أنا عايز أسألك سؤال .. هل إنت شخصياً أو أي حد تعرفه من اللي بتتفرجوا علي أفلام أجنبي كتير مش بتحبوا الروك؟ .. الروك اللي هو (دواين جونسون Dwayne Johnson) اللي كان مصارع في WWE وبعد كده بقي ممثل .. يعني هل ممكن إنت يتعرض فيلم من أفلامه علي MBC2 وتقرر إنك تغير القناة لمجرد إنك مبتحبوش؟ .. لنفترض إنك بني أدم طبيعي وبتحب الروك زيك زي كتير في العالم وخلي بالك إنت مش لوحدك اللي بتحبه .. الرجل ده له أكتر من 109 مليون متابع أو Follower علي الأنستجرام .. مهم تكون عارف إنك عشان تبقي نجم شباك أو Movie Star إنت لازم يبقي ليك صورة في دماغ الناس أو Image .. خد عندك (محمد رمضان) مثلاً .. الImage اللي هو إشتغل كتير أوي عشان يزرعها في دماغ معجبينه هي إنه بني أدم مغرور بيحب يتمنظر بالعربيات اللي بيجيبها ويغني لنفسه إنه نامبر وان .. مش عيب طالما هو شايف إن ده جايب معاه نتيجة ومزود شعبيته .. الفكرة إن الImage بتاعة الروك اللي بيبيعها لمعجبينه إنه رجل بيعشق الحياة الزوجية .. من فترة كان منزل صورة علي أنستجرام لنفسه وهو بيأكل صاحبته مكرونة وهي بترضع بنتهم .. يا ريت إكتفي بالصورة .. التعليق بتاعه إنه كاتب تحياتي وإحترامي لكل الأمهات اللي بتربي عيالها وممشية بيوتها .. بفكرك بس إن الوحش المعضل ده عنده 3 بنات واحدة عندها سنتين والتانية عندها شهرين من صاحبته الحالية وعنده بنت تالتة عندها 16 سنة من جوزاته الأولانية.
كل فترة بيجيلها Movie Star بيبقي هو النامبر وان بتاعها .. أنا شخصياً مبحبش (محمد رمضان) بس عاجني التعبير .. حالياً الروك هو نجم الشباك بتاع المرحلة اللي إحنا عايشين فيها .. سنة 2016 بناء علي كلام مجلة Forbes فهو كان أكتر ممثل في هوليوود دخله فلوس ب48.7 مليون جنيه إسترليني .. السنة اللي وراها كان (مارك والبرج Mark Wahlberg) اللي بس عايزك تعرف إن عدد الFollowers بتوعه علي أنستجرام ميجوش 9.4 مليون مقارنة بال109 مليون بتوع الروك .. الكلام علي إن الروك حيرجع تاني السنة دي يبقي أكتر ممثل دخله فلوس لإن أرقام الأرباح بتاعة أفلامه بجد ترعب .. أنجح فيلم عمله مؤخراً كان Jumanji: Welcome to the Jungle جاب أكتر من مليار دولار علي مستوي العالم .. واحد من أسوأ أفلامه علي الإطلاق Rampage جاب 320 مليون جنيه إسترليني عالمياً .. أحدث أفلامه Skyscraper اللي برده يعتبر من أسوأ أفلام الأكشن اللي إتعملت في السنين اللي فاتت برده جاب حوالي 300 مليون دولار أرباح ودي فلوس حلوة علي فيلم ميدخلش زمتي بتلاتة تعريفة .. اللي عايز أوصله ليك إن مبقاش يفرق إذا كانت الأفلام اللي بيعملها الروك حلوة ولا وحشة .. مجرد وجوده علي أفيش الفيلم حيخليه ينجح.
في رأيي الشخصي الروك أو خلاص بلاش نستخدم الإسم ده وخلينا نناديه بإسمه السينمائي (دواين جونسون) بعتبره ظاهرة في زمن اللي بينجح فيه السلسلة مش الممثل .. خليني أفهمك أنا قصدي إيه .. مش حتفرق مين الواد الأمور اللي يختاروه عشان يبقي بطل سلسلة Spider Man .. إحنا حنروح السينما نتفرج علي فيلم Spider Man ومش حيفرق بقي مين البطل .. طب أنا حسألك سؤال .. لو إنت بتحب سلسلة Star Wars مع إني عارف إن اللي بيحبوها في مصر قليلين هل تعرف إسم أي حد من الممثلين اللي فيها؟ .. بلاش .. إنت أكيد إتفرجت علي Jurassic World: Fallen Kingdom بتاع الديناصورات ده تقدر تقولي إسم البطل والبطلة؟ .. إحنا دلوقتي في عصر مبنحفظش أسامي الممثلين بس بنحفظ كويس أسامي السلاسل .. حتي (دواين جونسون) شخصياً إتشهر جامد بعد دوره في سلسلة Fast and Furious .. تفتكر مين الممثل اللي يقدر دلوقتي ينجح فيلم ويبدأ سلسلة لوحده كده؟
عندك (توم كروز Tom Cruise) اللي كل الشهد من ورا سلسلة Mission: Impossible بس لما جه يحاول يبدأ سلسلة من أول وجديد ومن الصفر زي The Mummy الفيلم وقع ولا الطيارة المحروقة .. ومش (توم كروز) لوحده علي فكرة .. (جنيفر لورينس Jennifer Lawrence) كانت نيتها إن فيلم Red Sparrow يبقي سلسلة طويلة عريضة زي سلسلة The Hunger Games بس لبست في الحيط .. عندك (سكارليت جوهانسون Scarlet Johansson) هي كمان كانت عايزة تخلي فيلم Ghost in a Shell بداية سلسلة محترمة بس وقعت في البلاعة ومعرفتش تطلع .. ومش بس الستات .. عندك (روبيرت داوني جونيور Robert Downey Jr.) اللي أي فيلم يعمله بره سلسله Avengers وبره شخصية Iron Man يفشل .. يا مؤمن ده حتي (فين ديزل Vin Diesel) اللي هو المفروض بطل سلسلة The Fast and Furiousمعملش حاجة بره السلسلة دي ونجحت غير دوره في Guardians of the Galaxy ومبيقولش فيه غير جملة واحدة I’m Groot.
ده السبب اللي بيخليني أقول إن (دواين جونسون) حالة خاصة لوحده لإنه بيقدر يشيل فيلم .. خد عندك مثال بسيط وهو فيلم Rampage .. ده فيلم أهبل مبني علي قصة هابلة بتاعة لعبة Video Game قديمة وحتي الCast بتاعه مفيهوش ممثل معروف ونزل الفيلم وجاب فلوس .. نفس اللي حصل في فيلم Skyscraper .. برده فيلم أهبل بقصة هابلة و Cast من تحت بير السلم وبرده الفيلم نزل وجاب فلوس .. بإختصار الناس بتحب تتفرج علي (دواين جونسون) وعلي قلبهم زي العسل يدفعوا فلوس عشان يتفرجوا علي فيلم أهبل يضيع وقتهم لمجرد إن بطل الفيلم هو (دواين جونسون).
أكتر حد شبه (دواين جونسون) كان طيب الذكر (أرنولد شوارزنيجر Arnold Schwarzenegger) .. الإتنين ليهم بسم الله ما شاء الله نفس الجسم .. واحد كان مصارع والثاني بتاع كمال أجسام .. الإتنين إتشهروا في السينما في أدوار الأكشن .. بس الإتنين قدروا ينقذوا الCareer بتاعتهم من إنهم يفضلوا مرتبطين بأفلام الأكشن بإنهم وروا الناس إنهم بيعرفوا يمثلوا .. الإتنين ليهم جانب كوميدي متقدرش تنكره وإن كان نجاح (دواين جونسون) التجاري كممثل بيعرف يجيب فلوس فيه ناس بتقول إنه إتعلمه من (ويل سميث Will Smith) .. من ضمن الأساطير المرتبطة باسم (ويل سميث) إنه في التسعينات لما أيام ما كان ممثل لسه طالع قعد مع وكيل أعماله وعملوا مع بعض خطة إزاي يخلوه يبقي أشهر ممثل في العالم بإنهم شافوا إيه أكتر أفلام بتجيب فلوس ويخلوا (ويل سميث) يعمل زيها .. الوصفة اللي هم لقوها إنه لازم يعمل فيلم فيه CGI كتير يعني فيلم فيه خدع سينمائية ومصروف عليه ملايين في الجرافيك .. بعد كده يعمل فيلم فيه مخلوقات فضائية أو فيه شغل مخلوقات شريرة .. ثالث فيلم إنه يعمل فيم رومانسي فيه قصة حب .. اللي هو في الأخر إترجم لأفلام Independence Day و Men in Black و Hitch .. (دواين جونسون) ماشي علي نفس السكة .. هو إستغل أول ظهور له كممثل في فيلم The Mummy Returns إنه يعمل كذا فيلم يستغل فيهم شكله وجسمه لمجرد إنه يتعرف في السوق زي The Scorpion King و Hercules .. بعد كده عمل أفلام عائلية زي Race to Witch Mountain و Tooth Fairy .. عمل أدوار غريبة في أفلام كوميدية زي Southland Tales و Be Cool.
حاجة كمان مخلية (دواين جونسون) حالة خاصة أوي ودي حاجة إحنا في مصر ممكن منفهماش أوي وهي العنصرية .. ده رجل لا هو أبيض ولا هو أسمر .. باباه رجل أسمر من كندا ومامته من جزر ساموا ودي جزر في المحيط الهادي جنب هاواي .. ده معناه إن (دواين جونسون) حاجة نادرة أوي زي ما كده حد من وجه بحري بس أصوله أوروبية عينيه زرقا وشعره أشقر يتجوز واحدة من النوبة فيطلع عيل شاي بلبن عسولة عنيه زرقا وشعره أسود وبشرته قمحاوية اللي تحس إنه مرسوم في لوحة مش بشر من لحم ودم .. (دواين جونسون) إتولد في كاليفورنيا بس إتربي في هاواي بس لما تشوفه تلاقيه ينفع يبقي حد أصوله لاتينية وينفع يبقي حد أصوله من دول البحر المتوسط وينفع كمان يبقي مجرد رجل أبيض عادي بس إتساب في الشمس ياخد تان لحد ما إتحرق .. في سوق السينما حد بالمواصفات دي يتقدر بفلوس كتير أوي.
(دواين جونسون) حالياً يقدر يعمل اللي هو عايزه .. خلال السنتين الجايين هو داخل في كمية مشاريع كفيلة إنها تخليه يفضل محتفظ بلقب أكتر ممثل بيدخله فلوس في العالم .. السنة الجاية حينزله فيلم Jumanji 2 .. حيعمل فيلم مشتق من سلسلة Fast and the Furious وحيعمله مع الممثل (جايسون ستاتوم Jason Statham) وسط إشاعات بإن حصلت مشاكل كتير بينه وبين (فين ديزل) وقت تصوير أخر أجزاء السلسلة The Fate of the Furious .. حيعمل فيلم مستوحي من فيلم الكرتون بتاع ديزني Jungle Cruise Ride وحتبقي بطلة معاه (جال جادوت Gal Gadot) بتاعة فيلم Wonder Woman .. ده غير دوره المنتظر في فيلم Black Adam اللي حيبقي ضمن سلسلة أفلام DC .. هو خلاص داخل علي الخمسين سنة وده السن اللي نجوم الأكشن أدوارهم بتبدأ تقل .. أنا شخصياً مش شايف إن (دواين جونسون) عنده القدرة إنه يبقي مخرج اللي هو حاجه زي (كلينت إيستوود Clint Eastwood) كده .. بس الكلام اللي عمال يزيد يوم عن يوم إنه إحتمال يخش مجال السياسة وإنه إحتمال لو كبر شوية في السن ممكن ياخد سلم السياسة من أوله ويرشح نفسه في الكونجرس .. مين عالم يمكن في يوم من الأيام نسمع عن الرئيس الأميريكي الروك.
المصدر:
- مقالة بعنوان Let’s Rock! Why Dwayne Johnson is the New Schwarzenegger يعني ليه (دواين جونسون) هو (أرنولد شوارزنيجر) الجديد .. نشرت في جريدة The Guardian و ده لينك المقالة الأصلية:
https://www.theguardian.com/film/2018/jul/14/lets-rock-why-dwayne-johnson-is-the-new-schwarzenegger
