لينك التسجيل الصوتي علي ساوند كلاود:
https://on.soundcloud.com/QQZ6mvJnSXAYiPvs7
من الحاجات اللي أنا مقتنع بيها إن اللي يمشي علي البني أدمين يمشي علي الدول .. المنطق ورا الإقتناع ده إن بما إن الدول ما هي إلا شوية بني أدمين عايشين في حتة واحدة يبقي اللي يمشي علي واحد فيهم يمشي علي الكل .. اه معاك إن فيه حالات شاذة وفيه إعتبارات تانية لازم تتحط في دماغك بس الفكرة واضحة ومتهيالي إن كلنا مقتنعين إن مفيش حاجة ممكن تكسر ظهر وكرامة الرجل غير الديون .. إمشي في الشارع في أي حتة تعجبك في مصر ولو لقيت رجل باين علي وشه إنه شايل هموم الدنيا إسأله إنت مديون غالباً حتلاقي عينه دمعت .. الدين أو Debt ده عبارة عن كلابشات بتكتف كل طموحاتك وأحلامك ورؤيتك للمستقبل .. الدين ده بلوة وخراب بيوت مستعجل وده اللي إحنا عايزين نتكلم عنه النهاردة وعشان نخش في الموضوع عايزك تبص كده علي الجدول اللي عندك تحت ده:
الجدول ده بيوريك أكتر عشرين دولة علي مستوي العالم مديونة بفلوس للصين وحتلاقي اسم مصر منور في المركز التاسع بديون وصلت 5.2 مليار دولار مستحقة للصين وعلي فكرة الجدول ده إتعمل بناء علي أرقام البنك الدولي بداية من سنة 2022 لحد دلوقتي .. طبعاً فيه دول أول ما تشوف الرقم اللي هي مديونة بيه للصين حتلاقي نفسك بشكل لا إرادي بتقول يا حوستي السودا يا أما وأخص بالذكر الحقيقة هنا باكستان وأنجولا .. الأولانية مديونة ب26.6 مليار دولار والثانية عليها 21 مليار دولار .. جدير بالذكر إن البلدين متنيلين علي عينهم مش عارفين يسددوا اللي عليهم وكل شوية الصين تديهم فترة سماح اخرها كان في 2024 لما في فبراير باكستان خدت مهلة إضافية إنها تسدد 2 مليار دولار وفي مارس أنجولا وصلت لإتفاق إنها تقلل شوية من المبلغ اللي هي المفروض تدفعه كل شهر عشان تسدد اللي عليها .. سنة 2020 لقينا إن الدول النامية علي مستوي العالم لو جيت تحسب هم مديونين لمين حتلاقي إن 37% من إجمالي ديون الدول النامية علي مستوي العالم جايه من الصين .. اللي عايزين نتكلم عنه النهاردة هو إننا نفهم إزاي ده حصل؟ والأهم تفهم ليه ده حصل؟
إزاي ده حصل؟
السؤال اللي إحنا عايزين نحاول نلاقي إجابة ليه هو إزاي ده حصل؟ .. إزاي من يوم وليلة الصين بقت (شايلوك Shylock) العالم .. للي مش فاهم مين (شايلوك) ده فزمان كان فيه واحد غالباً إنت سمعت اسمه قبل كده هو (وليام شكسبير William Shakespear) كتب مسرحيات كتير من ضمنها واحدة اسمها تاجر البندقية The Merchant of Venice بتحكي عن تاجر يهودي اسمه (شايلوك) كان بيسلف الناس فلوس بالربا لحد ما البلد كلها بقت مديونة ليه .. المهم إن بداية القصة بترجع لافتكاسة كده الصينين بيقولوا إنها وليدة أفكار جهبز الجهابزة زعيم الأمة (جي جينبينج Xi Jinping) وهي حاجة اسمها مبادرة حزام وطريق Belt and Road Initiative أو BRI إختصاراً .. البتاعة دي عبارة عن حزمة تمويل لمشاريع بنية تحتية سواء طرق أو موانيء أو مطارات أو محطات كهرباء حتتعمل في دول أفريقيا وأسيا وأوروبا بميزانية كسرت الترليون دولار .. طب ما حلو الطموح مش عيب .. عايزك تعرف إن سنة 2021 يعني بعد 8 سنين بس من بداية المبادرة لقينا إن فيه 98 بلد علي مستوي العالم استلفت فلوس من الصين عشان تتعمل فيها مشاريع تحت مظلة الافتكاسة دي .. حلو أوي .. من ضمن الدول دي باكستان اللي خلال 8 سنين بقت مديونة بحوالي 27.4 مليار دولار .. أنجولا بقي عليها 22 مليار دولار .. أثيوبيا المفروض تسدد 7.4 مليار دولار زيها زي كينيا وسريلانكا .. ده معدل تراكم ديون مش منطقي وميخشش دماغ بني أدمين وده اللي بيقوله (ديفيد مالباس David Malpass) مدير البنك الدولي اللي هو أساساً رجل حرامي وذمته متسواش معايا كيس شيتوس الصغير حتي بس الصراحة الرجل في الحتة دي بالذات عنده حق.
سنة 2010 الصين كانت سلفت 40 مليار دولار للدول النامية .. وراها بسنة الرقم ضرب منهم بقي 180 مليار دولار .. وهنا طبيعي إنك تسأل طب هو معلش يعني الصينين قروضهم بالمكسرات ومعمولة بالسمن البلدي مثلاً عشان كده الإقبال عليها تاريخي بالشكل ده .. هو الحقيقة الفكرة إن لو إنت بلد نامية عايزة تستلفي فلوس فإنتي قدامك طريقتين تستلفي بيها فلوس:
- الطريقة الأولانية إنك تروح للبنك الدولي World Bank أو للصبي بتاعه صندوق النقد الدولي International Monetary Fund أو IMF إختصاراً والناس دي عشان تسلفك فلوس حتبدأ تبص للإقتصاد بتاعك زي ما إنت كده تروح تستلف من حد فلوس فيقولك معلش بقي وريني إنت مصروفك الشهري بيمشي إزاي وبيخشلك كام في الشهر وبتصرف كام .. مش كده وبس .. عشان يضمن إنك حترجعله فلوسه فهو بيجبرك بشكل أو بأخر إنك تمشي مصروف البيت بالطريقة اللي تخليه ضامن إنه حياخد فلوسه .. تلاقيه يقولك مفيش فسح ولا خروجات .. مفيش أكل فراخ ولحمة كل يوم .. ده اللي عمله معانا صندوق النقد الدولي لما جينا استلفنا منهم فلوس وقالولنا معلش بقي أنتوا تعوموا الجنيه وتشيلوا الدعم وترفعوا فواتير الكهرباء .. زي ما إنت شايف فيه دول كتير بتقول لنفسها معلش يعني حمارتي العرجة تغنيني عن سؤال اللئيم ومش عايزين نستلف وخلينا زي ما إحنا.
- الطريقة الثانية إنك تروح تستلف من الصين .. الصين بتقولك لا تعوم عملة ولا تشيل دعم .. بس قصاد إني مش جابراك علي حاجة فأنا حفرض عليك معدل فايدة أعلي من اللي ممكن يتفرض عليك لو رحت استلفت من صندوق النقد الدولي .. نسبة الفايدة علي الديون الصينية حوالي 4% وده أعلي 4 أضعاف تقريباً من أي دين إنت ممكن تاخده من صندوق النقد الدولي أو من البنك الدولي .. وكمان فترة السداد مش مريحة زي صندوق النقد الدولي يعني في المتوسط فترة السداد بتتقسط علي 28 سنة بس الديون الصينية بتترد خلال 10 سنين بس .. بس حتة الحرية أو عدم إجبار حد علي إنه يمشي مصروف البيت علي مزاجهم دي بتخلي الصين حل مغري لحكومات كتير خصوصاً الدول اللي حكوماتها بتلعب بالبيضا والحجر ومصداقيتها متخشش ذمتي بكيس دوريتوس الصغير.
جائحة فيروس كورونا قلبت موازين حاجات كتير .. سنة 2020 و 2021 الصين إضطرت تعمل جدولة لديون وصلت قيمتها 52 مليار دولار .. الفكرة إن سنة 2023 طلع تقرير من مؤسسة AidData قالت إن المشكلة إن 80% من القروض اللي الصين عطتها لدول مختلفة علي مستوي العالم الدول دي مش عارفة تسدد الفايدة بتاعتها .. عشان بس كلامي يبقي واضح .. خلال فوق عشرين سنة الصين عطت الالاف من القروض إذ نكتشف إن فوق نص القروض دي الصين مش عارفة تاخد فلوسها .. 55% من القروض اللي راحت لحوالي 165 دولة هوبا فص ملح وداب.
عشان برده الصورة تبقي واضحة ليك .. مبادرة BRI دي لما إتعملت كانت سنة 2013 يعني أيام ما الدنيا كانت حلوة .. الإتفاق اللي كان بيتعمل بين الصين وبين أي بلد عايزة تاخد قرض منها إن والله إنتي يا بلد حتاخدي الفلوس وقدامك فترة سماح يا إما 5 أو 6 أو 7 سنين لحد 10 سنين .. حلو .. المشكلة إن وسط كل ده جت علينا مصيبة جائحة فيروس كورونا Covid-19 فالصين لقت نفسها مضطرة إن أيا كانت فترة السماح اللي البلد إختارتها إتزود عليها سنتين كمان .. وحتي ده مش المشكلة .. المشكلة إن رغم إن فيه دول خدت فلوس وكان قدامها 9 سنين تسدد ففيها دول كتير معهاش تدفع .. إنت قصاد وضع إن خلال الفترة من 2000 لحد 2021 الصين كان المفروض يخشلها 1.34 ترليون دولار والفلوس دي مجتش .. إنت متخيل؟ .. مستوعب طيب الرقم؟ .. ومش بس الرقم اللي مشكلة إنما عدد المديونين كمان عامل صداع في دماع الصين .. لحد سنة 2008 الحكومة الصينية محصلش إنها سلفت فلوس لأكتر من 10 دول معرفتش تسدد اللي عليها فإنت بشكل أو بأخر بتقدر تتفاوض مع 10 دول عشان تلاقي حل وسط يخليك تاخد فلوسك من غير ما تيجي جامد علي الناس .. سنة 2021 الصين لقت نفسها مسلفة فلوس لأكتر من 57 بلد مش عارفة تسدد اللي هو إنت حتتفاوض مع مين ولا مين .. بس من أول هنا تبدأ وجهات النظر تختلف .. أنا كده شرحتلك المشكلة فين بس لما تيجي تسأل طب وبعدين تلاقي نفسك قدام وجهتين نظر مختلفين عن بعض كتير الحقيقة .. وجهة نظر شايفة إن الصين حاولت تساعد وحاولت تغير العالم للأفضل بس الظروف جت عليها .. قصاد وجهة نظر تانية شايفة إن علي فكرة بقي الصين كانت قاصدة إن ده يحصل.
وجهتين النظر: الصين حلوة ولا الصين وحشة؟
حنرجع هنا تاني لحتة إن اللي يمشي علي البني أدمين يمشي علي الدول .. لو إنت رجل ربنا كرمك ومعاك فلوس وقررت إن إنت متحوجش حد من عيلتك لحد وأي حد يتزنق في قرشين إنت بتسلفه .. جيت لقيت إن كتير من اللي إنت سلفتهم فلوس معرفوش يسدوا الفلوس اللي عليهم فالمنطق إنك لو يا سيدي إنت مش عايز تبطل تسلف المحتاجين فعلي الأقل حتاخد موقف صارم من اللي إنت سلفتهم ومسسدوش وأي حد عليه فلوس إنت مش حتسلفه فلوس جديدة .. ده المنطق .. تلاقي إن رغم كل ده الصين مش بتبطل تدي قروض .. حالياً هي أكتر دولة من ضمن الدول السبع العظمي اللي بيتسموا G7 بتسلف فلوس .. لما جت سنة 2016 الصين كانت مسلفة فوق 150 مليار دولار بس لما جت جائحة فيروس كورونا فتقدر تقول إن مكنة ATM أبو بلاش اللي فاتحاها الصين هديت شوية وسنة 2020 كانت وصلت الفلوس اللي مسلفاها الصين لدول تانية 100 مليار دولار وده كان أقل رقم تسلفه الصين من أول ما بدأت إفتكاسة BRI سنة 2013 وعشان بس تفهم إزاي الناس واقفة طوابير علي ATM الصيني بتاعة الغلابة دي ففي سنة 2021 قصاد إن الصين مسلفة فوق 100 مليار دولار تلاقي إن البنك الدولي بجلالة قدره مسلف بس 72 مليار دولار وده اللي بيخلي الناس اللي بتقول إن الصين متعمدة إن ده يحصل صوتها يعلي ودي نقطة محتاجة تبقي مشروحة كويس.
دلوقتي إحنا قلنا إن الفكرة ورا مبادرة حزام وطريق أو BRI إن الصين مشكورة حتسلف دول كتير علي الله حكايتها في أفريقيا وأسيا وأوروبا فلوس عشان يعملوا مشاريع بنية تحتية تربط بين الصين بإعتبارها أكبر مصنع في العالم وبين أوروبا اللي هي أكبر سوق في العالم .. ده معناه إن تمويل مشروعات البنية التحتية Infrastructure Projects زي الطرق والموانيء والمطارات طبيعي يبقي له نصيب الأسد من الفلوس اللي بتروح كقروض للدول دي وده كان فعلاً الوضع من أول 2013 لحد 2017 ومن بعدها بدأت الأية تتعكس .. كنسبة وتناسب فنصيب مشاريع البنية التحتية من إجمالي القروض الصينية اللي بتطلع علي حس مبادرة BRI قلت من 65% سنة 2014 بقت 50% بس سنة 2017 .. سنة 2018 النسبة وصلت 49% وسنة 2021 النسبة وصلت 31% .. ده معناه إن فيه حاجة تانية بتاخد مكان مشاريع البنية التحتية كأولوية للقروض الصينية اللي بتطلع والحقيقة إن في سنة 2021 حتلاقي إن 58% من الفلوس دي راحت في شكل حزم إنقاذ مالي بتروح للدول اللي ميزانيتها إتفشخت ولو محدش لحقها فالدول دي حتعلن إفلاسها .. مجرد إني أقولك الكلمتين دول وأسكت فأنا كده بظلمك لإني مش بشرحلك الصورة كاملة .. دلوقتي لما بلد زي مصر تمضي علي عقد قرض مع الصين ضمن مبادرة BRI فاللي بيحصل إن الحكومة المصرية بتمضي عقد مع بنك صيني .. الفلوس اللي إحنا في مصر خدناها دي هي فلوس مودعين صينيين عايشين في الصين .. يعني فيه مواطن صيني اسمه مثلاً (جاكي تشان) حاطط تحويشة عمره في البنك اللي إحنا خدناها عشان نبعزقها علي كوبري غالباً محدش حيسوق عليه تحت مسمي البدعة البنكية اللي اسمها Fractional Reserve Banking إن البنوك بتسلف فلوس المودعين اللي عندها علي شكل قروض عشان عجلة الإقتصاد تمشي .. فلما مصر متقدرش تسدد ثمن القرض ده فاللي حيشيل أوبح هو (جاكي تشان) اللي تحويشة عمره راحت فلما أنا أجي أقولك إن الصين عطت مصر مثلاً حزمة إنقاذ مالي ثمنها مليار دولار فالفلوس دي زي ما هي رايحة تنقذ مصر فهي رايحة عشان تلحق البنك الصيني اللي سلفنا الفلوس قبل ما يتخرب بيته.
عشان تفهم المشكلة أكتر تعالي ناخد مثال والمثال ده هو بلد اسمها زامبيا .. زامبيا بلد في أفريقيا .. بلد إحنا في مصر مش بنشغل بالنا بيها إلا لما منتخبنا يلاعبها في أمم أفريقيا أو تصفيات كأس العالم .. للناس الشاطرة شوية في الجغرافيا فزامبيا بلد حبيسة يعني بلد مش بتطل لا علي بحر ولا محيط عايش فيها فوق 20 مليون بني أدم واللي لمدة أكتر من عشرين سنة استلفت من الصين مليارات الدولارات عشان تبني مشاريع بنية تحتية ما بين سدود وخطوط سكك حديد وطرق وكباري وبسم الله ما شاء الله المشاريع دي كلها اتعملت في وقت واحد .. سبحان الله واضح إن النموذج الزيمباوي إحنا متأثرين بيه جداً هنا .. المهم زي ما أي حد قرأ شوية في الإقتصاد عارف فالمشاريع دي لما اشتغلت في وقت واحد ضخت فلوس حلوة في السوق وشغلت ناس كتير ومعدلات البطالة قلت وحاجة زبادي خلاط بس في نفس الوقت القروض اللي إتاخدت عشان المشاريع دي كلها تتعمل كانت بفايدة عاليه وصادف إن دفعات كتير من الفوايد دي جه معاد سدادها قبل ما المشاريع تفتح وتبدأ تدخل فلوس .. اسم النبي حارسك فاهم إنت اللي حصل بعد كده ما إحنا عايشينه كلنا .. عشان الحكومة الزيمباوية تسدد الفلوس اللي عليها قللوا الدعم علي كل حاجة من التعليم للصحة للبذور بتاعة المحاصيل الزراعية .. لما زامبيا غرقت وكانت عايزة حد يلحقها لقينا الصين رافضة تقعد في أي إجتماع تحضره بلد بره زامبيا سواء بتتكلم عن أميركا أو اليابان أو أي بلد من الإتحاد الأوروبي .. الصين اشترطت إن القعدة تبقي بين زامبيا وبينها وبس .. طيب ماشي .. شوية والصين حرجت علي زامبيا إنها تقول إنها استلفت من الصين كام ولا امتي .. مشكلة ده إن زامبيا مش مستلفة فلوس من الصين بس لإنها مستلفه من أميركا ومن غيرها والدول دي قالت لزامبيا معلش يعني نصدقك إزاي إنك مفلسه وإنتي مش عايزة تقوليلنا إنتي مستلفة كام من الصين ومعاد سداد فلوسك ليها إمتي .. في نوفمبر 2020 زامبيا أعلنت إنها دخلت مرحلة Default يعني مش عارفة تسدد الفلوس اللي عليها وده كان بداية إنهيار العملة وإقتصاد البلد راح في ستين داهية.
بعد ما زامبيا خلاص رقعت بالصوت لقيناها أعلنت إنها مديونة للصين بحوالي 6.6 مليار دولار وده خلي الحقيقة الناس تقول أحيه يا أبوسوسو أحيه لإن أكتر التوقعات تشاوءماً يعني كانت بتقول إن زامبيا ممكن تكون مديونة بنص المبلغ ده .. ده غير إن الفلوس دي تمثل تقريباً تلت ديون زامبيا الخارجية .. زامبيا مش لوحدها .. فكرة إن الصين بترفض إنها لا هي ولا الدول اللي سالفه منها فلوس يعلنوا عن هم مديونين بكام بالضبط ولا مواعيد السداد بتخليك إنت كمواطن بتصحي الصبح علي خبر إن بلد قربت تبيع هدومها .. إنت قصاد وضع إن دول كتير سالفه من الصين الإحتياطي النقدي الأجنبي بتاعها بيتسحب منه نسب خزعبلية عشان يسدوا الديون اللي عليهم .. باكستان خسرت فوق 50% من الإحتياطي النقدي الأجنبي بتاعها .. نفس الكلام مع جمهورية الكونغو الديموقراطية.
سريلانكا كمان بتعتبر مثال صارخ علي لعب التلات ورقات اللي بتعمله الصين .. زمان حد وسوس في ودن حكومة سريلانكا إن ليه لا يعملوا ميناء في حتة اسمها هامبانتونتا Hambantonta وبعد ما المشروع اتصرف عليه مليارات لقوا إن الحكومة مش عارفه تسد الفلوس اللي استلفتها من الصين عشان تعمل الميناء ده وده اللي خلاها سنة 2017 تمضي إتفاق غريب الشكل مع الصين إن شركة موانيء الصين China Merchants تاخد 70% من أسهم الميناء كحق انتفاع لمدة 99 سنة في مقابل إسقاط ديون سريلانكا .. علي فكرة .. فيه ناس بتقول إن في حالة سريلانكا دي بالذات أنتوا ظالمين الصين لإن أولاً الغالبية العظمي من الديون المستحقة علي سريلانكا مش حتروح للصين أصلاً وإن اللي قال فكرة إن الصين تاخد الميناء حق إنتفاع مش الصين إنما حكومة سريلانكا وده حيوصلني للنقطة اللي أنا عايز أقولها .. سواء الصين أو صندوق النقد الدولي كلهم ولاد كلب .. لو عايز تعرف مين فعلاً الشرير في رواية أحدهم بص لحكوماتنا.
اللي إنت محتاج تبقي فاهمه كويس إن سؤال هو الصين حلوة ولا وحشة ده لازق فيه سؤال تاني بتاع هو يا تري مين أحسن النموذج الغربي ولا النموذج الصيني في الإقتراض؟ .. بمعني .. دلوقتي مصر خدت قرض من صندوق النقد الدولي فالصندوق بيمسك الورق بتاع الإقتصاد بتاعنا وبيقولنا بصوا يا رجاله عشان أضمن إن فلوسي حترجعلي لازم تاخدوا شوية قرارات حتنكد علي عيشة الغلابة بتوعكوا زي قرارات التعويم ورفع فاتورة الكهرباء وده خراب بيوت مستعجل .. قصاد إنك لو رحت للصين تقولها سلفيني حتقولك خد يا حبيب أخوك من غير ما تقولك عوم ولا إرفع الدعم .. النموذج الأولاني بيكتم علي نفس أهل البلد وبيخليهم مش عارفين يعيشوا .. النموذج الثاني بيخلي الحكومة تتدلع ومتاخدش أي قرارات ولا خطوات تخليها ساعة رد الدين تبقي معاها الفلوس حاضرة فبتلاقي البلد كلها ركبت طيارة مصر للطيران المتجهة للشلاحات وده حصل مع دول كتير زي باكستان وكينيا وزامبيا ولاوس ومنغوليا .. دول زي زامبيا وسريلانكا دخلت مرحلة العجز بتاع سد فوائد الديون وبقوا مضطرين يبيعوا أصول البلد زي ما هي للصين عشان يسدوا الفلوس اللي عليهم .. بالمناسبة بعد ما سريلانكا أعلنت عجزها عن سد الديون اللي عليها لقوا إن معدل التضخم عندهم ضرب فوق 50% .. مش بيفكرك بحاجة اللي حصل هناك ده .. باكستان إضطرت تقفل مصانع الغزل والنسيج بتوعها عشان لقوا إن المصانع دي بتستهلك كهرباء كتير كان ممكن الغاز اللي إتحرق عشان يولدها يتصدر بالعملة الصعبة عشان يسد شوية من الديون المتلتلة لحساب الصين .. مش بيفكرك بحاجة اللي بيحصل عندهم ده .. عشان كده صدقني لما قلتلك في المقدمة أوعي تتداين .. كلهم ولاد وسخة ولا استثني أحدا.
فيه دول كتير طيارتها وصل الشلاحات خلاص ولو الصين قلبها محنش وقررت تستعوض ربنا في الفلوس اللي ليها ده علي أساس إن الصينيين يعرفوا ربنا أصلاً فالبلاد دي حتتباع خرده وقصاد وضع زي ده بيبقي صعب عليا أوي إني أفترض حسن النية عند الصين زي ما أنا برده مش قادر أفترض حسن النية عند صندوق النقد الدولي .. مقدرش أنكر إني شبه مقتنع بفكرة إن اللي بتعمله الصين ده اسمه Debt-Trap Diplomacy أو دبلوماسية فخ الديون إني أبقي عايز أمسك عليك ذله فاسلفك فلوس أنا عارف إنك مش حتعرف تردها فميبقاش قدامك حل غير إنك تبقي لعبة في صباعي .. ده يفسرلك ليه أغلب اللي بيستلفوا فلوس من الصين هي دول أفريقية فقيرة .. وفي نفس الوقت أنا بحسبن علي أي حكومة قررت تستلف سواء من ده أو من ده عشان اللي يدفع ثمن المشاريب هو الأجيال اللي جايه اللي اتحكم عليهم يعيشوا عيشة سودا من قبل ما يتولدوا أصلا.
المصادر:
- مقالة بعنوان Ranked: The Top 20 Countries in Debt to China نشرت في موقع Visual Capitalist وده لينك المقالة الأصلية:
https://www.visualcapitalist.com/ranked-the-top-20-countries-in-debt-to-china/ - مقالة بعنوان Developing countries owe China at least $1.1 trillion- and the debts are due نشرت في موقع وكالة أخبار CNN وده لينك المقالة الأصلية:
https://edition.cnn.com/2023/11/07/business/china-bri-developing-countries-overdue-debt-intl-hnk/index.html - مقالة بعنوان China’s loans pushing word’s poorest countries to brink of collapse نشرت في موقع وكالة أنباء الأسوشيتيد برس وده لينك المقالة الأصلية:
https://apnews.com/article/china-debt-banking-loans-financial-developing-countries-collapse-8df6f9fac3e1e758d0e6d8d5dfbd3ed6 - مقالة بعنوان Developing countries receiving the most loans from China نشرت في موقع Visual Capitalist وده لينك المقالة الأصلية:
https://www.visualcapitalist.com/countries-loans-from-china/ - مقالة بعنوان The countries most in dent to China نشرت علي موقع Statista وده لينك المقالة الأصلية:
https://www.statista.com/chart/19642/external-loan-debt-to-china-by-country/ - مقالة بعنوان China: Is it burdening poor countries with unsustainable debt? نشرت في موقع هيئة الإذاعة البريطانية BBC وده لينك المقالة الأصلية:
https://www.bbc.com/news/59585507
منه لله اللي في بالنا كلنا السبب في خراب الديون والقرف ده ولو افترضنا انه هيسدد اصلا ربع المبلغ ده فهو مش هيسدد من جيب اهله يعني اكيد هيسدد من قوت الشعب الغلبان اللي رفع الدعم عليه من كل حاجة عيش كهربا بنزين وتموين منه لله ابن القصيرة العبيط ده وبعدين الدول دي شغلتها الشاغل جمع الفلوس زي الاحتلال كدة بيخش يخرب في اي بلد وياكل خيرها وبعدين يمشي ما امريكا اصلا فلوسها دي كلها بسبب احتلالها لدول كتير اوي نهبت خيرها ومشيت وبقت امريكا مصر لاسف مفيش حد بيحكمها رشيد وعاقل اللي بيحكمها واحد اهوج لا يمت للعقلانية باي صورة من الصور والمفروض يتعدم بخازوق طويل اوي