سنة 2018 شركة تطوير عقاري صيني طلعت بمشروع كانوا متخيلين إنه حيأكلهم الشهد حيتعمل في مدينة كيي Qiyi اللي في ولاية تشينجدو Chengdu وحاول تتخيل نفسك رجل معاك فلوس عايز تشتري شقة في كومباوند بس يكون فيه فكرة مطرقعة تخليك تتباهي بنفسك وسط صحابك .. تخيل إنك سمعت عن كومباوند عبارة عن عمارات والعمارات نفسها عبارة عن غابة .. أيوة .. إحنا جبنالك الغابات الإستوائية لحد عندك .. تفتح البلكونة تلاقي الخضرة والعصافير والطيور بتزقزق في جو شاعري جميل .. حاجة في منتهي أفلام الكرتون يعني .. في إبريل 2020 كانت كل ال826 شقة في الكومباوند كلهم إتباعوا .. جميل .. تيجي تشوف فيه كام واحد ساكن في الشقق دي؟ .. تقريباً عشرة .. عشر شقق بس عايش فيها بني أدمين من أصل 826 شقة مهجورة .. والسبب؟ .. الناموس .. الناس إكتشفت إن مش بس العصافير والهدهد والكروان اللي بيحبوا يعيشوا في الشجر .. الناموس كمان بيحب الخضرة .. عشان مفيش ناس عايشة في الكومباوند فبقي منظره زي ما إنت شايف كده ولا كإنك بتتفرج علي فيلم I’m Legend بتاع (ويل سميث Will Smith).
المصادر:
- مقالة بعنوان Welcome to the jungle: Plants overrun Chinese apartment blocks نشرت في جريدة Bangkok Post وده لينك المقالة الأصلية:
https://www.bangkokpost.com/world/1985687/welcome-to-the-jungle-plants-overrun-chinese-apartment-blocks - مقالة بعنوان Welcome To The Jungle: Plants Overrun Chinese Apartment Blocks نشرت في جريدة International Business Times وده لينك المقالة الأصلية:
https://www.ibtimes.com/welcome-jungle-plants-overrun-chinese-apartment-blocks-3045732
