لينك التسجيل الصوتي للمقالة علي ساوند كلاود:
https://on.soundcloud.com/yhCA4
كمهندس ميكانيكا ودي شغلانة طبيعتها إنها شغلانة رجالي شوية يعني تلاقي أغلب اللي شغالين فيها رجاله وبالتالي عدد البنات اللي بتتخرج بشهادة بكاليرويوس هندسة ميكانيكا قليلين فأنا شفت بعيني إزاي ممكن في شركة أو حتي في موقع مهندسة بنت تبقي وسط رجاله والمفروض بحكم إنها هي المهندسة إنها هي اللي تمشي الشغل وهي اللي بتدي الأوامر .. فيه رجاله كتير عندها مشكلة حقيقية مع فكرة إنهم ياخدوا أوامر أو بلاش أوامر عشان إحنا مدنيين خليني اسميها Tasks أو تعليمات من واحدة ست .. كونك مهندسة ميكانيكا فده معناه حاجات كتير من ضمنها إن حضرتك شغاله في مكان كان الأولي ياخده رجل علي الأقل الفلوس اللي إنتي بتاخديها تصرفيها علي نفسك كان هو حيفتح بيها بيت .. أنا أسف إذا كان كلامي مسيء لبنات كتير بس دي النظرة اللي بتتشاف بيها الست اللي بتشتغل في وظيفة إتعودنا إن يشتغلها رجاله.
عشان كده أنا أرشحلك أوي إنك تتفرجي علي فيلم محترم اسمه On the Basis of Sex وعلي فكرة عنوان الفيلم خداع أوي .. الفيلم ده بيحكي القصة الحقيقية لواحدة ست اسمها (روث بايدر جينسبيرج Ruth Bader Ginsburg) كانت الست الوحيدة ضمن التسع قضاة بتوع المحكمة الدستورية العليا الأميريكية .. في مشهد من المشاهد الصعبة أوي في الفيلم لما كانت هي في كلية حقوق في جامعة هارفارد يعني واحدة من أكبر الجامعات علي مستوي العالم عميد الكلية عزمها هي وال8 بنات اللي في دفعتها علي حفلة حضرها أحسن طلبة الجامعة وهما قاعدين عميد الكلية طلب من ال8 بنات إن كل واحدة فيهم تقف تقول لللي قاعدين سبب يخليها هي أحق بالمكان ده من طالب تاني ولد كان ممكن يبقي مكانها .. تخيلي نفسك مكان واحدة من البنات ولما تحسي إن دمك بيغلي كملي قراية.
زي ما أنا بحكم شغلي ممكن أتفهم أوي (روث بايدر جينسبيرج) كانت حاسة بإيه وقتها فكمان مخرجة الفيلم (ميمي ليدر Mimi Leder) الحق يتقال الست دي سفت التراب وطلع عينها وعين اللي خلفوها مش لسبب غير إنها إختارت تشتغل في مجال أغلبه رجاله .. عشان بس أديلك لمحة قد إيه الست دي إتفحتت في حياتها عشان يبقي ليها Career ففيلم On the Bases of Sex يعتبر أول فيلم تعمله من أكثر من 20 سنة .. سنة 1973 الست دي كانت أول بنت تتخرج من كلية American Film Institute Conservatory اللي هي هارفارد بس لصناعة السينما .. بداية شغلها خالص أخرجت شوية حلقات من مسلسل ER .. للناس اللي برده من جيل الألفينات متعرفش إيه هو ER فده حضرتك النسخة التسعيناتي من مسلسل Grey’s Anatomy أو House .. تقدر تقول إن الرتم السريع وإسلوب التصوير اللي يخليك قاعد علي أعصابك طول ال45 دقيقة بتوع الحلقة هي اللي عملته .. الست دي خلت مسلسل درامي عن حياة الدكاترة ياخد جايزة إيمي Emmy ودي بتعادل الأوسكار بس للمسلسلات كأحسن مسلسل تليفزيوني.
شغل (ميمي ليدر) سمّع أوي في هوليوود لدرجة إن مخرج له مكانته زي (ستيفن سبيلبيرج Steven Spielberg) لما عمل شركه الإنتاج بتاعته دريم ووركس Dream Works وكان حيعمل أول فيلم من إنتاج الشركة إختارها هي عشان تخرجه وكان فيلم The Peacemaker سنة 1997 وكان من بطولة (نيكول كيدمان Nicole Kidman) في دور متخصصة في الأسلحة النووية بتحاول تحبط هجوم إرهابي علي أميركا بمساعدة ضابط قوات خاصة قام بدوره (جورج كلوني George Clooney) .. فيلمها اللي بعد كده كان Deep Impact اللي تقريباً كسر الدنيا وقتها .. فيلمها الثالث Pay it Forward من بطولة (كيفن سبايسي Kevin Spacey) فشل إنه يعمل أرباح كويسة ومن بعدها ششششششش .. مفيش .. فجأة السيناريوهات الحلوة مبقتش بتيجي .. الفترة دي (ميمي ليدر) بتسميها Movie Jail يعني إنك تتحبس من إنك تعمل أفلام وغالباً أي مخرج سينما بيتعرضلها بعد ما بيعمل فيلم فاشل.
إنك كمخرج سينما تطلع بره دوامة الMovie Jail دي بتستهلك جزء كبير من مشاعرك إنك تبقي عارف من جواك إنك كويس بس محتاج تثبت للمنتجين إن غلطة واحدة مش حتدمرلك الCareer بتاعك .. من بعد فيلم Pay it Forward حاولت (ميمي ليدر) إنها ترجع اسمها تاني للسوق عن طريق إنها تبدأ تخرج في التلفيزيون .. عادة لما منتج يحب يعمل مسلسل فهو الأول بيعمل حاجة اسمها Pilot ودي بتبقي الحلقة الأولي للمسلسل ولما بتتعرض بيقيسوا رد فعل الناس هل عجبتهم الحلقة الأولي أو لا .. لو الحلقة عجبت الناس فالPilot دي بتقلب علي إنها تبقي موسم كامل أو Season .. بعد الSeason ما بيخلص شركة الإنتاج بتشوف رأي الناس هل نكمل Season تاني أو لا وهكذا .. (ميمي ليدر) أخرجت 9 حلقات Pilot ل9 مسلسلات مختلفة منهم 6 كملوا يبقوا مواسم كاملة ومنهم مسلسلات كملت وبقت ناجحة جداً زي مسلسل West Wing و Shameless و The Leftovers اللي أنتجته شركة HBO و(ميمي ليدر) شخصياً واحدة من المنتجين بتوعه .. بس رغم نجاحها في التليفيزيون مفيش ستوديو إنتاج أفلام فكر إنه يرجعها تاني تخرج .. ده سببه إن في رأي (ميمي ليدر) لو إنتي واحدة ست قررتي تبقي مخرجة وعملتي فيلم فاشل فالMovie Jail بالنسبة ليكي ممكن يبقي تأبيدة بس بالنسبة للمخرجين الرجاله بيبقي أخرهم إن شركة الإنتاج تقولهم متعملش كده تاني يا حبيبي.
فكر فيها كده .. مخرج زي (ديفيد فينشر David Fincher) اللي عملنا Seven و Fight Club و The Social Network و The Girl with the Dragon Tattoo وعشان خاطري زود عليهم Gone Girl .. ده مخرج تقيل أوي بس وسط الCareer دي عمل فيلم فاشل اسمه Alien 3 وإتسامح والموضوع عدي .. مخرج تاني زي (جوس وييدون Joss Whedon) اللي عملنا مسلسل Buffy the Vampire Slayer وفيلمي Avengers و Avengers: Age of Ultron فبرده ده مخرج دماغه متكلفة أوي مع إنه برده عمل فيلم ميتشافش قبل كده اسمه Serenity .. مخرج تالت زي (ستيفن ساديربيرج Steven Soderberg) اللي عملنا سلسلة Ocean’s 11 برده عمل فيلمين زبالة اللي هم Haywire و Logan Lucky .. ده فيه مخرجين الCareer بتاعتهم كلها مبنية علي الفشل .. عندك واحد زي (زاك سنايدر Zack Snyder) اللي كمكافأة له علي فشله في فيلمي Sucker Punch و Legend of the Guardians فشركة Warner Bros عينته يمسك سلسلة أفلام DC Comics وهو اللي عملنا الكارثة الأولانية Batman V Superman: Dawn of Justice والكارثة اللي وراها Justice League وقبل ما يمشي قتل حلم شركة DC إن يبقي ليها العالم السينمائي بتاعها زي شركة Marvel.
اللي بدأنا نشوفه دلوقتي إن مخرجات إتحطوا في السجن بسبب فيلم فاشل عملوه بس دلوقتي بدأوا يرجعوا تاني يشتغلوا .. إتكلمنا عن (ميمي ليدر) ومثال تاني هو (كارين كوزاما Karyn Kusama) اللي رجعت بعد سنين من القعدة في البيت بفيلم Destroyer من بطولة (نيكول كيدمان) .. الCareer بتاعة (كارين كوزاما) تعتبر Copy & Paste من الCareer بتاعة (ميمي ليدر) .. أول فيلم تخرجه كان Girlfight اللي كسر الدنيا وكان من بطولة (ميشيل رودريجيز Michelle Rodriguez) أيام ما كانت ممثلة صاعدة وكان بيدور حول بنت عايزة تبقي ملاكمة محترفة وكسبت بالفيلم ده جوايز في مهرجان صاندانس ومهرجان كان .. الفيلم خلي الناس كلها تتكلم عن إمكانياتها كمخرجة وده خلي شركة إنتاج كبيرة اسمها Paramount تجيبها عشان تخرج فيلم اسمه Aeon Flux من بطولة (تشارليز ثيرون Charlize Theron) .. شركة الإنتاج كان في دماغها إنهم يجيبوا (كارين كوزاما) تعملهم فيلم حاجة شبه The Matrix كده بس دماغ (كارين كوزاما) كانت إنها تعمل فيلم خيال علمي أقرب ما يكون للفيلم الصيني Crouching Tiger, Hidden Dragon .. بسبب الهري ده شركة الإنتاج مشتها في نص التصوير وجابوا حد تاني يكمل الفيلم بس لما جم يتفرجوا علي الفيلم بعد ما خلص لقوا نفسهم قدام حاجة متتشافش مدتها 71 دقيقة من التعذيب البصري لأي حد بيتفرج .. شركة الإنتاج قررت تهين (كارين كوزاما) أكتر وجابوها تعمل المونتاج أو Editing للفيلم عشان يحاولوا ينقذوا اللي يقدروا عليه وبرده الفيلم طلع زي الزفت وفشل في إنه ينجح في السينمات .. تجربة Aeon Flux كانت شبه تجربة Pay it Forward و(كارين كوزاما) لقت نفسها محبوسة ومفيش شركة إنتاج مديالها الفرصة إنها تاخد إفراج.
سنة 2009 حاولت (كارين كوزاما) إنها ترجع تاني تحيي الCareer بتاعها بفيلم رعب اسمه Jennifer’s Body بس فشل ويمكن سبب فشله إن البطلة بتاعته كانت (ميجان فوكس Megan Fox) واللي محدش بياخد الأفلام بتاعتها جد مش عارف ليه .. بعد كده عملت فيلم رعب تاني اسمه The Invitation اللي إلي حد ما كان كويس بس إنت بتتكلم عن مخرجة من بعد فيلمها الأول Girlfight لحد دلوقتي يعني بتتكلم عن 15 سنة أخرجت 4 أفلام بس .. في نفس الفترة دي مخرج زي (ستيفن ساديربيرج) اللي حكتلك إنه من المخرجين الرجاله اللي غلطوا في الCareer بتاعهم وعملوا كذا فيلم فاشل أخرج 21 فيلم .. الوضع بالنسبة للمخرجات الستات في أميركا فعلاً مزري.
بناء علي كلام مبادرة اسمها Annenberg Inclusion Initiative عملتها جامعة كلارولينا الجنوبية الأميريكية فإنت لو جيت تشوف الأفلام الأميريكية اللي إتعملت من سنة 2007 لحد 2017 حتلاقي نفسك بتتكلم عن 1,100 فيلم .. من ال1,100 فيلم دول فيه منهم 53 فيلم بس أخرجتهم واحدة ست يعني بتتكلم عن أقل من 4% من إجمالي الأفلام اللي إتعملت في هوليوود خلال 10 سنين كاملين .. من ال53 فيلم دول 84% منهم عملتهم مخرجات معملوش إلا فيلم واحد بس في حين إن ال1,047 فيلم اللي أخرجهم رجاله تلاقي إن 55% منهم عملهم رجاله مأخرجوش إلا فيلم واحد بس .. للناس اللي تاهت من الإحصائية دي و مفهمتش أنا عايز أوصلك لإيه فحضرتك بمنتهي البساطة فيه جيل كامل من المخرجات الأميريكيات عملوا فيلم واحد وإختفوا بحيث منهم اللي بطلت إخراج خالص ومنهم اللي ملقتش شغل إلا في التليفيزيون.
حالة تالتة ممكن نتكلم عنها هي (باتي جينكينز Patty Jenkins) اللي بدأت الCareer بتاعها كمخرجة سنة 2003 بفيلم Monster اللي فعلياً كسر الدنيا .. ده فيلم بيحكي قصة القاتلة المتسلسلة Serial Killer المشهورة أوي (إليين وورونز Aileen Wuorons) وقامت ببطولته (تشارليز ثيرون) وخدت عنه أوسكار أحسن ممثلة .. بزمتك واحدة زي (باتي جينكينز) أول فيلم تعمله ياخد أوسكار أحسن ممثلة تفتكر ستوديهات إنتاج الأفلام في هوليوود حتكافئها إزاي؟ .. 15 سنة الست مش لاقيه شغل في السينما لحد ما أخيراً رجعتلنا بفيلمها الرائع Wonder Woman واللي أنقذ سلسلة أفلام DC Comics من الجرائم ضد الإنسانية اللي كان عملها (زاك سنايدر) واللي بقي أكتر فيلم في تاريخ السينما تخرجه واحدة ست يجيب فلوس في شباك التذاكر .. 15 سنة ست موهبتها في الإخراج تتاقل بالذهب ومحدش راضي يديها شغل .. بذمتك شفت سفالة وقلة أدب أكتر من كده؟
وغيرهم كتير كتير كتير .. مخرجة زي (كيمبرلي بيرس Kimberly Pierce) اللي أخرجت فيلم Boys Don’t Cry سنة 1999 من بطولة (هيلاري سوانك Hilary Swank) واللي خدت عنه أوسكار أحسن ممثلة إضطرت تصبر 10 سنين عشان تعمل فيلمها الثاني اللي إتعمل سنة 2008 وكان اسمه Stop-Loss عن حرب العراق وإضطرت تصبر تاني 5 سنين عشان تعمل فيلمها اللي بعده اللي كان إعادة إنتاج لفيلم الرعب Carrie سنة 2013 .. مخرجة زي (تامارا جينكينز Tamara Jenkins) عملت أول فيلم ليها سنة 1998 وكان اسمه Slums of Beverly Hills وإتعرض في مهرجان كان ويا عيني عشان تعمل فيلمها الثاني إستنت لحد سنة 2007 وكان فيلم The Savages وإترشحت عنه لأوسكار أحسن سيناريو .. وشوف يا أخي في نفس مهرجان كان سنة 1998 وفي القاعة اللي جنب اللي بيتعرض فيها فيلم Slums of Beverly Hills كان بيتعرض الفيلم الأول لمخرجة أميريكية برده اسمها (ليزا تشولودينكو Lisa Cholodenko) وكان اسمه High Art ومن 1998 لحد 2019 الست دي عملت 3 أفلام بس أخرهم كان سنه 2010 واسمه The Kids are All Right.
مش بس الفشل التجاري إنك كمخرجة تعملي فيلم يفشل في السينمات ممكن يخليكي يتحكم عليكي بالسجن وإنك متخرجيش تاني ممكن لمجرد إن دماغك ناشفة زي اللي حصل مع (كاثرين هاردويك Catherine Hardwick) اللي بدأت تظهر للناس بفيلمها Thirteen واللي خدت عنه جايزة في مهرجان صاندانس Sundance السينمائي الدولي وبعد كده خلت العالم كله يتكلم عنها لما أخرجت Twilight .. المنطق بيقول واحدة أخرجت فيلم كسر الدنيا زي Twilight بميزانية شويه ملاليم إنها تتشال من علي الأرض شيل .. إذ يا أخويا الناس تتفاجيء إن شركه الإنتاج إستبعدتها من إخراج الأجزاء اللي بعد كده من السلسلة.
اللي أنا شايفه دلوقتي إن المخرجات الستات اللي إتركنوا علي الرف بما فيه الكفاية بدأوا يرجعوا تاني .. زي ما قلتلك (باتي جينكينز) رجعت بفيلم Wonder Woman وحالياً بتخلص الجزء الثاني .. (تامارا جينكينز) بعد صبر 10 سنين من غير شغل السنة اللي فاتت أخرجت فيلم حلو أوي اسمه Private Life عن معاناة أي إتنين متجوزين عايزين يخلفوا ومش عارفين .. (كيمبرلي بيرس) شغالة دلوقتي علي مشروع فيلم شكله حيبقي حلو اسمه This is Jane عن الست اللي بدأت تشتغل في Business الإجهاض في أميركا لأول مرة في السبعينات .. حتي (كاثرين هاردويك) حنشوفها السنة دي في فيلم Miss Bala وده فيلم جريمة شكله حيبقي حلو .. دي حاجة كويسة أكيد بس في نفس الوقت بتخليك تفكر في كم الفرص اللي ضاعت .. فيه كام فيلم كان ممكن يبقي حلو لو كانت أخرجته أي واحدة من جيل المخرجات اللي كان قاعد في البيت ده؟
فيه فرق كبير أوي بين رؤية المخرج الرجل و الست وخليني أفهمك قصدي .. لما نزل فيلم Wonder Woman كان فيه مشهد لما المحاربات بتوع جزيرة ثيماسكيرا بيواجههوا القوات الألمانية اللي نزلت علي الشط في مشهد قتالي طويل بس متصور حلو أوي لدرجة إن صحفيين حكوا إن ستات كتير من اللي كانوا بيتفرجوا علي الفيلم في السينما عيطوا .. لما جم إتسالوا إنتوا بتعيطوا ليه؟ كانت الإجابة إن عمرهم ما شافوا حاجة بالجمال ده .. مجرد إن واحدة ست هي اللي أخرجت الفيلم خلت الستات تحب إنها تتفرج علي مشهد حربي .. خليني أشبهالك أكتر .. فيه كام ولد إتفرج علي فيلم Troy قصاد كام بنت؟ .. من وجهة نظرنا كولاد فيلم Troy ده تحفة من تحف الإخراج السينمائي خصوصاً في مشاهد المعارك .. ده كفاية الفورمة بتاعة (براد بيت Brad Pitt) بس من وجهة نظر البنات ده فيلم ميتشافش .. تدري ليش؟ .. عشان ده فيلم أخرجه وقتها واحد كبير في السن اسمه (وولفجانج بيترسون Wolfgang Peterson) وكفاية اسمه لوحده.
الإخراج السينمائي زيه زي أي شغلانة تانية بتاخد موقف ضد الستات عموماً والست المتجوزة والمخلفة خصوصاً .. لما مخرجة زي (تامارا جينكينز) قررت تاخد أجازة وضع عشان تربي عيالها إتقالها لو حبيتي ترجعي شغلك مش حتلاقي شركة إنتاج عايزة تشغلك .. ليه؟ أصلك ست مخلفة ومش حتبقي فاضية .. يمكن الفرق إن دلوقتي في أميركا فيه موضة اسمها #MeToo Movement ودي حاجة بدأت تظهر بعد فضيحة (هارفي واينستين Harvey Weinstein) .. الموضة دلوقتي إنهم يبدأوا يحطوا كوتة للمشاركة النسائية في صناعة السينما .. شركة زي Warner Bros أو HBO عايزين إن أي فيلم أو مسلسل جديد يعملوه فطاقم التصوير والإخراج نفسه يبقي فيه نسبة من الستات .. ممثلة زي (نيكول كيدمان) كانت وعدت إنها كل سنة حتشتغل علي الأقل مع مخرجة ست وكانت البداية بفيلم The Beguiled اللي أخرجته (صوفيا كوبولا Sofia Coppola) ووراه فيلم Destroyer .. مؤخراً ظهرت كمان حملة اسمها تحدي ال4% إن شركات الإنتاج تحاول تحافظ إن علي الأقل 4% من طقم العمل بتاع أي فيلم يبقي ستات و فيه منتجين تقال أوي في السوق زي (جيه جيه إبرامز JJ Abrams) رحب جداً بالفكرة.
كواحد بحب أتفرج علي الأفلام فأنا في رأيي إن هوليوود وكمان مصر محتاجة تدي للستات فرصة إنها تخرج وخليني أختملك بحاجة لطيفة .. عارف فيلم الطريق الي إيلات؟ .. إنت تعرف إن أخرجته واحدة ست اسمها (إنعام محمد علي)؟ .. أنظف فيلم حربي إتعمل في تاريخ السينما المصرية أخرجته واحدة ست .. حتي في أميركا أنا شايف إن (إنعام محمد علي) بتاعة أميركا واحدة اسمها (كاثرين بيجلو Kathryn Bigelow) .. الست دي سنة 2008 عملت فيلم مش متكلف حاجة اسمه The Hurt Locker كان نازل الأوسكار ضد فيلم Avatar .. عارف مين خد أوسكار أحسن إخراج وقتها؟ هي .. عارف مين اللي كان أخرج فيلم Avatar؟ (جيمس كاميرون James Cameron) اللي أخرج قبل كده Titanic .. عارف (جيمس كاميرون) يقرب إيه ل(كاثرين بيجلو)؟ يبقي طليقها .. ولنا في هذا حديث أخر إن شاء الله.
المصدر:
- مقالة بعنوان How today’s female directors broke out of ‘movie jail’ نشرت في جريدة The Guardian البريطانية وده لينك المقالة الأصلية:
tps://www.theguardian.com/film/2019/jan/31/female-directors-movie-industry-gender-discrimination
