لو أنا جيت سألتك إيه هي أقوي سلاسل أفلام أو حتي مسلسلات الجاسوسية اللي إنت شفتها وعجبتك أوي؟ .. فيه منكوا حيروح للإختيار اللي أغلب الناس عارفاه اللي هو سلسلة (جيمس بوند James Bond) .. فيه منكوا حيقول إيه الهبل ده سلسلة Mission: Impossible أحلي بكتير .. اللي منكوا متعمق شويتين تلاتة حيقولك هو أنتوا نسيتوا سلسلة (جايسون بورن Jason Bourne) .. اللي معدي بقي خالص حيجيب سيرة مسلسل 24 .. بس اللي حنتكلم عنه النهاردة هو سلسلة أفلام دايماً بتقع من دماغ الناس اللي هي سلسلة (جاك رايان Jack Ryan) .. يمكن لإن السلسلة دي عملها كذا ممثل ورا بعض فإنت كمشاهد الشخصية معلقتش معاك بوش ممثل معين .. (جاك رايان) للناس اللي مش عارفه الاسم كانت شخصية في سلسلة روايات شبه رجل المستحيل كده عندنا في مصر كتبها رجل اسمه (توم كلانسي Tom Clancy) بتحكي عن شاب خريج إقتصاد وعلوم سياسية ومعاه دكتوراه في الإقتصاد دخل الجيش وبعد كده إتجند في وكالة المخابرات المركزية الأميريكية CIA.
أول رواية في السلسلة كان اسمها The hunt for Red October واللي إتحولت لفيلم بنفس الاسم واللي عمل الشخصية كان ممثل اسمه (أليك بولدوين Alec Baldwin) .. بعد كده جسدها الممثل الكبير (هاريسون فورد Harrison Ford) في فيلمين اللي هم Patriot Games و Clear and Present Danger .. بعد كده السلسلة إتعادت من الأول بممثل شاب كان (بين أفليك Ben Afflick) أيام ما كان لسه ممثل شاب في فيلم The Sum of All Fears .. بعد كده السلسلة إتعادت تاني بممثل شاب تاني بقصة تانية خالص كان بطلها (كريس باين Chris Pine) في فيلم Jack Ryan: Shadow Recruit .. وأخيراً وده اللي حنتكلم عنه النهاردة هو أخر إصدار للسلسلة بس المرة دي مش فيلم إنما مسلسل أنتجته شركة Amazon Prime Video وهنا السلسلة بتتعاد للمرة الثالثة بممثل شاب للمرة الثالثة برده والمرة دي الدور كان علي (جون كرازنسكي John Kransisky).
لإن لسه برده أنا عارف فيه ناس مش مقتنعة إن شخصية (جاك رايان) ليها تقلها في أفلام الجاسوسية فعايزك تعرف إن من ساعة الظهور الأول للشخصية في فيلم The Hunt for Red October والكلام ده كان سنة 1984 لحد دلوقتي فالشخصية دي إتنشرلها 24 رواية منهم 7 روايات إتنشروا في أخر 4 سنين بس حتي بعد ما (توم كلانسي) اللي إخترع الشخصية توفي سنة 2013 ففيه كتاب وروائيين كملوا وراه السلسلة زي (مارك جريني Mark Greany) و(جرانت بلاكوود Grant Blackwood) و(مارك كاميرون Mark Cameron) ولسه الروايات حتفضل تنزل والناس تقراها وتستناها .. مبدأياً لازم تكون فاهم إن شخصية (جاك رايان) مختلفة شوية .. لا شوية إيه قول شويات عن أي شخصية تانية في سلاسل أفلام الجاسوسية .. هو مش نسوانجي زي (جيمس بوند) .. مش بينط من طيارات ولا بيكتم نفسه تحت المياه لست دقايق زي (إيثان هانت Ethan Hunt) في سلسلة Mission: Impossible .. ولا هو كان قاتل محترف بيعرف ينط من أسطح العمارات ويسوق عربية تاكسي لادا يعمل بيها أحلي دريفتات في شوارع موسكو زي (جايسون بورن) .. ده شاب كان لسه مستقبل حلو أوي في البنوك وبياخد مرتب خرافي ساب كل ده ودخل الجيش .. إتصاب في حادثة طيارة هليكوبتر ومبقاش يمشي وخد الدكتوراه بتاعته في الإقتصاد وهو علي كرسي متحرك في المستشفي .. فضل يتعالج لحد ما بقي يمشي تاني .. إتجند في CIA وبقي شغال محلل شغلته إنه قاعد ورا مكتب يدور علي إزاي المنظمات الإرهابية بتلاقي فلوسها وبتنقل الفلوس دي في بنوك العالم لحد ما بالصدفة بيكتشف خلية إرهابية بيقودها واحد (جاك رايان) سماه خليفة (أسامة بن لادن) والمسلسل بيخدك في مطاردة حول العالم بين الإتنين دول .. مطاردة بتاخدك من أميركا لليمن لباريس لتركيا وترجعك تاني لأميركا.
أنا مش عايز أحرقلك المسلسل وأنصحك إنك تتفرج عليه الحقيقة لإن المسلسل ده عاجبني فيه إهتمامه بالتفاصيل .. صحيح الفيلم أحداثه حول إرهابي مسلم إسمه (موسي سليمان) جسدها بشكل مذهل الممثل (علي سليمان) وغالباً حتحس إن دي مجرد حلقة جديدة في مسلسل ربط الإسلام بالإرهاب بس ده مش حقيقي .. رئيس (جاك رايان) في الشغل واسمه (جيمس جرير James Greer) بيجسدها الممثل (وينديل بيرس Wendell Pierce) واللي حيلف معاه العالم عشان يقبض علي (موسي سليمان) هو كمان مسلم و قصة إسلامه لوحدها حتخليك تتعلق به أوي .. الشخصية اللي جايه من سوريا جايبين ممثل سوري يعملها .. الشخصية اللي جايه من تونس جايبين ممثل تونسي يعملها .. معاناة اللاجئين السوريين حتشوفها بعنيك في المسلسل .. تفاصيل كتير أوي حتخليك تغرق جوه المسلسل والأهم إن مع كل حلقة بتتفرج عليها حتلاقي نفسك بتفكر في قضايا مهمة مش بس قد إيه ملامح الممثل أمور أوي .. مسلسل Jack Ryan للناس الجد ولو إنت شخص تافه متتفرجش عليه لإنه مش حيعجبك .. لو إنتي بنت إتفرجي علي المسلسل ده لإن أحلي حاجة فيه قوة الشخصيات النسائية .. مفيش ست مكسورة الجناح في المسلسل ده.
بس خلينا دلوقتي نشوقك ونقيملك الخمس أفلام اللي إتعملوا لحد دلوقتي عن شخصية (جاك رايان) لإن فعلاً لو إنت بتحب الأفلام وبتقول علي نفسك غاوي فرجة علي أفلام الأكشن بالذات مينفعش متبقاش عارف حاجة عن الخمس أفلام دول .. الخمس أفلام متقيمين من الأسوأ للأحسن علي فكرة:
فيلم The Sum of all Fears واللي أُنتج سنة 2002:
مبدأياً الCast بتاع الفيلم ده يخض .. البطل (بين أفليك) .. الممثلين المساعدين (مورجان فريمان Morgan Freeman) و(لييف شرايبر Live Schreiber) .. العنوان يخض اللي هو مجموع كل المخاوف .. فكرة السيناريو إن رجل أعمال ألماني نازي بيفجر قنبلة نووية مسروقة من إسرائيل وعملها علماء روس عشان تتفجر في أميركا فتقوم حرب عالمية ثالثة بين روسيا وأميركا لوحدها تبيع أي فيلم .. المشكلة كانت في المخرج اللي هو (فيل ألدين روبينسون Phil Alden Robinson) اللي عملنا فيلم ممل لا يتناسب خالص مع كم التوتر والمصايب اللي سواء كانوا في السيناريو أو حتي في الرواية الأصلية اللي السيناريو مكتوب منها .. لإن المخرج كان ممل فكمان أداء (بين أفليك) كان ممل وتحس إنه كان بيتصنع زيادة عن اللزوم خصوصاً إننا كنا إتعودنا علي أداء (هاريسون فورد) اللي كان شارب الشخصية وبيقدمها بشكل سلس خالص.
فيلم Jack Ryan: Shadow Recruit واللي أُنتج سنة 2014:
ده فيلم كان حلو وفيه كمية معلومات تقنية عن تفاصيل الجاسوسية والإقتصاد وإزاي روسيا وأميركا ممكن يشنوا حروب إقتصادية ضد بعض اللي هو يحسسك إنك بتتفرج علي فيلم ذكي بيتكلم مع مشاهد ذكي مش جاهل مش فاهم الألف من كوز الدرة .. المشكلة كانت إن أداء (كريس باين) كان طفولي أوي يمكن أكتر من أداء (بين أفليك) .. زي ما قلتلك الفيلم كان فعلاً حلو والمخرج بتاعه (كينيث برانا Kenneth Branagh) عمل فيه شغل حلو خصوصاً مشاهد الأكشن وأخص بالذكر مشهد مطاردة العربيات في شوارع موسكو واللي لما تشوفه حتحس إنك بتتفرج علي نفس مطاردة العربيات بتاعة فيلم The Bourne Supremacy واللي أخرجه (بول جرينجراس Paul Greengrass) وإتصورت في شوارع موسكو برده .. المشكلة الثانية في الفيلم إنه ركز كتير بشكل مستفز علي الحياة العاطفية ل(جاك رايان) لدرجة تحسسك إنك أحياناً بتتفرج علي فيلم رومانسي مش فيلم أكشن .. أنا طبعاً فاهم إن لما يبقي البطلين إتنين زي القمر زي (كريس باين) و (كيرا نايتلي Keira Knightley) فإنت لازم تسيبلهم وقت يحبوا في بعض زي ما هم عايزيين بس مش للدرجة دي .. تظل في رأيي أسوأ غلطة في الفيلم ده عملها المخرج (كينيث برانا) إنه هو بنفسه اللي عمل دور الشرير (فيكتور شريفين Victor Cherevin) لإنه بصراحة أداها بلكنة روسي زي الزفت ضحكت الناس عليه .. بس يمكن هو عمل حاجة كويسة إحنا مش فاهمينها لإن بعدها المخرج (كريستوفر نولان Christopher Nolan) إختار (كينيث برانا) إنه يعمل نفس الدور هو هو في فيلم Tenet.
فيلم Patriot Games اللي أُنتج سنة 1992:
ملامح وش (هاريسون فورد) في الفيلم ده اللي مليانه غُلب تحسسك إنك عايز تقوم تحضن التليفيزيون تبوسه وتقوله معلش هانت من كتر المصايب اللي كانت عماله تتحدف عليه ومش ملاحق يتعامل معاها .. أنا مش عارف شخصياً مين الCasting Agent اللي إختار (هاريسون فورد) إنه يقوم بشخصية (جاك رايان) بس الرجل أو الست دي محتاجين كلنا ننحنيله أو ننحنيلها إحتراماً علي الإختيار .. الفيلم كله عبارة عن خناقة بين شخصية (جاك رايان) وبين إرهابي منتمي لمنظمة إرهابية اللي هي الجيش الجمهوري الأيرلندي IRA اسمه (شون ميلر Sean Miller) قدمها بشكل إحترافي الممثل (شون بين Sean Bean) بسبب إن في المشهد الإفتتاحي في الفيلم (جاك رايان) بيحبط عملية إغتيال لحد من العيلة المالكة البريطانية وبيقتل أخو (شون ميلر) .. شوف فيلم قصته سهلة ومفيهاش فكر ومش معقدة زي أفلام The Sum of all Fears و Shadow Recruit بس الفيلم نجح بشكل لا تتخيله بسبب إنه أُخرج صح وإتصور صح وإختيار الممثلين كان صح .. شابو بصراحة للمخرج (فيليب نويس Philip Noyce).
فيلم Clear and Present Danger اللي أُنتج سنة 1994:
ده كان تاني فيلم يعمله (هاريسون فورد) في السلسلة وكمان أخرجه (فيليب نويس) .. عشان أوصفلك الفيلم ده حاول تتخيل مسلسل Narcos ومسلسل 24 إتضربوا في الخلاط .. يعني مثلاً شخصية (جاك باور Jack Bauer) دخل في خناقة مع تاجر المخدرات الكولومبي (بابلو إسكوبار Pablo Escobar) .. تخيلت؟ .. أهو ده اللي حصل في الفيلم ده .. ده فيلم مفيهوش جاسوسية بالشكل اللي إنت مستنيه قد ما هو قصة إزاي CIA بتعمل عملية غير مشروعة ضمن الحرب علي المخدرات في كولومبيا واللي بتتحول لفضيحة سياسية الرئيس الأميريكي شخصياً بيحاول يخفيها بس (جاك رايان) طلعله زي الخازوق في النص .. بص لو إنت متفرجتش علي الفيلم ده إعمل في نفسك معروف وإتفرج عليه.
فيلم The Hunt for Red October واللي أُنتج سنة 1984:
غريبة إن يبقي أول فيلم في السلسلة وفيلم إتعمل في الثمانينات وبرده يعتبر أحسن فيلم في السلسلة لحد دلوقتي .. أنا في رأيي إنه أحسن فيلم إتعمل عن الجاسوسية بشكل عام .. لو إنت كاتب شاب نفسك تكتب كتاب عن الجاسوسية أومخرج نفسك تعمل فيلم كويس عن الجاسوسية يا تقرأ الرواية يا تتفرج علي الفيلم .. (أليك بولدوين) قدم شخصية (جاك رايان) بشكل أجبر تقريباً كل الممثلين اللي جم من بعده إنهم يقلدوه .. هو قدم شخصية شاب مش بطل .. مش من نوعية الرجاله اللي بترمي نفسها في التهلكة عشان خاطر الله والوطن .. هو زيه زيك بالضبط .. أحياناً كتير بيبقي مش واثق في نفسه وأحياناً تسرعه في إثبات وجهة نظره وإنه يطلع صح قدام الناس بتلبسه في الحيط بس يمكن ده السبب اللي حيخليك تحبه .. فكرة الفيلم إن (جاك رايان) وظيفته إنه إزاي يقنع قيادة القوات البحرية الأميريكية إنها متغرقش غواصة نووية سوفيتية بقيادة قبطان اسمه (ماركو رامياس Marco Ramius) قدمها ببراعة الممثل (شون كونري Sean Connery) لإن علي عكس كل تقارير المخابرات اللي بتقول إن (ماركو رامياس) مجنون وجاي يضرب صواريخه النووية علي أميركا إلا إنه في الحقيقة جاي يهرب لأميركا.
من النادر أوي إنك تلاقي فيلم جاسوسية مفيهوش غلطة .. المخرج (جون ماكتيرنان John McTiernan) اللي قدملنا قبل كده أفلام Die Hard و Predator و The 13th Warrior عمل فيلم يقعدك علي أعصابك وكله توتر ومفيهوش ولا غلطة لا هندسية ولا سياسية ولا أي حاجة خالص .. زي ما يكون بعد ما خلص الفيلم جه قعد يتفرج عليه وجاب ورقة وقلم وقعد يصحصح لنفسه الأخطاء ورجع صور المشاهد دي تاني عشان يطلعلك فيلم مفيهوش غلطة .. حتي قراره إن (شون كونري) يقدم شخصية القبطان السوفيتي (ماركو رامياس) بيتكلم إنجليزي بلكنة بريطانية مش روسية طلع قرار صح أوي لإنه فتح الباب لممثل عبقري زي (شون كونري) إن في المشاهد بتاعته كأنك بتتفرج عليه في مسرحية مش في فيلم .. الرجل يا جدعان في الفيلم كأنه بيمثل لوحده .. تاني لو إنت متفرجتش علي الفيلم ده قوم حمله وإتفرج عليه ومش حتندم صدقني.
المصدر:
- مقالة بعنوان Jack Ryan: Why is Tom Clancy’s CIA operative such an enduring character? يعني (جاك رايان): ليه الشخصية اللي قدمها (توم كلانسي) عن ضابط مخابرات أميريكي مكملة معانا كل ده؟ .. المقالة دي نشرت في جريدة The Independent البريطانية و ده لينك المقالة الأصلية:
https://www.independent.co.uk/arts-entertainment/tv/features/jack-ryan-amazon-prime-series-harrison-ford-tom-clancy-cia-john-krasinski-patriot-games-a8512206.html
