تابعونا

البوم صور

محطة قطار جياشينغ .. الصين حلوة.

سنة 1907 الحكومة الصينية عملت محطة قطر و المحطة دي إتسوت بالأرض في الغزو الياباني للصين سنة 1937 .. جت دلوقتي الحكومة الصينية قالت إنها عايزة تعمل مشروع إعادة إحياء محطة القطر دي و المشروع الحقيقة كبير مش صغير علي مساحة 354 كيلومتر مربع و دي مش غلطة مطبعية.

14 يناير، 2021 943

تحت شعار الهندسة حلوة بس إنت اللي عايش في مصر فالإخوة في شركة الإستشارات الهندسية الصينية MAD قرروا يفقعوا مرارتنا و يعملوا مشروع يخلينا نبصله و نقول وه .. فيه مدينة إسمها جياشينغ Jiaxing و دي مدينة يدوبك ساعة بالعربية من مدينة شنغهاي تاني أكبر المدن الصينية .. المهم إن مدينة جياشينغ دي تقدر تقول عليها مدينة إلي حد ما زراعية شوية أو علي الأقل ده التراث بتاعها .. دي المدينة اللي الصينيين عرفوا فيها سر خيوط الحرير اللي بتطلع من دودة القز .. المدينة دي خير ربنا فيها كتير لدرجة إن إسمها اللي هي معروفة به هو أرض العسل و اللبن .. سنة 1907 الحكومة الصينية عملت محطة قطر و المحطة دي إتسوت بالأرض في الغزو الياباني للصين سنة 1937 .. جت دلوقتي الحكومة الصينية قالت إنها عايزة تعمل مشروع إعادة إحياء محطة القطر دي و المشروع الحقيقة كبير مش صغير علي مساحة 354 كيلومتر مربع و دي مش غلطة مطبعية .. دي حتبقي مساحة المشروع و عشان تفهم النقطة دي بص علي الصور و إقرأ الوصف بتاع كل صورة.

ده تصور لقاعة الدخول للمحطة .. هي الحقيقة مش قاعة ده مبني كامل بس هي الفكرة إن أي مبني فوق الأرض حيتبني حيتحط في السطوح بتاعه خلايا شمسية تولد كهرباء.
المحطة نفسها حتبقي تحت الأرض .. القطارات و القضبان و الرصيف .. اللي حيبقي فوق الأرض هو مباني ترفيهية و تجارية.
بما إن محطة القطر حتتبني تحت الأرض فده حيخلي المساحة الخزعبلية دي فوق الأرض فاضية فزي ما إنت شايف كده حتتعمل مش جنينة دي حتبقي غابة.
الConcept المعماري زي ما إنت شايف مبهر جداً بس الله يكون في عون مهندس الصرف اللي حيصمم شبكة صرف المطر و مهندس الحريق اللي حيتقاله تعالي ورينا حنحمي الحتة دي من الحريق إزاي؟
ده نفق بيوصل بين أرصفة المحطة زي النفق بتاع محطة مترو الشهداء كده بالضبط بس خلي بالك .. سبب المساحة اللي إنت إحتمال تشوفها غير منطقية دي في التصميم المعماري هي إن المهندسين بتوع MAD بيبصوا لقدام .. إنت بتتكلم عن محطة قطر متوقع ليها خلال سنين قليلة إن عدد المسافرين اللي يستخدموها يوصل 5.28 مليون بني أدم .. في وقت الذروة دي محطة حيخشها 2,300 بني أدم كل ساعة و ده يفسرلك المساحات دي.
الLandscape لوحده حيبقي وهمي .. إنك تروي المساحات دي كلها من النجيلة و الجناين حيخلي المشروع رغم إنه زي ما قلتلك هو مجرد محطة قطر إنه يبقي مشروع تقيل أوي هندسياً.

المصدر:

مقالة بعنوان China is building a railway station in a forest and it is absolutely stunning نشرت في موقع Luxury Launches و ده لينك المقالة الأصلية:
https://luxurylaunches.com/travel/china-is-building-a-railway-station-in-a-forest-and-it-is-absolutely-stunning.php

مهندس ميكانيكا بحب الصحافه و الكتابه .. مؤمن بان من حق كل بني ادم انه يعرف الحقيقه ورا الخبر .. رسالتي انك تفهم حقيقه اللي بيحصل عشان لما تقرر رايك تكون فاهم انت بتقرر علي اي اساس

اترك تعليق

بريدك الالكتروني لن ينشر. يجب ملئ الخانات بعلامة *

من فضلك ادخل التعليق!

من فضلك ادخل الأسم!

من فضلك ادخل البريد الالكتروني!من فضلك ادخل بريد الكتروني صحيح!