لينك التسجيل الصوتي للمقالة علي Sound Cloud:
https://soundcloud.com/user-112011687-312727988/zeucwsuerbxm?utm_source=clipboard&utm_medium=text&utm_campaign=social_sharing
مشكلة التاريخ الأزلية إن أي حد ممكن ياخد أحداثه يفسرها علي مزاجه عشان يبين نفسه إنه صح .. خليني أديلك مثال بسيط علي كده بأفغانستان .. من كام يوم طلعلنا (دونالد ترامب) عشان يتكلم عن هو بالصلاة علي النبي ناوي يهبب إيه في أفغانستان فقعد يهبد هبد السنين والحقيقة أنا بس حابب هنا إني أنقلك كلامه نصاً عشان تعرف إحنا بنتعامل مع عقلية شكلها ازاي:
“روسيا اللي كان اسمها الإتحاد السوفيتي والسبب اللي خلي الإتحاد السوفيتي يبقي روسيا بس هو أفغانستان لإن الحرب في أفغانستان فلستهم .. السبب اللي روسيا دخلت أفغانستان عشانه هو الإرهابيين اللي كانوا عمالين يعدوا الحدود .. الروس كان عندهم حق يخشوا أفغانستان بس المشكلة إن الحرب كانت جامدة أوي وبحلفلكوا والله هم فلسوا بسببها ورجعوا تاني يتقال عليهم روسيا بعد ما كان بيتقال عليهم الإتحاد السوفيتي .. انتوا عارفين إن فيه حتت كتير بتسمعوا عنها في الأخبار مبقتش تبع روسيا بسبب أفغانستان”
بص بقي هو قال كام معلومة غلط :
- روسيا مكنتش الإتحاد السوفيتي.
- روسيا كانت أكبر دولة من ال15 دولة اللي مع بعض شكلوا الإتحاد السوفيتي.
- (ترامب) بقي أول رئيس غربي يطلع قدام الناس يدافع عن قرار الإتحاد السوفيتي غزو أفغانستان.
- الإرهاب مكنش سبب إن السوفييت يدخلوا أفغانستان .. نقول كمان .. الإرهاب مكنش السبب .. (ترامب) تقريباً لخبط بين الغزو السوفيتي لأفغانستان وبين الحرب بين روسيا والشيشان.
- بالورقة والقلم انهيار الإتحاد السوفيتي كان بسبب ميكس من المصايب ما بين الفساد اللي كان سوس في كل حتة في الدولة وانهيار أسعار البترول واللي كان الاقتصاد السوفيتي معتمد بشكل كبير علي فلوس تصديره وكمان إن في أواخر حكم رجل اسمه (ميخائيل جورباتشوف Mikhail Gorbachev) قرر إن مينفعش الحكومة السوفيتية أو زي ما بتتسمي الكريملين تفضل مسيطرة أوي كده علي كل حتة في البلد فلما بدأ يسيب الحبل علي الغارب كل حاجة وقعت.
إنك تقول إن الإتحاد السوفيتي إنهار بسبب غزو أفغانستان ده زي إنك تقول إن الزمالك مخدش الدوري في السنين اللي فاتت عشان مبيعرفش يكسب الأهلي في ماتشات القمة .. لا الحقيقة إن فيه مصايب كتير جوه الزمالك من رؤساء نادي شايفين نفسهم أكبر من النادي وإن مفيش حد بيعرف يشتري لاعيبه كويس للفساد جوه اتحاد الكورة للكائن اللزج اللي اسمه (تركي أل شيخ) .. إنك تختزل وتختصر مشاكل الزمالك والكرة المصرية كلها في نقطة إن والله الأهلي كعبه عالي علي الزمالك فانت كده بتستهبل .. الغزو السوفيتي لأفغانستان مكنش هو السبب الوحيد في انهيار الإتحاد السوفيتي ومكنش بسبب الإرهاب زي ما كيس الشيتوس ده بيقول .. الحرب دي كانت بسبب حاجة تانية خالص.
في إبريل 1978 وصل للحكم في أفغانستان الحزب الشيوعي الأفغاني اللي كان ماسكه واحد اسمه (نور محمد تراقي) .. المشكلة زي ما كتير منكوا توقع هو ازاي حزب شيوعي يعني الناس اللي فيه ملحدين مش معترفين بحاجة اسمها ربنا يحكموا بلد إسلامي زي أفغانستان؟ .. والله انت عندك حق عشان كده الدنيا كانت مولعة في البلد .. الحكومة الشيوعية الجديدة بقت بتعدم قادة الحركات الإسلامية زي ما انت بتقتل النمل في مطبخ بيتكوا كده .. الخناقة بين الحكومة الشيوعية وبين الحركات الإسلامية اللي إحنا دلوقتي بنسيمها المجاهدين الأفغان وصلت لمرحلة صعبة أوي.
في الوقت ده أفغانستان كان بيحكمها رجل ضلالي اسمه (حفيظ الله أمين) .. فكك من إسمه .. هو لا كان حفيظ ولا أمين .. الرجل ده كان اللي ماسك الحزب الشيوعي الأفغاني يعني كان ولاءه للاتحاد السوفييتي .. ده بالضبط زي ما يكون الإتحاد السوفيتي مأجر أفغانستان للرجل ده بس المشكلة إن (حفيظ الله أمين) ده كان بيخلي السوفييت بيشدوا في شعرهم .. مبدأياً كده هو كان خايف علي كرسيه لدرجة إنه دبر عملية اغتيال (نور محمد تراقي) وده كان اللي ماسك الحزب الشيوعي الأفغاني قبله لإنه كان حاسس إنه هو بيدبر لمؤامرة عشان يطيح به .. (حفيظ الله أمين) كان رجل مفتري والمصيبة إنه مكنش عارف يحكم وبسبب ده حصل كذا تمرد ضد حكومته في المناطق النائية من أفغانستان وكل ده كان مخلي السوفييت علي أعصابهم .. افرض فعلاً لو قامت ثورة ضده؟ افرض لو الأمريكان وقفوا في صف الثورة دي وخلوا حكومة ديموقراطية مُنتخبة موالية ليهم تحكم أفغانستان؟ ساعتها الأمريكان حيكونوا وصلوا لعتبة باب الإتحاد السوفيتي ودي حاجة مينفعش يتسكت عليها.
كان فيه كذا حل عشان السوفييت يخلصوا من (حفيظ الله أمين) .. كان ممكن يقفوا جامد ورا حد تاني في الانتخابات الداخلية للحزب وبكده يكونوا قلشوه بس بالأدب .. كان ممكن يهددوه بإنهم مش حيقفوا في ظهره لو متعدلش .. كان فيه حلول كتير الحقيقة بس السوفييت لجأوا لأغبي حل وهو إنهم يحاولوا يغتالوه .. منطق السوفييت هو إننا مش عارفين نخلص منه يبقي نقتله ونجيب حد مكانه .. طيب حمشي وراكوا لحد الأخر .. في ديسمبر 1979 الطباخ بتاع (حفيظ الله أمين) طلع عميل للمخابرات السوفيتية KGB وقالوله حطله سم في الأكل .. الطباخ تفكيره هداه إنه يحطله السم في كوباية الكوكاكولا بتاعته أصل (حفيظ الله أمين) بعيد عنك كان مدمن كوكاكولا بس الستيم بتاع الكوكاكولا طير السم منها .. السوفييت قالوا مش مشكلة نحاول تاني .. بعدها بأسبوعين سمموه تاني ولما (حفيظ الله أمين) وقع من طوله في القصر الرئاسي رجالته اتصلوا بالسفارة السوفيتية في العاصمة كابول إنهم يبعتوا طقم دكاتره بسرعة .. المشكلة إن الدكاتره اللي في السفارة محدش قالهم إن دي محاولة اغتيال قامت بيها المخابرات بتاعة بلدهم فراحوا عشان يلحقوه وقدروا إنهم ينقذوه.
(حفيظ الله أمين) ده عمل للسوفييت هسهس لدرجة إنهم قرروا يغزوا أفغانستان كلها لمجرد إنهم يخلصوا منه .. أنا مش بهزر ومش ببالغ .. الغزو السوفيتي لأفغانستان حصل عشان السوفييت يخلصوا من رجل واحد .. فعلاً ضمن عملية الغزو وحدة قوات خاصة سوفيتية اقتحمت القصر الرئاسي وقتلت (حفيظ الله أمين) يوم 24 ديسمبر 1979 والسوفييت حطوا مكانه واحد تاني اسمه (بارباك كرمال) .. في الوقت ده الحسبة كانت بسيطة .. تقريباً البلد كلها هايجة علي الحكومة الشيوعية وكتير من عساكر الجيش هربوا وانضموا للمجاهدين .. يبقي بقاء (بارباك كرمال) في الحكم معتمد علي وجود ال85,000 عسكري سوفيتي في أفغانستان .. طالما هم موجودين يبقي الرجل ده حيكمل .. لو مشيوا فالرجل ده حيمشي.
دلوقتي دماغ السوفييت كانت إن أنا عايز أخلص من خطر المجاهدين .. حلو .. الناس دي صحيح معاها سلاح بس هم محتاجين أكل وشرب ودعم ومكان يناموا فيه وكل ده بيوفره الأهالي المدنيين اللي مقتنعين بنفس اللي المجاهدين شايفينه وهو إن السوفييت قوة احتلال شيوعية كافرة بالله عايزه تخلي اللي يحكم البلد رجل كافر بالله زيهم .. يبقي أنا محتاج أحرم المجاهدين من دعم الأهالي .. حلو أوي .. السوفييت هرشوا في رأسهم شوية يفكروا وملقوش حل غير الدم .. السوفييت كانوا بيخشوا قرية معروف عنها إن فيها ناس بتقدم مساعدات للمجاهدين يقوموا جايبين عليها واطيها .. أي حاجة بتمشي علي الأرض بيموتوها .. بني أدم .. حيوان .. مش حتفرق .. العساكر السوفييت يخشوا القرية أو المدينة وأهل البلد اللي مهربوش بيتم استجوابهم وتعذبيهم كمان لحد ما يعترفوا أو يدلوا السوفييت علي مكان المجاهدين .. لو السوفييت وصلوا لمعلومة مفيدة بيبعتوا عساكرهم وطياراتهم الهليكوبتر في مهام بحث وتدمير عشان يخلصوا عليهم.
كان ممكن الغزو السوفيتي لأفغانستان يمشي زي السكينة في الجاتوه .. انت داخل بلد أساساً مكنتش طايقه الرئيس بتاعها عشان انت تمشيه وتجيب حد تاني .. بس تقول إيه الروس ودماغهم اللي زي الصرمة القديمة .. العساكر السوفييت كانوا بيتعاملوا بعنف مبالغ فيه .. ايديهم كانت فرطة أوي علي رصاصات مدافعهم الرشاشة .. الأسوأ من كده إن بسبب أخطاء في توزيع حصص الأكل والشرب عساكر سوفييت كتير مبقاش عندهم حل غير إنهم لما يدخلوا مدينة أو قرية ينهبوها عشان ياخدوا أكل وشرب .. مع الوقت المواطن الأفغاني بقي مش شايف حاجة قدامه غير إنه عايز يشرب من دم السوفييت .. المشكلة إن الأفغان مكانوش عارفين لا ياخدوا لا حق ولا باطل من السوفييت.
في الفترة من 1979 لحد سنه 1986 كان فيه أكتر من 100,000 عسكري سوفيتي في أفغانستان .. أغلب المدن الأفغانية كانت في إيدهم .. بس المجاهدين عايشين حياتهم في المناطق النائية .. الحرب كانت وصلت لمرحلة إن محدش كان عارف يوصل لحاجة .. لا السوفييت عارفين يخلصوا من المجاهدين .. ولا المجاهدين عارفين يعتبوا ناحية أي مدينة .. في المرحلة دي السوفييت بدأوا يطلعوا بره المدن بس كانوا بيكنسوا أي حاجة قدامهم .. أي حد يشوفوه بيتحرك بيموتوه .. القتل العشوائي ده خلق حالة هجرة جماعية لدرجة إن لما جت سنة 1982 كان فيه أكتر من 2.8 مليون لاجيء أفغاني في باكستان وحوالي 1.5 مليون لاجيء في إيران .. السوفييت مكنش فارق معاهم يستخدموا إيه عشان يطلعوا المجاهدين بره أفغانستان .. غاز سام وإستخدموا .. أسلحة كيماوية وإستخدموها .. نابالم وأستخدموه .. الدنيا بدأت تختلف بداية من سنة 1985 .. بداية من السنة دي حصل حاجتين قلبوا الطرابيزة كلها:
- أول حاجة إن وكالة المخابرات المركزية الأميريكية اللي إنت عارفها باسم CIA بدأت تدي للمجاهدين الأفغان صواريخ ستينجر Stinger المضادة للطيارات اللي بتتشال علي الكتف.
- تاني حاجة إن وصل لكرسي الحكم في الإتحاد السوفيتي رجل اسمه (ميخائيل جورباتشوف) .. من أول يوم استلم فيه الرجل ده الحكم وهو بيوعد بإنه حينسحب من أفغانستان .. أربع سنين وهو بيوعد ومش عارف ينفذ .. أربع سنين وخساير السوفييت سواء في الأرواح أو الفلوس عماله تزيد والأمريكان بيشوفوا اللي بيحصل وبيطلعوا لسانهم للسوفييت زي ما السوفييت كانوا بيطلعوا لسانهم للأمريكان بسبب حرب فيتنام.
أخر عسكري سوفيتي يطلع بره أفغانستان كان في فبراير 1989 وزي ما انت بتحتاج وقت عشان تعدي فترة انفصالك ببنت كنت فاكرها حتبقي أم عيالك وممكن تفضل شهور مخلص فلوسك علي المناديل ومعاها السجاير أو الأكل علي حسب دماغك وإنك تفضل تسمع في أغنية (أدهم سليمان) متفتحيش في جرح عيشته زمان لحده ما تمشي علي رملة الساحل تغنيها وانت بترقص زي الأهبل زيه فالروس كمان قعدوا 30 سنة عشان في الأخر يقبلوا باللي حصل .. لحد سنة 2008 مثلاً يعني بعد 19 سنة من انسحاب السوفييت من أفغانستان لو كنت تسأل أي حد في روسيا خصوصاً الناس اللي خدمت في أفغانستان عن رأيهم في اللي حصل حتلاقيهم مقتنعين بإنهم خسروا الحرب دي .. معلش يعني إيه اللي يخلي الأفغان ياخدوا السوفييت بالأحضان .. إحنا جينا قتلنا عيالهم وسرقنا أكلهم ودمرنا بيوتهم ومشينا.
من بعد 2008 لما (فلاديمير بوتين) مسك الحكم بدأت وجهة النظر دي تتغير .. بدأ الكلام علي إن إحنا مخسرناش في أفغانستان .. الأمريكان هم السبب .. لولا صواريخ ستينجر اللي CIA كانت بتديها للمجاهدين الأفغان لكانت أفغانستان دلوقتي جزء من الإمبراطورية السوفيتية .. المشكلة إن (بوتين) فعلياً واخد أميركا شماعة .. هو دخل سوريا وهو مش عارف هو داخل ليه يمكن بس إن لمجرد إنه يعكنن علي الأمريكان قام واقف في صف (بشار الأسد) .. أنا شخصياً مش شايف أي مبرر لده بس نقول إيه دماغ أمه جزمة قديمة .. كرر نفس الغلطة في أوكرانيا .. وبيرجع تاني يكررها في أفغانستان لإن الروس عاملين نفسهم وسيط في مفاوضات السلام بين طالبان وبين الحكومة .. أنا عايزك تفهم إن أخر حاجة (بوتين) عايزها هو استقرار أفغانستان ولا أوكرانيا ولا حتي سوريا .. هو مش فارق معاه أي ابن كلب غير إنه ينكد علي الأمريكان عيشتهم.
في نفس الوقت (ترامب) زي العبيط بيدي ل(بوتين) اللي هو عايزه خصوصاً في أفغانستان .. صحيح إن سنة 2014 أميركا أعلنت انتهاء عملياتها العسكرية في أفغانستان بس فضلت سايبه 14,000 عسكري هناك .. جه (ترامب) قام ساحب نصهم وساب 7,000 عسكري بس .. القرار ده خلي ضباط كتير جوه وزارة الدفاع يهيجوا علي (ترامب) من ضمنهم جنرال قديم زي (ستانلي ماكريستال Stanley McChrystal) اللي كان قائد القوات الأمريكية في أفغانستان.
الغزو السوفيتي لأفغانستان الناس شافته علي حسب وجهة نظرهم .. فيه ناس شافته علي إنه عملية عسكرية محسوبة أصل مستحيل قوة عظمي زي الإتحاد السوفيتي تتصرف بالغباء ده أكيد فيه خطة .. ناس شافت الغزو علي حقيقته وهو إنه هبد السنين وغلطة احتمال كبير تجيب أجل الإمبراطورية السوفيتية .. ناس تالتة شافته علي إنه تصرف دولة عظمي وصلت لمرحلة اليأس إنها شايفه دولة جاره ليها المفروض بيحكمها رجل ولاءه ليا بس بيخرب الدنيا لدرجة إنها بقت خايفة إن يحصل تمرد وهوبا ألاقي أميركا حطت ايدها في أفغانستان .. ناس شافت الغزو السوفيتي لأفغانستان علي إنه مجرد فرد عضلات وإنه احتلال لدولة أضعف عشان أسيطر علي ثرواتها.
أيا كان انت رأيك إيه .. اللي أنا اتعلمته إن مفيش حاجة في التاريخ اسمها صح وغلط .. التاريخ وجهة نظر .. فنصيحتي ليك بلاش لما تيجي تتكلم في التاريخ بالذات تتمسك برأيك لإن وجهة النظر بتتغير بظهور حقايق جديدة ويمكن نبقي غلطانين .. الغزو السوفيتي لأفغانستان استمر 9 سنين وفي السنين دي كلها مات حوالي مليون مدني أفغاني .. زود عليهم 90,000 من المجاهدين الأفغان ودي الناس اللي شالت سلاح ضد السوفييت .. زود عليهم 18,000 جندي حكومي أفغاني من اللي وقفوا مع السوفييت ضد المجاهدين .. وزود عليهم عشان خاطري 14,500 جندي سوفيتي .. كل دول ماتوا عشان إيه؟ .. شوية وهم إتباع للشعب السوفيتي عشان يبعتوا ولادهم لحرب ملهاش أي ستين لازمة .. حتي بعد ما السوفييت انسحبوا قامت الحرب الأهلية في أفغانستان واللي انتهت سنة 1996 بسيطرة حركة طالبان علي البلد اللي هي أساساً من اختراع باكستان .. لما السوفييت انسحبوا الغرب كان عارف إن البلد بقت عامله زي بلاعة المجاري الضاربة لو جيت تسلكها مش حينوبك غير وساخة ايدك والريحة الوحشة .. عشان كده محدش كان عايز يقرب من أفغانستان .. تقدر تقول إن الغرب عطي لباكستان شغلانة أفغانستان من الباطن.
المصدر:
- مقالة بعنوان The Truth About the Soviet War in Afghanistan نشرت في مجلة The Atlantic وده لينك المقالة الأصلية:
http://www.theatlantic.com/ideas/archive/2019/01/trump-was-wrong-about-soviet-war-afghanistan/579451/
