تخيل معايا إن (عمرو دياب) عمل دويتو مع (تامر حسني) .. علي إيدك اليمين واحد عامل أكتر من 20 ألبوم و نص شعب مصر حافظ أغانيه .. و علي إيدك الشمال واحد رغم إن الCareer بتاعته إلي حد ما طويلة إلا إنك متقدرش تميز من شغله إلا كام أغنية عملهم .. لو حتقارن بين الإتنين ففيه فرق سنين ضوئية سواء في الشهرة أو النجاح أو حتي التأثير .. صحيح إن (تامر حسني) شعبيته أكبر من (عمرو دياب) كل ما بتنزل بمعدل الأعمار بين الناس بس في المجمل حاجة زي دي حتضر (عمرو) و حتفيد (تامر) .. أهو فكرة إنك تبدأ تشوف شخصيات X-Men في سلسلة أفلام Marvel حتبقي أكبر غلطة ممكن Marvel تعملها في تاريخها و أظن إنك استنتجت السبب .. Marvel هي (عمرو دياب) بس X-Men تبقي (تامر حسني) .. بعد ما خلاص شركة Disney الشركة الأم لMarvel إشترت شركة 20th Century Fox اللي بتنتج سلسلة X-Men و كمان بتنتج سلسلة Fantastic Four و الموضوع اللي شاغل دماغ ناس كتير هو إمتي حنشوف شخصيات X-Men في سلسلة أفلام زي Avengers؟
لما تيجي تبصلها تكتشف إن فيه حاجات مشتركة كتير بين Marvel و (عمرو دياب) .. الإتنين بقالهم سنين مكملين و مفيش أي حاجة بتقول إن فيه إحتمال إنهم يبطلوا .. بتتكلم عن أكثر من 20 فيلم بداية من Iron Man سنة 2008 لحد Avengers: End Game سنة 2019 و يمكن باستثناء غلطة The Incredible Hulk فالأفلام دي كلها تحس إنها حلقات في مسلسل ورا بعضه .. نجاح بسم الله ما شاء الله مفيش سلسلة أفلام عرفت تقرب منه مش توصله .. أنا أفتكر إن لما إتعرف إن شخصية Spider Man حتبدأ تخش في عالم Marvel بعد ما شركة Disney اللي المفروض إنها بتملك Marvel إشترت شركة Sony Entertainment اللي بتملك سلسلة Spider Man ناس كتير حطت إيدها علي قلبها .. المشكلة مش إن Spider Man شخصية وحشة أو مش قد المقام لا سمح الله .. المشكلة إنك عملت 3 أجزاء Iron Man و جزئين Avengers و جزئين Captain America و في كل دول مجبتش سيرة Spider-Man فإنت فجأة كده و بدون أي مقدمات حتقول للناس Surprise يا جماعة رحبوا معانا ب(بيتر باركر Peter Parker) بيشتعلق علي الحيطة زي البرص و عمته ست زي القمر .. بس لما إتفرجنا علي Captain America: Civil War لقينا إن الموضوع عدي زي السكينة في التورتة .. بس Spider Man ده شخصية واحدة فإلي حد ما أمرها سهل .. سلسلة X-Men دي فيها فرح العمدة.
فكك من إن سلسلة X-Men بتغير مخرجيها زي ما إنت بتغير شراباتك كده بس عدد المرات اللي بتشوف فيها شخصيات في السلسلة بتتشقلب و بتموت و بترجع تعيش تاني و تموت و تموت تاني و تلاقيها رجعت بممثل غير الأولاني في جو من الفوضي الخلاقة يحسسك إن دي سلسلة ماشية بالعك .. سلسلة Marvel إلي حد كبير محدده هي رايحه فين و إزاي و إمتي و السبب في كده إن Disney معينه واحد اسمه (كيفن فايجي Kevin Feige) هو اللي ماسك المشروع .. أنا لو مكان الرجل ده حفكر ألف مرة قبل ما أقول طب ما نجرب ندخل حد من عالم X-Men في سلسلة Marvel حتي لو كل يوم اللي ماسكين الشركة قارفيني في عيشتي تليفونات عايزين الخطوة دي تتعمل .. أقسملك بالله أنا فاهم كويس أوي كم الأوووووه مااااااي جاااااااد اللي حتتقال لما تشوف شخصية زي Wolverine أو Deadpool في نفس المشهد مع Iron Man و Captain America .. لا Iron Man إيه بقي الله يرحمه .. خصوصاً إن كلهم سواء العالم بتاع شخصيات Marvel أو العالم بتاع X-Men عايشين مع بعض في القصص المصورة .. بس في الأفلام الدنيا مفصولة .. حتي لو بكره الصبح قرروا إن ليه لا ندمج السلستين في بعض حيفضل الصداع اللي في راس الفريق بتاع (كيفن فايجي) هو إزاي لإن علي رأي الروس .. الشيطان في التفاصيل.
تعالي ناخد الفيلم الجديد من سلسلة X-Men و اللي حيبقي اسمه Dark Phoenix و اللي يعتبر أخر فيلم تنتجه شركة 20th Century Fox للسلسلة .. الفيلم ده الحقيقة يعتبر مثال صارخ للفوضي و العك و اللي بقي طريقة شغل في السلسلة .. في الوقت اللي Marvel بتعمل اللي تقدر عليه عشان تضمن سرية الأحداث في أي فيلم تعمله تلاقي إننا بسم الله الرحمن الرحيم كده عارفين إن شخصية (ميستيك Mystique) اللي بتقدمها (جينيفر لورينس Jennifer Lowrence) حتموت في الفيلم .. علي فكرة أنا مش بخمن .. مخرج الفيلم (سايمون كينبرج Simon Kinberg) مشكوراً يعني حرقلنا نص الفيلم و قال إن ده حيحصل .. فكده شخصية محورية في السلسلة مش حتشوف وشها تاني خلاص فلو إنت مكان الفريق بتاع (كيفن فايجي) طبيعي تبدأ تقول ياخراااااابي .. بلاش (ميستيك) .. أساساً ناس كتير بتشوف إن (جينيفر لورينس) دمها واقف و مش بتنزلها من زور .. كلنا عارفين إن خلاص (هيو جاكمان Hugh Jackman) مش حيقدم شخصية (وولفرين Wolverine) تاني بعد أخر فيلم عمله اللي هو Logan .. تاني أنا برده مش بخمن هو نفسه قال كده إني مش حقدم الشخصية دي تاني .. حالياً الفريق بتاع (كيفن فايجي) سامع صوته بيقول ياختاااااااااااي لحد ما مؤخراً عرفنا إن (هيو جاكمان) حيرجع تاني بشخصية (وولفرين) في الجزء الثالث من سلسلة Deadpool.
حيجي حد يقولي بس أهم شخصيتين في سلسلة X-Men هم (البروفيسور إكس Professor X) اللي بيقدمها الممثل (جيمس ماكفوي James McAvoy) و (ماجنيتو Magneto) اللي بيقدمها الممثل (مايكل فاسبندر Michael Fassbender) .. تخيل كده إنك تشوفهم بيحاربوا (ثانوس Thanos) مع باقي Avengers بس حتفضل المشكلة اللي قابلت الفريق بتاع Marvel لما بقي في إيدهم يستخدموا شخصية Spider Man و هي حتدخلهم في السيناريو إزاي؟ .. نقطة تانية و هي إنك أخدت بالك إن رغم سلسلة X-Men دي إتعملها أكتر من 6 أجزاء و مش فاكر اساميهم من كتر ما هم ملهمش لازمة إحنا مش معلق معانا من شخصياتهم إلا أربع شخصيات منهم إتنين مش حينفع يدخلوا العالم بتاع Marvel لإنهم ماتوا زي ما قلتلك .. ده يحطك قدام واقع جديد و هو إن سلسلة X-Men بجلالة قدرها و رغم إنها طويلة طول الليلة السودا و إتعمل منها أفلام كتير إلا إن فعلياً هي مفيهاش إلا أربع شخصيات تستحق إنها تتشاف و الباقي كمالة عدد .. اللي هو بإختصار إنت قصاد حاجة شبه (تامر حسني) .. محدش قال إن Marvel معملتش شخصيات كمالة عدد .. عندك شخصية (دراكس المدمر Drax The Destroyer) اللي قدمها (ديف باتيستا Dave Bautista) في Guardians of the Galaxy اللي أنا مش شايفله أي ستين لازمة الحقيقة أو شخصية زي (هوك-أي Hawkeye) اللي قدمها (جيريمي رينر Jeremy Renner ) بس لو تسألني أي واحد فيهم ظفره برقبة أي شخصية من الشخصيات اللي ملهاش لازمة في سلسلة X-Men .
لو تسألني رأيك إيه أقولك إن أكبر مشكلة هي الفرق الرهيب في Quality بين Marvel و X-Men .. هل عمرك شفت فيلمين لMarvel ليهم نفس القصة؟ .. فكر و لو لقيت قولي .. بس X-Men عملوها .. فاكر X-Men: Last Stand؟ .. فاكر قصته؟ إن (جين جراي Jean Grey) حتتحول من البنت الكيوت الأمورة للوحش المخيف اللي بيدمر أي حاجة قدامه يخليها حتت صغيرة زي عصافير الجنة ..أاهو عشان أكملك حرق فيلم Dark Phoenix فهو نفس الفكرة Copy & Paste .. في الأخر أنا معرفش هل فعلاً شخصيات X-Men حتبدأ تدخل في Marvel ولا لا و لو حتدخل حيبقي إمتي و إزاي .. لو ده حصل فأنا حبقي فاهم ليه .. و لو محصلش زي ما (كيفن فايجي) بيحلف حيبقي أحسن قرار تاخده Marvel لحد دلوقتي.
المصدر:
مقالة بعنوان Marvel shouldn’t rush to introduce the X-Men to its cinematic universe .. نشرت في جريدة The Guardian البريطانية و ده لينك المقالة الأصلية:
https://www.theguardian.com/film/filmblog/2019/mar/07/marvel-xmen-cinematic-universe-disney-merger-20th-century-fox
