أنا من الناس المعجبة جداً بشغل الممثل (أدام درايفر Adam Driver) .. ناس كتير علي فكرة متعرفوش و حتي اللي شافوه في أفلام و عجبهم أوي مش حافظين إسمه .. هو لسه مش نجم شباك زي (توم كروز Tom Cruise) ولا له وجود علي Social Media زي (ويل سميث Will Smith) أو (دواين جونسون Dwayne Johnson) بس صدقني لو قلتلك إن (أدام درايفر) دلوقتي في مستوي بيخلي أغلب ممثلين هوليوود نفسهم يبقوا زيه رغم إنه فعلياً لسه صغير .. هو عنده 39 سنة و ده رقم قليل لممثل بس عشان أوصلك إزاي موهبة (أدام درايفر) فرقعت في وشنا كلنا خصوصاً السنة دي فهو بدأ السنة في فبراير 2019 بترشيحه لأوسكار أحسن ممثل مساعد عن دوره في فيلم BlaKKKlansman و حيخلص السنة بإننا نشوفه في أهم و أكتر 3 أفلام الناس بره بتتكلم عليهم .. الجزء التاسع من سلسلة Star Wars اللي هو The Rise of Skywalker .. فيلم The Report و اللي بيحكي عن التقرير اللي طلع من الكونجرس الأميريكي و أثبت إن برنامج تعذيب المعتقلين اللي نفذته وكالة المخابرات المركزية الأميريكية مش شرعي و مش بيجيب نتيجة .. فيلم Marriage Story بيتكلم عن قصة طلاق إتنين متجوزين و عندهم طفل و إزاي الحرب اللي بتحصل في المحاكم ممكن تخلي إتنين كانوا بيعشقوا بعض يوصلوا لمرحلة إنهم يبقوا كارهين الهواء اللي التاني بيتنفسه و اللي خدها مني كلمة إحتمال كبير يسرق جايزة أوسكار أحسن فيلم السنة دي.
3 أفلام مختلفين فشخ عن بعض و كل واحد فيهم كفيل إنه يعمل Career لأي ممثل حظه خلاه يبقي بطل أي فيلم فيهم و حنتكلم عنهم بشوية تفصيل قدام .. خلال سنة 2019 هو عمل مسرحية إسمها Burn This إترشح بسببها لجايزة توني Tony و دي جايزة شبه جايزة الأوسكار بس للأعمال المسرحية و كان بينافس فيها الممثل (برايان كرانستون Brian Cranston) بتاع مسلسل Breaking Bad .. لو كل ده مخلكش تقول لنفسك لا ده واضح إني بتكلم عن ممثل تقيل أوي فخليني أوريك رأي مخرجين إشتغلوا مع (أدام درايفر) و قالوا رأيهم فيه.
حتحس دلوقتي إني شبه (فوزية) في مسرحية سك علي بناتك و هي بتعد المشاهير اللي إتقدمولها و جه (حنفي) برجولته المتفجرة عشان يخطفها منهم كلهم .. المهم .. نقاد كتير أوي إتكلموا عن إن (أدام درايفر) فعلياً هو إمتداد لجيل السبعينات و الثمانينات بتاع هوليوود .. مجلة The New Yorker مثلاً وصفته بإنه حيكمل المشوار اللي مشي فيه ممثلين جامدين زحليقة زي (روبيرت دي نيرو Robert De Niro) و (داستن هوفمان Dustin Hoffman) .. مخرج عبقري زي (مارتن سكوريزي Martin Scorsese) و اللي إشتغل معاه في فيلم Silence وصفه بإنه واحد من أحسن ممثلين جيله إن لم يكن أحسنهم .. مخرج تاني زي (سبايك لي Spike Lee) و اللي إشتغلوا سوا في فيلم BlacKKKlansman لما سألوه ليه إخترت (أدام درايفر) قال Game gets Game اللي هو حاجة كده زي عشان الناس اللي بتفهم بتقدر الناس اللي بتفهم.
أي ممثل في الدنيا عايز يبقي فيه صورة أو Image معينة مرتبطه بإسمه في دماغ الناس .. يعني مثلاً (محمد رمضان) عايز الصورة اللي في دماغنا عنه إنه سرسجي .. ليه؟ .. لإن السرسجية هم اللي حيدفعوا فلوس عشان يشوفوا أفلامه في السينما و يحضروا حفلاته .. (توم كروز) علي الناحية الثانية مش إني بقارن بينه و بين (محمد رمضان) بس الصورة اللي هو عايز يزرعها في راسك إنك لما بتشوفه متشعبط من طيارة أو بتشوفه متعلق علي إزاز برج خليفة زي البرص فده مش دوبلير اللي عامل كده .. إنت بتبقي بتتفرج و بتقي عارف إن اللي بيعمل كده هو (توم كروز) بنفسه .. (أدام درايفر) الصورة اللي عايز الناس تعرفها عنه مش إنه حاجه معينة قد ما هي إنه مش عايز الناس تبصله علي إنه Sex Symbol .. هو مش عايز البنات لما تسمع إسمه تهيم و تتخيل نفسها في حضنه .. و مش عايز يبقي له Look معين الولاد يقلدوه عشان يعجبوا البنات .. هو ملوش وجود تقريباً علي Social Media و مش عايز يركب الموجة اللي عايش عليها أغلب ممثلي هوليوود دلوقتي و إن كان الPhoto Session اللي هو عملها في 2013 لمجلة Vogue عملت العكس تماماً و الصورة عندك عشان تحكم عليها بنفسك .. هو عايزك تتعلق بالشخصيات اللي هو بيجسدها مش به هو شخصياً .. هو مش سنجل بالمناسبة .. هو متجوز بقاله ست سنين من واحدة إسمها (جوان تاكر Joanne Tucker) كانت زميلته في الكلية اللي هي مدرسة جوليارد للفن زي ما حنشوف كمان شوية و عنده منها إبن .. هو مش عايش في قصر ولا فيلا فشيخة .. لا خالص هو عايش في شقة عادية جداً في حي بروكلين في مدينة نيويورك و ده حي شعبي علي فكرة و ده الحي اللي إتولدت فيه مراته و إتجوزها فيه و عايش هناك معاها.
إزاي (أدام درايفر) دخل التمثيل دي قصة فعلاً توريك إن الصبر مفتاح الفرج .. و هو صغير أبوه و أمه إتطلقوا و يا عيني هو إتصدم لما لقي أبوه قرر إنه بعد ما طلق أمه إنه مش عايز يبقي له أي علاقة بإبنه .. فعلياً أبوه سابلهم البيت و مشي .. اللي حصل ده ساب جرح كبير أوي في نفسيته .. أمه إتجوزت تاني و جوز أمه كان شغال قسيس في كنيسة .. فعلياً (أدام درايفر) قرر إنه يتمرد علي كل حاجة بيقولها أو بيطلبها جوز أمه .. روح يابني الكنيسة .. مش رايح .. قوم صلي يابني .. مش مصلي .. في الفترة دي من حياته هو حب أوي إنه يبقي ممثل .. لما كان لسه مراهق هو إتفرج علي فيلم Fight Club اللي أخرجه (ديفيد فينشر David Fincher) .. حبه للأفلام بدأ بالفيلم ده .. هو إتفرج عليه مرتين ورا بعض و حس إن زي ما يكون الفيلم عايز يوصله حاجة إنه لازم يسعي ورا حلمه .. راح قدم في مدرسة جوليارد Julliard للفن في مدينة نيويورك و دي تعتبر أكبر و أعرق مدرسة للفنون في أميركا و إترفض و هو كان عنده 17 سنة .. وقتها أمه و جوزها قالوله إنت مش حتقعد في البيت ببلاش كده إنت لازم تلاقي شغل و تدفع إيجار الشقة اللي إنت قاعدلنا فيها .. جرب يشتغل بياع غسالات و الدنيا ممشتش معاه .. بعد زن جوز أمه إنه يلاقي شغل قرر إنه يتطوع في الجيش في قوات مشاة البحرية US Marine و فجأة حصلت هجمات 11 سبتمبر 2001 و كان المفروض إن (أدام درايفر) وحدته تبقي أول وحدة قتالية تروح للجبهة في أفغانستان .. قبل ما يطلع علي أفغانستان بكام يوم راح مع صحابه رحلة سواقة عجل في الجبل و عمل حادثة و إتصاب إصابة جامدة طلعته من الجيش .. عمل كذا عملية جراحية و دخل مرحلة العلاج الطبيعي و عرف يمشي تاني و دي رحلة أي حد جربها عارف قد إيه هي صعبة .. جرب حظه تاني في مدرسة جوليارد و المرة دي اتقبل .. زمايله في المدرسة بقوا عارفينه إن ده (أدام درايفر) اللي بيصحي الساعة خمسة الصبح يجري 10 كيلومتر في حرم المدرسة و يلعب ضغط قبل ما الدراسة تبدأ و بياكل في اليوم 6 بيضات و فرخة كاملة عشان يحافظ علي فورمة الساحل اللي هو عملها من أيام ما كان في الجيش.
ميزة (أدام درايفر) في رأيي كممثل إنه بيحاول يعيش الشخصية .. هو بيتقمصها و بيحاول يفكر زيها .. هو بيحاول يسأل نفسه إزاي الشخصية بتبرر أفعالها؟ .. ليه بياكل كده؟ .. ليه بيقرر يقتل؟ .. ليه بيقرر يدمر؟ .. ليه بيقرر إنه يبقي طيب؟ .. و من تجربته و حياته الشخصية بيبدا يحط التاتش بتاعته علي كل شخصية بيقدمها .. يعني مثلاً .. في أخر أفلامه Marriage Story و اللي بقول تاني حاول تتفرج عليه لإنه حيفتح عنيك فعلياً ليعني إيه جواز؟ و يعني إيه طلاق؟ و يعني إيه خلفة؟ و يعني تربية؟ هو قال لنفسه إن الشخصية اللي هو بيجسدها (تشارلي Charlie) رجل بيموت في إبنه و بينشف دماغه إنه حيحتفظ بحقه بإنه هو اللي يربي إبنه مش طليقته .. ده تصرف عكس اللي أبو (أدام درايفر) عمله معاه لما طلق أمه .. هو تخيل إزاي كان نفسه أبوه يتصرف و خد التصرفات اللي هو تخيلها دي و رسمها علي الشخصية اللي هو بيجسدها .. الدور اللي خلي الناس كلها تعرف هو مين (أدم درايفر) كانت شخصية (أدام ساكلر Adam Sackler) في مسلسل Girls .. الشخصية دي بمنتهي البساطة هو شاب عايش حياته مقضيها بنات و فسح و سهر و عمره ما فكر إنه يرتبط ببنت عشان يكون أسرة .. حاجة كده شبها شخصية (تامر حسني) في فيلم عمر و سلمي بس اللي عمله (أدام درايفر) إنه خلي للشخصية عمق بحيث و إنت بتتفرج عليه إنت مش بتكرهه .. مهما عمل من تصرفات تخليك عايز تسب و تلعن فيه بس فعلياً إنت متعاطف معاه جداً عشان (أدام درايفر) شرب الشخصية و خلاك تفكر زيه .. أدوار (أدام درايفر) متنوعة ولا كإنها فلتر التصوير في Snapchat .. شوية تلاقيه الشاب القافل علي نفسه اللي مبيتكلمش كتير زي ما شفناه في فيلم Paterson من إخراج (جيم جارموش Jim Jarmusch) .. شوية تشوفه في دور القسيس الكاثوليكي اللي سافر اليابان ضمن بعثات التبشير و هناك شوية بشوية بيفقده إيمانه بدينه و بعقيدته و ده كان فيلم Silence من إخراج (مارتن سكوريزي) .. شوية و تلاقيه ضابط الشرطه اليهودي الأهبل بس عنده ضمير خلاه ميرضاش بالتفرقة العنصرية ضد زميله الأسمر و ده كان فيلم BlacKKKlansman .. هنا أنا حابب أتكلم شوية عن ال3 أفلام اللي (أدام درايفر) عملهم السنة دي لإنهم الحقيقة 3 أفلام مختلفين جداً عن بعض زي ما حتشوف دلوقتي.
فيلم The Report .. حيحسسك إن ضباط المخابرات دول شوية بهايم:
أنا مش بهزر و مش هدفي إني أضحكك في العنوان .. فعلياً الفيلم بيخليك توصل إنك تسأل نفسك هم ضباط المخابرات دول فعلاً بهايم؟ .. الفيلم بيحكي قصة التحقيق اللي فتحه الكونجرس الأميريكي حول برنامج تعذيب المعتقلين اللي إتقبض عليهم ضمن الحرب علي الإرهاب و اللي المخابرات الأميريكية بتسميه EIT و دي إختصار Enhanced Interrogation Program .. الفيلم ده من كتابة و إخراج شاب إسمه (سكوت زي بارنز Scott Z. Burns) و اللي عمله إنه جاب التقرير اللي أكتر من 7,000 ورقة اللي إتحط فيه نتايج التحقيق و حكي قصته و إزاي إتكتب .. القصة بإختصار شديد إن رئيسة لجنه المخابرات و الأمن القومي في الكونجرس وقتها (دايان فاينستين Dianne Feinstein) اللي جسدت دورها الممثلة (أنيت بينينج Annette Bening) كلفت دراعها اليمين و كان محامي إسمه (دانييل جونز Daniel Jones) و ده اللي جسده (أدام درايفر) إنه يقضي خمس سنين من عمره بيكتب تقرير و هو بيكتبه كان عنده إحساس داخلي إن شغله ده عمره ما حتينشر و لا حد حيعرف عنه حاجة .. قصة توجع القلب فعلاً و ياريت لو عندك وقت تبقي تتفرج عليه .. و أنا بتفرج عليه مش عارف ليه إفتكرت الكوميك بتاع إيه يا جدع كل ده وجع مش عارف ليه .. اللي منكوا شاف فيلم Spotlight و عجبه يبقي الفيلم ده معمول عشانك.
فيلم Star Wars: the Rise of Skywalker .. يادي النيلة هي سلسلة السيف أبولمبة دي مش حتخلص:
و يبقي الدور اللي حطه ضمن كبار و عتاولة ممثلين هوليوود تجسيده لشخصية (كايلو رين Kylo Ren) في سلسلة Star Wars و اللي بيستمر في التريند بتاعه إنه يجسد شخصية بنت وس&^ بس إنت غصب عنك بتتعاطف معاه .. مع إني عارف كويس إن ناس كتير في مصر مش بتحب سلسلة Star Wars و عارف كويس إن إحنا أساساً منعرفش حاجة عن السلسلة دي غير إنها بتاعة السيوف أبو لمبة .. بس صدقني لو قلتلك إن الفيلم ده مختلف .. بسم الله الرحمن الرحيم كده ده يبقي الجزء التاسع و الأخير من السلسلة اللي بدأت سنة 1977 بالجزء الأول Star Wars اللي أخرجه (جورج لوكاس George Lucas) و من ساعتها و هي عامله هسهس للناس بره .. بعد الجزء ده باي باي Star Wars بشكله القديم .. صحيح إن شركة Disney اللي إشترت حقوق السلسلة و اللي أنتجت الفيلم عملت قناة مسلسلات إسمها Disney Plus و أنتجت مسلسل إسمه The Mandalorian و ده تبقي واحدة من الشخصيات الكتير فشخ في السلسلة بس تاني .. فيلم the Rise of Skywalker هو نهاية تسع أجزاء .. لمجرد إني حابب أرخم عليك مش أكتر خليني أرصلك الأسئلة اللي في دماغي و دماغ أي حد إتفرج علي السلسلة دي و مستني الفيلم ده بفارغ الصبر .. جاهز .. مين هي (راي Rey)؟ هل هي بنت عادية ولا المنقذ المنتظر اللي حتحرر الكون؟ .. هل (كايلو رين) حيسيب الجانب المظلم اللي في السلسلة بيتسمي Dark Side و يروح للجانب المضيء من الكون أو Light Side؟ .. هل (فين Fin) و (روز Rose) حيتجوزوا و يخلفوا صبيان و بنات؟ .. إيه اللي حصل ل(لوك سكاي ووكر Luke Skywalker)؟ إزاي الإمبراطور (بالباتين Palpatine) أو (دارث سيديوس Darth Sidious) حيرجع تاني؟ .. إزاي حيصوروا مشاهد الأميرة (ليا Leia) عشان الممثلة اللي بتجسدها (كاري فيشر Carrie Fisher) إتوفت قبل ما الفيلم يتصور؟ .. أنا عارف والله إن كتير منكوا ولا يعرف أي حاجة عن الأسامي اللي أنا قلتها أنا بس زي ما قلتلك حبيت أرخم عليكوا عشان تعرفوا إن فيه ناس تانية بتموت في السلسلة دي .. أيوه أنا بحب السيف أبولمبة و زي ما قال طيب الذكر (مرتضي منصور) اللي مش عاجبه يشرب من أي خرارة.
فيلم Marriage Story .. يخرب بيت الجواز علي اللي عايز يتجوز:
كان يا مكان كان فيه واحد إسمه (نواه باومباخ Noah Baumbach) بيكتب سيناريوهات و بيشتغل مخرج كان متجوز ممثلة أغلب شغلها كان مسلسلات تليفيزونية إسمها (جينيفر جايسون لاي Jennifer Jason Leigh) .. المهم إن سنة 2013 الإتنين إتطلقوا و واضح إنه كان Breakup تقيل حبتين لإن الرجل فضل 5 سنين يكتب سيناريو فيلم بيحكي قصة طلاقه .. الفيلم مش قصة حقيقية .. حاول تتخيل إن حد عمل عملية قلب مفتوح مثلاً فقرر يكتب سيناريو فيلم عنها فحتلاقيه كاتب سيناريو صادق أوي .. سيناريو كتبه حد عاش التجربة بنفسه و عارف تفاصيلها .. عارف إن الجواز مش وحش علي طول الخط و مش حلو علي طول الخط .. لو إنت متجوز فإنت فحتتفرج علي الفيلم و تقول أيوه هو ده اللي حصل معايا .. و لو إنت لسه سنجل فبلاش تشوف الفيلم لإنك حتحس إنك عندك إستعداد تعيش أحداث فيلم Schindler’s List ولا إنك تجرب تتجوز .. (أدام درايفر) مش بيوريك تجربة (نواه باومباخ) .. لا خالص .. الفيلم ده هو زي ما قلتلك بيجسد شخصية واحد من الناس إسمه (تشارلي Charlie) شغال كاتب سيناريوهات متجوز واحدة إسمها (نيكول Nicole) بتجسدها الممثلة (سكارليت جوهانسين Scarlet Johansson) بس حياتهم بتتحول لحرب لما بيقرروا يتطلقوا و بيرفعوا علي بعض قواضي في المحاكم علي مين اللي يحتفظ بحق تربيه إبنهم.
(أدام درايفر) زيه زي أي بني أدم دماغه بتكبر مع كل يوم بيعيشه .. إنت دلوقتي غير إنت من 10 سنين .. لما كان عنده 17 سنة كان ضايع مش عارف هو عايز إيه .. هو كان عارف إنه نفسه يبقي ممثل بس إزاي؟ .. حاول يخش مدرسة جوليارد و فشل .. ملقاش شغل فدخل الجيش .. حياته العسكرية علمته الإنضباط و الإنضباط خلاه يعرف إزاي يبقي بني أدم .. إتعلم إزاي يعيش في التين الشوكي زي ما بنقول .. زيه زي أي حد دخل الجيش بيتخيل إنه رجل فشخ .. أحياناً بحس إن ضباط الجيش عندهم حتة جنون العظمة شوية لإنهم بيتخيلوا إن تدريبهم و اللي إتعلموه خلاهم من وجهة نظرهم Superheroes فمينفعش تعامله كإنه بني أدم عادي و دي النقطة اللي لبست (أدام درايفر) في الحيط لما طلع من الجيش و قدم في مدرسة جوليارد تاني و إتقبل .. لو كان حد من زمايله إستلف منه مثلاً سجادة اليوجا بتاعته و رجعاله مش نظيفة كانت بتبقي ليلة أمه سودا .. هو إتعلم في الجيش إن الحاجة تبقي نظيفة و لو إنت مش نظيف تبقي مش بني أدم و عايز تتربي .. واحدة واحدة بدأ يستوعب إنه خلاص مبقاش في الجيش و مفيش حاضر و نعم و تمام يافندم.
هو بني أدم خجول بشكل إنت لا تتخيله .. مبيحبش يتفرج علي نفسه .. ملوش أي حياة إجتماعية و مش بتاع فسح و خروج و الوحيدة اللي بتاخده من إيده تفتح عينه علي الدنيا هي مراته .. هي اللي علمته إزاي يبقي مدني مش عسكري .. سنة 2015 لما المخرج العبقري مع إنه لسه صغير (جيه جيه إبرامز JJ Abrams) إختاره عشان يجسد شخصية (كايلو رين) في فيلم Star Wars: the Force Awakens فعلياً طاقة القدر إتفتحله بس يمكن خليني أقولك إنه يستحق ده .. اللي شافه سواء في طفولته أو في حياته قبل ما يبقي ممثل مش شوية بس يمكن عشان كده هو أتقن فن إنه يحط نفسه مكان الناس و دي أهم ميزة في أي ممثل.
المصادر:
- مقالة بعنوان Fir for stardom: How Adam Driver went from US Marine to Hollywood heartthrob نشرت في جريدة The Guardian و ده لينك المقالة الأصلية:
ps://www.theguardian.com/film/2019/dec/08/adam-driver-hollywood-heartthrob - مقالة بعنوان The Report review: Claustrophobic tale of CIA interrogation failures نشرت في جريدة The Guardian و ده لينك المقالة الأصلية:
tps://www.theguardian.com/film/2019/nov/17/the-report-review-adam-driver-annette-bening - مقالة بعنوان The Rise of Skywalker trailer – five things we learned نشرت في جريدة The Guardian و ده لينك المقالة الأصلية:
https://www.theguardian.com/film/2019/oct/22/the-final-star-wars-the-rise-of-skywalker-trailer-kylo-ren-palpatine-c3po-jannah-rey - مقالة بعنوان Marriage Story review – everything you ever wanted to know about divorce نشرت في جريدة The Guardian و ده لينك المقالة الأصلية:
https://www.theguardian.com/film/2019/nov/15/marriage-story-review-noah-baumbach-adam-driver-scarlett-johansson - مقالة بعنوان 5 things you didn’t know about Adam Driver نشرت في مجلة Vogue و ده لينك المقالة الأصلية:
https://www.vogue.com/article/things-you-didnt-know-adam-driver-star-wars-logan-lucky
