جرائم الحرب اليابانية في الحرب العالمية الثانية .. فن لعب دور الضحية.

خليك دايما عارف إن التاريخ ما هو إلا قصة والقصة متبقاش قصة لو اتحكت من كذا منظور .. دي كده بقت تحقيق صحفي .. القصة دايما بتكون من منظور واحد .. القصة هي ازاي بني أدم بيشوف الدنيا من شباك بلكونة بيته .. بتسمع علي طول انت جملة إن التاريخ بيكتبه المنتصر بس الكلام ده مش دايماً صح .. التاريخ بيكتبه اللي بيعرف يحكي قصته .. بيعرف يحبكها .. بيعرف يلعب علي مشاعر الناس اللي بتسمع القصة عشان تصدق وجهة نظره .. تاني .. القصة مش لازم تبقي صادقة أو حقيقية .. القصة لازم تتحس حتي لو كلها غلط ويمكن ده السبب ورا عشق الناس للدرما سواء بتتكلم عن مسلسلات أو أفلام أو مسرح .. الكلام ده مهم عشان موضوعنا النهاردة بيتكلم عن تطبيق عملي لازاي ممكن حد يغير التاريخ بمجرد إنه عرف يحكي قصة .. التاريخ اللي محدش يقدر ينكره هو إن جرائم الحرب اللي ارتكبتها اليابان خلال فترة الحرب العالمية الثانية حقاً وصدقاُ تخلي ابليس شخصياً يقف قدام اليابانيين ويقولهم عليا الطلاق انا مقارنة بيكوا أنا ملاك نازل من السما .. السؤال بقي .. هل حد فينا يعرف حاجة عن جرائم الحرب دي؟ .. لا .. القصة اللي اتحكت لينا إن اليابان هي الضحية بتاعة الحرب العالمية الثانية .. اليابان هي اللي اتضربت بالقنبلة النووية عشان الأمريكان الوحشين المتوحشين يفردوا عضلاتهم علي العالم .. النهاردة سوا حنفهم مع بعض ازاي اليابانيين بمنتهي العبقرية الحقيقة عرفوا يقلبوا نظرة العالم ليهم من شياطين الإنس لضحايا دمعتك بتنزل علشانهم.

عشان نفهم اللي حصل احنا محتاجين سوا نجاوب علي كذا سؤال:

• يا تري لما بنيجي نقول جرائم الحرب اليابانية احنا بنتكلم عن ايه بالضبط؟ .. هي الناس دي هببت ايه في عيشتها؟
• لو اليابانيين كانوا وحشين اوي كده .. ازاي فجأة الغرب بقي بيتعامل مع جرايمهم تحت مسمي المسامح كريم؟
• ايه دور القنبلة النووية في اللي حصل بالضبط؟
• ايه تفسير اللي حصل؟ .. بمعني أخر .. إيه اللي يخلي العسكري الياباني العادي قابل علي نفسه فكرة إنه يعمل البلاوي دي كلها؟

جرائم الحرب اليابانية .. شيء لا يصدقه عقل؟

انا ححاول اقولك شوية أرقام وأنا عارف كويس إنك حتبدأ تهرش في شعرك لما تقرأ الأرقام دي وحتحس إني بضحك عليك أصل مستحيل الأرقام دي تكون صح بس للأسف هي حقيقية :

• اليابان لوحدها خسرت 2.7 مليون بني أدم من شعبها سواء بتتكلم عن مدنيين أو عسكريين قصاد إن الأمريكان اللي كانوا العدو الرئيسي لليابانيين مات منهم 108 ألف بني أدم اللي هو يا حرام.
• خلال غزو اليابان لشبه الجزيرة الكورية فيه 533 ألف بني أدم كوري ماتوا .. الفلبين مات منها مليون بني أدم .. فيتنام ولاوس وكمبوديا عدد القتلي بتوعهم وصل 2 مليون .. الهند اللي كانت تحت سيطرة الانجليز وقت الحرب مات منها 2.8 مليون بني أدم .. أندونيسيا راح منها 4.3 مليون بني أدم.
• الصين لوحدها سيدي الفاضل اليابان مسئولة عن موت 26 مليون بني أدم من شعبها.

مبدأياً كده ضحايا جرائم الحرب اليابانية خلال فترة الحرب العالمية الثانية شاكب راكب حوالي 37 مليون بني أدم ماتوا .. اهدي كده علي نفسك وحاول تستوعب الرقم قبل ما تكمل .. أغلب اللي ماتوا كانوا مدنيين صينيين لما اليابان غزت الصين سنة 1937 يعني انت بتتكلم عن سنتين قبل ما الحرب العالمية الثانية تبدأ فعلياً بالغزو النازي لبولندا .. الغزو الياباني للصين الحقيقة كان مرحلة قاسية جداً من تاريخ البشر لدرجة إن التاريخ مش بيسمي اللي حصل غزو الصين أو احتلال الصين .. كتب التاريخ بتسمي اللي حصل في الست أسابيع بتاعة دخول اليابان للعاصمة الصينية اللي كانت وقتها اسمها نانكينج باسم اغتصاب نانكينج The Rape of Nanking .. انت متخيل ان مثلاً بريطانيا تحتل القاهرة والعساكر الانجليز يرتكبوا جرايم حرب شنيعة يصعب وصفها لدرجة إن التاريخ يسمي اللي حصل اغتصاب القاهرة .. ده حتي المغول لما دخلوا بغداد جرايمهم مكانتش بالفظاعة دي .. كتير من ال37 مليون اللي ماتوا تحت ايد اليابان كانوا أسري حرب .. بس يمكن اللي مات منهم كتير كانوا بنات من الصين وكوريا أجبروا علي انهم يشتغلوا في الدعارة.

فيه 4 جرايم حرب أساسية عملتها اليابان في سنين الحرب دي ومحتاجين نتكلم عنهم شوية عشان بس تبقي فاهم ومستوعب هي الناس دي عملت ايه والأهم هي عملت كده ازاي:

اغتصاب نانكينج .. زي ما حنشوف كمان شوية اليابان بدأت تاخد الصين حتة حتة بداية من سنة 1931 لما خدت منشوريا .. للعلم بالشيء يعني منشوريا دي اللي هي ولاية من ولايات الصين مساحتها تعتبر 3 أضعاف مساحة بلد زي فرنسا وكان عايش فيها وقتها فوق 30 مليون بني أدم بس عشان منشوريا وقتها مكنتش رسمياً جزء من التراب الصيني فمحدش بيقول علي احتلال اليابان لمنشوريا انه بداية غزوها للصين وده طبعاً علي حسب انت قاعد في مدرجات مين .. بعدها ب6 سنين بدأ غزو اليابان لساحل الصين علي المحيط الهاديء في أغسطس 1937 لما اليابان ضربت شنجهاي .. في الوقت اللي الصين في حرب أهلية .. في الوقت اللي القوات المسلحة اليابانية متفوقة بسنين ضوئية عن أي دولة تانية بتطل علي المحيط الهاديء يمكن باستثناء أمريكا .. رغم كل ده المقاومة الصينية في شنغهاي صمدت 3 شهور كاملة عشان المدينة تقع في ايد اليابانيين في نوفمبر 1937 .. اللي فاضل من القوات الصينية اللي انسحبت من شنجهاي راحت علي العاصمة وقتها نانكينج .. عايزك تعرف إن المسافة من شنغهاي لحد نانكينج حوالي 350 كيلومتر وفي كل متر توصله القوات اليابانية اللي رايحة علي العاصمة مفيش كائن حي بيفضل عايش .. مفيش حيطة بتفضل علي حالها .. عشان بس أحسسك بكم الدمار اللي القوات اليابانية كانت بتعمله فيه مدينة صغيرة في النص كده بين شنغهاي ونانكينج اسمها سوتشاو .. سوتشاو في الوقت ده كان عايش فيها حوالي 350 ألف بني ادم .. لما القوات اليابانية سابتها وكملت سكتها لنانكينج كان فاضل في المدينة 500 بني أدم بس .. انت مستوعب كم الدمار .. الطاعون مكنش بيقتل بالبشاعة دي ولا بالكم ده .. فيه مدن في الصين راح منها ضحايا قد اللي راح من دول كاملة في أوروبا خلال الحرب العالمية الثانية.

في ديسمبر 1937 القوات اليابانية دخلت عاصمة الصين وقتها وكان اسمها نانكينج عشان تبدأ أبشع جريمة حرب في تاريخ البشر الحديث .. اللي حصل في ست اسابيع كفيل انه يخليك تحس إن البشر ده المفروض يتمحوا من الوجود ودي مش مبالغة .. نانكينج بالنسبة للغزو الياباني للصين كانت شبه ستالينجراد كده بالنسبة للنازيين في غزوهم لروسيا .. مدينة تعتبر رمز لصمود البلد .. نانكينج هي العاصمة .. سقوطها يعني سقوط البلد .. ولإن نانكينج مهمة فشخ فبأمر مباشر من الإمبراطور ودي حتة في غاية الأهمية وحنعرف أهميتها بعدين صدر قرار بتعيين عم الإمبراطور شخصياً الأمير (أساكا) عشان يبقي قائد عام للقوات اليابانية المسئولة عن دخول نانكينج اللي الحقيقة مخدتش غلوة في ايدهم وسقطت بعد 4 أيام .. وهنا ومتفهمش ايه اللي حصل والعساكر اليابانيين اللي دخلوا المدينة زي ما يكونوا اتجننوا.

العساكر اليابانيين كانوا بيعملوا مسابقات لاعدام الناس في الشارع بسيوف الكاتانا اللي هي السيوف بتاعة الساموراي .. بتيجي مثلاً وحدة قتالية مسكت 100 مدني صيني يقوم كل عسكري ياباني يتنافس مع زمايله هو مين فيهم يقدر يقطع راس اكتر عدد من المدنيين الصينيين في أقل وقت .. العساكر اليابانيين كانوا بيغتصبوا الستات قدام عائلاتهم .. فيه صور كتير لستات صينيات حوامل كانوا بيتقتلوا في الشارع والجنين بيعلقوه علي السونكي بتاع البنادق في الشوارع .. دي جرايم مكانها مسلسل زي The Walking Dead .. لما الناس جت تحسب فيه كام مدني اتقتل في اغتصاب نانكينج لقينا اننا قدام ما بين 200,000-300,000 بني أدم اتقتلوا في شهر ونص .. الوضع كان مرعب لدرجة إن الموظفين بتوع السفارة الألمانية في بكين بعتوا جوابات لحكومة بلدهم إن اللي بيحصل ده مينفعش يكمل وإن لازم (أدولف هتلر) شخصياً يكلم الأمبراطور الياباني (هيروهيتو) أو رئيس الوزراء (هيدوكو توجو) إن اللي بيعمله العساكر اليابانيين في الصين بيهدد التحالف بين ألمانيا النازية واليابان .. انت مستوعب اللي انا بقوله .. الألمان اللي كانوا بيرموا اليهود في الفرن كانوا مرعوبين اللي بيعمله العساكر اليابانيين  .. النازيين كانوا شايفين اللي بيحصل ده كتير وميتسكتش عليه.

الوحدة 731 .. غزو اليابان للصين متمش مرة واحدة زي ما قلتلك .. هو تم علي مراحل .. أول حتة من تورتة الصين تاكلها اليابان كانت منشوريا في شمال الصين واللي بمجرد ما بقت تحت ايد اليابان اتعملت فيها قاعدة عسكرية سموها الوحدة 731 في حتة اسمها بينج فانج فضلت شغالة لحد استسلام اليابان والوحدة دي كانت مخصصة للابحاث العلمية علي أسري الحرب وكانت حقاً وصدقاً فيلم SAW بس بحق وحقيقي .. العلماء اليابانيين اللي الحقيقة مينفعش يتقال عليهم علماء دول سفاحين ميفرقوش عن (هانيبال ليكتر) .. الناس دي كانوا بيشرحوا الأسري وهم أحياء من غير بنج عشان يشوفوا هو الجسد البشري يقدر يستحمل ألم لحد امتي .. من ضمن الجرائم اللي كانوا بيعملوها أنهم يجيبوا أسير يستأصلوا منه أعضاءه الداخلية عضو ورا الثاني عشان يشوفوا هو امتي الجسد البشري حيموت .. الأسري كان بيتجرب فيهم أي سلاح جديد تعمله القوات المسلحة اليابانية من قنابل يدوية وقاذف لهب .. بس يمكن كل ده كوم وفكرة إن مئات الأف من الاسري الصينيين اللي ماتوا بسبب تجارب الأسلحة الكيماوية والبيولوجية اللي كانت بتتعمل فيهم ده كوم تاني خالص.

الدعارة المنهجية .. اللي حصل إن خلال فترة الحرب فيه أكتر من 200,000 بنت من كوريا والصين اتخطفوا عشان يخلوهم حاجة بيسموها بنات الراحة أو Comfort Women اللي هو بنت بيدوها لوحدة قتالية يابانية عشان العساكر اليابانيين يغتصبوها .. في بنت شهدت بعد الحرب إن 40 عسكري ياباني اغتصبوها علي مدار 24 ساعة .. في اغتصاب نانكينج لوحدها اتسجلت فوق 20 الف حالة اغتصاب ودي الحالات المسجلة بس.

معاناة أسري الحرب .. الشهادة لله أسري الحرب اللي كانوا بيقعوا تحت ايد اليابانيين كانوا بيتفشخوا .. في ابريل 1942 ودي المرحلة اللي اليابان كانت دايسة فيها علي وش أمريكا في الحرب اليابانيين احتلوا جزيرة باتان في الفلبين ولما احتلوها اسرولهم حبة عساكر أمريكان وفلبينيين بيتراوح عددهم ما بين 72,000-78,000 أسير .. الأسري دول أُجبروا انهم يمشوا علي رجليهم حوالي 100 كيلومتر ودي الرحلة اللي مات فيها الاف الاسري اللي لما وصلوا لمعسكر الاعتقال مات منهم الاف تانيين .. وهي دي النقطة اللي انت محتاج تفهمها .. سواء النازيين او اليابانيين كان تحت ايدهم أسري حرب من قوات الحلفاء .. نسبة أسري الحرب اللي ماتوا في معسكرات الاعتقال النازية يدوبك 4% بس من اجمالي عدد الاسري .. قصاد إن في معسكرات الاعتقال اليابانية النسبة كانت 30% .. يمكن معاناة أسري الحرب الأمريكان في معسكرات الاعتقال اليابانية جسدتها قصة العسكري (لويس زامبريني) .. ده كان عداء أوليمبي أصلاً ولما الحرب العالمية الثانية ولعت بقي فرد من ضمن طاقم واحدة من القاذفات الأمريكية في المحيط الهاديء .. في واحدة من مهماته الطيارة بتاعته وقعت والرجل فضل في المياه 47 يوم مستني حد ينقذه .. ويوم ما انقذوه اللي لقاه كان عساكر يابانيين عشان يرموه في معسكر اعتقال .. المعسكر اللي هو كان فيه كان ماسكه لواء في الجيش الياباني اسمه (موتشهيرو واتانابي) حنجيب سيرته كمان شوية .. علي فكرة قصة (لويس زامبريني) تقدر تشوفها في فيلم حلو أوي بيحكيها اسمه Unbroken اخرجته (أنجلينا جولي) بالمناسبة.

جت منين فكرة المسامح كريم؟

الساعة 12 يوم 15 أغسطس 1945 مفيش مواطن ياياني مكنش بيسمع خطاب الإمبراطور (هيروهيتو) اللي كان بيعلن فيه استسلام اليابان .. الحقيقة إن الخطاب ده كان حاجة كبيرة أوي بالنسبة لليابانيين لكذا سبب .. زي ما حنشوف كمان شوية بالإمبراطور بالنسبة لليابانيين كان إله فحاول تتخيل إن ربنا اللي انت بتعبده طلع يلقي خطاب في الراديو اللي هو حرفياً ومش ببالغ اليوم ده بالنسبة لليابانيين كان بيعادل يوم القيامة .. الحاجة الثانية المهمة إن لسنين وسنين والكلام اللي المواطن الياباني البسيط بيسمعه إن الإمبراطور بصفته إله اختار الشعب الياباني عشان يبقي شعب الاله المختار اللي قدره إنه يحكم أسيا .. كل طلقة بتتصنع .. كل دبابة بتطلع من المصنع .. كل عسكري بيضحي بحياته .. كل دي تضحيات في الحرب المقدسة عشان الشعب الياباني يحكم أسيا وكل شعوب أسيا تسجد للإمبراطور .. الإله المقدس لليابانيين .. فجأة كل ده راح .. حاول قبل ما تكمل قراية تستوعب هي الناس دي في اللحظة دي كانوا حاسين بايه .. كل حاجة هم كانوا مؤمنين بيها .. كل حاجة هم عاشوا عشانها وماتوا عشانها .. كل ده اترمي في الزبالة .. بمجرد ما الخطاب خلص كان 7 مليون عسكري ياباني سلم سلاحه .. خلال اسبوع كان فوق 1000 من قادة القيادة العسكرية اليابانية انتحروا ومن ضمنهم كان (هيدوكو توجو) اللي حاول ينتحر بس الأمريكان لحقوه … ملايين الأدلة والوثائق والخطابات السرية والتقارير بتاعة المخابرات كلها اتحرقت .. خلال اسبوع واحد كانت اليابان حرقت ماضيها .. الاسبوع ده اللي كان الاسبوع الانتقالي من اعلان الاستسلام لحد نزول أول عسكري أمريكاني علي التراب الياباني كان حرج جداً ومهم فشخ .. ده الاسبوع اللي كل الأدلة اللي بتثبت تورط الإمبراطور في أي حاجة اتدمرت .. زي ما تقول كده اليابان كانت بتغسل ايدها من الدم اللي هي سيحته.

لما الجنرال (دوجلاس ماك أرثر) قائد القوات الأمريكية في المحيط الهاديء وصل طوكيو يوم 30 أغسطس 1945 هو كان جاي وحاطط في دماغه هو ناوي يعمل ايه .. الخطة إن اليابان لازم تتفرمط .. اليابان لازم يعاد تشكيلها مجتمعياً وعسكريا واقتصادياً .. أول خطوة كانت إن اليابان تتخلص من كل ما له علاقة بكلمة جيش .. اليابان حتبقي دولة بلا سلاح .. دولة بلا قوات مسلحة .. كل دبابة فاضلة وكل طيارة لسه متدمرتش وكل سفينة لسه طافيه علي وش المياه حيتم تدميرها .. المصانع اليابانية من هنا ورايح مش حتصنع لا سلاح ولا ذخيرة .. بس كل ده الجزء السهل في الموضوع .. الجزء الصعب هو يا تري حنعمل ايه عشان نعوض الاسبوع الفشيخ اللي راح واليابان حرقت فيه تاريخها ده .. حنحاسب القيادة السياسية والعسكرية اليابانية ازاي .. علي الورق المفروض الكلام سهل و واضح .. حنشوف اللي عملناه مع النازيين ونطبقه هو هو في اليابان.

لما الحرب العالمية الثانية في أوروبا خلصت كل اللي شارك في الحرب وكان لابس بدلة ميري ألماني كان بيتحط عليه .. لو انت جنرال في قيادة القوات المسلحة النازية كنت بتتحاكم في محاكمات نورمبيرنج .. لو انت كنت عسكري فبعد الحرب المجتمع كان بيتعامل معاك علي انك عندك مرض معدي مثلاً اللي هو حتي أهلك مش بيسلموا عليك في الشارع .. كل مظاهر النازية بقت ممنوعة بالقانون .. بس هو السؤال المهم حتعمل ده في اليابان ازاي .. الناس كلها كانت عارفه الاوامر اللي جت من واشنطن للجنرال (ماك أرثر) وهي اعتقال كل من شارك في جرايم الحرب اليابانية خلال الفترة من 1931 لحد سنة 1945 وأهمها جريمة ضرب الاسطول الأمريكي في بيرل هاربور .. انت ممكن تشوف الموضوع واضح بس استني لما تعرف إن خلال 14 سنة اليابان عدي عليها 16 حكومة مختلفة .. يعني بتتكلم عن 20 وزير خارجية مختلف .. 15 وزير مالية .. 15 رئيس وزارة .. 12 وزير حربية .. 9 وزراء بحرية .. فوقهم كلهم بقي قاعد ومربع ومدلدل رجله تلاقي الإمبراطور .. السؤال بقي .. تشاور علي مين وتقول ده الغلطان؟

الأمريكان عملوا زي ما الجيش بتاعنا بعد ثورة 25 يناير لما كان كل شوية تسمع في الاخبار انهم عملوا جلسة حوار وطني قال يعني عشان يجسوا نبض الشارع عن طريق انهم يقعدوا مع الثوار والمفكرين والأدباء والمثقفين .. كل واحد من دول الأمريكان يقعدوا معاه يقول نفس البق .. ملكوش دعوة بالامبراطور .. الامبراطور ملوش ذنب .. (هيدوكو توجو) ورجالته هم الغلطانين .. (ماك ارثر) بيسمع الكلام ده وقلبه بين بين رجليه .. كل استطلاعات الراي اللي بتجس نبض الشارع الأمريكاني بتقول إن الأمريكان شايفين إن الأمبراطور زيه زي اي حد لازم يتحاكم .. الرسايل اللي بتيجي للجنرال من حلفاء أمريكا سواء الاستراليين أو السوفييت بتقول ياريت لو تعلقوا راس الامبراطور ده علي ابواب طوكيو .. يعمل ده ازاي وكل الناس في اليابان بتقوله أوعي .. أوعي الامبراطور حد يقربله.

في يناير 1946 (ماك أرثر) بيبعت تقريره النهائي للرئيس (هاري ترومان) اللي فيه قال إن عشان مفيش أي دليل يربط بشكل مباشر الأمبراطور بجرايم الحرب اللي ارتكبتها القيادة العسكرية اليابانية .. وعشان الأمبراطور هو رمز وحدة اليابانيين .. فالجنرال بيوصي بإن عشان منعملش حاجة تولع الشارع الياباني ومنلاقيش نفسنا قصاد حرب أهلية جوه اليابان فمفيش أي داعي إن ده يحصل وعشان كده بلاش نقرب من الأمبراطور .. الكلام اللي حيتباع للناس إن الإمبراطور كان ضحية القيادة العسكرية اللي حوليه اللي خبوا عنه كل حاجة .. الكذبة دي هي اللي حتتباع للناس وتحت الشعار الزن علي الودان أمر من السحر و الناس صدقت .. الراس الكبيرة حيعيش بس 28 بني أدم من رجالته حيتحاكموا في محاكمات طوكيو .. المذهل في الموضوع إن المحققين الأمريكان اللي المفروض يعني انهم النيابة اللي حتترافع ضد المتهمين سابتهم يقعدوا مع بعض عشان يضبطوا شهاداتهم واعترافاتهم بحيث كلهم يكونوا متفقين علي إن الإمبراطور ملوش دعوة باللي حصل .. انت متخيل؟ .. جرايم حرب اليابان كلها علي بعضها بسلطاتها وباباغنوجها حيشيل الليلة فيها 28 بني أدمين متوجه ليهم 55 تهمة .. الناس دي حتشيل الليلة .. هي اللي حتحاسب علي المشاريب عشان يقنعوا العالم إن الإمبراطور معملش حاجة .. ده نفس الإمبراطور اللي بنفسه هو اللي عين عمه عشان يبقي قائد القوات اللي دخلت نانكينج .. ده نفس الأمبراطور اللي كان بيتابع تحركات الاسطول الياباني خطوة بخطوة وهو رايح يضرب بيرل هاربور.

وسط ما محاكمات طوكيو شغالة بيطلع الحكم النهائي في محاكمات نورنبيرنج واللي فيها تم الحكم علي قيادات كتير من المؤسسة العسكرية النازية بالاعدام ودي الحقيقة كانت اول مرة حاجة زي دي تحصل وهنا مهم نتكلم شوية عن مبدأ في القانون اسمه السابقة التاريخية .. يعني ايه الكلام ده .. انا شخصياً خلال الكاريير بتاعي اشتغلت في شركة استشارات هندسية كبيرة في مصر كانت ماشية بسياسة داخلية كده إن الشركة مش بتقطع عيش حد .. انت مش حيجي اليوم اللي يجي مديرك يقولك لم حاجتك احنا مش عايزينك .. سنين والشركة ماشية بالمبدأ ده لحد ما حصلت حادثة غريبة إن واحد من الموظفين ظبطوه وهو بيسرق كارتات الفيجا من اجهزة الشركة ودي كانت المرة الأولي من وقت تاسيس الشركة اللي يطلع قرار اقالة لحد .. صحيح هو كان قرار عادل جداً بس بقي يتبصله علي انه السابقة التاريخية اللي بقي ذريعة لادارة الشركة انها بدأت بعد كده تمشي ناس عادي خالص حتي لو معملوش حاجة غلط.. اذا كان القضاة بتوع محاكمات طوكيو ايدهم بتترعش لما يفكروا يدوا لحد حكم اعدام فاهو في ألمانيا الحكم طلع عادي واتنفذ عادي ومفيش حد قال حاجة.

بس في نفس الوقت تطورات الوضع في أسيا ككل كانت حاطه المحاكمات بتاعة قادة النظام الياباني في وضع زي الزفت .. بعد الحرب العالمية الثانية ما خلصت فيه دول كتير من اللي كانت مستعمرات أوروبية في جنوب شرق أسيا واللي اليابان احتلتها في الحرب اعلنت استقلالها ودي حاجة كانت معصبة الدول الاستعمارية اللي طلعت منتصرة من الحرب .. فييتنام و لاوس و كمبوديا اللي كان بيتقال عليهم زمان الهند الصينية  أعلنت استقلالها وده خلي فرنسا ترجع تحتلها تاني .. يعني انت بتحاكم اليابانيين علي جرايم الحرب اللي عملوها تقوم فرنسا جايه محتلية فيتنام تاني وقاتلالها فوق 700 ألف .. ده برده اللي حصل في أندونيسيا اللي اعلنت استقلالها عن هولندا اللي هي كمان بعتت قوات عسكرية عشان تحتلها تاني و نتج عنها 200 الف قتيل .. الحرب الأهلية الصينية بين الشيوعيين والقوميين بتولع ..دي نقطة كانت بتشكل ضغط رهيب علي القضاة بتوع المحاكمات .. انتوا ازاي بتحاكموا اليابانيين علي جرايم انتوا شخصياً بلدانكوا وحكوماتكوا بترتكبها دلوقتي.

نقطة تانية برده كانت مصدر ضغط هي إن محاكمات طوكيو بدأت في يناير 1946 .. في مايو 1947 كان الدستور الياباني الجديد بيخش حيز التنفيذ .. دستور كامل اتكتب بناء علي ورقة واحدة كتبها الجنرال (ماك أرثر) محطوط فيها 4 جمل .. الجملة الأولي هي إن الإمبراطور هو رأس الدولة اليابانية .. الجملة الثانية هي إن خلافة كرسي الإمبراطور بيكون بالوراثة .. الجملة الثالثة إن اليابان دوناً عن باقي خلق ربنا مبقاش من حقهم يخشوا حرب مع أي حد بمعني إن اليابان بقي مش من حقها يبقي ليها لا قوات برية ولا بحرية ولا جوية  .. الجملة الرابعة والأخيرة إن النظام الاقطاعي في اليابان حيتم انهاءه.

النقطة اللي حسمت مسار المحاكمات كانت اعتراف (هيديكي توجو) اللي كان حرفياً الرجل الثاني في اليابان بعد الإمبراطور علي نفسه إنه هو العقل المدبر لكل حاجة وإن الإمبراطور يا عيني طيب غلبان ملوش حيلة غير إنه يوافق علي اي حاجة تجمع عليها وتقررها القيادة العسكرية اللي كانت في ايد (هيديكي توجو) .. الاعتراف ده حقق كل حاجة الأمريكان كانوا عايزينها .. الإمبراطور طلع بريء وبناء عليه استقرار اليابان بقي مضمون عشان في نوفمبر 1948 المحاكمات بتخلص بعد 818 جلسة استماع و 419 شهادة شهود و 779 عريضة دعوة و 4636 دليل ادانة وفوق السنتين و6 شهور بيطلع الحكم اللي الناس كلها كانت مش بس عايزاه دي سعت عشان يطلع زي ما هو عايزينه إن الإمبراطور بريء براءة الذهب من دم سيدنا (يوسف) عليه السلام وإن المسئول عن اللي حصل هم ال28 قيادي اللي مثلوا أمام المحكمة .. اتحكم علي 16 منهم بالمؤبد .. اتنين باحكام سجن مخففة .. و 7 اتحكم عليهم بالاعدام.

شايف كل الجرايم اللي عملتها المؤسسة العسكرية اليابانية دي كلها؟ أهو اللي اتعاقب بسببها كانوا يدوبك 7 بني أدمين اتحكم عليهم بالاعدام وبس كده .. مفيش حد اتعاقب بره السبعة دول .. سنة 1958 كل أسري الحرب اليابانيين اللي كانوا تحت ايد الأمريكان تم الافراج عنهم .. فاكر (موتشهيروا واتانابي) اللي كان ماسك معسكر الاعتقال اللي كان قاعد فيه (لويس زامبريني)؟ الرجل ده كان سادي ومجرم سفاح لدرجة إنه كان رقم 23 علي قائمة المطلوبين ضمن قيادة القوات المسلحة اليابانية بسبب جرايم الحرب اللي عملوها وكان قائد القوات الأمريكية في المحيط الهاديء (دوجلاس ماك أرثر) حالف بالانجيل لا يعلقه من حواجبه .. الرجل ولا اتقبض عليه .. ولا اتحاكم .. وبعد الحرب عاش حياته بشكل طبيعي من غير ما حد يقوله سلامات يا أم أحمد .. فاكر الوحدة 731؟ .. اليابانيين اللي كانوا ماسكينها مضوا علي اتفاق مع المخابرات الأمريكية بإنهم يروحوا أمريكا عشان يمسكوا مشروع الحرب البيولوجية اللي كان لسه بيبدأ في مقابل إن كل واحد فيهم ياخد عفو رئاسي عن كل جرايمهم .. بلاش دي .. هل نعلم سيدي القاريء إن رئيس الوزراء الياباني رقم 56 اللي جه يحكم اليابان في فترة احتلال أمريكا للبلد كان اسمه (نوبوسوكي كيشي) وصدق أو لا تصدق ده كان من ضمن ال28 متهم اللي كانوا بيتحاكموا في محاكمات طوكيو والأمريكان طلعوه وصنفروه ولمعوه وحطوه علي الكرسي يحكم البلد.

السؤال بقي .. ليه؟ .. عشان تفهم ده لازم تبص للموضوع من فوق .. الكبير بتاع الليلة كان الأمبراطور (هيروهيتو) .. كل الجرايم دي تمت بعلمه .. كل الوساخه اللي عملتها القوات المسلحة اليابانية هو كان موافق عليها .. لو ناوي تبدأ تعاقب حد فأول حاجة تعملها هو إنك تعصر (هيروهيتو) ده تنزل منه قطع سوشي صغيرة .. بس ده محصلش .. السبب في إن ده محصلش كان الجنرال (دوجلاس ماك أرثر) اللي كان تقييمه للوضع إن لو حصل وأمريكا أعدمت أمبراطور اليابان اللي بالمناسبة الناس هناك بتسجدله فالشارع الياباني حيولع وهي بصراحة مش ناقصه .. دي نقطة .. النقطة الثانية هي الخوف من إن لو اليابان ولعت فالاتحاد السوفيتي ممكن يستغل ده ويكسب اليابان لصفه ودي حاجة حتبقي مش لطيفة خالص .. السبب الثالث والمهم هو الحرب الكورية واللي قلبت موازين كل حاجة .. فجأة استقرار اليابان بقي مهم .. فجأة الناس اللي كانت عايزة تعلق الإمبراطور من رقبته قالتلك لا يا عم مش مهم .. محصلة الأسباب دي هي اللي كانت ورا قرار الأمريكان إن لو احنا حنفشخ النازيين فاحنا حنطبطب علي اليابانيين .. مش بس (هيروهيتو) فضل يحكم اليابان ده سنة 1975 راح زار أمريكا وخلوه يخش ديزني لاند .. بس دي كانت النظرة اللي من فوق .. فيه كمان النظرة بتاعة الناس اللي ماشيه في الشارع.

لو انا جيت سالتك مين أكتر ناس اتحط عليهم جامد في الحرب العالمية الثانية مين اللي حيجي في بالك .. بنسبة كبيرة كتير مننا حيروح لليهود .. ليه .. عشان خاطر ده اللي الاعلام واللي الافلام واللي كتب التاريخ بتقوله ليك .. جرائم حرب النازيين متوثقة بالساعات .. زود عليها إن اليهود شغلوا للناس كلها العياطة اللي بالكهربا وانت حتقدر تستوعب ليه كل الناس بتربط اسم الحرب العالمية الثانية بالهولوكوست .. زود علي كده إن كتير من اللي ماسكين استوديوهات الأفلام بتاعة هوليوود هم يهود جم من أوروبا ويا هربوا من الهولوكوست يا أهاليهم هربوا من الهولوكوست فهم حرفياً ملوا دماغنا بقصص إزاي النازيين وحشين وهم فعلاً وحشين بس مش لدرجة إن في حفلة الجولدن جلوبز اللي هي تعتبر تاني أهم جايزة سينمائية في أمريكا بعد الأوسكار فمقدم الحفلة الكوميديان الانجليزي (ريكي جيرفيز) بص للممثلة (كيت وينسليت) اللي يمكن انت عارفها من فيلم Titanic وكانت وقتها نازله بفيلم اسمه The Reader وكان اغلب الترشيحات بتقول انها حتكسب الأوسكار كاحسن ممثلة وده حصل فعلاً بس وهو واقف علي المسرح (ريكي) بيبص ل(كيت وينسليت) اللي هي تبقي صديقة قريبة ليه وقالها مش قلتلك .. لو عايزه تاخدي الأوسكار اعملي فيلم عن الهولوكوست .. الهولوكوست بقت فئة مستقلة من الأفلام زيها زي الأفلام الحربية وأفلام الأكشن والخيال العلمي .. فئة ارتبطت بإن اللي يشتغل فيها مضمونله جايزة.

بس صدقني لو قلتلك إن اللي حصل في الهولوكوست وفي اليهود عموماً ميجيش حاجة قصاد اللي عمله اليابانيين في الصينين بس يمكن لإن الجرايم دي مش متوثقة بشكل كويس ويمكن لإن عنصرية الغرب تجاه معاناة أي حد شعره مش اصفر وعنيه مش زرقا بتخلي معاناة الصينيين والكوريين مش شاغله مكان كبير في دماغ الغرب .. امشي في شوارع أمريكا اللي هي طلع ميتينها في معارك المحيط الهاديء وأسال أي حد يعرف ايه عن اللي حصل في الجبهة اليابانية مش حتلاقيه غير عارف 3 حاجات .. اليابانيين فشخوا الأمريكان في بيرل هاربور .. الأمريكان حطوا علي اليابانيين في ميدواي .. الأمريكان نهوا الحرب بالقاءهم القنبلة النووية علي هيروشيما وناجازاكي .. غير كده مفيش حد عارف حاجة .. لحد سنة 1997 مفيش أمريكاني كان يعرف حاجة عن اغتصاب نانكينج لحد ما في السنة دي الكاتبة (أيريس تشانج) نزلت كتابها اللي كسر الدنيا The Rape of Nanking واللي كان دش مياه مثلجة ينزل فوق نفوخ المواطن الأمريكاني العادي .. انا كنت لسه قايلك من شوية علي هوس هوليوود بافلام الهولوكوست قصاد إن ما يسمي بمسرح المحيط الهاديء The Pacific Theatre مش واخد حقه الصراحة اعلامياً علي الاقل .. مش حتلاقي غير يمكن فيلم زي The Empire of the Sun وفيلم Unbroken ومسلسل The Pacific اللي هو يعتبر امتداد مسلسل Band of Brothers .. بس مفيش حاجة زي Schindler’s List أو Saving Private Ryan أو The Pianist .. حتي Oppenheimer كان بيتعامل مع اللي حصل في اليابان علي إنه يا حرام احنا رمينا عليهم القنبلة النووية اللي بتعمل بوم كبيرة.

القنبلة النووية .. يلا ننسي اللي فات:

انا شخصياً شايف اننا لازم ننحني احتراماً لقدرة اليابانيين انهم يعيدوا كتابة قصتهم من انهم يبقوا ولاد كلب عشان يتحولوا لضحايا ولاد الكلب .. ازاي انك تاخد لقطات رعب وفظاعة القنبلة النووية عشان تلمع صورتك .. لما الحرب خلصت بقي فيه توجه قوي جوه الحكومة اليابانية إنهم يعيدوا تصدير صورة اليابان عشان تبقي بلد السلام اللي خلال شهر أغسطس من كل سنة وده الشهر اللي اترمت فيه القنبلتين النوويتين علي هيروشيما وناجازاكي بتعيد احياء ذكري ضحايا الناس اللي ماتت بس محدش بيجيب سيرة الناس اللي ماتت في نانكينج ولا في منشوريا ولا في كوريا ولا الفلبين .. الحقيقة قدرة اليابانيين انهم يعيدوا صياغة القصة من انها تكون حولين احنا عملنا ايه وتبقي ايه اللي اتعمل فينا لازم نقف قدامها شوية ونتعلم منها.

خلينا نتفق علي حاجة .. فكرة إن بلد تمحي مدينة في بلد تانية من الوجود مكنتش حاجة جديدة .. الامريكان شالوا مدينة دريزدن الألمانية من علي الخريطة .. تقريباً في الوقت اللي القنبلة النووية اترمت فوق هيروشيما كانت طوكيو العاصمة نفسها مفيش فيها بيت سليم من كتر القصف الجوي .. انا لو وريتك صورتين واحدة من طوكيو وواحدة من هيروشيما ووريتك الدمار اللي فيهم بحيث واحدة من قنبلة واحدة اترمت من طيارة واحدة قصاد قنابل كتير فشخ اترمت من طيارات كتير فشخ فانت مش حتعرف تميز بينهم بس مش مهم .. اليابانيين خدوا اللي حصلهم وحطوا عليه شوية بهارات وصدروه للعالم علي إن هم اللي الضحايا .. اصرار اليابان حكومة وشعباً علي تصدير فكرة أنهم بلد السلام وإن زي ما يكون كان فيه جن لابسهم وقت الحرب ده غريب فشخ .. اللي هو انت عايز تقولهم يعني انتوا مثلاً الشعب الياباني كله عنده شيزوفيرينيا أو انفصام شخصية .. فيلم بئر الحرمان علي Scale البلد كلها ده ولا ايه.

العقلية اليابانية  في الحرب العالمية الثانية .. بوظتوا المعني السامي للساموراي:

خليني اقولك إن احنا في مصر بنقول علي اليابان كوكب اليابان الشقيق لسبب وهو إننا حرفياً المجتمع الياباني بالنسبة لينا عبارة عن فزورة احنا مش فاهمينها .. اهو تخيل بقي موقف الأمريكان .. يعني اليابانيين لما ضربوا الأمريكان في بيرل هاربور دي كانت قفا عباسي محدش كان مستنيه ولا متوقعه .. الطريقة اللي اليابانيين حاربوا بيها .. فكرة الهجمات الانتحارية للعساكر اللي بيسموها بانزاي .. فكرة الانتحار بالطيارات اللي بيسموها كامي كازي اللي يمكن انت سمعت الاسم ده في الاغنية بتاعة كايروكي .. فكرة إننا حنحارب لحد أخر رجل .. فكرة إن الموت أحب ليهم من الاستسلام .. دي أفكار انت ممكن كبني ادم مسلم تفهمها لإن احنا عندنا في الاسلام فكرة الجنة والنار وإن الشهيد حيخش الجنة فبالنسبة لينا كمسلمين الحرب ليها نتيجة من احدي الحسنيين يا اما النصر أو الشهادة .. طب بالنسبة لليابانيين الكلام علي ايه؟

عشان تفهم العقلية اليابانية في الحرب العالمية الثانية لازم تبصلها من منظورين .. منظور من فوق اللي هو نظرة طائر محلق بيبص علي التكتيكات العسكرية اللي اليابان كانت معتمدة عليها اللي اتبنت وفق استراتيجيات حطتها القيادة اليابانية لنفسها .. المنظور التاني انك تبدأ تمشي في الشارع وتقراً دماغ المواطن الياباني البسيط عشان تبدأ تفهم هو المواطن ده ازاي اقتنع بشكل شبه أعمي بالاستراتيجية اللي بلده حطتها وبقي مستعد يموت عشان خاطر يحققها .. لما تفهم المنظورين مع بعض حتبدأ تفهم ليه العسكري الياباني كان مستعد يعمل اللي هو عمله في الحرب وتبدأ تفهم هي البشاعة دي وانعدام الأدمية ده جه منين.

المواطن الياباني البسيط ليه مستعد يضحي بنفسه عشان خاطر الإمبراطورية؟

حضرتك كمواطن مصري بسيط بتخاف ربنا بتصحي الصبح تصلي ركعتين .. تروح تشتغل بتراعي ربنا في شغلك .. بتصلي الخمس فروض اللي عليك .. لو معاك قرش زيادة ممكن تتصدق بيه .. بتصوم في رمضان .. نفسك تحج أو علي الأقل تعمل عمرة تشوف بيت ربنا وتزور قبر سيدنا النبي (عليه الصلاة والسلام) .. لو انا جبت مواطن أمريكاني أو أوروبي وخليته يتفرج علي يومك فهو حيفضل يعاني شوية عشان يفهم دماغك .. ليه بتصلي؟ .. هو انت ليه بتعمل اللي عليك في الشغل عشان عايز تراعي ربنا مش عشان خايف من القانون؟ .. ايه اللي يخليك تصرف دم قلبك عشان تعمل عمرة ما تروح تقضيلك اسبوع في بالي أو المالديف؟ .. المواطن الأوروبي أو الأمريكي اللي ميعرفش حاجة عن الثقافة الإسلامية أو العربية مخه حيسيح شوية قبل ما يبدأ يستوعب الدوافع اللي بتخليك تعمل الحاجات اللي انت بتعملها في يومك وانت اساساً مش بتفكر فيها لإنها مغروزة في دماغك .. نفس الكلام مع دماغ المواطن الياباني .. اذا كان انت بيحركك كبني أدم مصري هو تعاليم الإسلام وشوية القيم والأخلاق اللي باباك ومامتك زرعوها فيك فهو في كوكب اليابان الشقيق بيحركه حاجة اسمها بوشيدو .. بوشيدو دي هي شوية تعاليم وأخلاقيات اتكتبت في مرحلة من تاريخ اليابان بيسموها فترة توكاجاوا أو فترة أيدو اللي امتدت من 1603 لحد 1868 اللي هي تقريباً الفترة بتاعة الحملة الفرنسية علي مصر .. فترة توكاجاوا كانت فترة سلمية شوية في تاريخ اليابان وبوشيدو لما اتكتبت كانت محاولة أدبية للأجابة عن سؤال هو يا تري يا هل تري محارب الساموراي بيقضي يومه ازاي؟

تاني عشان بس نرجع لتشبيهاتنا .. حاول تتخيل إن بوشيدو مثلاً كانت وصف قاله أحد صحابة سيدنا النبي (عليه الصلاة والسلام) عن يا تري سيدنا النبي كان بيقضي يومه ازاي .. بيصحي يعمل ايه .. لما بيزعل أو يتنرفز بيعمل ايه .. بياكل ازاي .. بينام ازاي .. بيعامل زوجاته ازاي .. اللي هو بمعني أخر السنة النبوية .. بس خلي بالك .. الكلام ده اتكتب وقت حياة سيدنا النبي فهل معني كده إن الكلام ده حينفع تاخده هو هو تطبقه في حياتنا اليومية دلوقتي؟ بالنسبة لينا كمسلمين اه بس هل ده صح بالنسبة للساموراي؟ .. بوشيدو اتكتبت في وقت كانت اليابان حمادة و وقت الحرب العالمية الثانية اليابان كانت حمادة تاني خالص .. ازاي تطبق مباديء بوشيدو علي المجتمع الياباني الحديث؟ .. تضيف ايه وتحذف ايه .. الشغل ده عمله واحد اسمه (نيتوبي أينازو Netobe Inazo) اللي سنة 1900 كتب كتاب اسمه بوشيدو: روح اليابان Bushido: Soul of Japan وخليني أقولك إن شغل الرجل ده في نقل مفاهيم ومباديء بوشيدو وتطبيقها علي المجتمع الياباني الحديث كانت نقلة نوعية لدرجة إن الرجل ده من كتر احترام اليابانيين ليه حطوا صورته علي ورقة العملة 5000 ين .. محدش يقول بقي اننا نحط صورة الإمام البخاري علي الجنيه لاحسن (اسلام البحيري) يتجلط فيها .. المهم .. بوشيدو أيها السادة مبنية علي 3 مباديء متاخده من 3 مصادر مختلفة:

• البوذية .. بوشيدو خدت منها فكرة حب الموت ودي فكرة احنا كمسلمين ممكن نفهمها بسهولة شوية مقارنة بالغرب .. بوشيدو كمان خدت من البوذية 4 أفكار مهمة .. إن الحياة الدنيا ما هي إلا معاناة ودي برده حاجة ممكن نفهمها كمسلمين إن خلق الإنسان في كبد .. إن متاع الحياة الدنيا والتعلق بيها حيخليك تخسر الأخرة  .. بمناسبة الاخرة فالبوذية عندها فكرة الجنة اللي هم بيسموها نيرفانا .. عشان تخش نيرفانا لازم تبقي انسان كويس .. بوشيدو مش مبنية علي فكرة انت يا تري في حياتك اشتريت كام شقة وبقي عندك كام عربية وحسابك كام في البنك انما هو انت عشت حياتك ازاي.
• شينتو ودي ديانة شايفة إن الإمبراطور الياباني هو شخصية مقدسة لازم الدفاع عنه حتي الموت.
• الكونفيوشيسية ودي حاجة غريبة لإن الكونفيوشيسية كديانة بدأت في الصين واليابانيين خدوا منها حتت ويمكن أهم حتة هو ان تقسيمة المجتمع بتتم علي اساس الطبقية القائمة علي الواجبات ويمكن دي حاجة مشتركة برده بين المجتمع الياباني والمجتمع الشرقي إن مثلاً عندنا في مصر انك تبقي مهندس أو دكتور أو قاضي أو وكيل نيابة أو ضابط في الجيش بيحطك في فئة مجتمعية عالية مع إنك ممكن تبقي شخصية بنت ستين كلب عادي جداً ومتتقلعش من رجلي بس عشان انت خريج كلية قمة أو معلق دبورتين ونجمة لازم الناس تحترمك في الشارع.

الشاهد من كلامي إن المواطن الياباني البسيط بيصحي من نومه بيتمني إن موته يكون مشرف .. لو لقيت نفسك مش عارف تحقق هدفك من اليوم مش مشكلة .. بس أوعي تنام وانت عارف انك كان ممكن تدي أكتر أو تتعب أكتر والا انت بتجيب العار ليك ولعيلتك .. الفكرة اللي اتزرعت في دماغ المواطن الياباني هي إن في مواجهة عار الهزيمة مفيش مفر غير الموت .. تاني احدي الحسنيين النصر أو الشهادة .. كمان فكرة إن اللي عايز حاجة بيروح ياخدها .. مفيش حاجة اسمها اصل العدو بتاعي جامد .. الجامد ياخد فوق دماغه عادي جداً والصغير يتداس عليه طالما ده في مصلحة اليابان .. طب لو العدو قاوم؟ .. مش معني إني انتصرت علي عدوي في معركة مفتوحة يبقي كده خلاص صافي يا لبن حليب يا قشطة .. هنا برده بوشيدو بتخش .. الاهم من الانتصار العسكري علي عدوك هو الانتصار النفسي .. فكرة إنك تزرع في العدو ان مفيش أمل من المقاومة .. من شباك بيته فالعدو (اللي هو انت) مفتري وسفاح وقتال قوتله وبالتالي مفيش أي داعي لأي تضحيات زيادة.

ده يمكن يفسرلك شوية مثلاً اللي حصل في نانكينج .. ازاي .. ارجع قبلها ب3 شهور .. فاكر معركة صمود شنغهاي .. شنغهاي صمدت 3 شهور قصاد إن نانكينج صدمت 4 أيام .. هل فيه حاجة اتغيرت في العسكري الصيني؟ ولا يمكن العسكري الياباني اللي شارك في معركة شنغهاي جاب العار لبلده وعيلته لما فشل في إنه يخضع المدينة أسرع من كده .. تاني .. مفيش حاجة بتنكد علي اليابانيين عيشتهم غير احساس العار .. احساس العار اللي مش بيروح غير بالانتحار أو بنصر كاسح مع أكبر ضرر ممكن للعدو .. حاجة تانية وهي إن بوشيدو اللي محفورة في نفوس العساكر اليابانيين معتمدة علي طاعة ولي الأمر .. فلما القائد بتاعك متمثلاً في الأمير (أساكا) قائد عام القوات اليابانية اللي دخلت نانكينج يدي أمر باعدام كل الأسري يبقي مفيش أسير يعيش .. جزرة وقطمها جحش .. فكرة طاعة ولي الأمر دي برده اللي ورا فكرة إن بمجرد ما الإمبراطور قال خلاص يبقي خلاص .. استسلام يعني استسلام .. زي ما يكون زرار الباور وحد داس عليه .. سبحان الله شعب غريب جداً.

القيادة اليابانية كانت شايفه الدنيا ازاي؟

مهم تبقي فاهم إن عشان بلد تخش حرب علي نطاق أو Scale فشيخ زي الحرب العالمية الثانية فلازم البلد تحط نفسها في دماغ إن يا احنا يا هم .. نفس فكرة الجملة اللي نُسبت ل(طارق بن زياد) الله يرحمه ومعرفش الحقيقة هي صح ولا غلط لما قال لعساكره البحر خلفكم والعدو أمامكم .. اللي كان دايماً طول ما هو ماشي عمال يزعق يا رجاله يا رجاله احنا الساموراي يا رجاله كان (هيديكي توجو) اللي قلتلك انه كان رئيس وزراء اليابان في الحرب بس خليك فاهم نقطة .. من تربي علي شيء شاب عليه .. سواء بتتكلم عن (هيديكي توجو) رئيس الوزراء أو (ايسوروكو ياماموتو) قائد القوات البحرية اللي كان مهندس الهجوم علي بيرل هاربور فهم في الاخر اتولودوا واتربوا في مجتمع ياباني قائم علي فكرة بوشيدو .. فكرة لو عايز حاجة روح خدها .. ده بشكل أو بأخر بيترجم للفكر اللي القيادة السياسية والعسكرية اليابانية اتشكلت بيه.

تفتكر ليه اليابان فكرت أصلاً تخش الصين؟  من أول سنة 1911 وانت طالع يعني من الوقت اللي كان (سعد زغلول) الله يرحمه ماشي في الشارع يقول مفيش فايدة كانت الصين بتتصنف علي إنها ما يسمي بمعايير دلوقتي Failed State أو بلد فاشلة .. دي بلد مفيهاش حكومة بتمشي كلمتها علي الناس .. بلد متقسمة لحتت كتير فشخ كل حتة ماسكها حد فاكر إن الحتة دي هي المملكة الخاصة بيه .. بس لك أن تتخيل يا سيدي القاريء إن من أول 1911 لحد 1930 يعني بتتكلم في حوالي 19 سنة اليابان مفكرتش إنها تمد ايدها علي الصين .. الفكرة اتولدت سنة 1930 لما حاجة حصلت في أمريكا وحتي الحاجة دي مكنش مقصود إنها تزعل اليابان لإنها كانت قضية داخلية الحقيقة كانت السبب إن اليابان تقول لنفسها طب ما الصين حلوة.

سنة 1930 كانت امريكا غرقانة لشوشتها في الكساد الكبير اللي هي كانت عايشه فيه وكان فيه اتنين اعضاء في الكونجرس اسمهم (رييد سمووت) و (ويليس هاولي) قدموا مشروع قانون لفرض تعريفة جمركية علي اكتر من 20,000 منتج بتستوردهم أمريكا بهدف قال ايه حماية الصناعة الأمريكية .. مش بيفكرك بحاجة الكلام ده .. المهم رغم إن تقريباً مفيش واحد بيفهم في الاقتصاد مكنش شايف إن القانون ده حيودي البلد في داهية بس الرئيس وقتها (هيربرت هوفر) وافق علي القانون واللي مش بس كان كارثة علي الاقتصاد الأمريكاني انما كمان خلي اليابان تسأل نفسها هو لحد امتي حسيب نفسي رهينة للي يسوا واللي ميسواش .. سامع يا (أبو حنان) .. الفكرة إن في الوقت ده امريكا كانت هي الشريك التجاري الأكبر لليابان فلما أمريكا تقول لليابان مفيش تجارة بح كده خلاص فالاقتصاد الياباني حيعيش ازاي؟

كان فيه كذا حل الحقيقة .. كان ممكن الدبلوماسية اليابانية تبدأ تتحرك عشان تستبدل أمريكا كشريك تجاري بدول تانية .. كان ممكن الاقتصاد الياباني يطور من نفسه عشان يتعايش مع الوضع الجديد .. بس حنرجع تاني لمباديء بوشيدو اللي اتربي عليها اليابانيين واللي منهم كبروا وبقوا قيادات في البلد .. اللي عايز حاجة بيروح ياخدها .. يدوبك سنة 1931 يعني بعد سنة واحدة من تطبيق قانون التعريفات الجمركية كانت القوات اليابانية بتغزو شمال الصين اللي هي الحتة اللي بيسموها منشوريا .. اليابانيين شاطرين جداً تكتيكيا انك تديهم هدف معين وتقولهم حققوه .. بس هم مبيعرفوش يبقوا استراتيجيين .. هم ممكن يكسبوا المعركة بس يخسروا الحرب .. ضربهم للحتة اللي اسمها الهند الصينية اللي هي زي ما قلتلك من شوية تبقي فييتنام و ولاوس و كمبوديا وان كان ضربة معلم تكتيكياً بس عرضهم لمشكلة إن أمريكا فرضت عليهم حظر تصدير بترول وده كان ضربة تقيلة للاقتصاد الياباني .. طب نعمل ايه؟ يلا نروح نضرب ييرل هاربور.. باختصار القيادة اليابانية خصوصاً وقت الحرب العالمية الثانية مكنتش بتعرف تجاوب علي سؤال طب وبعدين؟ .. طب انت دلوقتي دخلت بلد عشان تاخد مواردها طب أسري الحرب اللي بقوا مسئوليتك دول حتعمل فيهم ايه؟ حتاكلهم منين؟ حتشربهم منين؟ حتصرف عليهم منين؟

بعد ما منشوريا بقت معاهم اليابانيين لقوا إن الصينيين بدأوا يفهموا فكرة انا واخويا علي ابن عمي وانا وابن عمي علي الغريب .. الصينيين بدأوا يتجمعوا حولين قيادي شيوعي صيني اسمه (شيانج كاي شيك) اللي السوفييت بعتوله فلوس وسلاح عشان يبدأ يواجه الغزو الياباني لأرضه .. تاني .. المفروض ده يكون منطقي .. المفروض إن وقت قرار غزو منشوريا ما كان بيتاخد كان يبقي فيه رجل رشيد جوه القيادة اليابانية يقولهم يا حبايب احنا كده حندخل نفسنا في حرب شوارع واستنذاف ضد المقاومة الصينيية ودي حاجة بتحرق فلوس وأرواح ومعدات والاقتصاد بتاعنا مش ناقص .. بس دي مش الطريقة اللي اليابانيين بيفكروا بيها .. هم بيفكروا بطريقة هو الكلام علي ايه النهاردة .. اكسب الخناقة اللي قدام عينيا دلوقتي اهم بكتير من اني افكر هو بعد سنة او سنتين ايه اللي حيحصل .. عشان كده اليابان بعد ما منشوريا كلها بقت معاهم سنة 1933 بدأوا يخشوا في الخناقة اللي وراها لما بدأوا عملية عسكرية لاحتلال ساحل الصين علي المحيط الهاديء سنة 1937.

العملية بتنجح واليابان بتسيطر فعلاً علي ساحل الصين بس المشكلة إن مع كل متر جديد اليابان بتاخده غليان الشارع الصيني من اللي بيحصل بيزيد .. المقاومة المسلحة الصينية بتشتد .. المساعدات السوفيتية اللي دخل معاها علي الخط كمان الأمريكان للمقاومة المسلحة الصينية عماله تخش .. اليابان تعمل ايه؟ .. يلا نصعد المشكلة .. في ديسمبر 1941 اليابان بتحط علي المحيط الهاديء كله .. مش بس بيرل هاربور اللي اتضربت كل جزر المحيط الهاديء نالها من الحب جانب.

اللي يمكن اليابان فشلت انها تفهمه من درس الغزو النازي للاتحاد السوفيتي إن زي ما الصين كانت Failed State لما اليابان خدتها وضع يد حتة حتة فروسيا هي كمان كانت Failed State لما الغزو النازي بدأ .. (جوزيف ستالين) اللي كان زعيم الاتحاد السوفييتي كان مهووس بالسلطة ومرعوب من فكرة إن حد من رجالته ينقلب عليه لدرجة إنه لما كان بيشك في ولاء واحد من رجالته أيا كانت رتبته وحتي لو من غير أي دليل ملموس علي إنه فعلاً متأمر كان بيتعدم هو وعيلته .. لما الغزو النازي بدأ لروسيا فالقوات المسلحة السوفيتية كان عندها عجز رهيب في الضباط وصف الضباط وبالتالي العساكر في الميدان بقوا مش عارفين يعملوا ايه ولا ياخدوا قرارات وده كان واحد من أسباب إن النازيين داسوا علي وش السوفييت في النص الأولاني من الحرب .. كمان سياسات (ستالين) اللي زي الزفت كانت السبب في إن أوكرانيا تحصلها مجاعة مكنش ليها أي لازمة قبل ما الغزو يبدأ .. انا بقول كل ده ليه .. النازيين لما دخلوا روسيا كانت قدامهم فرصة تتاقل بالدهب إنهم يكسبوا الشارع الروسي ليهم .. هم كانوا ممكن يقولولهم احنا هنا جايين عشان نخلصكوا من ابن الكلب اللي عمال يقتل فيكوا وفي عيالكوا ده .. بس اللي حصل إن رصاص النازيين مكنش بيميز بين مدني وعسكري .. بشاعة النازيين خلت إن الجيش والشعب والحكومة الروسية يقفوا مع بعض ضد الغزو النازي ودي كانت بداية فشل الغزو .. النازيين فشلوا في روسيا مش في ستالينجراد خلي بالك في 1943 .. النازيين فشلوا في روسيا مع أول طلقة يضربوها في عملية بارباروسا في 1941.

المصادر:

• فيديو بعنوان Japan’s War Crimes: Why Did We Forget? نشر علي YouTube وده لينك الفيديو:
  (808) Japan’s war crimes … why did we forget? – YouTube
• محاضرة بعنوان Why Japan Lost WWII قدمتها الباحثة في كلية الحرب الأمريكية (سارة باين) وده لينك المحاضرة علي YouTube:
  Sarah Paine — Why Japan lost WWII (lecture & interview)
• فيلم وثائقي بعنوان Judging Japan: How the Tokyo War Crimes Trial Went Wrong تقدر تتفرج عليه علي YouTube من اللينك ده:
  Judging Japan: How the Tokyo War Crimes Trial Went Wrong | FULL DOCUMENTARY
• فيديو بعنوان Playing the Victim: Historical Revisionism and Japan نشر علي YouTube وده لينك الفيديو:
  (902) Playing the Victim | Historical Revisionism and Japan – YouTube