الفيلم ده كان سابق عصره في كل حاجة .. لما فيلم The Matrix نزل السينمات سنة 1999 يعني من 26 سنة كنا أول مرة نشوف يعني إيه فيلم أكشن سوبرهيرو قبل حتي ما أول فيلم من أفلام Marvel ينزل السينمات اللي هو X-Men .. كنا أول مرة نشوف يعني إيه ممثلين يضربوا بعض بتكنيك الكونج-فو وهم متعلقين بحبال قبل سنة من عرض الفيلم الصيني Crouching Tiger, Hidden Dragon واللي خد أوسكار أحسن فيلم لو تفتكر .. كنا أول مرة نشوف مشهد تصوير بطيء لطلقة مسدس طايرة في الهواء .. في الوقت اللي مكنش فيه شباب كتير في مصر عندهم كومبيوتر ولا إنترنت يبقي عندك فيلم يتكلم عن مفاهيم معقدة أوي زي الواقع الافتراضي Virtual Reality والذكاء الصناعي Artificial Intelligence فانت فعلاً بتتكلم عن فيلم سابق عصره وكان بيتكلم في مواضيع وقتها كانت خيال علمي بس دلوقتي بقت واقع كلنا عايشينه.
بس يمكن الحاجة الوحيدة اللي متغيرتش من وقت عرض الفيلم لحد دلوقتي من 26 سنة هي إن البشر لسه زي ما هم متغيروش من التسعينات لحد دلوقتي .. لو معترض علي رأيي تعالي اثبتلك وجهة نظري بإننا نتكلم شوية عن بطل الفيلم .. لا مش (كيانو رييفز Keanu Reeves) .. أنا قصدي الشخصية اللي هو بيقدمها .. مهندس الكومبيوتر (توماس إيه أنديرسون Thomas A. Anderson).
ده رجل شغال مهندس برمجيات في شركة كبيرة الصبح وبعد الظهر شغال Hacker بارت تايم ومسمي نفسه (نيو Neo) .. بيبدأ يجيله رسايل غريبة أوي علي كومبيوتر بتاعه وبيتخيل إن Hacker تاني بيلعب معاه بس في رحلته بيتعرف علي شخصيتين .. بنت اسمها (ترينيتي Trinity) جسدتها الممثلة (كاري أن موس Carrie-Ann Moss) .. و رجل اسمه (مورفيوس Morpheus) جسده الممثل (لورينس فيشبيرن Laurence Fishburn) و الاتنين دول بيعرفوا (توماس إيه أنديرسون) الحقيقة وهي إن البشر كلهم اللي هو بيشوفهم كل يوم في حياته دول مش عايشين حياة زي البني أدمين .. دول عايشين جوه واقع افتراضي Virtual Reality أو تقدر تسميها Video Game اسمها The Matrix وإن الحقيقة إن حصلت حرب كبيرة بين البشر وبين الالات والبشر خسروها واللي فضلوا عايشين مستخبيين في حتة قريب من مركز الأرض وباقي البشر اللي اتأسروا محطوطين في غيبوبة والالات موصلة مخهم بالThe Matrix عشان يفضلوا نايمين بيحلموا وعايشين جوه الواقع الافتراضي ده .. اللي (توماس إيه أنديرسون) بيكتشفه إنه بما إنه عرف حقيقة The Matrix فهو يقدر يعمل اللي هو عايزه .. يقدر يجري بسرعة ويكسر الحيطان ويطير كمان .. بيعرف إنه هو المنتظر أو The One وتقدر تقول إنه هو الشخصية أو Character جوه اللعبة اللي معاها كل مفاتيح السوبرباورز كلها .. لحد دلوقتي الفكرة حلوة لحد ما تقرر إنك تغوص شوية جوه دماغ شخصية (توماس إيه أنديرسون).
فعلياً هو بني أدم طبيعي بشكل مستفز .. هو حقاً وصدقاً معملش ولا يملك أي شيء يخليه يستحق إنه يتقال عليه سوبرهيرو .. هو The One اللي يقدر يعمل اللي هو عايزه جوه The Matrix مش لإنه قوي ولا ذكي ولا شجاع .. هو بيقدر يعمل ده لإن زي ما تقول كده عملوا قرعة وهو اللي كسبها .. هو بطل صنعته الصدفة .. حتي في حياته جوه The Matrix قبل ما يتعرف علي (ترينيتي) و(مورفيوس) كان مهندس برمجيات تقدر توصف حياته زي ما (عادل إمام) قال في مسرحية شاهد مشافش حاجة .. من البيت للكباريه ومن الكباريه للبيت .. هو بني أدم مش بيسهر بليل ومش مبيعرفش ينام لإنه شايف الظلم حوليه في كل حتة ومحتاج يعمل حاجة .. هو مش ناشط سياسي ومش بيروح الجيم يتمرن كل يوم بليل عشان يعمل فورمة الساحل .. هو موظف شغال في شركة وصل لمرحلة إنه مبقاش طايق الشغل .. باختصار (توماس إيه أنديرسون) هو أنا وانت وأي حد تعرفه بيشتكي من شغله .. اللي منكوا شاف فيلم Fight Club ففعلياً شخصية (توماس إيه أنديرسون) هي هي الشخصية اللي قدمها الممثل (إيدوارد نورتون Edward Norton) .. موظف شكله مش بطال .. معدي الثلاثين سنة بس سنجل .. مرتبه إلي حد كبير كويس أوي بس بيعاني من اكتئاب رهيب .. يمكن عشان مفيش بنت في حياته ويمكن لإنه مبيعملش الحاجة اللي هو بيحبها .. بس جوانا كلنا نفسنا نصحي الصبح نلاقي نفسنا (نيو) .. من جواك وانت بتقرأ المقالة دي انت مش عايز تفضل طول حياتك (توماس إيه أنديرسون) .. إنت نفسك يجي اليوم اللي تبقي فيه (نيو).
اللحظة دي في فيلم The Matrix إن (توماس إيه أنديرسون) بقي (نيو) كانت لما العميل (سميث Smith) اللي قدمه الممثل (هيوجو ويفينج Hugo Weaving) كان بيستجوب (مورفيوس) في ناطحة السحاب وبص من الشباك لقي (نيو) قاعد علي باب الطيارة الهليكوبتر وماسك المدفع الرشاش .. بصة عين (نيو) كفيلة إنها تفهمك ازاي شخصية (توماس إيه أنديرسون) ماتت خلاص .. الموظف مات وحل محله شاب لابس أسود في أسود بنظارة سودا وطايح في خلق الله تلطيش .. لو حصل واتفرجت علي The Matrix تاني ركز في اللقطة دي أوي .. حاول تفتكر أول مرة اتفرجت فيها علي الفيلم وحسيت إن كان نفسك تبقي مكان (نيو) بس دلوقتي بعد ما كبرت واشتغلت والدنيا داست علي وشك حتحس بأد إيه إنت متعاطف مع شخصية (توماس إيه أنديرسون) كأنك بتبص لنفسك في المراية .. وده حيخليني أروح للحتة اللي أنا عايز أتكلم عنها النهاردة .. ليه عايزين تبوظوا الحاجة الحلوة في The Matrix لما قلتوا إنكوا عايزين تعملوا السلسلة من أول وجديد؟
فيه مشهد في فيلم The Matrix Reloaded اللي أُنتج سنة 2003 لما شخصية (نيو) كان بيتكلم مع شخصية العرافة أو Oracle وبتشرحله إن كان فيه نسخ كتير من (نيو) حصلت قبل كده وكلهم كان اسمهم (نيو) وكلهم كان ليهم نفس القدرات وكلهم قادوا البشر في حربهم ضد الالات وكلهم وقفوا قصاد قائد الالات في أوضة مقفولة وكلهم إتسألوا نفس السؤال اللي (نيو) الجديد حيتسأله .. من أول المشهد ده وإنت طالع ودماغ الناس بتسأل يا تري لو حصل وإتعملت سلسلة جديدة من The Matrix مين اللي حيعملها من بعد (كيانو رييفز)؟ .. الناس كانت متخيلة إن سلسلة The Matrix حتبقي عاملة زي سلسلة (جيمس بوند James Bond) كده اللي هو يجيبوا ممثل يعملها وتقف وشوية يجيبوا ممثل تاني يعملها وهكذا .. فضلت الناس مستنية أي خبر أو أي حاجة عن إعادة إحياء السلسلة لحد ما في 2017 إتقال إن (زاك بين Zack Penn) وده يبقي السيناريست بتاع فيلم Ready Player One شغال علي سيناريو الفيلم الجديد من The Matrix وإن اللي حيعمل شخصية (نيو) المرة دي الممثل (مايكل بي جونسون Michael B. Johnson) اللي يمكن إنت تعرفه من فيلم Creed وكمان بدور (كيلمونجر Killmonger) في فيلم Black Panther.
أنا شخصياً تخيلت إن أكيد الأخوين (واتشوسكي Wachowski) اللي بقوا الأختين (واتشوسكي Wachowski) حيعترضوا .. بصوا هي قصة طويلة إنهم كانوا أخين والإتنين عملوا عملية تحول جنسي وبقوا أختين وليلة كبيرة كده ممكن نبقي نتكلم عنها بعدين .. المهم .. واحدة من الأختين اللي هي (لانا Lana) قالت إنها معندهاش أي مشكلة خالص إن حد تاني غيرها هي وأختها اللي يمسك مشروع إحياء فيلم The Matrix .. هنا بقي أنا محتاج إني أقول بلاش .. وإفتكروا إني قلتلكوا بلاش وخليني أشرحلك أنا ليه بقول كده:
فيلم The Matrix لما نزل فعلياً كسر الدنيا .. مش بس الأكشن .. الفكرة نفسها كانت جديدة .. إن يبقي عندك ألات عايزة تسيطر علي البشر فتخلق ليهم عالم إفتراضي زي ما يكون Video Game كلنا عايشين جواه عشان منفكرش إننا نثور علي الألات .. المشكلة إن حتي الأخوين (واتشوسكي) اللي أبهرونا في الجزء الأول معرفوش يكرروا نجاحهم ده في الجزئين اللي وراه سواء The Matrix Reloaded أو The Matrix Revolutions فلو الناس اللي عملوا الجزء الأول فشلوا إنهم يكملوا نجاح السلسلة فإنت عايز تقنعني إن حد تاني خالص حيعرف؟ .. حتي لو جه حد قالي إن سبب فشل الجزئين الثاني والثالث هو أن الأخين (واتشوسكي) حطوا التاتش بتاعتهم بطريقة أوفر أوي .. أوفردوز فلسفة الصراحة محشور وسط مشاهد أكشن معمولة بأوفر دوز جرافيك .. يعني أنا معاك إن الأخوين (واتشوسكي) هم اللي بوظوا السلسلة بس تفتكر مين اللي حيقدر يعيد إحياء السلسلة من بعدهم؟
إتقال أسامي مخرجين تقال أوي .. ناس قالت أدوا المشروع ل(كريستوفر نولان Christopher Nolan) .. ناس تانية قالت أدوا المشروع ل(دينيس فيلينيف Denis Villeneuve) وده المخرج الكندي اللي عملنا أفلام زي Sicario و Arrival .. ناس تانيه قالت طب ما تدوا المشروع لمخرج شاب دماغه متكلفة زي (نيل بلومكامب Neil Blomkamp) اللي عملنا تحفة District 9 .. بص أنا ممكن أقعد معاك نحط لستة أسامي مخرجين ينفعوا إنهم يعملوا الجزء الجديد من The Matrix بس برده إنت متكلمتش عن أهم نقطة .. إنت أساساً ليه عايز تعيد إحياء السلسلة؟
تخيل معايا حضرتك لو كنا سبنا الجزء الأول من The Matrix في حاله ومعملناش لا The Matrix Reloaded ولا The Matrix Revolutions .. تخيل بس إيه اللي كان ممكن يحصل؟ .. كان حيبقي عندك فيلم له مكانة كبيرة أوي في دماغنا زي ما كده فيلم Blade Runner اللي إتعمل سنه 1982 وأبهرنا كلنا ومتعلموش جزء تاني إلا بعد 30 سنة اللي هو Blade Runner 2049 واللي أخرجه (دينيس فيلينيف) وعملي أنا شخصياً صداع من كتر العظمة .. قصة سلسلة The Matrix تديك درس إن مش كل فيلم ينجح تقوم تروح تجري عشان تعمله جزء تاني وتالت .. فكر في فيلم Avatar .. فيلم Avatar لما نزل مكنش له نفس تأثير الصدمة بتاع The Matrix بس ده ممنعش المخرج بتاعه (جيمس كاميرون James Cameron) إنه يستني أكتر من 10 سنين قبل ما يفكر يعمل الجزء الثاني بتاعه .. ده برده اللي خلي الاتنين اللي كتبوا السيناريو بتاع Ready Player One يقرروا يكتبوا رواية ملهاش أي علاقة بالفيلم قبل ما يفكروا يعملوا الجزء الثاني من الفيلم اللي أخرجه (ستيفن سبيلبيرج Steven Spielberg) والمنتجين شوية وحيبوسوا ايدهم عشان يكتبوا الجزء الثاني بتاعه .. أظن اللي أنا عايز أقوله ليك إنك لما تعمل فيلم يكسر الدنيا خد وقتك ومتستعجلش إنك تعمل الجزء الثاني .. الخبر اللي إتقال اليومين اللي فاتوا إن (لانا) اللي هي احدة من الأختين (واتشوسكي) هي اللي حتخرج الجزء الجديد من السلسلة وإنها حترجع تجيب (كيانو رييفز) و(كاري أن موس) والصراحة من ساعة ما الخبر ده إتقال وانا مش متفائل.
المصادر:
- مقالة بعنوان The Matrix Rebooted: Do We Want to Go Down the Rabbit Hole Again? .. نشرت في جريدة The Guardian وده لينك المقالة الأصلية:
https://www.theguardian.com/film/2019/aug/08/the-matrix-rebooted-new-film - مقالة بعنوان The Matrix’s Male Power Fantasy Has Dated Badly نشرت في موقع هيئة الإذاعة البريطانية BBC وده لينك المقالة الأصلية:
/story/20190319-the-matrixs-male-power-fantasy-has-dated-badly
