بينيدكت كامبرباتش .. ممثل متنوع لدرجة إننا قعدنا نحلل أدواره.

موضوعنا النهاردة اللي حنتكلم عنه هو الممثل البريطاني (بينيدكت كامبرباتش Benedict Cumberbach) ..  ده ممثل رغم إنه معملش أدوار كتير في السينما إلا إنه مشهور جداً علي مستوي العالم .. فيه ناس كتير تعرفه بسبب مسلسل (شيرلوك Sherlock) اللي بيتعرض علي قناة BBC البريطانية .. فيه ناس تانية عرفته من فيلم Star Trek: Into Darkness .. اللي حنحاول نتكلم عنه النهاردة هو الإجابة علي سؤال واحد: هو إيه اللي بيخلي الممثل ده ميعرفش ينقي أدواره كويس؟

خليني أفهمك انا قصدي إيه .. فيه ممثلين يا عيني لما بينجحوا في دور بيفضلوا محبوسين جوه الدور ده و مبيعرفوش يطلعوا منه .. زي مثلاً (توم كروز Tom Cruise) اللي إنت بتستني تشوفه  في جزء جديد من سلسلة Mission Impossible و غير كده بتبقي شبه متؤكد إن أي فيلم تاني هو يعمله بره السلسلة دي حيبقي وحش .. مشكلة (بينيدكت كامبرباتش) إنه حصر نفسه مش في سلسلة إنما في شخصية .. هو بقي بيعرف يعمل شخصيات العباقرة المجانين اللي فيهم حاجة غلط في شخصياتهم لدرجة إنه مبقاش عارف يعمل أي دور تاني غيرهم .. (بينيدكت كامبرباتش) واحد و يمكن هو أحسن ممثل يجسد شخصية (شيرلوك هولمز Sherlock Holmes) بعبقريته و جنونه .. بعد كده شفناه في فيلم The Fifth Estate بيجسد فيه شخصية (جوليان أسانج Julian Assange) مؤسس موقع ويكيليكس Wiki-leaks .. بعدها شفناه بيجسد دور عالم الرياضيات البريطاني العبقري (ألان تورينج Alan Turing) في فيلم The Imitation Game .. و لما قلنا إنه خلاص بدأ يخرج بره الشخصية دي لما عمل دور دكتور (ستيفن سترينج Steven Strange) في فيلم Doctor Strange إذا به يرجع تاني يضربنا علي قفانا و يقدم شخصية (توماس إيديسون Thomas Edison) في فيلم The Current War.

أنا معنديش مشكلة إنك كممثل تعجب بنوع معين من الشخصيات و تفضل تقدمه .. برجع تاني أضربلك مثل ب(توم كروز) اللي معجب جداً بشخصية الرجل اللي بيهتم جداً بلياقته و إن يبقي عنده عضلات بطنه مقتسمة لدرجة إنه حتي لما عمل دور شخصية عادية جداً زي (راي فيرير Ray Ferrier) اللي شغال سواق أوناش في ميناء في فيلم War of The World كان مهتم بجسمه لدرجة أحيانا بتبقي مش منطقية .. (توم كروز) لو عمل دور شحات مش لاقي بيت ينام فيه حيطلعك بعضلات و لياقة بدنية بتلاقيها بس في لاعيبه ألعاب القوي و ده أحياناً بيضر الشخصية اللي هو بيقدمها لإن مش منطقي بصراحة إن طبيعة جسم و اللياقة البدنية لواحد زي (راي فيرير) شغال زي ما قلتلك سواق أوناش تبقي زيها زي شخصية زي (إيثان هانت Ethan Hunt) ضابط المخابرات في سلسلة Mission Impossible .. عشان منبعدش كتير عن الموضوع ..  مشكلة (بينيدكت كامبرباتش) إن إختياره لأدواره بيبقي علي الورق حلو أوي بس الفيلم بيبقي زي الزفت.

فكر في شخصية زي (جوليان أسانج) .. ده رجل سرق معلومات شديدة الحساسية عن أنشطة المخابرات الأميريكية و نشر المعلومات الموثقة دي علي الإنترنت علي الWebsite بتاعه اللي سماه ويكي-ليكس Wiki-Leaks .. شخصية أي ممثل يحب يجسدها .. شخصية معقدة عبقرية تقدر تقول إنها الشخصية المفضلة لممثل زي (بينيدكت كامبرباتش) .. بس للأسف فيلم The Fifth Estate كان زي الزفت .. صحيح فيلم The Imitation Game منقدرش نقول عنه كلمة وحشة لإنه إترشح للأوسكار .. بس في فيلمه الجديد (بينيدكت كامبرباتش) بيرجع يمارس عادته القديمة .. مين ممثل أهبل ممكن يرفض فكرة إنه يجسد شخصية مخترع اللمبة .. (توماس إيديسون) واحد من أكثر الشخصيات في التاريخ اللي أي ممثل يتمني يجسدها .. ده رجل إشتري فيل من السيرك و كهربه عشان كان عايز يثبت إن (نيكولاي تيسلا Niclolai Tesla) غلطان في حاجة .. بس برده فيلم The Current War مش حلو و ده بناء علي التقييمات المبدأية للنقاد السينمائيين اللي شافوه.

مشكلة إختيار الأدوار دي إحنا ممكن نحسها كعرب أوي بس فيه مشكلة تانية في إختيار  (بينيدكت كامبرباتش) لأدواره إحنا كعرب و كمصريين مش بنحسها أوي ولا بنفهمها أحياناً و هي مشكلة بيسموها White Washing و دي ملهاش ترجمة حرفية بس شرحها إنك تجيب ممثل أو ممثلة بيضاء عشان تعمل دور إتكتب أساساً لممثل أو ممثلة من عرق مختلف سواء أسمر أو أسيوي أو حتي عربي .. أقرب مثال يهمنا كعرب لمشكلة الWhite Washing دي لما في فيلم زي Exodus: Gods and Kings اللي بيحكي قصة سيدنا (موسي) عليه السلام و اللي جسد شخصية سيدنا (موسي) كان الممثل (كريستيان بايل Christian Bale) اللي هو أساساً ممثل بريطاني .. إنسي لحظياً إن شخصية (موسي) عليه السلام نبي و تخيل معايا إنه بني أدم عادي و إنسي لحظياً فكرة إن مينفعش بني أدم يجسد شخصية نبي من أنبياء الله .. شخصية (موسي) عليه السلام ده بني أدم إتولد و عاش في مصر .. يعني ملامح وشه مصرية .. تقوم يا مخرج يا (ريدلي سكوت Riddley Scott) يوم ما تجيب ممثل يعمل الشخصية تجيب نفس الممثل اللي عمل باتمان .. طب هات واحد أسمراني شوية .. مش كده و بس .. اللي عمل دور فرعون مصر هو (جويل إيدجرتون Joel Edgerton) و ده أساساً ممثل أسترالي عنيه زرقا .. فهمت إيه هي مشكلة الWhite Washing؟ برده انا مقولتش إيه علاقة (بينيدكت كامبرباتش) بالموضوع ده.

طبعاً حضرتك شفت فيلم Doctor Strange .. عارف شخصية The Ancient One اللي هي الراهبة الصلعاء اللي علمت دكتور (ستيفن سترينج) و اللي قامت بدورها الممثلة (تيلدا سوينتون Tilda Swinton) .. المفروض إن علي حسب القصص المصورة Comic Books  اللي إتبني عليها الفيلم إن شخصية The Ancient One تقدمها ممثلة أسيوية يعني صينية أو يابانية أو أي دولة أسيوية تانية .. يقوم اللي عملوا فيلم ينقوا الممثلة (تيلدا سوينتون) اللي هي أبيض من قشطة اللبن .. طبعاً (بينيدكت كامبرباتش) ملوش علاقة بالموضوع بس مجرد إنه بطل الفيلم خلاه في نظر ناس كتير مشارك في الWhite Washing.

ده بيخليك تبص علي الرسم البياني اللي عندك في الصورة و تلاقي نفسك بتقول ممممممم .. حتلاقي إن كل الأفلام و المسلسلات اللي عملها (بينيدكت كامبرباتش) في حياته تقدر تقسمها لنصين:

• النص الأول هي أفلام مكنش ينفع ممثل أبيض أصلاً يعملها زي شخصية (خان Khan) في فيلم Star Trek: Into Darkness و اللي المفروض زي ما هو باين من الإسم لازم الشخصية يعملها ممثل شرق أوسطي بس المخرج (جيه جيه إبرامز JJ Abbrams) هرب من الفخ ده بإن السيناريو إتبني علي فرض إن شخصية (خان) هو مقاتل مخلق بالهندسة الوراثية يعني ده إتولد في معمل و بالتالي إسمه لا يعني بالضرورة إنه لازم يبقي من أصول هندية أو باكستانية .. مثال تاني هو فيلم Gypsy Boy و ده لسه فيلم متعملش بس بناء علي تقرير من مجلة Variety ف (بينيدكت كامبرباتش) حيعمل شخصية واحد من الغجر اللي هو برده كان يستحسن لو كانوا جابوا ممثل تاني مش أبيض يعمل الدور.
• النص الثاني هي الأفلام اللي بتدور حول عباقرة بس مجانين أو مش متزنين نفسياً علي الأقل و قلنا إن ال3 أفلام اللي بيتحطوا في القائمة دي هم The Fifth Estate و The Imitation Game و The Current War.

علي الناحية الثانية إنت تقدر تقسم الأدوار اللي  (بينيدكت كامبرباتش) نجح فيها جداً كممثل في نصين:

• النص الأول هو المشاريع اللي (بينيدكت كامبرباتش) كان مشارك فيها كبطولة مطلقة زي مسلسل Sherlock و فيلم Doctor Strange.
• النص الثاني و ده حيذهلك من كتره هو المشاريع اللي  (بينيدكت كامبرباتش) شارك فيها بدور صغير زي دوره كثري أرستوقراطي متوحش في فيلم Atonement و دوره كمالك عبيد في فيلم 12 Years A Slave .. دوره الصوتي كالتنين (سموج Smaug) في ثلاثية The Hobbit .. دوره كمان الحلو أوي في فيلم Tinker Tailor Soldier Spy.

بره في بلاد الغرب فيه ناس كتير بتموت و بتعشق (بينيدكت كامبرباتش) .. و فيه ناس مش بتطيقه .. فيه ناس بتكرهه أكثر من الناس اللي بتكره الممثل البريطاني برده (توم هيدلستون Tom Hiddleston) الي إنت تعرفه بدور (لوكي Luki) في سلسلة أفلام Thore و فيلم The Avengers .. بس زي ما قلتلك ده بره مش هنا .. إحنا كعرب مش فارق معانا أوي موضوع الWhite Washing .. بس أنا شخصياً بحب (بينيدكت كامبرباتش) و نفسي أشوفه في أفلام ناجحة علي طول.

المصدر:

مقالة بعنوان Why Benedict Cumberbach’s career choices are making people hate him نشرت في Website إسمه The Daily Dot و ده لينك المقالة الأصلية:

https://www.dailydot.com/parsec/benedict-cumberbatch-whitewashing-gypsy-boy/