إسأل أي حد عاش فترة أو إشتغل في الخليج هل بمجرد النظر كده تقدر تميز أهل جنوب شرق أسيا من بعض؟ .. يعني لو قدامك ثلاثة واحد من باكستان والثاني من الهند والثالث من بنجلاديش تقدر من بصة واحدة تقول مين فيهم جه من أنهي بلد؟ .. أتحداك تعرف .. مش عنصرية والله بس زي ما إحنا كعرب وكمصريين بالنسبة لعيونا أهل جنوب شرق أسيا من اليابان وكوريا الجنوبية والصين شبه بعض وبالنسبة لينا أهل جنوب شرق أسيا برده شبه بعض هم كمان شايفنا كده .. عنيهم مش لاقطة إننا كمصريين ملامح وشنا غير بعض .. بس النهاردة عايزين نتكلم عن حالة خاصة شوية من دول جنوب شرق أسيا .. الحالة الخاصة دي هم شوية بني أدمين من وسط قبيلة اسمها بوتون Buton Tripe عايشين علي واحدة من جزر دولة أندونيسيا والمميز فيهم إن زي ما إنت شايف ربنا خلقهم عينيهم زرقاء.
بداية إن الناس تبدأ تسمع عن أهل القبيلة دي لما بتاع جيولوجيا ومصور فوتوغرافي في وقت فراغه اسمه (كورشنوي باساريبو Korchnoi Pasaribu) صورهم ونشر صوره دي علي السوشيال ميديا ومن ساعتها ناس كتير كل اللي بتفكر فيه هو إزاي؟ إزاي الناس دي مش بس عينيها الإثنين زرق ده إنت ممكن تلاقي واحد عينه اليمين زرقا والثانية عسلي عادي جداً؟ .. إجابة السؤال ده نشرته مجلة علمية أميريكية اسمها U.S. National Library of Medicine واللي شرحت إن الظاهرة دي سببها تحور جيني اسمه متلازمة واردينبيرج Waardenburg Syndrome وده ممكن يخليك مش سامع بودن من ودانك أو يغير لون بشرتك أو لون عنيك .. زي ما قلتلك ده تحور جيني نادر مش حتلاقيه كتير بس بسببه الناس دي ربنا خلقها بالجمال الرباني ده .. برده مهم تبقي عارف إن مش كل أهل القبيلة كده إنما مجرد نسبة بسيطة منهم اللي عندهم متلازمة واردينبيرج.
المصدر:
- مقالة بعنوان People in this Indonesian tribe have dazzling blue eyes. Wait, but how? نشرت في مجلة Mashable وده لينك المقالة الأصلية:
https://sea.mashable.com/culture/12666/people-in-this-indonesian-tribe-have-dazzling-blue-eyes-wait-but-how
