لينك التسجيل الصوتي للمقالة علي ساوند كلاود:
https://on.soundcloud.com/ErJ3o
زي ناس كتير لما سمعت إن شركة Netflix أنتجت مسلسل اسمه The Witcher فكرته متاخدة من Video Game مشهورة أوي اسمها The Witcher برده مجاش في بالي غير جملة واحدة بس .. ياااااادي النيلة .. فعلياً مفرقش عندي إني عرفت معلومة إن بطل المسلسل هو (هنري كافيل Henry Cavil) الممثل اللي يمكن إنت تعرفه في دور Superman و اللي أنا فعلياً بحبه جداً .. حتي لما عرفت إن المصدر الأساسي اللي المسلسل إتبني عليه هو سلسلة الروايات مش الVideo Game برده مفرقش معايا .. كل اللي جه في دماغي إن المسلسل ده متاخد عن Video Game و دي لوحدها معلومة كفيلة إنها تقفلني منه .. ليه؟ .. لسبب أنا معرفوش كل ما شركة إنتاج تفكر تعمل فيلم مبني علي أحداث Video Game فالفيلم ده بيطلع ميتشافش .. من يوم ما المسلسل إتعرض و أنا بفكر أكتب المقالة دي و هي إني أحاول أفهم ليه محدش بيعرف يعمل فيلم مبني علي أحداث Video Game و يكون فيلم كويس؟ هل الحكاية صعبة أوي كده؟ .. لما بدأت أدور و أعمل Search عشان أفهم لقيت نفسي قدام 3 حقايق لما تحطهم جنب بعض حتبدأ تفهم هي المشكلة فين:
حقيقة رقم واحد .. Video Games بتجيب فلوس أكتر من أفلام هوليوود:
كنت إتكلمت قبل كده عن Video Games في مقالة قديمة و إزاي البيزنس ده بيجيب فلوس بس الفلوس دي جاية من إن شركات إنتاج Video Games بتدوس علي وش الموظفين و المهندسين اللي شغالين فيها .. أنا بس حابب أحطك في الصورة إن فعلياً بيزنس Video Games بيجيب فلوس أكتر من أرباح استوديوهات هوليود .. مش مصدقني صح؟ .. يوم 29 إبريل 2008 نزل في السوق لعبة Grand Theft Auto IV أو اللي يمكن إنت عارفها باسم GTA 4 .. حلو .. في أول 24 ساعة من نزول اللعبة في السوق جابت 310 مليون دولار .. عارف دول قد إيه؟ .. دي فلوس أكتر من مبيعات أنجح كتاب إتباع في تاريخ البني أدمين اللي هو Harry Potter & the Deathly Hallows و اللي جاب في أول 24 ساعة من نزوله السوق 220 مليون دولار .. الفلوس اللي جابتها لعبة GTA 4 في أول 24 ساعة من نزولها أكتر من الفلوس اللي جابها أكتر فيلم جاب إيرادات في أول 24 ساعة من عرضه في تاريخ السينما اللي هو Spider-Man 3 و اللي جاب 117 مليون دولار.
مش بس كده .. عارف لعبة Tomb Raider؟ أهي دي أرباحها عدت 3 مليار دولار .. عارف لعبة World of Warcraft؟ أهي دي جابت 10 مليار دولار أرباح .. طب سمعت عن لعبة Mario؟ أهي دي بقي جابت 30 مليار دولار .. ده كله معناه إن Video Games ليها زبايينها اللي مستعدين يدفعوا عشان يلعبوا و الناس دي كتير فلما فيلم مبني علي أحداث Video Game و تكون لعبة ليها مبيعات كويسة و مشهورة ففعلياً الفيلم ده بيتحط تحت الميكروسكوب .. حاول تتخيل إنك عشان تعمل فيلم متاخد من Video Game فإنت كأنك بتعمل مسلسل تاريخي زي ممالك النار كده كل الناس بتشوفه مش عشان تتسلي أو تضيع وقت .. لا خالص .. الناس بتشوفه عشان تتطلع فيه القطط الفاطسة و تفلي فيه عشان تلاقي أخطاء.
حقيقة رقم إتنين .. مين قال إن متعملش قبل كده أفلام مبنية علي Video Games و كانت كويسة؟
عارف مين أكتر فيلم متاخد من Video Game واخد أعلي تصنيف علي موقع Rotten Tomatoes؟ فيلم Detective Pikachu اللي واخد تصنيف 66% و أرباحه في شباك التذاكر العالمي معدية 160 مليون دولار .. أنا شخصياً إتصدمت إن الفيلم متاخد عن Video Game إتعملت في العالم بتاع بوكيمون Pokemon و هي لعبة فك ألغاز جرايم نزلت أول نسخة ليها سنة 1996 لإن كل معلوماتي عن Pokemon هو الكرتون اللي كنت بتفرج عليه و أنا صغير .. بمناسبة بوكيمون .. هل تعلم سيدي القاريء إن بوكيمون هي أكتر مادة ترفيهية جابت فلوس في التاريخ؟ يعني هل تعلم إن الفلوس اللي جابها العالم بتاع بوكيمون سواء بتتكلم عن Anime أو الكروت اللي كنا بنلعب بيها و إحنا صغيرين أو Video Games جابت 59.1 مليار دولار و دي كفلوس أكتر من أرباح سلاسل أفلام زي Star Wars و كل أجزاء كل سلاسل الأفلام اللي أنتجتها Marvel و كل أرباح سواء الكتب أو الأفلام من سلسلة Harry Potter؟ .. عارف إيه الغريب في الحكاية دي؟ .. العالم بتاع بوكيمون اللي عمله كان واحد ياباني اسمه (ساتوشي تاجيري Satoshi Tajiri) و فكك من اسمه بس اللي عايزك تعرفه إنه بدأ شغله علي العالم بتاع بوكيمون سنة 1995 و لحد دلوقتي جاب فلوس أكتر من سلسلة أفلام زي Star Wars اللي حققت أرباح وصلت 42.9 مليار دولار و تعتبر أنجح سلسلة أفلام في التاريخ و بدأت سنة 1977 .. إنت متخيل؟ .. سلسلة أفلام بدأت قبل بوكيمون بعشرين سنة و برده بوكيمون جاب فلوس أكتر منها .. لو كنت تعرف المعلومة دي من قبل كده أنا أنحنيلك إحتراماً و لو دي أول مرة تعرف الحكاية دي فتعالي في حضن أخوك اللي لسه مصدوم لحد دلوقتي.
بلاش Detective Pikachu .. عارف مين تاني أكتر فيلم متاخد من Video Games واخد أعلي تصنيف علي Rotten Tomatoes؟ فيلم Rampage بتاع (دواين جونسون Dwayne Johnson) و اللي واخد تقييم 50% .. ده دي الأفلام اللي أُنتجت من فترة قريبة .. تعالي بقي أعيشك النوستاليجا .. و أنا صغير أيام ما كنا مش بنشوف أفلام أجنبي إلا علي القناة الثانية بس كانوا كل شوية يعرضوا فيلم Mortal Kombat بالSoundtrack المميز بتاعه أوي .. الفيلم ده إتعرض في السينمات سنة 1995 فإحنا كنا بنشوفه علي القناة الثانية حوالي سنة 1996 .. كبرنا شوية و بقي عندي أتاري و عرفت إن الفيلم ده كان أصلاً لعبة و لعبتها و عجبتني جداً و لما لعبتها حسيت إزاي تعمل فيلم كويس و يحسسك إنه فعلاً بيحكي قصه اللعبة اللي إنت بتلعبها و بتحبها .. فيلم Resident Evil الأولاني خالص يعتبر من الأفلام الناجحة جداً و اللي مبنية علي Video Game أصل معلش يعني لو الفيلم الأولاني مكنش ناجح مكنتش إتعملت سلسلة من 6 أجزاء كلهم من بطولة (ميلا جوفوفيتش Milla Jovovich) .. أظن إنك بدأت تحس بالمشكلة .. لحد دلوقتي إتعمل حوالي 36 فيلم سينمائي مبني علي Video Games و أعلي إتنين واخدين تقييمات جابوا 66% و 50% و حتي الأفلام الكويسة منها عشان ألاقيها إضطريت أرجع لطفولتي .. أظن دلوقتي جه وقت إننا نسأل السؤال المهم .. ليه؟ .. ليه مفيش أفلام متاخدة من Video Games و تكون كويسة؟
حقيقة رقم تلاتة .. لو سمعت إن الناس اللي بتعمل الفيلم عمرهم ما سمعوا ولا لعبوا Video Game اللي هم بيعملوها فيلم فخليك عارف إن الفيلم ده حيطلع زي الزفت:
الفكره كلها في القصة .. قلب أي فيلم هي قصته و لو فيلم مفيهوش قصة فحيبقي فيلم وحش أيا كانت تكاليفه و أيا كان طاقم العمل أو Cast بتاعه .. خد مثال علي كده فيلم Prince of Persia: The Sands of Time اللي أٌنتج سنة 2010 .. الفيلم كان مصروف عليه الصراحة و متجابله طاقم تمثيل فشيخ .. كفاية إن البطل بتاع الفيلم كان (جايك جيلينهول Jake Gyllenhaal) و الشرير بتاعه السير (بين كينجسلي Ben Kingsley) و رغم كده الفيلم لما نزل النقاد وصفوه بإنه النسخة اللي تحت بير السلم من سلسلة Lord of the Rings .. ليه قالوا كده؟ .. عشان الفيلم متصور حلو بس مفيهوش قصة .. نفس الحكاية إتكررت مع فيلم Tomb Raider الجديد .. مفيش حد مقالش إن الممثلة (أليشيا فيكاندر Alicia Vikander) مقدمتش الشخصية بطريقة تحسسك إنها بني أدمة عادية مش زي ما (أنجلينا جولي Angelina Julie) قدمتها و برده الفيلم فشل .. تدري ليش؟ .. عشان الفيلم متمثل كويس أوي بس مفيهوش قصة.
الحكاية بتبدأ إنك بتجيب طقم من كتاب السيناريو بتقعدهم في أوضة عشان يشتغلوا مع بعض بحيث إن أهم حاجة هي إن الناس اللي بتكتب السيناريو تكون فاهمة كويس أوي المادة العلمية اللي هم شغالين عليها .. يعني مثلاً .. لو حتجيب ناس تكتبلك سيناريو مسلسل عن حياة الدكاترة في قسم طواريء مستشفي فلازم كتاب السيناريو مش حقول يكونوا نفسهم دكاترة بس يكون عندهم خلفية كويسة عن حياة الدكاترة و أسس التشخيص و يعني إيه طب و يعني إيه طواريء و يعني إيه جراحة و إيه الفرق بين النايب و المقيم .. فلو أنا جبت ناس تكتب سيناريو فيلم مبني علي أحداث Video Game فالسؤال اللي إنت محتاج تسأله لنفسك هو بالصلاة علي النبي (عليه أفضل الصلاة و السلام) الناس دي فاهمة هي بتكتب إيه؟ لعبت Video Game دي قبل كده؟
بما إني إتكلمت عن فيلم Detective Pikachu و قلت عليه إنه فيلم ناجح فخلينا نشوف اللي عمله .. مخرج الفيلم (روب ليترمان Rob Letterman) ده رجل مواليد 1970 يعني إتربي علي Anime بتاع بوكيمون .. لعب اللعبة من أيام ما كانت بكروت أتاري مش مجرد App بتنزله علي Smartphone بتاعك و عشان كده هو عمل فيلم فاهم يعني إيه بوكيمون .. من ضمن الأفلام برده اللي أنا ذكرتها كأمثلة ناجحة لأفلام متاخدة من أفكار Video Games هو Mortal Kombat و اللي لما تعرف إن مخرج الفيلم (بول دبليو إس أنديرسون Paul WS Anderson) تقريباً كان مدمن اللعبة دي أيام ما كان لسه مش كل الناس عندها كومبيوتر فكان بيلعبها في سايبر حوالي 3 ساعات كل يوم فلما عمل اللعبة فيلم كان فيلم مش حاجة زي Gladiator كده اللي هو مفيهوش غلطة بس بإمكانيات سنة 1995 اللي إتعرض فيها كان فيلم محترم جداً قدر يجيب 122 مليون دولار في شباك التذاكر العالمي .. تاني السر كان إن مخرج الفيلم واحد عارف كويس أوي اللعبة دي إيه .. (بول دبليو إس أنديرسون) مارس هوايته إنه يحول Video Games اللي هو كان بيلعبها و هو صغير لأفلام تاني لما عملنا الجزء الأول من سلسلة Resident Evil .. سلسلة كاملة من 6 أجزاء بأرباح وصلت 1.2 مليار دولار و ميلاد فكرة إنك تعمل فيلم بطلته واحدة ست بتحارب زومبي قبل ما نصحي الصبح نلاقي مسلسل زي The Walking Dead مش عارفين نموته لحد دلوقتي و مش عارف أنتوا بتتفرجوا عليه ليه لمجرد إنك جبت واحد فاهم هي إيه Video Game و بتتلعب إزاي و بتحكي عن إيه و قلتله إعملهالي فيلم.
العكس تماماً لو إنت جبت ناس متعرفش حاجة عن Video Game اللي هم المفروض حيعملوها فيلم و قلتلهم عايزكوا تعملولي حاجة محصلتش .. يحكي أن المخرج (جاستن كورزيل Justin Kurzel) اللي عملنا فيلم Assassin’s Creed إعترف بعد ما الفيلم إتاخد غسيل و مكواة علي إيد النقاد و الجمهور إنه و هو بيعمل الفيلم لا كان يعرف إن فيه لعبة اسمها Assassin’s Creed ولا عمره لعبها .. نفس الحكاية مع فيلم Street Fighter اللي أُنتج سنة 1994 و برده متاخد من Video Game يحكي أن لا المخرج ولا الممثلين ولا حتي مصممي مشاهد القتال كانوا عارفين إن الفيلم متاخد من Video Game و إن المفروض يعني إن كل شخصية في الفيلم يكون ليها الحركة القتالية الخاصة بيها زي ما هو موجود في اللعبة و عشان كده بسم الله ما شاء الله طلعلنا فيلم ميتشافش .. ده يحطك قدام حقيقة مهمة أوي و هي إنك عشان تعمل فيلم مبني علي Video Game فإنت مش بس حتعملك كام مشهد أكشن مكلفين و تخلي الدم يطرطش علي شاشة السينما و إحنا بنتفرج و خلاص علي كده .. الVideo Games بتاعة جيلنا دلوقتي فيها قيم و مشاعر و أفكار و حبكات درامية و ليلة كبيرة أوي سعادتك مينفعش تختذلها و تقصها في كام مشهد أكشن و تقول لنفسك أنا عملتلكوا فيلم يجنن .
المشكلة في رأيي إن دايماً استوديوهات هولييود بتختار اللعبة الغلط عشان تعملها فيلم .. حديلك مثالين عشان أوريك وجهة نظري: المثال الأولاني هو فيلم Need for Speed اللي أُنتج سنة 2014 و المثال التاني هو فيلم Warcraft اللي أُُنتج سنة 2016 .. سبب إني عايز أتكلم عن الفيلمين دول بالذات هو إن الفيلمين فشلوا بس أسباب فشلهم عكس بعض خالص .. فيلم Need for Speed فشل لإن للأسف استوديوهات هولييود لما بتيجي تقرر تعمل فيلم عن Video Game غالباً اللي بيعملوه إنهم يخشوا علي Google يكتبوا يا تري إيه أكتر لعبة جابت فلوس و بالتالي ليها شعبية عالية و يقولك باااااس إحنا نعمل اللعبة دي فيلم .. طب يا معلم لعبة Need for Speed أساساً مفيهاش فكرة ولا قصة .. دي مجرد سباق عربيات .. لعبة قايمة بالكامل علي الجرافيك يعني مينفعش تتعمل فيلم .. تلاقيهم بيقولولك ششششش إيش عرفك إنت .. هوبا الفيلم يتعمل و هوبا الفيلم يفشل .. تيجي استوديوهات هوليوود تقولك طب بلاش نختار Video Game تافهة .. نقيلي يا عم أكتر Video Game معقدة و فيها شخصيات كتير داخلة في بعضها و ناس تتجوز ناس و تخلف و تتعارك و تتصالح فقالك باااااس مفيش أحسن من لعبة World of Warcraft .. تيجي تقولهم يا جدعان إزاي بس حتجيبوا لعبة بتتلعب في أكتر من 100 ساعة تقوم إنت جاي مختذلها و مختصرها في فيلم ساعتين؟ تلاقيهم بيقولولك ششششش إيش دراك إنت إحنا حنجيب مخرج تقيل زي (دانكن جونز Duncan Johnes) يعمل الفيلم و حنجيب (رامين ديجاوادي Ramin Djwadi) يعمل الموسيقي التصويرية و ده الرجل اللي عمل الموسيقي التصويرية لمسلسل Game of Thrones .. هوبا بقي عندك فيلم متصور حلو فشخ و الموسيقي بتاعته جامدة اوي بس تحسه ناقص ملح .. فيه حاجة ناقصة .. الفيلم عمال ينط بين الشخصيات و إنت مش فاهم هو ده قابل مين إمتي و إزاي .. المشكلة دي خلت النقاد يدوا للفيلم تقييم علي Rotten Tomatoes وصل 28% قصاد إن الجمهور عطاله تقييم 77%.
المشكلة يا حضرات إنك لازم تختار اللعبة الصح إنك تعملها فيلم .. لا لعبة تكون تافهة و لا لعبة تكون معقدة زيادة عن اللزوم .. نقطة تانية و هي إن Video Games دلوقتي بقت فعلياً فيلم و يمكن المثال الصارخ علي كده هو لعبة The Last of Us .. دي لعبة و إنت بتلعبها تحسسك إنك بتتفرج علي فيلم و بالتالي لو أنا مخرج حبيت أعملها فيلم حلاقي نفسي بسأل سؤال منطقي أوي .. هو فيه حاجة أعملها عشان أضيف للعبة حاجة جديدة؟
إحنا دلوقتي في عصر غريب شوية في حتة إن الجيل اللي أنا بنتمي ليه لما كنا زمان بنحب نتسلي كنا بنلعب كورة في الشارع .. دلوقتي إحنا في زمن الشباب الصغير بيقعد علي القهوة عشان يلعبوا PUBG .. لو حتتكلم كفلوس فأنا أبصملك بالعشرة إن بيزنس Video Games بيجيب فلوس زي الفل .. بس لو حتتكلم كAdded Value أو قيمة إنت بتضيفها لجيل فإحنا لسه قدامنا كتير أوي عشان نوصل لمرحلة إنك كأب أو أم تسيب إبنك أو بنتك يلعبوا Video Game براحتهم عشان إنت عارف إن قعدتهم الكتير قدام اللعبة دي حتضيفلهم حاجة زي ما إنت كده لما بتسيب عيالك قدام قناة MBC4 أو Spacetoon فإنت بتبقي عارف إن المعروض حاجة مش مضرة و يمكن كمان مفيدة .. نقطة تانية و هي إن لسه لحد دلوقتي وجهة النظر المتاخدة عن Video Games هي إنها حاجة تافهة .. متزعلش مني بس لما مثلاً حد يعمل Review لفيلم أهبل زي Transformer: Revenge of the Fallen و يقولك يا عم ده فيلم شبه Video Game كله أكشن و إنفجارات و مفيهوش قصة فده يوريك إن لسه المجتمع بتاعنا مبقاش ياخد Video Games بشكل جد .. رغم إن مثلاً فيلم زي Marriage Story و لعبة زي Assassin’s Creed الإتنين يعتبروا Entertainment أو ترفيه أو تسالي بس أغلب الناس بتشوف الفيلم علي انه حاجة ثقافية بAdd Value بس اللعبة دي حاجة للعيال الصغيرة.
المصادر:
- مقالة بعنوان Are there any good movies based on video games? نشرت في جريدة The Guardian و ده لينك المقالة الأصلية:
ttps://www.theguardian.com/film/2019/may/10/detective-pikachu-movies-based-on-video-games - مقالة بعنوان Pokemon rules them all as highest-grossing franchise ever نشرت علي موقع Movie Web و ده لينك المقالة الأصلية:
tps://movieweb.com/pokemon-franchise-highest-grossing-all-time/ - مقالة بعنوان Why can’t Hollywood make a good video game movies؟ نشرت في جريدة The Washington Post و ده لينك المقالة الأصلية:
https://www.washingtonpost.com/graphics/2018/entertainment/video-game-movies/ - مقالة بعنوان Videogames now outperform Hollywood movies نشرت في جريدة The Guardian و ده لينك المقالة الأصلية:
tps://www.theguardian.com/technology/gamesblog/2009/sep/27/videogames-hollywood
