الحقيقة أنا أقدر أقول إن العالم مستفدتش حاجة من روسيا إلا عربيات اللادا و البنادق الكلاشينكوف .. فكر فيها كده .. عايز تتعلم سواقة في عربية رخيصة معمولة من الحديد مبيفرقش معاها تخبطها فين و في نفس الوقت مفيهاش Power Steering فإنت كإنك بتروح الجيم كل مرة بتسوقها فإنت عليك و العربية اللادا .. أغلب شباب مصر إتعلموا سواقة في العربية دي .. نفس الكلام مع الكلاشينكوف .. من أول الجماعات التكفيرية لتجار المخدرات في أميركا الجنوبية للجماعات المتمردة في أفريقيا حتلاقي الكلاشينكوف .. سلاح خفيف و رخيص و سهل الإستخدام ومش محتاج حد بيفهم عشان يتحول به لقاتل يقدري ينهي حياة بني أدمين .. البندقية الكلاشينكوف أو AK-47 زي ما ناس كتير عارفاها من تصنيع شركة روسي اسمها كلاشينكوف جروب Klashinkov Group و الحقيقة إن دي الحاجة اللي الشركة بقت مميزة بيها .. تصنعلك سلاح رخيص و أي حد يقدر يستخدمه عشان يبقي أداة قتل في إيد الحكومات و الأفراد .. حتي الأمريكان نفسهم لما بيحبوا يدوا سلاح لجماعة مسلحة زي مثلاً في سوريا أو العراق محدش بيديلهم بنادق M-16 أمريكاني .. لا خالص .. الأمريكان بيشتروا بنادق كلاشينكوف مستعملة من السوق السودا و بيشحنوها ليهم .. البنادق الكلاشينكوف بقت عامله زي صناديق البيبسي في الأفراح .. مينفعش تروح فرح من غير ما تلاقي صنادق بيبسي و لازم كلها تتشرب في الأفراح متفهمش ليه و إزاي .. الإتجاه ده استمر مع الشركة لما قدمت للعالم أحدث منتجاتها .. الطيارة بدون طيار KUB-UAV أو KUB-BLA علي حسب ما حتلاقيها علي النت في معرض أبوظبي الدولي للسلاح أو IDEX2019 في فبراير اللي فات.
الروس متحمسين أوي للطيارة دي .. العرض الرسمي ليها في معرض أبوظبي قدمه واحد اسمه (سيرجي تشيميزوف Sergey Chemezov) رئيس مجلس إدارة شركة اسمها روزتيك Rosetec ودي شركة سلاح روسي قطاع عام وهي اللي بتملك أكبر حصة من أسهم شركة كلاشينكوف جروب و الكلام اللي جاي منهم إن الطيارة دي حتقلب موازين الحروب زي ما البندقية الكلاشينكوف لما هي كمان غيرت مفاهيم الناس عن الحروب أول ما طلعت .. و الصراحة إنت بسهولة أوي تقدر تفهم هم ليه بيقولوا كده.
دي طيارة شبه الطيارة Drone اللعبة عرضها ميجيش 122 سنتيمتر بتقدر تطير لمدة 30 دقيقة علي سرعة 35 متر في الثانية و هي شايلة متفجرات بحوالي 3 كيلوجرام .. ده بالضبط كأنك جبت شنطة سفر مليتها متفجرات و قدرت تطيرها لحد ما تنفجر فوق هدف علي بعد 20 كيلومتر منك .. حاول تفكر فيها علي إنها صاروخ موجه بس مداه قصير .. مدي الدقة اللي الطيارة دي بتطير بيها ناحية هدفها مش حتلاقيها إلا في عدد محدود أوي من القنابل الموجهة بالليزر اللي تحت إيد أميركا .. بذمتك مين التنظيم الإرهابي اللي ميحلمش بسلاح زي ده؟ .. مين الدولة اللي ريقها مش حيجري و مستعدة تشتري الالاف من الطيارات دي؟ .. مهم تفهم نقطه .. قوة البندقية الكلاشينكوف لما طلعت إنها خلت مبقاش فيه فجوة كبيرة بين إمكانيات حكومة وبين إمكانيات جماعة مسلحة متمردة و ده الوضع اللي إنت شايفه هنا.
لنفترض إني بحكم بلد و مخليها تنام من المغرب علي رأي الفنان (محمد هنيدي) في فيلم سور الصين العظيم .. أنا عندي جيش فيه دبابات و طيارات و مدافع و العساكر بتوعي معاهم بنادق .. بإشارة من إيدي أقدر أحبس أي حد و أموت أي معارض سياسي لحكمي .. لما الكلاشينكوف نزل و بقي يجري في إيد المتمردين اللي عايزين يمشوني من الحكم بقي المتمردين مش مجرد بيجروا مني كل ما أجي أضربهم دول بقوا هم اللي يضربوني .. فجأة مبفاش فيه فرق كبير بين إمكانيات العساكر بتوعي و هم .. ده اللي حيحصل لما حاجة زي KUB-AUV دي تنتشر في السوق .. فجأة الكلام إن زي ما سلاح الجو بتاعنا يقدر يضرب عناصر داعش في سيناء فهم كمان يقدروا بشوية طيارات من دول يضربوا مقر وزارة الدفاع في العباسية أو مقرهم الجديد اللي اسمه أوكتاجون أو الكيان العسكري جنب العاصمة الإدارية الجديدة.
فكرة إنك تجيب طيارة بدون طيار تلزق عليها قنبلة بشيكارتون مش جديدة .. هي الفكرة نفسها متاخدة من الطيارين اليابانيين في الحرب العالمية الثانية .. زمان لما اليابان كانت خلاص بتخسر الحرب الطيار الياباني لما طيارته تتضرب و يلاقي نفسه مش عارف يرجع بأمان فكان بيفضّل إنه ينزل بطيارته في أقرب سفينة أميريكية يفجر نفسه فيها علي إنه يهبط بيها و يتأسر .. الإسلوب ده في الإنتحار اسمه في اللغة اليابانية كاميكازي Kamikaze ومن ساعتها و فكرة إنك تجيب طيارة سواء بطيار أو من غير و تركب فيها قنبلة و ترميها علي العدو بقت تتسمي كاميكازي .. داعش هي اللي إخترعت الحكاية دي بطيارة بدون طيار في معارك مدينة الموصل في العراق و مدينة الرقا في سوريا .. في يناير 2018 قاعدة جوية في سوريا اسمها حميميم فيها سرب مقاتلات روسية إتعرضت لهجوم مفاجيء ب13 طيارة بدون طيار متوجهيين بالGPS و كل طيارة كانت شايلة قنبلة حمولة 5 كيلوجرام بس.
كل اللي بتفكر فيها شركة زي كلاشينكوف جروب إنها تعمل سلاح يتباع و أنا فاهم ده كويس .. المشكلة إن الروس عموماً معروفين إن مش فارق معاهم يبيعوا السلاح لمين طالما معاه فلوس يدفع .. زي ما الكلاشينكوف بقي أداة في إيد الروس إنهم ينشروا نفوذهم في العالم كله فأنا متؤكد بإن طيارة KUB-AUV حتُستخدم في نفس الغرض .. المصيبة إنها سلاح مغري جداً .. أقرب حاجة ليها هي الطيارة Harpy هاربي من تصنيع شركة IAI الإسرائيلية بس فيه نقطة .. طيارات Harpy دي الإسرائيليين مصممينها عشان كل واحدة تشيل صاروخ أو قنابل بحمولة 35 كيلوجرام بحيث إن الرادار اللي في الطيارة يلقت الإشارة اللي بتطلع من أنظمة الرادارات المعادية .. يعني مثلاً مصر ناشرة بطارية S-300 في سيناء فالرادار بتاع البطارية بيطلع إشارة .. الرادار بتاع Harpy بيجري ورا الإشارة بتاع الرادار بتاع S-300 و لإنها طيارة بلاستيك مفيهاش محرك إحتراق داخلي فهي مش بتتلقط و بتقدر ترمي قنابلها فوق بطاريات الدفاع الجوي .. المشكلة بتظهر لما تبص للسعر .. طيارة Harpy الواحدة بتكلف 70,000 دولار .. طيارة KUB-AUV الواحدة مش حتجيب ال25,000 .. مش أي حد حيقدر يشتري سلاح من الإسرائيليين بس أي حد يقدر يشتري سلاح من الروس .. بدأت تفهم المشكلة فين؟
حتي الأمريكان دخلوا في اللعبة بمشروع ملوش أي ملامح اسمه LCAA و ده إختصار Low Cost Attritable Aircraft شغالين عليه من 2016 لما وزارة الدفاع الأميريكية عطت عقد بقيمة 41 مليون دولار لشركة اسمها كراتوس Kratos عشان تصمم طيارة بدون طيار بتقدر تطير بسرعة عالية و لمسافات طويلة و تكون رخيصة و عمرها الإفتراضي كبير و بتشيل قنابل و كان ناقص يقولولهم تكون بتعرف تغسل و بتعمل الأكل و بتذاكر للعيال الصغيرة .. بس إنت عارف عشان الأمريكان بيحبوا يعملوا من الحبة قبة و بيحبوا الشو أوي فمش بيعملوا طيارة تؤدي الغرض و خلاص .. لا دول عملوا طيارة بتختفي من الرادار .. بتشتغل علي محرك نفاث مش فاهم ليه وده خلاها طيارة أقرب ما تكون للطيارة المقاتلة F-35 بس من غير طيار .. في حين إن الطيارة الHarpy الإسرائيلي بتكلف يدوبك 70,000 دولار و فيه ناس مستكترة المبلغ ده و شايفاه مبالغ فيه فالطيارة LCAA الواحدة بتكلف 3 مليون دولار .. بصراحة مشفتش في سفه الأمريكان في صرفهم علي السلاح.
اللي أنا عايز أختم به بس هو فكرة إني خايف و مرعوب من اليوم اللي KUB-UAV تنزل السوق لإنها زيها زي الكلاشينكوف قبلها حتلاقيها في كل حتة .. دول كتير و تنظيمات إرهابية أكتر حتحاول إنها تشتريها ولإن زي ما بنقول مفيش حد بيقول للرزق لا فالروس مش حيبقي عندهم مشكلة إنهم يبيعوا السلاح ده لأي حد .. يمكن كمان تلاقي ناس يستخدموه ضد الروس نفسهم زي ما السوفييت لما دخلوا أفغانستان لقوا المجاهدين الأفغان ماسكين بنادق كلاشينكوف سوفيتية برده .. الحاجة الوحيدة اللي بفكر فيها هو إن فعلاً ربنا يستر.
المصادر:
- مقالة عبنوان The Klashinkov Assault Rifle changed the world. Now there is a Klashinvov Kamikaze Drone .. نشرت في جريدة The Washington Post الأميريكية وده لينك المقالة الأصلية:
https://www.washingtonpost.com/world/2019/02/23/kalashnikov-assault-rifle-changed-world-now-theres-kalashnikov-kamikaze-drone/ - مقالة بعنوان The Company that Makes the AK-47 is Now Building Suicide Drones .. نشرت في مجلة The National Interest الأميريكية وده لينك المقالة الأصلية:
http://://nationalinterest.org/blog/buzz/company-makes-ak-47-now-building-suicide-drones-44937
قاعدة حميميم ضربت علي يد حركة احرار الشام