نشرت في موقع Center for Strategic and International Studies و ده لينك المقالة الأصلية:
https://www.csis.org/analysis/coup-proofing-making-sense-turkeys-s-400-decision - مقالة بعنوان Will Turkey’s elections finally spell the end of Recep Tayyip Erdogan? نشرت في جريدة The Guardian و ده لينك المقالة الأصلية:
https://www.theguardian.com/world/2023/apr/16/will-turkeys-elections-spell-end-of-recep-tayyip-erdogan
