تابعونا

البوم صور

التصوير الفوتوغرافي .. رحلة في توثيق اللحظة في تاريخ البني أدمين.

صدقني لو قلتلك إن العالم قبل سنة 1839 كان حمادة و بعدها بقي حمادة تاني خالص .. دي السنة اللي تم فيها إختراع التصوير الفوتوغرافي و من ساعتها و التطور الطبيعي لما يسمي توثيق اللحظة تطور من إنك تبعت صحفيين يغطوا الأحداث اللي بتغير شكل البشر للي إحنا وصلنا ليه دلوقتي إن العيل من دول قبل ما يتنيل ياكل بقولك لازم أصور الMeal دي و أحطها علي أنستجرام أو يلا ناخد سيلفي مع الأكل .. الألبوم ده الهدف منه إنه يوريك أيام الكحرتة بتاعة التصوير الفوتوغرافي وقت ما كان له قيمة و كل صورة كان بتوصلك معلومة أو حاجة معينة عايزينك تبقي عارفها.

14 مارس، 2023 308

صدقني لو قلتلك إن العالم قبل سنة 1839 كان حمادة و بعدها بقي حمادة تاني خالص .. دي السنة اللي تم فيها إختراع التصوير الفوتوغرافي و من ساعتها و التطور الطبيعي لما يسمي توثيق اللحظة تطور من إنك تبعت صحفيين يغطوا الأحداث اللي بتغير شكل البشر للي إحنا وصلنا ليه دلوقتي إن العيل من دول قبل ما يتنيل ياكل بقولك لازم أصور الMeal دي و أحطها علي أنستجرام أو يلا ناخد سيلفي مع الأكل .. الألبوم ده الهدف منه إنه يوريك أيام الكحرتة بتاعة التصوير الفوتوغرافي وقت ما كان له قيمة و كل صورة كان بتوصلك معلومة أو حاجة معينة عايزينك تبقي عارفها.

أثر رجل لديناصور في فرنسا عمرها فوق 150 مليون سنة.
كم الإهتمام بالتفاصيل يوريك قد إيه الناس بتوع زمان دول كان علي قلبهم مراوح .. ده يبقي برج (ماركوس أوريليوس Marcos Aurelius) إتسمي علي اسم واحد من أهم أباطرة الإمبراطورية الرومانية و إنتهي العمل عليه سنة 193 بعد الميلاد .. علي فكرة (ماركوس أوريليوس) هو نفسه الإمبراطور اللي إنت شفته في فيلم Gladiator.
حاول تستوعب إن (بابلو بيكاسو Pablo Picasso) الرسام الإسباني المشهور رسم اللوحة دي وهو عنده 15 سنة بس .. إنت متخيل.
إنت ممكن تبقي معذور لو تخيلت إن دي صورة متصورة بفيلم كاميرا ألوان بس الحقيقة مش كده .. من حوالي 110 سنة كان فيه مصور فوتوغرافي روسي إسمه (سيرجي بروكودين Sergey Prokudin) صور الصورة دي بفيلم كاميرا أبيض و أسود بس عمل منها 3 نسخ بحيث كل نسخة حطها علي فلتر بحيث صورة بفلتر أحمر و صورة بفلتر أزرق و صورة بفلتر أخضر و ركب ال3 صور علي بعض و هوبا بقي عندك الصورة دي اللي تحسسك إنها متصورة بكاميرا موبايل.
ميدان قتال في الحرب العالمية الأولي .. اللي فعلاً يزعل في الموضوع إن حط نفسك مكان العساكر اللي في الصورة اللي فوق .. إنت متخيل إن رغم التضحيات بتاعتهم محدش حيفتكرهم .. كل اللي هم حاربوا عشانه طلع فنكوش .. العالم اللي كانوا بيدافعوا عنه خلاص مبقاش موجود.
قبر الجندي المجهول لضحايا الحرب العالمية الأولي موجود في المجر .. فكرته فعلاً حلوة و هي أساساً فكرة عكس التريند اللي بتشوفه في تصميم قبور الجندي المجهول اللي دايماً بتميل لتمجيد العسكري بس هنا هو عايز يوصلك فكرة مأساة الحروب علي الأسر البسيطة.
ده كان شكل القفل اللي حطه الكهنة علي مقبرة (توت عنخ أمون) و اللي لأكتر من 300 سنة فضل مقفول لحد ما في سنة 1923 قطعه (هاورد كارتر) عشان يكتشف المقبرة.
الصورة دي متصورة سنة 1927 للمسحراتي بتاع إنجلترا .. قبل ما يبقي فيه منبه و موبايلات كان فيه واحد شغلته إنه يعدي علي الناس في بيوتها و معاه عصاية عشان يخبط علي ازاز اوضة النوم يصحيهم عشان متروحش عليهم نومة.
شوف يا مؤمن من الثلاثينات و الأمريكان عندهم الإختراع اللي لسه لحد دلوقتي موصلش مصر مع إنه حيحل كتير من أزمة المرور .. أساسنير ركنة العربيات في مدينة شيكاغو الأميريكية.
اللوحة المتعلقة علي الحيطة دي تبقي واحدة من أشهر اللوحات الفنية في تاريخ البشر اسمها American Gothic رسمها فنان اسمه (جرانت وود Grant Wood) سنة 1930 .. سنة 1942 الرجل و الست اللي في اللوحة إتقابلوا عشان يتصوروا الصورة دي كعادة إحياء للوحة .. هي تبقي أخت الرسام و اسمها (نان وود جراهام Nan Wood Graham) و هو يبقي دكتور (بايرون ماكيبي Dr. Byron Mckeeby) ويبقي دكتور السنان بتاع الرسام.
قبل ما يبقي فيه كومبيوترات و فلاشات و كلاود ده كان سجل البصمات بتاع مكتب التحقيقات الفيدرالي FBI الأميريكي سنة 1944.
عساكر أمريكان بيحضروا قداس يوم الاحد جوه ما تبقي من كاتدرائية مدينة كولون الألمانية في مارس 1945.
واحدة من الصور اللي أنا وقفت قدامها كتير الحقيقة .. الصورة دي إتصورت سنة 1961 لعسكري بيحاول يخلي طفل يعدي السلك الشائك بتاع سور برلين عشان يعدي من ألمانيا الشرقية للغربية .. نظرة الخوف علي وش العسكري و هو خايف إن حد يشوفه بيعمل حاجة هو شايفها صح بس القانون شايف إنها خيانة عظمي .. يا تري بعد السنين ما عدت بقينا شايفين العسكري ده إزاي و شايفين القادة بتوعه اللي لو كانوا شافوه كانوا أعدموه إزاي.
سنة 1961 ألمانيا مكنتش زي دلوقتي بلد واحدة إنما كانت مقسومة نصين ألمانيا الشرقية و الغربية بس مش ده الغريب .. الغريب إن برلين اللي هي عاصمة البلد جغرافياً بتقع في النص الشرقي من البلد يبقي المنطق بيقول إن برلين تبقي عاصمة ألمانيا الشرقية و ألمانيا الغربية تنقيلها أي مدينة تانية تبقي عاصمة بس ده محصلش .. فيه حد عبقرينو قالك برلين هي كمان تتقسم نصين بيفصل بينهم سور بحيث النص الغربي من برلين يبقي تحت سيطرة الأمريكان اللي هي أساساً يعني بتقع جوه النص الشرقي من ألمانيا .. الوضع اللي ميدخلش دماغ عاقل ده هو السبب في الصورة دي .. أب و أم شايفين عيالهم عشان جدودهم يقدروا يشوفوا أحفادهم من ورا السور .. سور برلين ده فعلاً من المأسي الإنسانية اللي حصلت من غير أي مبرر أو منطق.
الست اللي تحسسك إنها لسه متطلقة بعد ما قضت سنين في علاقة توكسيك تبقي (روزا باركس Rosa Parks) اللي لمن لا يعلم دي الست اللي كانت راكبة أوتوبيس في أمان الله أيام التفرقة العنصرية ضد السمر في أميركا و اللي بحكم القانون لو حد أسمر قاعد علي كرسي في مواصلة عامة و ركب مواطن أبيض فلازم المواطن الأسمر يقوم يقف عشان المواطن الأبيض يقعد بس الست دي ركبت دماغها و رفضت تقوم عشان رجل أبيض يقعد .. المهم (روزا باركس) بقت واحدة من أيقونات حملة حقوق السمر في أميركا و الصورة دي إتصورت سنة 1965 بعد ما طلع قرار بوقف العمل بقانون التفرقة العنصرية ضد السمر في المواصلات العامة.
سنة 1970 إنت كنت تقدر بعنيك تشوف Steel Structure بتاع ناطحتي السحاب برجي التجارة العالميين في مدينة نيويورك الأميريكية اللي وقعوا في هجمات 11 سبتمبر 2001.
البنوتة الشيكولاتاية دي تبقي (ماري والاس Marry Wallace) و دي تبقي أول بنت سمرا تشتغل سواقة أوتوبيس في أميركا في مدينة شيكاغو سنة 1974.
أهو ده اللي يتقال عليه فريق العمل .. سنة 1977 نزل للسينمات الفيلم اللي بقي السلسلة الأشهر في تاريخ السينما Star Wars و ده طاقم العمل بتاعه.
الصورة اللي لسه عايشه من كارثة إنفجار مفاعل تشيرنوبل .. الصورة دي إتصورت يوم 26 إبريل 1986 صباحية يوم الإنفجار و اللي صورها كان الصحفي الروسي (إيجور كوستين Igor Kostin) .. حتلاحظ حاجة إن الصورة منمشة شوية و ده سببه الإشعاع النووي اللي كان بيبوظ فيلم التصوير بتاع الكاميرات.
يوم 23 أغسطس 1989 حاول تتخيل إن في عصر ما قبل الموبايلات و السوشيال ميديا فيه 2 مليون بني أدم من 3 دول مختلفة اللي هم لاتفيا و أستونيا و ليثوانيا إتفقوا مع بعض إنهم يعملوا سلسلة بشرية علي إمتداد 600 كيلومتر مشتركة بين الدول الثلاثة عشان يوصلوا للعالم كله إنهم عايزين يستقلوا عن الكيان اللي اسمه الإتحاد السوفيتي اللي هم شايفين إن إنضمام بلادهم ليه مجابلهمش غير الفقر و الجوع و المرض.
واحدة من أجمل الصور في الألبوم إتاخدت سنة 1988 للمفاوضات بين الرجل اللي علي الشمال و ده يبقي مدير حديقة حيوان بلجراد اللي كانت وقتها عاصمة جمهورية يوغوسلافيا و الشمبانزي اللي علي اليمين و اللي هربت من حديقة الحيوان و مدير الحديقة بيحاول يقنعها ترجع تاني.
برضا غريب عن النفس ضابط سابق في القوات البحرية السوفيتية بيعدي قدام بحارة بيدوله التحية العسكرية في مدينة ليننجراد اللي إنت دلوقتي عارفها باسم سانت بطرسبرج سنة 1989 قبل سنة واحدة من إنهيار الإتحاد السوفيتي.
ده مش حلبة سباق .. نقول كمان .. ده مش حلقة سباق .. ده يبقي السطوح بتاع مصنع شركة فيات الإيطالية قديم في مدينة تورين و اللي كانوا بانيين عليه حلبة سباق عشان يختبروا العربيات اللي هم بيصنعوها أيام ما كانت FIAT اسم له تقله في السوق.
الصورة اللي من ساعتها و (مونيكا بيلوتشي Monica Bellucci) بقت أيقونة من أيقونات الموضة لما سنة 1995 بدأت شغلها مع مصمم الأزياء الطلياني (جياني فيرزاتشي Gianni Versace)
ده التراث بتاع الديموقراطية الأميريكية حول العالم .. سنة 1967 وقت حرب فييتنام الفيتناميين بقوا بيحفروا الخنادق الصغيرة دي علي الأرصف بتاعة الطريق عشان لما صفارات الإنذار ترن في مدينة هانوي في فيتنام الشمالية عشان تحذر المواطنين من غارة أميريكية الناس تجري تروح تستخبي فيهم.

المصادر:

مهندس ميكانيكا بحب الصحافه و الكتابه .. مؤمن بان من حق كل بني ادم انه يعرف الحقيقه ورا الخبر .. رسالتي انك تفهم حقيقه اللي بيحصل عشان لما تقرر رايك تكون فاهم انت بتقرر علي اي اساس

اترك تعليق

بريدك الالكتروني لن ينشر. يجب ملئ الخانات بعلامة *

من فضلك ادخل التعليق!

من فضلك ادخل الأسم!

من فضلك ادخل البريد الالكتروني!من فضلك ادخل بريد الكتروني صحيح!