ألبوم صور .. عشان تفتح بيزنس لازم تدفع.

المفروض إن الإقتصاد هو من أكتر العلوم اللي ماشية بالمنطق .. المنطق بيقول إن لو حضرتك قررت تفتح بيزنس خاص بيك فده خير و بركة و المفروض الدولة تزغرط ويوم الإفتتاح بتاع البيزنس بتاعك تقلبهالك حنة شيماء .. ليه؟ .. حضرتك حتفتح بيزنس يعني حتشغل ناس .. يعني معدلات البطالة حتقل .. حضرتك حتفتح بيزنس يعني حتدفع ضرايب يعني الفلوس اللي بتخشلي كحكومة حتزيد .. هو فيه حد يقول للرزق لا؟ .. من الألبوم بتاع النهاردة انت حتلاقي نفسك مصدوم وانت قدام حقيقة إن أيوه .. فيه ناس بتقول للرزق لا.

فيه دول ماسكها ناس عايزه الناس تشتغل زي كازاخستان مثلاً اللي عشان تخلص ورق إنشاء البيزنس بتاعك بتدفع 12 دولار بس ودول يدوبك 2% من متوسط الدخل الشهري في البلد .. فيه دول تانية زي مثلاً الكونغو الديموقراطية محتاج يا عيني تكع 1,232 دولار ودول ضعفين متوسط الدخل الشهري في البلد يعني الحكومة تقريباً بتقول إن محدش حيفتح بيزنس هنا إلا لو كان من كبارات البلد.

الخريطة دي هي زتونة شغل سنين عمله تعاون مشترك بين البنك الدولي World Bank و مؤسسة إسمها Business Financing وفكرتها إنهم يحسبوا إنت محتاج رأس مال قد إيه عشان تخلص ورق الإجراءات المطلوب عشان تفتح البيزنس بتاعك في دول العالم .. يمكن أهم و أكتر معلومة صادمة إن أغلي بلد في العالم بلا منازع عشان تخلص ورق إنك تعمل البيزنس بتاعك هي الإمارات العربية المتحدة لانك بتحتاج تدفع 7,443 دولار لمجرد انك تاخد التصاريح .. علي الناحية الثانية أرخص بلد في العالم هي رواندا اللي فيها عشان تفتح بيزنس بتاعك انت مش بتدفع أي فلوس لمدة سنتين كنوع من أنواع التسهيلات .. كمان فيه دولة سلوفينيا اللي مجرد بتشترط إن حضرتك تقدم ورق يثبت إن رأس مالك أعلي من 8,900 دولار و ساعتها انت بتاخد التصاريح من غير ما تدفع ولا مليم.

حتلاقي إن كل ما كانت البلد متلونة بالأخضر كل ما كان أرخص فيها إنك تفتح البيزنس بتاعك علي عكس الدول المتلونة بالبرتقالي زي إيطاليا و النمسا و هولندا و بلجيكا اللي بيتدفع فيها فلوس كتير .. الخريطة دي توريك إن أوروبا بالذات مش حاجة واحدة .. في أوروبا حتلاقي 12 بلد بتشجع الناس إنها تفتح البيزنس بتاعها لدرجة إنهم مش عايزين منك غير أقل من 100 دولار .. علي الناحية الثانية فيه 11 بلد في أوروبا برده بيقصموا ظهرك و بيطلبوا تدفع فوق ال1000 دولار .. دولة زي بريطانيا مثلاً دي تاني أرخص دولة في أوروبا بعد سلوفينيا .. إذا كانت سلوفينيا مش بتطلب منك فلوس فبريطانيا مطلوب تدفع بس 17 دولار تكاليف إنضمامك للغرفة التجارية بتاعة أيا كان بقي البيزنس اللي انت حتفتحه .. بريطانيا علي فكرة أرخص من دولة تحت بير السلم زي بيلاروسيا أو روسيا البيضا اللي بتدفع فيها 18.18 دولار .. علي الناحية الثانية الطليان بيطلبوا تدفع 4,895 دولار عشان يبقي عندك سجل تجاري و ده علي فكرة ضعف متوسط الدخل الشهري في إيطاليا.

أميركا دي عاملة زي لما تزعق لإبنك عشان جاب درجات وحشة في الإمتحان فتلاقيه يرد عليك إنه علي الأقل مبيضربش زمايله في الفصل و بيشرب سجاير .. صحيح أميركا عشان تفتح فيها بيزنس محتاج تدفع 725 دولار بس ودول ميجوش حاجة جنب 1,463 دولار اللي انت محتاج تدفعهم عشان تفتح بيزنس في المكسيك .. بس في نفس الوقت اللي انت بتدفع في أميركا غالي أوفر عن اللي انت بتدفعه في كندا اللي هم بس 166 دولار.

أميركا الجنوبية زيها زي أوروبا فيها الدول الحنينة و فيها الدول الحراقة .. في الإكوادور مثلاً حضرتك محتاج يبقي معاك 1,629 دولار عشان تخلص ورقك .. في دولة تانية زي سورينام حضرتك بتدفع 3000 دولار ودي أرقام فلكية بالنسبة لدول مش لاقية تاكل .. علي الناحية الثانية دولة زي فنزويلا بتطلب منك فعلياً و ده مش هزار 12 سنت بس .. صحيح إن ال12 سنت دول ميجوش حتي 1% من متوسط الدخل الشهري بس فنزويلا دولة حالها يصعب علي الكافر و مينفعش نعتبرها مثال يحتذي بيه في تشجيع البيزنس الخاص.

أفريقيا فيها مشكلة غريبة .. المرتبات فيها ضعيفة فده معناه إنك لو شركة كبيرة عايزه تفتحي فرع ليكي في أي دولة في أفريقيا فده حيبقي أرخصلك من إنك تفتحي فرع أو مصنع في أوروبا أو أسيا مثلاً .. في نفس الوقت ضعف المرتبات معناه إن الناس الشاطرة المؤهلة إنها تفتح بيزنس معاهاش الفلوس الكاش اللي تخليها تدوس في الخطوة دي .. لو بصيت علي الخريطة حتلاقي إن الغالبية العظمي من الدول الأفريقية بما فيها دول إقتصادها تقيل زي مصر و جنوب أفريقيا تكلفة إنك تفتح بيزنس فيها أقل من 100 دولار بس زي ما قلتلك كل ده ولا حاجة قصاد إن معدلات الثروة في مصر ضعيفة فمش كل الناس معاها الفلوس اللي تخليها تفتح البيزنس بتاعها.

فعلاً دي أغرب حتة في العالم .. هو يبان إن دول الخليج دول حمادة و باقي الدول في المنطقة حمادة تاني خالص بس لو ركزت شوية حتلاقي إن الوضع مختلف سيكا .. صحيح إن الإمارات العربية المتحدة هي أغلي دولة في العالم عشان تفتح فيها بيزنس بس الدنيا مش سواد أوي هناك لإنك لو حسبت متوسط الدخل الشهري للفرد فلو قدرت تحوش مرتب شهرين فانت تقدر تفتح البيزنس بتاعك .. علي فكرة قطر و السعودية مش بعاد أوي عن الإمارات .. في حالة قطر انت محتاج 3,952 دولار و في حالة السعودية فانت محتاج 1,266 دولار اللي هو يعني مش ماشيين بمبدأ الجملي هو أملي .. في نفس الوقت البحرين رخيصة فشخ .. انت عشان تفتح بيزنس في البحرين محتاج 230 دولار بس اللي هو أساساً أرخص من اليمن اللي محتاج فيها 808 دولار .. بس البحرين مش رخيصة أوي لو قارنتها بدول تانية زي باكستان اللي محتاج فيها يبقي معاك 20 دولار عشان تخلص ورقك أو دولة قيرغيستان اللي محتاج فيها 8 دولار.

فكك من الصين و الهند .. و فكك كمان من أستراليا .. لو انت ناوي تفتح بيزنس فعلاً في الحتة دي من العالم روح نيوزيلاندا .. مقارنة بجيرانها فنيوزيلاندا مش رخيصة أوي يعني لإنك بتحتاج تدفع 43 دولار بس ده يدوبك 2% من متوسط دخلك الشهري هناك اللي بيوصل 2,838 دولار فانت بسهولة أوي تفتح بيزنس .. الأحلي بقي هو الإجراءات .. حضرتك بتروح تفتح سجل تجاري و بس .. تعمل بيزنس في خطوة واحدة مبتاخدش ساعة.

المصدر:

مقالة بعنوان How Much Does Cost to Start a Business? There’s a World Map for That نشرت في موقع Big Think وده لينك المقالة الأصلية:
https://bigthink.com/strange-maps/cost-of-starting-a-business