تعديل إتعمل يوم 27 يناير 2021 .. (يواكيم فينيكس) كسر الدنيا بأداءه لشخصية الجوكر في فيلم Joker وخد جايزة أوسكار أحسن ممثل عن دوره .. مسلسل Dracula اللي أنتجته هيئة الإذاعة البريطانية BBC وأخرجه (ستيفن موفات Steven Moffat) و(مارك جاتيس Mark Gatiss) اللي قدمولنا سلسلة Sherlock فعلاً كان حلو وشغالين علي الجزء الثاني بتاعه.
كنت إتكلمت من فترة عن إن شركة Amazon Prime أنتجت مسلسل إسمه Jack Ryan واللي الحقيقة ناس كتير من اللي أنا شخصياً أعرفهم بعد ما قروا المقالة إتفرجوا علي المسلسل وكان رأي كتير منهم إنه مسلسل يا إما مش حلو يا إما مش بطال بس مش حاجة وااو .. الحقيقة إن لو ده كمان رأيك فإنت مش لوحدك .. نقاد كتير قالوا إن (جون كرازنسكي John Krasninsky) بطل المسلسل واللي رعبنا في فيلم A Quite Place اللي هو كتبه وأخرجه وكان البطل بتاعه معرفش يحيي تاني شخصية (جاك رايان Jack Ryan) .. وبكده ينضم (جون كرازنسكي) لقايمة طويلة عريضة من الممثلين اللي هم كمان فشلوا إنهم يحطوا بصمتهم علي الشخصية لدرجة إنك تحس هي مالها شخصية منحسة وشها فقر ليه كده؟ .. سنة 2014 (كريس باين Chris Pine) كان زي الزفت في فيلم Jack Ryan: Shadow Recruit .. سنة 2012 لما (بين أفليك Ben Affleck) قدم الشخصية في فيلم The Sum of All Fears تحس إنه نسي التمثيل .. حتي (هاريسون فورد Harrison Ford) لما قدم الشخصية في فيلمين Patriot Games سنة 1992 و Clear and Present Danger سنة 1994 كنت تحس إنك بتتفرج علي أفلام من العميقة أوي اللي تحسها أفلام مهرجانات داخله تجيب جوايز مش أفلام أكشن إتعملت عشان تجيب فلوس .. حتي في أحسن فيلم إتعمل في السلسلة علي الإطلاق اللي هو The Hunt for Red October البطل (أليك بولدوين Alec Baldwin) أداءه إتهمش أوي بالمقارنة بالممثل المساعد (شون كونري Sean Connery) اللي أقل حاجة تتقال عن أداءه إنك وإنت بتتفرج عليه كإنك بتتفرج علي مسرحية وبقيت تستني مشاهده مع إنه بكرر تاني مش هو البطل هو يدوبك الممثل المساعد.
ده يخليك تسأل نفسك هي المشكلة في مين؟ .. كل الممثلين اللي جبت أساميهم يعتبروا ممثلين كويسين أوي بس ولا واحد فيهم خلي شخصية (جاك رايان) أي حد يستني يتفرج عليها .. اللي وصلت له إن المشكلة في الشخصية نفسها .. فيه شخصيات مينفعش تتعمل أفلام ولو إتعملت تتعمل مرة واحدة ومحدش يجي جنبها تاني .. (جاك رايان) واحدة من الشخصيات دي .. في المقالة دي أنا جمعت شوية شخصيات زي (جاك رايان) من اللي أبوس إيديكوا كفاية تعملوا عنها أفلام بقي عشان أنا فعلاً جتتي نحست.
شخصية (روبين هود Robin Hood):
دي شخصية إتقدمت في أكثر من 70 عمل فني .. عارف الإفيه بتاع دي فكرة إتهرست في مية فيلم قبل كده؟ .. شخصية (روبين هود) إتهرست في أفلام دراما وفي أفلام رومانسية وإتهرست في أفلام كارتون للأطفال .. شفناها في فيلم Prince of Thieves بتاع (كيفن كوستنر Kevin Costner) وشفناها في فيلم Robin Hood بتاع (راسل كرو Russell Crowe) .. وأخيراً حنشوفه في فيلم تاني إسمه Robin Hood برده اللي هو طب علي الأقل غيروا الإسم والمرة دي من بطولة (تارون إيجرتون Taron Egerton) اللي يمكن تعرفه من فيلم Kingsmen ومن إنتاج (ليوناردو ديكابريو Leonardo DiCaprio) .. معلومة ليك الفيلم ميتشافش ولو دخلته سينما يبقي ربنا يعوضك في فلوس التذكرة ولو مدخلتوش متحاولش تشوفه .. هل بقي نسكت علي كده؟ .. لا الأخوين أو خليني أقول الأختين (واتشوسكي Wachowski) اللي قدمولنا قبل كده سلسلة The Matrix وقدمولنا فيلم V for Vendetta شغالين علي مشروع فيلم مستوحي من شخصية (روبين هود) .. شركة ديزني بتفكر تعمل Reboot كامل لسلسلة أفلام Pirates of the Caribbean من غير (جوني ديب Johnny Depp) وهبدوا هبدتهم التمام إن اللي حيخلي السلسلة تسمع مع الناس هي إنهم يخلوها هي كمان مستوحاه من حياة (روبين هود) .. شركة Sonny نفسها تعمل حاجة شبه العالم السينمائي بتاع Marvel بس عشان يا عيني مش حيلتهم أي شخصيات فهم قالوا طب ما نعمل حاجة شبه أفلام Marvel بس حول حياة (روبين هود) وشغالين علي مشروع فيلم بيحكي قصة حياة مراته (ماريان Marian) وحتقوم بالبطولة الممثلة (مارجوت روبي Margot Robbie).
شخصية الجوكر:
دي شخصية مفيش ممثل إلا وحلم إنه يقدمها وإتهرست قبل كده برده في مية فيلم .. (هيث ليدجر Heath Ledger) الله يرحمه قدمها .. (جاك نيكلسون Jack Nicholson) قدمها .. والحمد لله (جاريد ليتو Jared Leto) كرهنا فيها في فيلم Suicide Squad واللي أنا شخصياً بضرب كف علي كف من ساعة ما سمعت إنهم بيعملوله جزء ثاني .. أكيد كلنا سمعنا إن فيه فيلم لوحده بيتعمل عن الجوكر من بطولة (يواكيم فينيكس Joachim Phoenix) واللي في رأيي هو اللي يا إما حيحيي الشخصية يا حيجيب أجلها بس اللي أنا نفسي أفهمه ليه التركيز الأوفر ده علي شخصية الجوكر وكأن باتمان مكنش له أعداء غيره؟
شخصية (دراكولا Dracula):
شركة Universal مش بتاعة التلاجات بتاعة الأفلام عملت 7 أفلام عن شخصية (دراكولا) .. شركة Hammer عملت 9 أفلام .. شفنا أفلام زي Dracula’s Death وزي Blood of Dracula وشفنا Young Dracula وشفنا Batman Dracula وفيه كمان Dracula and Son .. فيه طبعاً اللي بدأ الليلة دي كلها فيلم Bram Stoker’s Dracula .. وفيه Dracula 3D و Dracula 2000 وكمان Dracula 3000 .. كفاية أبوس إيديكوا بقي .. بعد كل ده .. يطلعلك خبر إن الإتنين اللي عملوا مسلسل Sherlock اللي هم (ستيفن موفات Steven Moffat) و(مارك جاتيس Mark Gatiss) شغالين دلوقتي علي كتابة سيناريو مسلسل عن Dracula .. ليه بقي؟ ها ليه بقي؟ ليه؟
شخصية (شيرلوك هولمز Sherlock Holmes):
علي حسب كلام موسوعة جينيس للأرقام القياسية فالشخصية دي هي أكتر شخصية إتهرست في الأفلام والمسلسلات في التاريخ .. إحنا عدي علينا (شيرلوك هولمز) في أكثر من 300 عمل فني وده رقم كبير جداً وقدمه ممثلين كتير أوي يعني .. (كريستوفر لي Christopher Lee) اللي إنت عارفه بدور (سارومان Saroman) من سلسلة Lord of the Rings قدم الشخصية .. (إيان ماكيلين Ian McKellen) اللي قدملنا شخصية (جاندالف Gandalf) هو كمان قدم الشخصية .. (روبيرت داوني جونيور Robert Downey Jr.) بتاع فيلم Iron Man عدت عليه .. (جوني ديب Johnny Depp) و(بينديكت كامبرباتش Benedict Cumberbatch) عدت عليهم .. هل تفتكر إن كده كفاية .. لا يا أستاذ تبقي متعرفش هوليوود كويس .. فيه كلام علي إن الجزء الثالث من سلسلة الأفلام من بطولة (روبيرت داوني جونيور) و(جود لو Jud Law) وحيكون من إخراج (جاي ريتشي Guy Ritchie) برده شغالين عليه دلوقتي .. (شيرلوك هولمز) فكرة والأفكار لا تموت.
شخصية (جيمس بوند James Bond):
إمتي أخر مرة كنت مستني تروح تتفرج علي فيلم James Bond في السينما؟ .. روح إسأل باباك أو حتي جدك زمان وهم في سنك إزاي كانوا بيقفوا طوابير علي باب السينمات عشان يتفرجوا علي فيلم من بطولة (شون كونري) ولا (روجر مور Roger Moore) وهم بيقدموا الشخصية .. دلوقتي خلاص جيلنا مبقاش يشوف شخصية (جيمس بوند) زي ما أهالينا كانوا بيشوفوها وده اللي المنتجين بتوع السلسلة محتاجين يفهموه .. الحل إن يا إما السلسلة تنتهي أو تجيبوا عليها واطيها .. (دانييل كريج Daniel Craig) ممثل جامد وعلي راسي من فوق بس لوحده مبقاش يقدر يشيل حمل الشخصية.
المصدر:
- مقالة بعنوان Reboot not more: The overused characters who should be retired .. كفاية إعادة إنتاج: الشخصيات اللي إتهرست و اللي مش راضية تموت .. نشرت في جريدة The Guardian البريطانية وده لينك المقالة الأصلية:
https://www.theguardian.com/culture/2018/aug/29/jack-ryan-reboot-overused-characters-the-joker-dracula
