المباني الخضراء .. فلسفة البناء الحديثة لإنقاذ البيئة.

فيه موضة جديدة اليومين دول مسيطرة علي دماغ المهندسين هي ما يسمي بالمباني الخضراء أو Green Buildings و ده مبدأ في التصميم الهندسي عشان تبسطه خالص فإنت تقدر تقول إنك عشان تبني أي مبني في الدنيا إنت محتاح تحرق حاجة .. فكر فيها كده .. لو عندي عمارة عايز أبنيها فإنت محتاج طوب أحمر و عشان تجيب الطوب الأحمر محتاج تحرق بنزين .. محتاج أسمنت و عشان تصنع الأسمنت بيبقي عندك فرن كبير بتحرق فيها مازوت .. محتاج حديد تسليح و اللي عشان برده تجيبه محتاج تحرق بنزين في فرن .. ده غير الدهانات و الجبس و الرملة و الزلط و البنزين اللي بيتحرق عشان تنقل كل ده علي عربيات نقل .. ده غير التكييفات لإن التكييف نفسه عشان يشتغل محتاج كهرباء و عشان تولد كهرباء بتحرق يا فحم يا غاز طبيعي .. بإختصار فيه حاجة حتتحرق عشان تبني أي عمارة و ده اللي فلسفة Green Buildings عايزه تهرب منه .. إنت عايز تبني مبني مبيحرقش بنزين لا في بناءه ولا بعد ما يشتغل و لإن المبدأ إنت ممكن متكونش قادر تستوعبه أوي فالنهاردة جبنالك ألبوم ب18 مبني حول العالم إتبنوا بالدماغ اللي إنت لو مقاول في مصر غالباً شايفها متأكلش عيش يمكن عشان الهندسة و المقاولات في مصر ماشية بمبدأ هذا ما وجدنا عليه أباؤنا و أجدادنا.

المبني اللي تحسه طالع من كراسة رسم ده اسمه مبني بيكسل Pixel Building و ده مبني إداري أفتتح سنة 2010 و اللي صممه هو مكتب استشارات هندسية اسمه Decibel Architecture .. المبني ده لما أشتغل في مدينة ملبرن الأسترالية كان أول مبني في البلد كلها يتقال عليه Carbon Neutral يعني ده مبني كهربته هو بيولدها بنفسه و مياه الشرب بتاعته بيجيبها برده لوحده .. ده مبني عشان يشتغل نظرياً مش محتاجله لا عداد مياه ولا عداد كهرباء من الحكومة .. الألواح أو Panels الملونة دي إتصممت بالشكل ده عشان تدخل أقصي درجة ممكنة من ضوء النهار الرباني للمكاتب جوه فإنت بتقلل كهربتك قدر الإمكان .. المبني بيجمع مياه المطر عشان يوديها علي محطة تحلية عشان ترجع تستخدمها تاني كمياه شرب .. لو خدت بالك برده في السطوح متركب Vertical Wind Turbines عشان تولد كهرباء تخدم المبني.

البرج اللي زي ما يكون الموطن الأصلي لطرزان يبقي One Central Park و ده مبني سكني أفتتح سنة 2014 في مدينة سيدني الأسترالية و اللي صممه هو مكتبين استشارات هندسية Ateliers Jean Nouvel و PTW Architects .. المبني عبارة عن برجين واحد قصير و وراه برج أطول شوية و زي ما إنت شايف متغطيين بجنينة عايش فيها 250 نوع نبات مختلف و بسببها المبني ده بيستهلك كمية طاقة أقل بحوالي 25% من أي مبني سكني تاني بنفس الحجم.

برجي التجارة العالميين بس بتوع البحرين .. دول يبقوا برجين زي ما إنت شايف مستخدمين كمكاتب إدارية أفتتح سنة 2008 و صممه مكتب استشارات هندسية اسمه Atkins .. المبني ده حقاً و صدقاً يعني هو مسألة Fluid Mechanics كاملة من مجاميعه .. شكل البرجين و اللي مستوحي من المراكب الشراعية الخليجية اللي بيسموها داو و الفراغ اللي بينهم بيشتغل كأنه Wind Tunnel طبيعي فلما تحط إنت 3 مراوح أو Wind Turbines حتلاقيهم بيولدوا 15% من كهرباء المبني و إنت متعبتش في حاجة .. عشان الجو في المنامة عاصمة البحرين حر زي ما إنت عارف فهم حاطين كذا حوض مياه تحت في الدور الأرضي عشان المياه دي لما تتبخر فبخار المياه يبرد المبني من بره.

المبني اللي ملوش ملامح ده يبقي اسمه متحف الغد في في مدينة ريو دي جانيرو البرازيلية .. المتحف ده أفتتح سنة 2015 و هو من تصميم مهندس معماري حرفياً مجنون اسمه (سانتياجو كالترافا Santiago Calatrava) .. رغم إني مهندس ميكانيكا بس أظن إن الكابولي أو الكانتيليفر Cantilever ده كان صداع في دماغ المهندسين الإنشائيين اللي اشتغلوا علي المشروع .. المبني ده فيه ميزتين أغرب من بعض إن إتعمله مخصوص ألواح شمسية Solar Panels بأشكال معمولة Custom Made عشان تتركب فوق سطوح المبني .. الحاجة الثانية إن نظام التكييف بتاعه بياخد مياه باردة من خليج جوانابارا اللي جنب المبني عشان يبرد بيها الهواء جوه المبني.

مبني مركز مؤتمرات مدينة فانكوفر في كندا هو تحفة معمارية حقيقية أفتتح سنة 2009 و صممه مكتب استشارات هندسية اسمه LMN Architects .. ده حضرتك أول مبني في العالم ياخد شهادتين LEED و دي إختصار Leadership in Energy and Environmental Design ودي بتتعطي للمباني اللي تصميماتها الفاجرة بتخليك تحقق الفكرة بتاعة Green Building .. ده مبني إتصمم عشان يبقي جزء لا يتجزأ من البيئة .. السطوح بتاعه مزروع فيه جنينة كاملة محطوط فيها 4 خلايا نحل أوروبي عشان الجنينة و النحل ميخلوش المبني يسخن في الصيف ولا يسقع في الشتاء .. عمدان المبني الإنشائية إتبنت جوه المياه عشان يعيش عليها الشعاب المرجانية .. مبني يستحق إننا نبقي نتكلم عنه في مرة تانية لوحده.

برج شنغهاي بيتصنف علي إنه Mixed-Use Building يعني مبني متعدد الأغراض لإن فيه مكاتب و محلات و فنادق أفتتح سنة 2019 و صممه مكتب استشارات هندسية اسمه Gensler .. حالياً هو تاني أعلي مبني في العالم بعد برج خليفة إرتفاعه 632 متر .. أي برج زي ده بيبقي عندك مشكلة كبيرة في حاجتين .. إزاي تقلل فاتورة الكهرباء بتاعته و إزاي برده تقلل حمل التكييفات و اللي هي كمان حتسمع في فاتورة الكهرباء .. في حالة برج شنغهاي فإنت عندك 270 مروحة Wind Turbine متركبين علي الواجهة الخارجية للبرج هي اللي بتولد كهرباء المبني و الأهم إن المعماريين مركبين طبقة خارجية علي الواجهة عشان يبقي فيه فراغ من الهواء بين الطبقتين و اللي بتخلي حمل التكييف بتاع المبني يقع النص مثلاً يمكن اكتر .. برج شنغهاي من المباني القليلة اللي معاه شهادة LEED Platinum في العالم.

الدانمركيين بيموتوا في العك .. المبني ده اسمه كوبين هيل CopenHill في العاصمة الدانمركية كوبنهاجن و ده مبني غريب جداً لإنه متصنف إنه Mixed Use بس هو مستخدم كمحطة إنتاج كهرباء و في نفس الوقت قاعة تزحلق علي الجليد .. معلش قلتلك إن الدانمركيين بيموتوا في العك بس يمكن العك بتاعهم هندسي أوي .. المبني ده أفتتح سنة 2017 و صممه مكتب اسمه Bjarke Ingels Group (BIG) .. كل سنة المبني ده بيحرقله 440,000 طن زبالة في أفران عشان البخار اللي طالع من الأفران دي يعدي علي تربينة تولد كهرباء كافية لإنارة 150,000 بيت في العاصمة الدانمركية.

برج ماركو بولو السكني في مدينة هامبورج الألمانية من المباني اللي فعلاً بسببها قامت خناقات كتير بين المهندسين المعماريين و الإنشائيين .. المبني ده أفتتح سنة 2010 و صممه مكتب Behnisch Architekten و الحقيقة إن المبني ده لو عرضت فكرته علي المهندسين الإنشائيين المصريين حيقولوا عليه كفر بالله .. كل دور من أدوار المبني لافف بزاوية عن الدور اللي تحتيه .. ده معناه إن الوجهات بتاعة المبني مش ثابته فده بيخلي مفيش شقة معرضة لأشعة الشمس طول النهار .. بمعني أخر .. إنت مش محتاج يتركبلك تكييف .. لو بصيت علي السقف حتلاقي متركب مبادل حراري Heat Exchanger عشان ياخد الهواء السخن اللي حولين المبني يبرده و ينزله يمشي جوه المبني في فتحات عشان يحقق حاجة بيسموها Natural Ventilation اللي هو كأنك نايم في البلكونة بالضبط.

عودة مرة أخري للمباني اللي تحسها متصممة عشان طرزان يعيش فيها مع مبني بوسكو فيرتيكالي Bosco Verticale في مدينة ميلان الإيطالية .. المبني اسمه هو ترجمة كلمة الغابة الرأسية Vertical Forest للغة الإيطالية و أفتتح سنة 2014 من تصميم مكتب استشارات هندسية اسمه Boeri Studio و ده في حالة إنك عايز تعرف بيهبب إيه في عيشته فده مبني سكني حضرتك ده لو إنت حابب تسكن في شقة بس تحس إنك عايش في غابة.

المبني ده يبقي مبني إداري اسمه سوزلون وان إيرث Suzlon One Earth في مدينة بيون الهندية أفتتح سنة 2009 و من تصميم المهندس المعماري (كريستوفر بينينجر Christopher Benniner) .. ده مبني واخد شهادة LEED Platinum بعد ما حقق حاجة مش أي مبني بيعرف يوصلها إنه يبقي Net Zero Energy Building يعني مبني مبيحرقش بنزين لا في بناءه ولا في شغله لإنه إتبني بالكامل من مواد معاد تدويرها و بيولد 100% من كهربته ذاتياً بحيث 80% من الكهرباء بتيجي من Wind Turbines و ال20% الباقيين بيجوا من Solar Panels.

في كوكب اليابان الشقيق وفي مدينة فوكيوكا Fokuoka و اللي تحسها شتيمة بالإنجليزي حتلاقي مبني اسمه ACROS ودي إختصار Asian Crossroads Over the Sea و ده مبني Mixed Use ينفع كقاعات محاضرات و إجتماعات و فيه قاعة أوبرا أفتتح سنة 1995 و من تصميم مكتب استشارات هندسية اسمه Mario Ambasz and Associates .. فكرة المبني بمنتهي البساطة إنك تيجي علي كل دور تعمل مسطبة مزروع فيها جنينة بإجمالي 15 جنينة و الفكرة نفسها مستوحاة من الوصف اللي وصلنا عن حدائق بابل المعلقة واحدة من عجائب الدنيا السبع القديمة.

ناطحة سحاب تورا ريفورما Torre Reforma في قلب العاصمة المكسيكية مكسيسكو سيتي غير إنه أطول مبني في المدينة إلا إنه واخد شهادة LEED Platinum لإنه بيقدر يعمل كذا حاجة عكس كتير من المباني في المكسيك .. المبني أفتتح سنة 2016 و هو مبني إداري في الأساس من تصميم شركة LBR&A Arquitectos .. مبدأياً هو مبني رفيع فده معناه إن ضوء الشمس بسهولة يقدر يخش من ناحية يطلع من الناحية الثانية فإنت تقدر تستخدم الخاصية دي إنك تقلل فاتورة الكهرباء بتاعتك لإنك مش حتحتاج إضاءة قوية طول الوقت .. الصبح قبل ما الموظفين تبدأ تيجي في الفترة من الفجر لحد 9 الصبح برنامج التحكم بتاع المبني بيفتح الشبابيك عشان يحصل Natural Ventilation يبرد المبني .. فوق ده كله إن المبني نفسه مقاوم للزلازل و دي حاجة مهمة لمبني بالإرتفاع ده في مدينة زي مكسيكو سيتي

المبني الجميل جمال ملوش مثال ده يبقي اسمه The Edge و ده يبقي مقر شركة اسمها ديلوييت Deloitte في العاصمة الهولندية أمستردام .. المبني ده بدأ يشتغل سنة 2014 و صممه مكتب استشارات هندسية اسمه PLP Architecture .. ده المبني اللي لو إنت حابب تدرس و تفهم يعني إيه Green Building لازم تذاكره كويس .. المبني ده مرجع لأي حد عايز يفهم يعني إيه LEED .. ده مبني بتتحكم فيه مش عن طريق زراير في كوبس الكهرباء أو ترموستات التكييف .. لا خالص .. المبني من أوله لأخره تقدر تتحكم فيه عن طريق Application بينزل علي الموبايل .. ده مبني مفيهوش لمض زي بتاعة بيتكوا إنما متركبله لمض مخصوص LED من تصنيع شركة Phillips شغالة بحساسات Sensors عشان تحس هل فيه بني أدم دخل الأوضة أو لا و كام واحد و بناء عليه تشغل اللمض اللي تكفيهم .. ده مبني بيستهلك كهرباء أقل 80% من أي مبني إداري تاني يقدر يستوعب نفس عدد البني أدمين.

معلومة رقم واحد إن ده فندق اسمه ParkRoyal Collection Pickering مش مبني إداري ومش مول .. معلومة رقم إتنين إنه إتبني في سنغافورة و عشان سنغافورة بلد أستوائية فالمكتب الاستشاري اللي صمم المبني و اسمه WOHA قرر يستخدم فكرة الزرع و الغابات في التصميم بتاع الفندق اللي أفتتح سنة 2013 .. ده مبني بينضم لمباني كتير في أسيا في الألبوم ده الزرع و الخضرة تعتبر جزء أساسي من فكرة تصميمهم.

أستمراراً للتيمة بتاعة الزرع و الخضرة و معانا مبني تاني برده من سنغافورة اسمه برج روبينسون Robinson Tower وده مبني إداري أفتتح سنة 2019 من تصميم مكتب اسمه Kohn Pederson Fox Associates .. الأخوة في كوكب سنغافورة الشقيق عندهم سياسة حلوة أوي لو أتطبقت عندنا الحكومة بتاعتنا حتضرب نفسها بالنار .. لو إنت مستثمر عايز تبني مبني إياكش حتي عمارة بس العمارة دي إتبنت مكان جنينة أو شجرة فإنت مطالب إن تصميم العمارة بتاعك يبقي فيه نفس المساحة الخضراء اللي حضرتك دمرتها.

معاك إن شكله غريب بس ده وراه حكمة .. ده اسمه One Angel Square في مدينة مانشستر الإنجليزية و ده يبقي مول تجاري أفتتح سنة 2013 بس مشكلة المولات التجارية إنك كل شوية معرض إن حد مأجر مكان يقفل و يجي مكانه حد تاني أو إن مستثمر يشتري كذا مكان و يفتحهم علي بعض .. المبني متصمم بحيث المحلات تبقي Modules سهل تفكها و تركبها زي المكعبات .. المكتب اللي صمم المبني اسمه 3DReid و هم عملوا كذا إفتكاسة في تصميمه سواء إن المبني معموله طبقة خارجية عشان تبرده و ده خلاه ياخد سكور 95.16% وده تقييم عالي أوي علي معيار BREEAM ودي مؤسسة بريطانية بتصنف المباني الخضراء زيها زي LEED بالضبط.

هو يبان بسيط من 6 أدوار بس المبني ده عمل قلبان في أميركا لما أفتتح سنة 2013 .. هو مبني إداري اسمه بوليت سنتر Bullitt Center في مدينة سياتل الأميريكية و من تصميم مهندس معماري اسمه (ميلر هال Miller Hull) .. ده مبني محطوطله Solar Panels في كل حتة بتخليه يقدر يولد 100% من إحتياجاته من الطاقة .. تخيل مبني زي ده محطوطله 575 خلية شمسية .. التكييف معتمد بشكل كبير علي Natural Ventilation إنك تمشي الهواء في مسارات تخليه يجري بسرعة جوه المبني .. بس يمكن المميز أوي إنهم حاطين حاجة اسمها Grey Water System و ده بمنتهي البساطة إنك بتجيب صرف الأحواض بدل ما تصرفه علي البلاعة العمومية خده وديه علي خزان و بعد كده نقي المياه دي و عيد استخدامها تاني في صرف القواعد .. ده مبني متصمم عشان يفضل عايش 250 سنة مستريح.

ده المبني الوحيد في الألبوم اللي موجود في أفريقيا .. ده اسمه مركز إيست جايت Eastgate Center وده مول تجاري في هراري عاصمة زيمبابوي أفتتح سنة 1996 و من تصميم المهندس المعماري (مايك بييرس Mike Pearce) .. المبني ده كله مفيهوش مكنة تكييف واحدة توحد ربنا .. مواد البناء و استخدام Natural Ventilation خلتك تبني مول كامل من غير نظام تكييف مركزي.

المصادر:

مقالة بعنوان Green Buildings: 18 Examples of Sustainable Architecture Around the World نشرت في موقع CNN و ده لينك المقالة الأصلية:
https://edition.cnn.com/style/article/green-buildings-world-sustainable-design/index.html