كان فيه حد الله يمسيه بالخير علمني حاجة إن لما تيجي تبص علي ظاهرة جديدة أو موضوع فجأة طلع من اللاشيء فانت عشان تفهمه وتعرف هو جه إزاي وليه لازم ترجع بظهرك الأول وتبص علي الوضع القديم .. شوف ايه مشاكله والناس كانت متضايقه منه ليه .. فجأة حتبدأ تستوعب إن الظاهرة الجديدة دي اللي خلت الناس تتصدم مش ظاهرة جديدة ولا نيلة ده رد فعل طبيعي جداً علي اللي بيحصل .. النهاردة تعالوا سوا نطبق الفكرة دي علي موضوع جديد ظهر فجأة من اللاشيء وخلي الناس كلها تتكلم عنه وهو البريكس BRICS .. لو مشيت في الشارع نقيت أي حد عشوائي كده سألته هو يا يطلع إيه بريكس ده فممكن تلاقيه بيسمعلك الكام كلمة اللي حتلاقيهم ماليين السوشيال ميديا علي أساس إن الناس كلها دلوقتي بقت بتجيب أخبار العالم من السوشيال ميديا ودي واحدة من مصايب العصر اللي احنا عايشين فيه وهي إن بريكس دي شوية دول عايزين يقفوا قصاد الغرب وينهوا سيطرة الغرب علي الاقتصاد العالمي .. لحد هنا الكلام حلو ومنطقي .. الناس كلها حاسه في مصر علي الاقل إن الاقتصاد راح في داهية .. الاسعار مفيش حد عارف يفرملها والسبب في ده اللي بيطلع من بق أي حد بيتقال عليها بيفهم في الاقتصاد هو سعر الدولار .. اذن اي محاولة أو أي توجه لإنهاء الاعتماد علي الدولار كطريقة لتقييم اقتصاد أي بلد بما فيها مصر فدي حاجة صح الصح واحنا كمصريين من مصلحتنا اننا نقف معاها.
دلوقتي يجي وقت اننا نرجع بظهرنا ونسال الاسئلة اللي كان المفروض تتسأل من الأول:
- هو ليه بريكس دي ظهرت أصلاً؟ .. بمعني أخر .. إيه كانت مشكلة الإقتصاد العالمي بصورته الحالية؟
- يطلعوا ايه البريكس دول؟ وهل فعلاً حيبقوا حاجة تستحق إننا نقف قدامها نتكلم عنها ولا حيتحرقوا زي النمور الاسيوية كده؟
- إيه المشاكل اللي ممكن توقع فكرة بريكس؟ وهل يقدروا يتخطوا المشاكل دي؟
السب ورا بريكس .. الدول السبع الصناعية الكبري:
لحد اللحظة اللي انت بتقرالي الكلام ده فالعالم دلوقتي بيسيطر عليه 7 دول بيسموهم G7 أو الدول الصناعية السبعة العظمي في العالم اللي هم أمريكا وبريطانيا وفرنسا وإيطاليا وألمانيا وكندا واليابان .. اللي هم باختصار أوروبا ومعاهم أمريكا وأنتيمتها كندا وزود عليهم اليابان .. ما يسمي G7 لما ظهر اسمها لأول مرة سنة 1975 مكنش اسمها كده انما كانوا G6 وكانوا بيضموا أمريكا وبريطانيا واليابان وإيطاليا وفرنسا وألمانيا الغربية .. سنة 1976 كندا انضمت ليهم فبقي اسمهم G7 .. يمكن ناس كتير متعرفش بس فكرة G7 اتولدت اساساً كرد فعل لقرار السعودية حظر تصدير البترول للغرب كرد علي دعم أميركا لإسرائيل خلال حرب أكتوبر 1973 ولإن G7 اتولدت من رحم أزمة عابرة لإن خلينا نكون صرحاء مع بعض الخليج موقفش وقفة رجاله زي دي من ساعتها فحتلاقي إن G7 مش كيان رسمي مؤسسي تقدر تتكلم معاه .. يعني مثلاً .. الدول الصناعية السبعة العظمي مش كيان زي حلف شمال الأطلسي مثلاً له سكرتير عام وله لايحة واضحة وفيه ناس شغاله فيه عشان تمشي أموره .. هم سبع دول بيتقابلوا مرة كل سنة بحيث خلال السنة دي فيه بلد من السبعة هي اللي بتتولي الرئاسة الشرفية للمجموعة وهي اللي بتحدد أجندة الإجتماع السنوي اللي بيتعمل علي أرضها.
بعد انهيار الاتحاد السوفيتي المجموعة قدمت دعوة لروسيا عشان تبقي عضو معاهم فبقي اسمهم G8 والكلام ده كان سنة 1998 أيام ما كان ماسك روسيا الخمورجي (بوريس يلتسن) .. انضمام روسيا للدول الصناعية السبعة العظمي عشان يبقوا ثمانية كان بهدف إن قال يعني كده الغرب والشرق حيبقوا حبايب ويعيشوا في تبات ونبات ويخلفوا صبيان وبنات لحد ما جت سنة 2014 .. سنة 2014 روسيا خدت حتة من أوكرانيا وضع يد اللي هي شبه جزيرة القرم وبسبب ده اتطردت روسيا من المجموعة عشان ترجع تاني تبقي G7.
البريكس .. الافينجرز الجداد في الاقتصاد العالمي:
كلمة بريكس BRICS دي الحروف الثلاثة الأولي من الخمس دول اللي أسسوا الفكرة وهم البرازيل وروسيا والهند والصين وجنوب أفريقيا .. وعلي فكرة الاسم نفسه طلع عليهم من واحد شغال في بنك جولدمان ساكس الأمريكاني اسمه (جيم أونيل) لما في سنة 2009 بريكس اتكونت والبنك شكل لجنة عشان تقيم هل فكرة بريكس دي تستحق إن الأمريكان يخافوا منها أو لا والاخ (جيم أونيل) ده حط كل اللي وصله في تقرير اقتصادي اسمه Build Better Global Economic BRICS .. التقرير بتاع (جيم اونيل) تنبأ إن لما تيجي سنة 2050 وعليك خير الاقتصاد العالمي حيسيطر عليه الدول الخمسة بتوع بريكس والرجل بني كلامه علي إن بما إن البرازيل وروسيا والصين والهند وجنوب أفريقيا هي بالورقة والقلم أكتر اقتصاديات علي مستوي العالم بتنمو بمعدل متزايد فالناس دي لما تحط ايدها في ايد بعض فهم علي الورق وركز أوي في حتة علي الورق دي يقدروا يدوسوا علي وش أي حد .. زود علي كده إن الدول الخمسة فيها 3 مميزات مش حتلاقيهم في الدول الصناعية الكبري:
- تكلفة عمالة قليلة لإن الحد الأدني للأجور في الدول الخمسة علي الله حكايته.
- بتتكلم عن خمس دول بسم الله ما شاء الله مش بيبطلوا خلفة فتعداد السكان بتاعهم يقدر يقوم إمبراطورية اقتصادية لإنك بتتكلم عن خمس دول عندهم 40% من إجمالي التعداد السكاني لكوكب الأرض قصاد إن الدول الصناعية السبعة العظمي يدوبك تحت ايدهم 10% بس من اجمالي التعداد السكاني للبشر
- خمس دول عندهم ثروات طبيعية ربنا عطالهالم بحيث هم مش مجبرين يروحوا لدول تانية يا يحتلوها يا يجبروها انها تديها ثرواتهم .. يكفي إنك تعرف إن الخمس دول بتوع بريكس لو حسبت مساحاتهم الجغرافية وجمعتها علي بعض حتلاقيهم 26% من مساحة الأرض قصاد إن دول G7 تحت إيدهم 15% بس من مساحة الأرض.
بريكس بمنتهي البساطة بتقول إن لسنين وسنين والاقتصاد العالمي بيتحكم فيه السبعة الكبار من غير ما حد فيهم يكلف نفسه ويقعد يسمع ويتكلم مع الدول النامية اللي علي الله حكايتها .. السبعة الكبار كانوا بيكلموا العالم من طراطيف مناخيرهم وجه الوقت ان حد يطلع يكسر عينيهم والحد ده هو البريكس .. جه الوقت إن الأفينجرز القدام يفهموا إن فيه موجه جديدة جايه والحق يتقال إن الموجه الجديدة دي مخليه ناس كتير متحمسة للفكرة .. إن يبقي عندك 40 دولة علي مستوي العالم مهتمين او عايزين ينضموا للبريكس فده يوريك قد ايه إن السبعة الكبار مبقاش حد طايقهم في الدنيا .. يا مؤمن البريكس عليها قبول لدرجة إن إيران والسعودية عايزين ينضموا .. ده كده لما عربية BMW مستعملة تكون بتتباع بسعر تحفة وفرصة متتعوضتش لدرجة إن إنت و الإيكس بتاعتك تعصروا علي نفسكوا شوال لمون وتشتركوا سوا عشان تشتروا العربية مع بعض وتششاركوا فيها.
الأرقام لوحدها بتخليك تقول إن البريكس تقدر مش بس تنكد علي الG7 عيشتهم إنما كمان اديهم شوية وقت وحيكونوا هم الG7 الجداد .. لحد أغسطس 2023 فدول البريكس بتشكل 40% من إجمالي تعداد السكان العالمي وتقريباً تلت الناتج الوطني الإجمالي العالمي .. كلمة ناتج إجمالي وطني دي اللي هي Gross Domestic Product أو GDP اختصاراً ودي بمنتهي البساطة إنك تجيب كل الفلوس اللي بيعملها إقتصاد أي بلد من غير ما تطرح منه المصاريف .. ده زي ما انت كده أول كل شهر تقول انا مرتبي كذا وفيه فلوس جيالي من ورث مثلاً قد كده وفيه حد كان سالف مني فلوس ردهالي بالمبلغ الفلاني فتجمع الفلوس دي كلها علي بعض وده بيكون GDP بتاع البيت للشهر ده .. بناء علي أرقام صندوق النقد الدولي International Monetary Fund أو IMF اختصاراً ففي سنة 2022 أًصلاً يعني فدول البريكس لما تيجي تحسب GDP بتاعها فهو بقي أكبر من اللي بتحققه دول G7 .. بس قبل ما تقول هييييييه .. اهدي بقي وخد بالك من نقطة.
لما IMF قال إن GDP بتاع البريكس خلاص عدي بتاع G7 فده كان مبني علي افتراض بيسموه Purchasing Power Parity .. يعني ايه الكلام ده .. يعني علي فرض إن القدرة الشرائية لعملات الدول بقت قد بعض يعني لو القدرة الشرائية للدولار بقت هي هي بتاعة الروبل الروسي بقت هي هي اليوان بتاع الصين .. طبعاً ده فرض مش متحقق دلوقتي في السوق وده السبب اللي مخلي دول البريكس بتسعي ورا إن البيع والشرا في السوق العالمي ميبقاش بالدولار انما يبقي بعملات الدول اللي بتبيع وتشتري بينها وبين بعض .. الحكاية دي اسمها De-Dollarization ودي ملهاش ترجمة عربي أوي بس تقدر تقول إنها سحب الكرسي من تحت الدولار لإن لو ده حصل والناس كلها قررت إن من هنا ورايح الدولار مش حيبقي العملة الرسمية للبيع والشرا بين دول العالم فساعتها الفرض اللي ارقام IMF اتبنت عليه حيتحقق .. ساعتها بس البريكس حيبقوا رسميا هم الافينجرز الجداد.
فاكر بنك جولدمان ساكس اللي هم طلعوا اسم بريكس ده؟ .. الناس دي سنة 2022 اشتغلت علي توقعاتهم علي معدلات نمو الدول النامية قصاد دول G7 .. الناس بتاعة جولدمان ساكس بتقول إن أكبر 3 اقتصاديات علي مستوي العالم سنة 2022 كانوا بالترتيب كده أمريكا وراها الصين وراها اليابان .. سنة 2075 وعليك خير حيكونوا بالتريب الصين وراها الهند وراها أمريكا .. عارف مين الدول اصحاب المراكز اللي وراهم؟ .. اندونيسيا في المركز الرابع وراها نيجيريا ووراها باكستان .. هل الكلام ده بجد ولا بلح؟ الله أعلم .. بس ده مش مهم .. المهم إننا نتكلم شوية عن الحاجة اللي مخلية البريكس سيكسي في عين الدول التانية .. حتة الحلاوة بالقشطة اللي بتخلي ريق أي بلد يجري إنه يترمي في حضن البريكس ويسيب ملاية أمريكا والحاجة دي هي بنك التطوير الجديد New Development Bank .. يطلع إيه البتاع ده؟
سنة 2014 لما فكرة البريكس اتولدت اتولد معاها بنك خليني أقولك إنه من سنة 2014 لحد سنة 2023 يعني بتتكلم في تسع سنين عطي قروض بقيمة 30 مليار دولار عشان تتعمل مشاريع بنية تحتية ودي حاجة مغرية فشخ لدولة زي مصر مثلاً .. إنتي كمصر عايزة قرض عشان تعملي أي مشروع في دماغك إياكش حتي مشروع قومي لمزارع البط فبدل ما تروحي تاخدي القرض من البنك الدولي أو من صندوق النقد الدولي يفشخك في شروطه فبتاخدي نفس القرض من New Development Bank وبتسددي ثمنه حين ميسرة .. بلاش دي .. لما تيجي تاخد قرض مش حيقولك لازم تاخده بالدولار وترده بالدولار ده انت ممكن تاخده بالجنيه وترده بالجنيه .. وده السبب اللي علشانه سنة 2024 فيه 4 دول تانيين انضموا للبريكس اللي هم مصر والإمارات وأثيوبيا و إيران وعشان كده بقوا بيسموا بريكس اسم سيكسي شوية BRICS+ وأول مرة فرح العمدة ده يقعد مع بعضه كانت في أكتوبر 2024 لما اتعمل مؤتمر البريكس بلاس في مدينة كازان الروسية .. سنة 2025 أندونيسيا انضمت .. يعني البريكس علي الورق هم 10 دول بس رسمياً هم خمسة عشان بس متتخيلش إن بشكل ما مصر ليها صوت قوي في اللي بيحصل .. بس ده مش معناه إن بنك التطوير الجديد ده جامد زحليقة .. كم القروض اللي البنك ده عطاها في سنة 2021 مثلاً تعتبر تلت كم الفلوس اللي طلعها البنك الدولي في نفس السنة.
المشاكل .. كل واحد عاجباه دماغه:
مشكلة بريكس الكبيرة في فكرة المريسة .. دلوقتي انت بتتكلم عن خمس دول هي اللي أسست الفكرة اللي بفكرك انهم البرايل وروسيا والهند والصين وجنوب أفريقيا .. فيه دولتين من الثلاثة دول ديكتاتورية بيحكمها رجل قاعد علي الكرسي لحد ما ربنا يفتكره اللي هم روسيا والصين .. روسيا ماسكها اللي ربنا يجعل كلامنا خفيف علي قلبه (فلاديمير بوتين) والصين بيمشيها طويل العمر يطول عمره يزهزه عصره وينصره علي مين يعاديه (جي جينبينج) .. فيه 3 دول المفروض إنهم دول ديموقراطية اللي هم البرازيل والهند وجنوب أفريقيا بس كل بلد فيهم شايفه الديموقراطية بشكل مختلف خالص عن الاتنين التانيين .. البرازيل ماسكها (لولا دا سيلفا) وده رجل اشتراكي جميل بس ده ميمنعش إن فيه ريحة شياط تسد مناخيرك من فضايح الفساد اللي بتحوم حوليه .. الهند ماسكها (ناريندرا مودي) وده رجل هندوسي متطرف مبيكرهش في حياته قد المسلمين ومستعد يعمل أي حاجة عشان يفضل قاعد في الكرسي ميمشيش بحيث يبقي زيه زي (بوتين) و(جي جينبينج) .. فكك من جنوب أفريقيا اللي عايشة علي حس السمعة الطيبة بتاعة (نيسلون مانديلا) وأنا بصراحة شايلهم جميلة القضية اللي رفعوها في المحكمة الجنائية الدولية ضد الصهاينة فمش حقول حاجة وحشة عنهم.
الخمسة دول فيه منهم ثلاثة هم اللي تقدر تقول انهم شايفين نفسهم حبتين تلاتة وكل واحد شايف نفسه يستحق إنه هو اللي يسوق اللي هم (بوتين) و(جي جينبينج) و(مودي) .. أو زي ما الإعلام الغربي بيسميهم الدب والتنين والفيل .. (بوتين) و(جي جينبينج) شايفين إن مستقبل بريكس إنها تفضل تقبل أعضاء جداد كل شوية بحيث التكتل ده يفضل يكبر كل سنة لحد ما يوصل لمرحلة إنه بقي قوة عظمي أكبر من أمريكا .. طبعاً كل واحد فيهم مبرراته ورا الرغبة في التوسع دي مختلفة يعني الصينيين عايزين التوسع ده عشان يعلموا علي الأمريكان بسبب الخناقة بتاعة التعريفات الجمركية قصاد إن الروس عايزين يبقي ليهم صحاب في العالم يدافعوا عنهم بعد ما فجأة لقوا نفسهم معزولين عن الدنيا بسبب غزوهم لأوكرانيا .. الهند علي الناحية الثانية مش عايزة التوسع ده .. رغبة الهند أو خليني أبقي دقيق أكتر وأقولك رغبة (مودي) إن بريكس تقفل بابها علي الخمسة دول بتتفسر علي حسب إنت عايز الحق ولا ابن عمه .. لو عايز الحق فهو مش عايز دول مسلمة تخش البريكس لإن الكلام كله علي السعودية وأندونيسيا هم اللي عايزين يخشوا .. أندونيسيا للعلم بالشيء يعني دولة مسلمة وهي رابع أكتر دولة في العالم من حيث عدد السكان .. لو عايز ابن عمه فهو مش عايز يبقي عدد الدول الديكتاتورية اللي مفيش حاجة عندها اسمها انتخابات حرة ونزيهة تبقي أكتر من الدول الديموقراطية قال يعني (مودي) عنده استعداد أو رغبة إنه يسلم السلطة سلمياً لحد تاني.
وهي دي الفكرة إنت عندك خمس دول كل دولة أو برده خليني أبقي صريح مع نفسي أكتر واقول خمس بني أدمين ماسكين الخمس دول كل واحد فيهم شايف الدنيا من شباك بيتهم .. كل واحد فيهم له مصالحه وله رؤيته وله دماغه .. الأهم إن كل واحد فيهم عايز يمسك هو الطارة ويسوق .. الأمل الوحيد لبريكس إنها تكمل طريقها هي إن الثلاثة الكبار اللي ماسكينها يفهموا إنهم لازم يشتغلوا مع بعض مش إنهم يمشوا كلامهم علي بعض والحقيقة إن ربنا ساترها معاهم وباعتلهم السبب اللي بيخليهم واقفين جنب بعض وهي كيس الشيتوس الحجم العائلي (دونالد ترامب) .. لما الغزو الروسي لأوكرانيا حصل أميركا والاتحاد الأوروبي فرضوا عقوبات اقتصادية كانت كفيلة انهم تقسم ظهر الاقتصاد الروسي بس الدول الخمسة بتوع البريكس وقفوا جنب بعض وده السبب اللي خلي حجم التجارة بين الدول الخمسة ينط 40% من سنة 2021 لحد سنة 2024 لحد ما بقينا بنتكلم في حجم تجارة وصل 700 مليار دولار وبسبب العقوبات الاقتصادية دي فالتجارة دي كلها تمت بالعملات المحلية للدول الخمسة.
خليني أبقي صريح معاك إن الغرب مرعوب من التغيير الجاي .. انت قصاد وضع إن كل 6 شهور يا صندوق النقد الدولي يا البنك الدولي يقوم مطلعلك تقرير يقولك فيه توقعاتهم للاقتصاد العالمي وتأثير بريكس عليه .. يعني مثلاً في أكتوبر 2024 صندوق النقد الدولي قالك إن خلال الخمس سنين الجايين نسبة النمو في الاقتصاد العالمي نصيب الصين منها حتكون 22% اللي هو لو فكرت فيها فنسبة نمو الاقتصاد الصيني هي هي نسبة نمو الاقتصاد بتاع الدول الصناعية السبعة كلهم مع بعض .. ورا الصين بتيجي الهند الي نسبة النمو بتاعها مقارنة بنسبة النمو في الاقتصاد العالمي حتوصل 15% .. هي المشكلة إن كل الكلام الجميل ده مبني علي فرضية Purchasing Power Parity يعني الجنيه زيه زي الدولار .. لما تيجي تستخدم نفس الفرضية دي حتكتشف حاجة في منتهي الغرابة وهي إن خلال الخمس سنين الجايين نسبة نمو الاقتصاد المصري مثلاً حتكون 1.4% من إجمالي معدل نمو الاقتصاد العالمي بس الفكرة مش في كده الفكرة إن دي نفس نسبة نمو الاقتصاد الألماني والاقتصادي الياباني .. عشان كده انا بركز جداً علي فكرة إن بريكس عايزين يوقعوا الدولار أو علي الاقل ميخلوش كل حاجة في الدنيا بتتقاس بالدولار لإن ساعتها بالأرقام حتلاقي إن الإقتصاد المصري بقي فلة شمعة منورة.
فكر فيها من وجهة نظر الروس مثلاً .. دلوقتي 35% من التجارة الخارجية اللي احنا بنعملها في السنة بتكون مع الصين فايه اللي يجبرني أنا كروسيا إني لما اشتري حاجة من الصين ادفع ثمنها بالدولار والعكس صحيح .. الصينيين علي قلبهم زي العسل إن أي حاجة هم بيبيعوها للروس تتباع باليوان اللي هي العملة بتاعتهم .. اللي يمشي علي روسيا يمشي علي البرازيل .. بداية من 2009 وانت طالع الصين بقت الشريك التجاري الأهم للبرازيل .. اذن الظروف جاهزة إن دول البريكس ترمي الدولار ورا ظهرها .. السؤال هو ليه ده محصلش لحد دلوقتي؟
الإجابة بمنتهي البساطة إن دول البريكس ماسكها رجاله مش سهل عليهم فكرة إنهم يبقوا زي الأفينجرز .. أنا عارف إنه تشبيه يبان أهبل بس لو انت بتحب الافلام زي حالاتي فانت مثلاً لو شفت سلسلة الافينجر حتلاقي انك قصاد فريق من شخصيات مختلفين عن بعض وكل واحد فيهم جاي من دنيا وعالم مختلفين بس لما بيتحطوا في موقف انهم لازم يتشغلوا مع بعض بتلاقيهم كتف في كتف بغض النظر عن مين الريس علي مين .. الأوروبيين بيعرفوا يعملوا ده شوية عشان كده عملوا الاتحاد الأوروبي وانا قلت شوية خلي بالك لإن الاتحاد الاوروبي متصلب بقشاية خصوصاً بعد البريكزيت .. بتوع البريكس مش عارفين يعملوا ده وتوقعي الشخصي انهم مش حيعرفوا حتي يعملوا ده .. عشان البريكس يبقوا زي الاتحاد الاوروبي هم لازم يبقي ليهم نفس الرأي في تقريبأ أغلب القضايا اللي ممكن تواجههم بس ده مش حيحصل .. الروس مثلاً مش عايزين يبقي ليهم علاقات مع الأوروبيين دلوقتي لحد ما المولد بتاع أوكرانيا ده يتفض بس حتلاقي البرازيل علي قلبها زي العسل انها تتاجر مع الاوروبيين والأمريكان عادي جدا .. مش حتلاقي مثلاً الهند مستعدة تضحي بسبوبة تجارتها مع الأمريكان عشان خاطر تقف وقفة جدعنة مع الصينيين .. يا مؤمن ده المفروض يعني إننا والأثيوبيين بقينا أعضاء في البريكس فممكن تفهمني إزاي إحنا مطالبين نقف كتف في كتف مع الأثيوبيين اللي احنا شايفينهم بيحاربونا في أكل عيشنا بسبب أزمة سد النهضة.
الحاجة الوحيدة اللي مخلية البريكس ماسكة في بعضها هي بنك التطوير الجديد New Development Bank وصدقني لو قلتلك إن الرغبة في إنك تحط ايدك علي سبوبة حلوة مش هو اللي حيخليك تقبل تتحالف مع دولة تانية تحت مبدأ يا نعيش عيشة فل يا نموت احنا الكل .. الفلوس عمرها ما كانت سبب ورا ان بلدين يحطوا ايديهم في ايد بعض .. الموضوع له علاقة بحاجة احنا مبقيناش نسمع عنها كتير وهي الارادة .. إرادة إنك عايز تبقي حاجة مختلفة .. إرادة التغيير .. إرادة إنك عايز تكسر الواقع المنيل بستين نيلة اللي انت عايش فيه .. دي مش حتلاقيها في حكام كل اللي بيفكروا فيه هو ازاي يقعدوا علي الكرسي .. ارادة التغيير دي بتيجي من حكام مستبيعيين وعارفين ان اخرها كام سنة وحيجي حد جديد عشان كده أنا شخصياً شايف إن فكرة البريكس وان كانت حلوة جداً والأرقام بتقول إنها تقدر تنجح بس هي مشكلتها في رأيي إن طول ما اللي ماسكها شخصيات مريضة نفسياً عمرها ما حتنجح.
المصادر:
- تقرير عملته مجلة Wall Street Journal اسمه BRICS: The G7Economic Alliance’s Rival, Explained نشر علي YouTube وده لينك الفيديو:
Brics: The G-7 Economic Alliance’s Rival, Explained | WSJ - تقرير عملته وكالة أنباء بلومبيرج Bloomberg اسمه BRICS: The Rise of a New Global Order? تشر علي YouTube وده لينك الفيديو:
BRICS: The Rise of a New Global Order? - مقالة بعنوان The BRICS Challenges to the G7 Established International Order يعني تحديات البريكس اللي بتشكلها علي النظام العالمي اللي عملته مجموعة الدول الصناعية السبعة العظمي نشرت علي موقع معهد دراسات العلاقات الدولية وده لينك المقالة:
The BRICS Challenge to the G7 Established International Order – Foreign Policy Research Institute
