لينك التسجيل الصوتي علي ساوند كلاود:
https://on.soundcloud.com/Nuobc
الناس بتوع الإقتصاد اللي منهم يعني شايف إن الرأسمالية والسوق الحر ده أحسن إختراع بعد الشويبس أناناس لو إتكلمت معاهم حتلاقيهم مقتنعين بحاجة غريبة شوية وهي إن أكتر حاجة ممكن تكون السبب ورا إن السلام ينتشر بين الناس وإن البشر يحبوا بعض وطول ما هم ماشيين يحضنوا في بعض ومشغلين أغنية (يسرا) حب خلي الناس تحب روح للناس يا حب هو إننا كلنا نطبق أفكار السوق الحر أو Free Market في حياتنا .. بمعني أخر الناس دي مقتنعة بمبدأ إن محدش بيقول للرزق لا .. طالما حناكل الشهد من ورا البيزنس يبقي مفيش داعي نرفع السلاح علي بعض .. هو فكر يبان من بره منطقي .. حاجة جواك حتقولك إن فعلاً الفكرة دي صح مش لإنها فعلاً صح قد ما إنت عايز تقنع نفسك إنها صح .. ليه أروح أتعارك معاك طالما شغلي معاك حيجبلي قرشين حلوين؟ .. يبقي السؤال المهم .. هو المنطق ده أو الفكر إتطبق فعلاً قبل كده؟
الحقيقة أه .. والنتايج كانت كارثية .. سنة 2000 عشان أميركا تقنع الصين إنها تنضم لمنظمة التجارة العالمية عملت حاجة غريبة جداً وهي إنها صنفت الصين علي إنها بلد نامية .. إنت دلوقتي عامل زي شخصية (عشري) في فيلم إبراهيم الأبيض وبتسأل الصين مين؟ الصين بتاعتنا؟ .. ده حصل فعلاً .. شروط إنضمام الصين لمنظمة التجارة العالمية خلت الصين من حقها تصدر اللي هي عايزاه لأي بلد من غير ما يتفرض عليها جمارك وفي نفس الوقت من حق الصين تفرض جمارك علي أي بضاعة مستوردة بحجة حماية السوق المحلي .. ده إيه حنية الأم ده كله يا أميركا .. منطقي إنك تسأل ليه؟ .. كانوا شاربين إيه الأمريكان لما عملوا كده؟ .. الفكرة اللي إتباعت هي اللي قلتها في المقدمة .. محدش بيقول للرزق لا .. إنضمام الصين لمنظمة التجارة العالمية حيفتحها علي العالم وده مع الوقت حيقنع المواطن الصيني البسيط إن هيمنة الحزب الشيوعي الصيني علي الحكم مش صح ولازم الصين تتجه أكتر ناحية الديموقراطية الغربية والليبرالية الجميلة الحلوة السخنة اللي بالسمسم .. هل ده حصل؟ .. أديك شايف الصين وهي بتقول علي نفسها إنها قوة عظمي و واقفة الند بالند للأمريكان.
مش بس الصين .. الألمان لسنين وسنين وهم بيبيعوا فكرة إن يا جماعة لو إحنا إشترينا غاز طبيعي من روسيا والروس إشتروا مننا عربيات ميرسيدس و BMW فإحنا كده حققنا كذا حاجة .. ملينا جيب (فلاديمير بوتين) فلوس من بيعه للغاز الطبيعي بتاعه .. إحنا جيوبنا إتملت من البضاعة اللي الروس بيشتروها مننا .. تاني .. محدش بيقول للزرق لا .. هل الفكر ده جاب نتيجة؟ .. أديك شايف الدنيا باظت إزاي بعد الغزو الروسي لأوكرانيا.
إذن واضح إن فيه حاجة غلط .. فكرة إن السوق الحر والرأسمالية حتنشر السلام بين البني أدمين مكنتش صح أوي يمكن بالعكس دي بتكون السبب إن الناس تمسك في رقاب بعض .. طب هو فين المشكلة؟ .. لو فتحت القرأن الكريم علي سورة النساء حتلاقي الأية 29 واللي بتقول الأتي: يا أيها اللذين أمنوا لا تأكلوا أموالكم بينكم بالباطل إلا أن تكون تجارة عن تراض منكم ولا تقتلوا أنفسكم إن الله كان بكم رحيما .. المشكلة إن الأخوة الرأسماليين بينسوا دايماً الميزان اللي بيوزن الأمور .. الفلوس حلوة بس لازم قصادها إتفاق واضح وده اللي قاله ربنا واللي عشان أوريك ده لازم أخدك من إيدك في رحلة طويلة شوية عشان تفهم التطور الطبيعي لفكرة إن محدش بيقول للرزق لا.
مرحلة رقم واحد .. المدعكة الهولندية الإسبانية البرتغالية:
أول واحد إتكلم عن فكرة إن محدش بيقول للرزق لا دي كان واحد إسمه (هيوجو جروتيوس Hugo Grotius) وده كان قاضي هولندي عرض أفكاره كلها في كتاب مشهور جداً إسمه حرية البحار The Freedom of the Seas نشره سنة 1609 يعني من زمان شوية .. الرجل ده فكرته بمنتهي البساطة إن ربنا لما خلق الأرض خلق المياه والهواء مفيش أكتر منهم .. تقريباً مش حيجي اليوم اللي الأرض دي يخلص فيها المياه والهواء .. ده معناه إن المياه والهواء ربنا خلقهم للناس كلها ومحدش يقول إن حتة المياه دي بتاعتي .. من حق أي حد إنه يسافر لأي بلد .. مهم أوي تبقي فاهم إن معني الكلام ده إن إسبانيا والبرتغال اللي كان تحت إيدهم أقوي أسطول بحري في العالم وقتها مينفعش يقولوا إن البحر المتوسط ده مثلاً بتاعنا وإن أي سفينة مش إسبانية أو برتغالية تعدي فيه لازم تشخلل عشان تعدي .. حلو .. أهو هولندا اللي هي البلد اللي الأخ (هيوجو جروتيوس) ده عايش فيها كان تحت إيدها أسطول بحري هو كمان محترم جداً كان فارض إتاوة علي أي حد يعدي في المحيط الأطلنطي .. وهو ده الميزان اللي مش مضبوط .. إزاي يبقي فيه تجارة بين ناس ملهمش كلمة .. بمعني أخر .. فين التجارة عن تراضي زي ما ربنا قال؟
مهم أوي بالنسبة لي إنك تفهم التطور الطبيعي للأمور .. الدماغ بتاعة (هيوجو جروتيوس) دي شكلها فكر إنتشر في أوروبا لسنين وسنين إن المسيحية الكاثوليكية اللي هي تقدر تقول كده مهكرة اللعبة وهي اللي معاها مفاتيح أي حاجة معصلجة مع البشر .. يحُكي أن كان فيه فيلسوف فرنساوي إسمه (جين دومات Jean Domat) كان شايف إن لما سيدنا (أدم) عليه السلام إتعاقب من ربنا بإنه يهبط من الجنة للأرض فكان ده معناه إن البشر إنتقلوا من مرحلة إن كل حاجة حوليهم ببلاش لمرحلة إنهم لازم يشتغلوا ويتاجروا عشان ياخدوا اللي هم عايزينه .. بمعني أخر .. رغبة البشر إنهم يحققوا ربح حتخليهم لو إتحطلهم نظام تجاري مفتوح ينسوا خالص خلافاتهم ويبطلوا يتخانقوا مع بعض .. الأفكار دي كانت بتتعرض في وقت العالم أو خليني أقول الأوروبيين مكانوش بيبطلوا يرفعوا السلاح علي بعض .. بريطانيا متخانقة مع فرنسا .. إسبانيا متخانقة مع بريطانيا .. أميركا تمردت علي بريطانيا .. بس وسط العركة دي بيطلع (أدم سميث Adam Smith) مؤسس علم الإقتصاد الحديث عشان يطلع بالحل اللي ربنا قال عليه من زمن .. التراضي.
مرحلة رقم إتنين .. نظرية رأس المال:
السياق التاريخي حيوضحلك حاجات كتير .. (أدام سميث) ده رجل أسكتلندي كان عايش في مدينة جلاسكو .. إتولد في بلد تحت الإحتلال البريطاني .. سنة 1776 دي السنة اللي المستعمرات الأميريكية أعلنت إستقلالها عن التاج البريطاني عشان تبدأ حرب الإستقلال الأميريكية .. دي نفس السنة اللي (أدم سميث) نشر كتابه ثروة الأمم The Wealth of Nations واللي بيقول فيه كلام يخليك تهرش في شعرك .. مبدأياً كده (أدم سميث) شايف إن أي بلد بيحكمها رجل واحد يبقي زعيم الأمة اللي الناس تصحي الصبح تمجد بحمده وتنام بليل علي تحية صورته فدي بلد ملهاش كلمة ومينفعش تعمل معاها تجارة حرة وأي محاولة منك لتطبيق فكرة محدش بيقول للرزق لا مع بلد زي دي هو مجرد هراء ملوش معني .. سامع يا اللي دخلت الصين منظمة التجارة العالمية سنة 2000 .. أهو (أدم سميث) كان بيقول إن ده غلط من سنة 1776 .. الدولة الملكية أو الديكتاتورية أو اللي بيحكمها شخص واحد ده من مصلحته إن كل الناس اللي معاهم فلوس في البلد وكل التجار اللي فيها يبقوا شغالين لحسابه وده معناه إن بالتبعية التجار دول عمرهم بأي حال من الأحوال ما حيطبقوا فكرة التجارة الحرة والرأسمالية.
الحقيقة إن الإنجليز خدوا مبدأ رأس المال بتاع (أدم سميث) وركبوله جناحات وطاروا بيه .. سنة 1815 الحكومة في بريطانيا بدأت تطبق قانون غريب جداً سموه قانون الذرة Corn Law .. يطلع إيه البتاع ده؟ .. تخيل معايا في مصر الحكومة قالتلك إحنا حنبطل نستورد قمح من بره ولو إستوردناه يبقي نحط تعريفة جمركية مش صغيرة علي القمح المستورد .. جميل .. تيجي إنت دلوقتي البلد مش بتنتج كمية القمح اللي تخليها تحقق الإكتفاء الذاتي .. فالناس عايزه قمح بس القمح المتاح في السوق مش كتير .. يقوم إيه اللي يحصل؟ .. سعر رغيف العيش يضرب في السما .. لما البلد تخش في مرحلة إنها علي بعد خطوة من المجاعة فقانون الذرة بيسمح ساعتها بس بفتح الإستيراد .. سنة 1846 تم إلغاء العمل بالقانون ده .. الناس لسه حتقول هييييه لقوا نفسهم قدام حقيقة سخيفة .. إيه ده هو إحنا بعد كده حنبقي لازم ندفع فلوس عشان نستورد قمح؟ طب ما نحتل الدول اللي إحنا بنستورد منها قمح ويبقي زيتنا في دقيقنا.
مهم تبقي فاهم إن الموتور اللي كان شغال عشان خاطر عجلة الإستعمار تدور هو التجارة الحرة .. فيه واحد إسمه (جون باورينج John Bowring) وده واحد من أكتر الناس اللي كانت بتشجع الأفكار الإستعمارية كان له جملة مشهورة أوي يقولك سيدنا (عيسي) عليه السلام هو التجارة الحرة والتجارة الحرة هي سيدنا (عيسي) عليه السلام .. مباديء التجارة الحرة تخليك تقول إن يا بريطانيا روحي إشتري قمح من الهند مش إنك تروحي تحتلي الهند عشان تسرقي منها ما يعادل 40 ترليون دولار خلال 100 سنة بس .. التجارة الحرة خلت الإنجليز مسابوش حد متعاركوش معاه .. حرب مع فرنسا قعدت قرن كامل .. حرب في جزر الكاريبي .. خناقات مع الصين والهند وبورما ونيوزيلاندا .. مشاكل مع إيران .. إحتلال لدول أفريقيا .. حتي الدول اللي بريطانيا مستعمرتهاش زي تركيا والصين وأميركا اللاتينية فكانت بتوافق علي الشروط المجحفة لإتفاقيات التجارة مع بريطانيا مش لسبب غير إنهم خايفين من الأسطول البحري البريطاني.
مرحلة رقم ثلاثة .. الحرب العالمية:
ناس كتير بتحب قصة سيدنا (يوسف) عليه السلام لأسباب كتير الحقيقة بس أنا في كل مرة بسمع فيها السورة دي بقف قدام شخصية عزيز مصر .. الرجل ده بيحكم أغني دولة في العالم .. تحت إيده أقوي قوات مسلحة في الشرق الأوسط .. فعلياً هو معندوش أي داعي إنه يصدق في يوم من الأيام إن المولد ده كله حينفض بس بمجرد ما سمع نبوءة سيدنا (يوسف) إن السبع سنوات العجاف جايين هو كان عنده الحكمة الكافية إنه يسأل نفسه سؤال منطقي .. إفرض لو سيدنا (يوسف) عنده حق؟ .. هل فيه إحتمال إنه يكون بيشم علي ظهر إيده؟ .. من وجهة نظر أي حد كان موجود في القعدة اللي كان سيدنا (يوسف) بيفسر فيها الحلم بتاع عزيز مصر اه طبعاً هو فيه حد يقدر يدعي إنه بيشوف المستقبل .. بس برده إفرض إنه عنده حق .. زي ما المثل بيقول Better be Safe than Sorry فهو بدأ ينفذ خطة جبارة لتخزين إحتياجات مش بس مصر إنما جيرانها كمان من القمح .. مشروع جبار متكلف ملايين وأرجع وأقولك إن فيه إحتمالية مش ضعيفة (من وجهة نظر الناس اللي عايشة وقتها علي الأقل) إنه يكون إتبني علي هجص .. وده بيخلي عزيز مصر هو يمكن أكثر الرجال حكمة في القصة دي ويمكن في قصص القران الكريم كله .. الناس اللي زي دي مش بيكونوا كتير وعشان كده محدش صدق اللي إتقال سنة 1905.
في السنة دي كان فيه أستاذ في جامعة كامبريدج إسمه (وليام كانينجهام William Cunningham) صوته إتنبح وهو بيحذر الناس إن فيه مصيبة جاية .. إحنا فاهمين أو خليني أقول بنطبق مباديء رأس المال بتاعة (أدم سميث) غلط .. الإستعمار وسرقة ثروات الناس والقتل والدم اللي الإمبراطورية البريطانية إتبنت علي كتافه مخلي ناس تانية تبصلنا وتسأل نفسها إشمعني الإنجليز .. اليابانيين ماشيين في نفس سكتنا ويمكن في يوم من الأيام الدولة اليابانية تحولت من شوية ساموراي عايشين في أمان الله لدولة عسكرية إستعمارية .. الألمان نفس الكلام وبقوا بيصنعوا كل حاجة والرصاص بقوا بينتجوه زي البسكوت .. مفيش بلد كانت عارفه تكسر هيمنة الإقتصاد البريطاني .. مش عشان الإقتصاد بتاعهم جامد زحليقة وكل يوم بيخترعوا حاجة جديدة إنما لإن المستعمرات البريطانية بيتسرق خيرها ومحدش عنده مستعمرات في كل حتة زيهم .. روسيا وإيطاليا وألمانيا وفرنسا وأميركا كلهم فارضين تعريفات جمركية كبيرة علي أي حاجة بتيجي من بريطانيا .. حرب عالمية أولي وفي ديلها حرب عالمية ثانية .. العالم إحتاج إن أميركا تدفع 150 مليار دولار علي إعادة إعمار أوروبا و 20 مليار دولار علي إعادة إعمار اليابان لمجرد إن الدنيا تتعدل بعد سنين وسنين من الإستعمار الأوروبي .. الناس كلها قالت بااااس ده وقت إن التجارة الحرة تشم نفسها بهواء نظيف .. جت الحرب الباردة .. وقع سور برلين .. الناس قالت باااااس القاضية ممكن .. هوبا سباق مين يصرف أكتر علي جيشه بدأ ولسه مكمل معانا لحد دلوقتي.
الفكرة بمنتهي البساطة إن عشان كله همه علي أكل عيشه فإحنا عايزين الحلو من كل حاجة ويمكن ده أكبر تهديد لفكرة التجارة الحرة من ساعة ما إتولدت .. مش الإستعمار ولا الحرب بين الشيوعية والرأسمالية إنما إننا كبشر عايزين نكوش علي كل الورق .. قليلين اللي عايشين بمبدأ خلي الفقير ياكل وده اللي حيجيب أجلنا وده اللي مخلي الإقتصاد العالمي رايح في سكة الكساد اللي إحنا ماشيين فيها دي .. أرجع لأول نقطة وهي التراضي بين الناس .. 3 كلمات بس يحلولك مشكلة التجارة العالمية إن نطلع انا وإنت راضيين عن الإتفاق اللي مضيناه ما بينا مش إني يبقي شغلي الشاغل إزاي أدوس علي وشك وأحاربك في أكل عيشك.
المصدر:
- مقالة بعنوان One of the Most Famous Ideas in Economics is Wrong نشرت في مجلة Politico وده لينك المقالة الأصلية:
https://www.politico.com/news/magazine/2022/10/05/free-markets-dont-buy-peace-00060236
