لو إنا شركة إنتاج أفلام عملت فيلم وقفت عليك تكلفته 35 مليون دولار أرباحه علي مستوي العالم عدت ال 70 مليون دولار يبقي أنا أقدر أقول علي نفسي إني شركة إنتاج بفهم .. طب لو أنا جيت قلتلك إني عملت فيلم وقف عليا ب35 مليون دولار و لما جيت أعرضه في السينمات قلت لا مش حعرضه لإني مش واثق في نجاحه أنا حخلي أي حد تاني يصرف علي الدعاية و يبقي ياخد هو الأرباح تقوم شركة تانية واخده الفيلم و عاملاله الدعاية بتاعته و تعرضه في السينمات و تاخد هي ال70 مليون دولار .. يبقي إيه رأيك بقي؟ .. أهو ده بالضبط اللي حصل مع فيلم Sicario 2: Day of the Soldado الجزء الثاني من فيلم Sicario .. المفروض إن كانت فيه شركة إنتاج إسمها Black Label Media هي اللي أنتجته و صرفت عليه و مش هو لوحده .. هي عملت معاه فيلم تاني في رأيي الشخصي هو تحفة من تحف السينما إسمه Only the Brave .. كان المفروض إن كانت فيه شركة إسمها Lionsgate هي اللي حتتولي عرض و دعاية الفيلمين بس هي إنسحبت في أخر لحظة و ده خلي شركة Sony Entertainment (أيوه هي هي شركة Sony اللي بتصنع الموبايلات و الكاميرات) تتدخل و تعرض الفيلمين و تلم هي الأرباح .. الحقيقة إن القرار ده كان ضربة معلم لشركة Sony Entertainment لسببين يبانوا منطقيين بس فعلياً هم عكس بعض بشكل يخليك تهرش في شعرك بتحاول تفهم إيه اللي حصل؟ و تحاول تستنتج هو إيه اللي حيحصل بعد كده؟
السبب الأول هو إن الشركة حطت إيدها علي كنز .. الكنز إن بقي عندك سلسلة أفلام الناس حبتها و بقت تستناها و جابت فلوس و عجبت النقاد و إترشحت لجوايز لإن الجزء الأول اللي هو فيلم Sicario اللي إتعمل سنة 2015 إترشح لأوسكار أحسن مونتاج صوت و أحسن موسيقي تصويرية و أحسن تصوير .. صحيح مخدش ولا واحدة فيهم بس مش مشكلة .. الأهم و هو السبب الثاني إنها سلسلة مش متكلفة فلوس كتير .. ده فيلم إنت عامله ب30 مليون دولار و جابلك أرباح 90 مليون دولار و الأهم إنه إترشح للأوسكار .. أبسط حاجة خالص إن شركة Sony Entertainment تجيب (تايلور شيريدان Taylor Sheridan) و ده السيناريست اللي كتب السيناريو بتاع الجزئين عشان يكتب الجزء الثالث و هوبا بقي عندك سلسلة أفلام محترمة تجارياً و فنياً.
بوستر فيلم Sicario اللي نجح جداً سواء تجارياً أو فنياً.
العالم بتاع Sicario كله مبني علي قصة الصحوبية بين شخصية إسمها (أليخاندرو Alejandro) اللي بيقدمها الممثل (بينيسيو ديل تورو Benicio del Toro) و ده عشان تفهمه هو وكيل نيابة اللي قلب علي النسخة المكسيكية من باتمان و اللي محدش يقدر يتوقع هو ممكن يعمل إيه و بين شخصيه (مات جريفر Matt Graver) ضابط CIA و دي تبقي وكالة المخابرات المركزية الأميريكية اللي بيقدم نفسه علي إنه مستشار لوزارة الدفاع و اللي قدمها الممثل (جوش برولين Josh Brolin) و الإتنين طايحين تلطيش في عصابات المخدرات المكسيكية .. حاول تتخيل إن مثلاً شخصيتي (بركات) و (مرزوق) بتوع فيلم سلام يا صاحبي اللي قدمها (عادل إمام) و (سعيد صالح) الله يرحمه واقفين لشخصية (البهظ بيه) اللي جسدها (جميل راتب) الله يرحمه في فيلم الكيف و مطلعين عين أهله .. الصحوبية بين الإتنين تحسسك إنك نفسك تبقي إنت و أنتيمك زيهم كده .. دول بيفهموا بعض من نظرة .. تقريباً مبيتخانقوش و حتي خناقاتهم بتبقي علي الهادي خالص و كل واحد بيبقي مقدر موقف التاني بشكل يخليك تقول لنفسك هو أنا ليه صحابي اللي بلعب معاهم Play Station ميبقوش كده .. بس محدش قال إن (تايلور شيريدان) لازم يكتب فيلم واحد كمان عشان تكمل الثلاثية .. ممكن يبقوا أربع خمس ست أفلام زي ما ربنا يكرمه .. أصل الحرب علي المخدرات دي بحرها واسع حبتين.
لو ده حصل فإنت ممكن ساعتها تستوعب ليه فيلم Sicario 2: Day of the Soldado مكنتش فيه الشخصية اللي قدمتها الممثلة (إيميلي بلانت Emily Blunt) في الجزء الأول لإن ساعتها كل فيلم حيبقي جزء مستقل بذاته فيه شخصيات أساسية مشتركة في السلسلة بس من ناحية السيناريو و الأحداث ملوش علاقة بالأجزاء الثانية .. ده حيخلي الشخصية اللي قدمتها (إيميلي بلانت) زيها زي شخصية (إيزابيلا رييس Isabella Reyes) اللي قدمتها الممثلة (إيزابيلا مونير Isabella Moner) في الجزء الثاني اللي هي كانت بنت تاجر المخدرات (كارلوس رييس Carlos Reyes) اللي (مات جريفر) و (أليخاندرو) خطفوها عشان يوقعوا عصابات المخدرات في المكسيك في بعض .. الأجمل و الأحلي بقي إنك ممكن في أي جزء جديد تلاقي شخصية طلعت في الأجزاء القديمة تظهر تاني .. أنا مبسوط يا (هاني) علي رأي (اللمبي) في فيلم اللي بالي بالك.
فيلم Sicario: Day of the Soldado مكمل علي نفس خط الجزء الأول.
اللي Sony Entertainment محتاجه تفهمه إن سلاسل الأفلام في الدنيا عبارة عن 3 حاجات:
- سلسله تلاقيها خمس أو ست أو يمكن سبع أجزاء ورا بعض بيكلموا نفس الحكاية زي مثلاً سلسلة Harry Potter و سلاسل أفلام The Avengers و Iron Man و Captain America و Thore و Ant-Man اللي لو جمعتهم كلهم علي بعض بيتسموا Marvel Cinematic Universe أو عالم السينما بتاع قصص الكرتون بتاعة مارفيل و إختصاراً بيتسمي MCU
- سلسلة تلاقيها 3 أفلام بداية و فيلم وسطاني و نهاية زي سلسله The Lord of the Rings و The Hobbit و The Matrix و حتي Star Wars
- سلسلة تلاقيها مكملة بقالها سنين بس كل جزء مستقل بذاته زي Die Hard و James Bond و Indiana Jones و Lethal Weapon و Transformers و Mission: Impossible و حتي سلسة أفلام Jack Ryan .. سلسلة Sicario ممكن تبقي عامله زي النوع ده اللي هي سلسلة أفلام كتير فشخ بس كل جزء مستقل بذاته و مش محتاج عشان تتفرج علي الجزء الثالث إنك تكون شفت الجزئين اللي قبله مع إنه حيبقي مستحب.
طب إفرض لو Sony Entertainment معرفتش تخلي Sicario سلسلة إما لإنهم معرفوش يخلوا (تايلور شيريدان) يكتبلهم سيناريو أو يمكن لإن (جوش برولين) أو (بينيسيو ديل تورو) رفضوا يشاركوا في الجزء الثالث .. أسباب كتير ممكن تخليهم يلغوا المشروع .. بس إفرض لو حتي ده حصل .. فيلم Sicario 2: Day of the Soldado أثبت إن ممكن شركة إنتاج تعمل فيلم أكشن مليان نجوم و ترميه في نص موسم الصيف و حيجيب فلوس و حيسمع مع الناس و حيعجب النقاد و حيترشح لجوايز .. شركة Sony Entertainment عملت الحركة دي سنة 2016 لما متفهمش جابوا فيلم The Shallows من بطولة (بلايك لايفلي Blake Lively) منين بس لما نزل كسر الدنيا و ده فيلم فعلاً حلو تقريباً مفيهوش غير البطلو و سمكة قرش طول الفيلم بيلعبوا مع بعض الكلب الحيران .. سنة 2017 نزلوا واحد من أجمل أفلام السنة Baby Driver من إخراج (إيدجار رايت Edgar Wright) و ده فيلم ميزانيته معدتش 34 مليون دولار و جاب أرباح 227 مليون دولار و إترشح ل3 جوايز أوسكار.. السنة دي كان Sicario 2: Day of the Soldado و اللي يعتبر مثال لإستراتيجية الشركة في المستقبل.
هم ناويين يركزوا علي أفلام الأكشن اللي معتمدة علي القصة و إختيار الممثلين بس ميزانية تصويرها قليلة .. حتشوف ده في فيلم Equalizer 2 من بطولة (دينزل واشنطن Denzel Washington) و ده فيلم متكلف 70 مليون دولار بس جايب 190 مليون دولار .. حتشوفه في فيلم Venom من بطولة (توم هاردي Tom Hardy) و ده فيلم يعتبر مثال صارخ اللي بتكلم عنه لإنه فيلم الCast بتاعه تقيل يمكن إنت متعرفش فيهم غير (توم هاردي) بس معاه (ميشيل وليامز Michelle Williams) و (ريز أحمد) و متكلف 110 مليون دولار و دي تعتبر ميزانية صغيرة لو حتحسبها لفيلم من أفلام مارفل .. حتشوفه في فيلم The Girl in the Spider’s Web من بطولة (كلير فويي Clair Foy) و اللي يعتبر الجزء الثاني من فيلم The Girl with the Dragon Tattoo و اللي شخصياً بعتبره أكتر فيلم مستنيه في الفترة الجايه و علي فكرة متكلف 43 مليون دولار بس.
اللي أنا شايفه إن Sony Entertainment عايزه ترسم صورة جديدة ليها وسط الناس و هي إنها شركة بتعمل أفلام جد و أكشن و بتناقش قضايا مهمة بتكلفة قليلة تخليك تروح تتفرج عليها في السينما ده لو إنت مهتم بالقضايا دي .. متنساش إن لو انت مواطن أميريكي متاح ليك تتفرج علي فيلم Sicario 2: Day of the Soldado في السينما فانت لازم تكون من جواك مهتم بقضية الهجرة الغير شرعية و دور المخابرات و القوات المسلحة في مواجهة المخدرات .. دي قضايا تتناقش في كتب و مش أي حد يدفع فلوس عشان يروح يتفرج علي فيلم بيناقش قضايا زي دي .. فيلم زي The Girl in the Spider’s Web مش أي حد حيروح يشوفه ده انت لازم تكون يا قريت الرواية يا شفت الجزء الأول بس أنا متوقع إنه يبقي فيلم محترم و حينافس في سباق الأوسكار و حط كلامي ده في سكرين شوت لو حبيت .. و في نفس الوقت Sony Entertainment عايزه تعمل أفلام تافهة تجيب فلوس زي Jumanji: Welcome to the Jungle .. فوق ده كله إن كل كام سنة يعملولهم فيلم بمصاريف ضخمة علي أمل إنه يكسر الدنيا زي فيلمي Men in Black 4 اللي بيحضروله دلوقتي و حيبقي فيلم قنبلة لان الCast بتاعه يخض و الجزء الجديد من سلسلة Spider-Man و اللي حيكون إسمه Far from Home .. دي في رأيي حتبقي إستراتيجية ناجحة و حتدي لSony Entertainment فرصة إنها تنافس عتاولة الإنتاج السينمائي زي Disney و Warner Bros و Universal.
المصدر:
مقالة بعنوان Why the success of Sicario 2 is a huge win for Sony يعني ليه نجاح فيلم Sicario 2 يعتبر ضربة معلم لشركة Sony .. نشرت في مجلة Forbes و ده لينك المقالة الأصلية:
