حرب فيتنام .. الحرب اللي مكنش ليها لازمة.

لينك التسجيل الصوتي علي ساوند كلاود:
https://on.soundcloud.com/VG43k

واحدة من مشاكل شرح التاريخ هو إن غالباً الأحداث التاريخية بدايتها بتكون ملهاش علاقة بالسنة اللي الأحداث حصلت فيها زي بالضبط خناقاتك مع مراتك كده .. إنت ممكن تكون متخانق مع مراتك بسبب كلمة بايخة هي قالتها ليك علي الغدا حرقت دمك بس يمكن اللي إنت متعرفوش إن أصل الخناقة دي من موقف تاني خالص غالباً إنت شخصياً مش فاكره حصل من حوالي شهرين والحقيقة المُرة إن عمر ما حضرتك حتقدر تفهم هي مراتك نكدت عليك ليه من غير ما ذاكرتك تسعفك وتخليك تفتكر كل اللي حصل مش بس من يوم أو يومين .. إنما من شهرين .. التاريخ كده ويمكن مثال صارخ علي ده هي القصة اللي حنحكيها النهاردة وهي حرب فيتنام .. خش علي ويكيبيديا إعرف كده هي حرب فيتنام بدأت إمتي حتلاقي الرقم الرسمي هو سنة 1959 بس الحقيقة هي بدأت قبل كده بكتير .. بكتير أوي .. يمكن بداية القصة فعلاً هي من سنة 1940 يعني قبل ما أول طلقة تتضرب في الحرب بحوالي 19 سنة ومن غير ما ترجع لأصل الحكاية حيبقي صعب عليك إنك تفهم هي بالصلاة علي النبي تطلع إيه حرب فيتنام دي .. قصة حرب فيتنام حنقسمها سوا لمراحل كل مرحلة ممكن تلاقيها مكملة معانا فوق العشر سنين وده يوريك إن حرب فيتنام قصة أعقد سيكا من إنها تتحكي في قعدة بس النهاردة حنحاول سوا نفك طلاسم الحرب دي.

المرحلة الأولي .. يخرب بيت أم الاستعمار علي ميتين أم اللي أخترعه:

كان يا مكان البلد اللي إنت عارفها باسم فيتنام كانت محتلة من الفرنساوين .. زي ما الإنجليز قعدوا عندنا فوق السبعين سنة كاتمين علي نفسنا فبرده الفيتناميين فضلوا متداس علي وشهم فوق الستين سنة لحد ما ربنا إبتلاهم بالأنيل من الفرنساويين .. اليابانيين .. سنة 1940 وفي عز ما الحرب العالمية الثانية كانت مولعة الإمبراطورية اليابانية سيطرت علي أجزاء من فيتنام .. دلوقتي البلد بدل ما كان بيحتلها مستعمر واحد بقوا إتنين .. دي السنة اللي فيها قرر بني أدم معرفش ليه التاريخ مش بيتكلم عنه أكتر من كده اسمه (هو تشي مينه Ho Chi Minh) إنه يرجع بلده فيتنام بعد ما قضي فوق الثلاثين سنة يلف العالم عشان يحرر بلده من مش بس مستعمر واحد إنما إتنين .. الحقيقة إن (هو تشي منه) ده قصة حياته إلي حد كبير وبشكل غريب الحقيقة شبه قصة حياة (وليام والاس William Wallace) اللي قاد كفاح بلده اسكتلندا ضد الإستعمار البريطاني وإنت شفت قصة حياته في الفيلم اللي ملوش علاقة بالأحداث التاريخية اللي حصلت بجد اللي هو Brave Heart .. زي ما (وليام والاس) في الفيلم اللي أرجع وأقولك ملوش علاقة بالواقع كان ابن ناس متربي كويس ومتعلم حلو وبيعرف يتكلم لغات فكمان (هو تشي منه) كان زيه كده .. (هو تشي منه) بدأ رحلته لتحرير بلده من كهف في شمال فيتنام وبدأ يشكل مع تلاميذه تنظيم إتسمي فييت-منه Viet Minh.

لأكتر من خمس سنين و(هو تشي منه) مطلع عين اليابانيين واليابانيين مبهدلينه هو ورجالته لحد ما ربنا كرم الأمريكان ورموا القنبلتين النوويتين علي هيروشيما وناجازاكي واليابان استسلمت وده اللي خلي (هو تشي منه) يطلع يوم 2 سبتمبر 1945 يعلن إستقلال فييتنام عن المستعمر الياباني وقيام دولة جمهورية فييتنام الديموقراطية وعاصمتها هانوي .. كده المستعمر الأولاني طار وفاضل المستعمر الثاني .. فرنسا .. اللي كان بيحكم فييتنام وقتها ولو حتي مش بشكل رسمي هو الإمبراطور (باو داي Bao Dai) اللي كان مدعوم من فرنسا وفي يوليو 1949 هو أعلن قيام دولة فييتنام وعاصمتها سايجون .. وهنا بقي لعبة حسابات المصالح حتبدأ تبان بوشها اللي يجيب الفقر:

• معلومة رقم واحد .. (هو تشي منه) حاول بكل اللي يقدر عليه إنه يكسب الأمريكان لصفه بما في ذلك إن رجالته في تنظيم فييت منه كانوا عمالين يغششوا الأميركان تحركات القوات اليابانية وكتير من العمليات العسكرية الأميريكية اللي تمت خلف خطوط العدو في فيتنام ساعدهم فيها رجاله فييت منه.
• معلومة رقم إتنين .. السر اللي كان عارفه الناس كلها إن (هو تشي منه) شيوعي بس يمكن اللي كان مصبر الأمريكان عليه إنه كان واقف معاهم ضد اليابانيين وفي نفس الوقت قدام الناس علي الأقل الإتحاد السوفيتي كان في نفس الخندق مع الأمريكان .. الحرب العالمية الثانية كانت بين تحالف الشيوعية والرأسمالية ضد الفكر النازي والفاشي .. المشكلة إن لما الحرب خلصت واليابان استسلمت ففعلياً (هو تشي منه) بقي كارت محروق .. هو مبقاش يتبصله علي إنه عميل للأمريكان ضد اليابانيين قد ما بقي بيتبصله علي إنه عميل للسوفييت ضد الفرنساويين اللي هم حلفاء الأمريكان.
• معلومة رقم ثلاثة ودي يمكن أهم معلومة .. رعب الأمريكان من السوفييت خلاهم كل ما يسمعوا كلمة شيوعية يركبهم مية عفريت .. هم كانوا عاملين زي الضباع في فيلم Lion King اللي كل ما يسمعوا سيرة (موفاسا) يترعشوا من الخوف .. في سعي الأمريكان لإحتواء المد الشيوعي هم بقوا مقتنعين بحاجة اسمها نظرية الدومينو Domino Theory واللي بتقول بمنتهي البساطة إن لو لا قدر الله فيه دولة من دول جنوب شرق أسيا وقعت في إيد السوفييت فإنت تقدر تقول يا رحمن يا رحيم علي باقي المنطقة .. رعب الأمريكان من إنهم يصحوا الصبح علي خبر إن فيتنام بقت دولة شيوعية خلاهم يرتبكوا واحدة من أسوأ كوارثهم في السياسة الخارجية من ساعة ما أتكونت البلد اللي اسمها الولايات المتحدة الأميريكية .. سنة 1950 قررت أميركا إن من مصلحتها إن (هو تشي منه) يغور في ستين داهية وبناء عليه قررت تساعد الإستعمار الفرنساوي في فيتنام إنه يقضي علي الثورة الشيوعية وهنا قررت الإدارة الأميريكية إنها ترمي كل كلام الإنشاء اللي إتكتب في الدستور الأمريكاني في الزبالة.

وشوف رغم وقوف الأمريكان في ظهر الفرنساويين إلا إن الفرنساويين أثبتوا إن ملهمش حاجة فالحين فيها غير عمايل الكرواسون والباتيه وسنة 1954 إتحط عليهم في واحدة من أشهر المعارك في التاريخ هي معركة ديين بيين فو Dien Bien Phu .. القفا بتاع الهزيمة دي كان جامد أوي لدرجة إن الفرنساويين راحوا يعيطوا للأمم المتحدة عشان في نفس السنة تتمضي إتفاقية جنيف اللي قالت الأتي:

• من هنا لحد إنسحاب القوات الفرنسية من فيتنام حيتم فرض وقف إطلاق نار بين الطرفين.
• حيتم تقسيم فيتنام لنصين بيفصل بينهم خط عرض 17 بحيث النصين دول هما فيتنام الشمالية الشيوعية وفيتنام الجنوبية اللي ملهاش ملة واضحة بس اللي إحنا عارفينه إنها مش حتبقي شيوعية.
• حل التقسيم ده حيبقي مؤقت لحد ما تيجي سنة 1956 وتتعمل إنتخابات برلمانية عشان يتم إختيار حكومة تحكم فيتنام الموحدة.

وخلال أقل من 6 سنين الأمريكان بيرتبكوا واحدة برده من أسواً كوارثهم في السياسة الخارجية من ساعة ما أتكونت البلد اللي اسمها الولايات المتحدة الأميريكية .. الأمريكان اللي كل ما تكلمهم يقولولك إنهم حماة الديموقراطية والحرية وإنهم مش عايزين حاجة غير إن السلام يعم العالم بس هم قالوا بلا إنتخابات بلا حرية بلا كلام فاضي ..خوف الأمريكان المرضي من إن تيجي حكومة شيوعية تحكم فييتنام حتي لو بالصندوق خلاهم يرفضوا نهائي فكرة إن تتعمل إنتخابات برلمانية تشمل فيتنام كاملة لإنهم كانوا عارفين إن (هو تشي منه) حيكسبها مستريح .. في خطوة ملهاش تفسير غير إن اللي كان ماسك أميركا وقتها هما كانوا ولا زالوا الحقيقة شوية بهايم مستكترين إنهم يذاكروا كويس ثقافة وهوية الشعوب اللي هم بيتحكموا في مصيرهم قرر الامريكان إنهم مش محتاجين غير إنهم يحطوا علي الكرسي في جنوب فيتنام حد ميكونش شيوعي وخلاص .. طب إيه مؤهلاته؟ مش مهم دلوقتي .. طب إيه سياساته ويا تري حيعمل إيه في مشاكل فيتنام الجنوبية ويا تري هو شايف مستقبل العلاقة مع (هو تشي منه) إزاي؟ بلاش والنبي أسئلة مجعلصة إحنا طلبنا واضح .. عايزين حد مش شيوعي .. تقريباً هم لعبوا حادي بادي كرنب زبادي لحد ما إختاروا واحد من أسواً الشخصيات اللي حكمت أي بلد في تاريخ الحكومات من ساعة ما البشر قالوا يلا نعمل حكومة اسمه (نجو دينه دييم Ngo Dinh Diem) .. الرجل ده خرب الدنيا لدرجة إن الأمريكان نفسهم اللي هم قعدوه علي الكرسي زهقوا منه وأغتالوه في إنقلاب عسكري هم اللي خططوله سنة 1963 .. بس قبل ما (نجو دينه دييم) يتقتل ويغور في داهية فالسبع سنين العجاف اللي هو حكمهم خلقوا المسخ اللي فضل منغص علي الأمريكان عيشتهم لسنين وسنين قدام .. الفييت كونج.

الأداء اللي زي القطران ل(نجو دينه دييم) خلي كتير من الفيتناميين اللي عايشين في فييتنام الجنوبية يقولوا لنفسهم طب ما يمكن (هو تشي مينه) عنده حق .. طب ما يمكن فعلاً مستقبل فيتنام إنها تبقي دولة شيوعية .. هو يعني أميركا الرأسمالية جابتلنا إيه غير الفقر والجوع والمرض .. الفكر ده بين الفيتناميين الجنوبيين بدأ ينتشر لحد ما في سنة 1960 أٌعلن عن إنشاء كيان اسمه جبهة التحرير الوطنية National Liberation Front أو NLF واللي الفيتناميين سموها فييت كونج Viet Cong عشان يبقي هدفها حاجة واحدة بس .. إنهم ينكدوا علي الأمريكان وعلي حكومة فيتنام الجنوبية عيشتها ولحد دلوقتي علي فكرة كان الوضع ينفع يتحل بطريقة سلمية .. إنت كل اللي إنتي محتاجة تعمليه يا أميركا إنك تنقي حد شاطر في شغلته ومخلص وأمين عشان يمسك فيتنام الجنوبية ويبدأ يوري الفيتناميين إن الأمريكان مش وحشين .. إنتي مطلوب منك إنك تحسسي الفيتناميين إن مستقبلهم إنهم يترموا في حضن الأمريكان .. توريهم إن الفكر الرأسمالي هو اللي يقدر فعلاً يبقي نموذج للحكم الرشيد ويمكن فيتنام في يوم من الأيام تبقي النسخة بتاعة أسيا من ألمانيا الغربية .. بس ده محصلش .. تاني يمكن لإن تاريخ السياسة الخارجية الأميريكية مليان بقصص إزاي تعاملهم بعجرفة وقلة ذوق وغباء وعدم فهم لثقافة الشعوب فهم تخيلوا إن مفيش حل للمشكلة دي غير العنف .. مع كل هجوم مسلح لعناصر فييت كونج علي هدف تابع لحكومة فيتنام الجنوبية الأمريكان بيبعتوا قوات إضافية ليهم في فيتنام .. الوضع فعلاً كان حرج وأي شرارة ممكن تولعه وتخليه يفرقع في وش الناس كلها وده اللي حصل فعلاً سنة 1964.

المرحلة الثانية .. الأمريكان حبوا يدبحوا القطة للعالم كله:

صحيح إن السياسة الخارجية الأميريكية مليانة بالكوارث اللي تخليك واثق إن أميركا وإن كانت قدام الناس بتقول علي نفسها إنها بتدافع عن مباديء الديموقراطية والحرية بس الحقيقة إن أميركا دولة استعمارية متفرقش كتير عن الإمبراطورية البريطانية .. الدول الاستعمارية مش بيبقي فارق معاها غير مصلحتها وبس ويا ويله يا سواد ليله اللي يدوسلها علي طرف .. أحياناً كتير المغالاة في رد الفعل كلف الأمريكان كتير أوي وعشان كده هم مع الوقت بدأوا يمشوا ورا مبدأ جديد اسمه Proportionate Response يعني رد الفعل يكون إلي حد ما متناسب مع الفعل .. مش إن حد يشتمنا نقوم ضاربينه .. مش إن حد يمد إيده علينه نقوم قاطعين إيده .. الدرس بتاع Proportionate Response الأمريكان إتعلموه بالغالي أوي سنة 1964 لما يومي 2 و 4 أغسطس إتضرب نار علي سفينتين حربيتين أميريكيتين ماشيين في المياه الدولية من حرس السواحل بتاع فيتنام الشمالية ودي الحادثة اللي إتعرفت بعد كده باسم حادثة خليج تونكين Gulf of Tonkin Incident .. زي ما قلت من شوية إنت عمال تبعت في قوات مسلحة لفيتنام الجنوبية كرد فعل لكل هجوم مسلح تعمله عناصر الفييت كونج فطبيعي إن وسط ما يسمي Military Build-up أو زيادة عدد أفراد القوات المسلحة الأميريكية في المنطقة ده حد أعصابه تفلت .. بتحصل وكان المفروض يكون التعامل بحكمة أكتر من كده خصوصاً إن وكالة المخابرات المركزية الأميريكية CIA جالها خبر إن ضرب النار اللي حصل مكنش بموافقة (هو تشي منه) بس زي ما قلت وقتها العرق الإستعماري كان ناقح أوي علي الأمريكان واللي خلاهم يردوا بقرارات كارثية .. كرد علي اللي حصل الكونجرس الأميريكي طلع قانون اسمه قانون خليج تونكين واللي عطي للرئيس الأميريكي وقتها (ليندون جونسون Lyndon Johnson) صلاحية إرسال قوات برية لفيتنام وده اللي حصل فعلاً في مارس 1965 عشان تبدأ رسمياً حرب فيتنام.

شوف يا أبني خدها مني كلمة ومتراجعش ورايا .. فيه حاجات مينفعش تبدأ تعملها من غير ما تبقي مقرر من الأول إنت ناوي تهبب إيه بالضبط .. زي إنك تروح تتقدم لوحدة مثلاً فإنت لازم تبقي عارف سقفك في المهر كام وتبقي عارف إنت حتقعدها في شقة إيجار ولا تمليك ولو إيجار تبقي مخطط هو إنت كمان قد إيه حتشتري شقتك .. زي إنك تقرري تعملي كيكة فلازم تبقي محضرة مقاديرك كويس عشان متنسيش تحطي الفانيليا وهوبا تلاقي الكيكة باظت منك .. من ضمن الحاجات اللي برده اللي لما تيجي تبدأ فيها لازم تبقي مخطط إنت حتنيل إيه فيها برده الحروب .. مينفعش تبدأ حرب وإنت مش محدد هو إنت عايز إيه .. مينفعش تبدأ حرب وإنت مش محدد أهدافك بمنتهي الوضوح عشان لما توصلها أو لما تلاقي نفسك بعدت عنها أوي تقف مع نفسك وتقرر تفض الخناقة دي أيا كانت التضحيات وأيا كان الثمن .. ده محصلش في فيتنام .. لما (ليندون جونسون) إتسأل إنت إيه تعريفك للنصر في فيتنام اللي هو بمعني أخر إيه اللي لو حصل يبقي إنت كده إنتصرت إتفاجئنا إن الأمريكان أساساً مكانوش داخلين الحرب دي عشان يكسبوها وده كان ريد فلاج كان المفروض يترفع من أول يوم .. الهدف من الحرب دي كان إن والله إحنا حنقف في ظهر فيتنام الجنوبية لحد ما تقدر تقف علي رجلها وتقدر تدوس علي وش مش بس الفييت كونج إنما القوات الفيتنامية الشمالية كمان .. إنت من اليوم الأول وإنت مكتف قواتك المسلحة .. لا إنت سايبلهم الحرية يشوفوا شغلهم ولا إنت قايلهم يعملوا إيه بالضبط .. إنت قايلهم ميعملوش إيه .. إنت قايلهم ميخرجوش بره حدود فيتنام الجنوبية تحت ما يسمي بالحرب المحدودة Limited War وطبعاً مش محتاج أقولك إن الطريقة دي في إدارة الحرب كانت أسواً من تعامل الإتحاد المصري لكرة القدم مع قضية (محمود كهربا).

إنت من سنة 1965 لحد سنة 1969 يعني بتتكلم عن 4 سنين كاملة كان أخرك إنك تشن غارات جوية علي فييتنام الشمالية وزي ما حكينا قبل كده إن الغارات الجوية من غير قوات برية علي الأرض مبتعملش حاجة فإنت مش قادر تحقق أي حاجة علي الأرض .. 4 سنين وإنت مش عارف تكسر خطوط الإمداد اللي بتربط بين فيتنام الشمالية وعناصر فييت كونج المنتشرين جوه فيتنام الجنوبية وخطوط الإمداد دي بتعدي جوه أراضي دولتين اللي هم لاوس وكامبوديا .. 4 سنين وإنت العساكر بتاعتك بتحارب في حرب غابات .. حرب غابات قصاد عدو متعود علي حياة الغابات وإنت لا .. الفييت كونج كانوا حافظين الغابات وعاملين شبكة إنفاق تحت الأرض بتخليهم عمالين يطلعوا في كل حتة يفجعوا العساكر الأمريكان ليل نهار .. 4 سنين من الخساير البشرية اللي مش عايزة تقف في صفوف القوات الأميريكية من غير ما أي حاجة تتحقق .. مع الوقت بدأ اليأس يخلي الأمريكان يرتبكوا جرايم حرب زيهم زي أي قوة استعمارية في التاريخ .. الموضوع بدأ باستخدام النابالم اللي هو مادة حارقة إتحرم دولياً استخدامها بعد كده عشان تحرق الغابات اللي كان بيستخبي فيها عناصر فييت كونج .. لما النابالم مجابش نتيجة بدأوا يستخدموا مبيدات حشرية حارقة برده إتحرم استخدامها دولياً بعد كده أشهرها كان Agent Orange أو العامل البرتقالي .. ده مبيد حشري فكرته كانت إنه يوقع ورق الشجر بتاع الغابات قال يعني كده عناصر الفييت كونج مش حيلاقوا مكان يستخبوا فيه .. خلال العشر سنين من 1961 لحد 1971 الأمريكان رموا فوق فييتنام 75 مليون لتر من Agent Orange علي مساحة 4.5 مليون فدان عشان أميركا تسيب فيتنام بلد مياه الشرب بتاعتها ملوثة وأرضها الزراعية مينفعش تتزرع وملايين حالات السرطان بين المدنيين الفيتناميين.

بس شوف يا أخي كل ده كوم .. كل ده حمادة .. واللي حصل في مارس 1968 ده حمادة تاني خالص  لما حصلت مذبحة ماي لاي My Lai واللي فيها قوات أميريكية عذبت وقتلت فوق 500 مدني من ضمنهم أطفال ونساء .. وشوف حتي ده مش أزمتي .. الحروب بيحصل فيها بلاوي سودا وبتطلع أوسخ ما في البشر ودي معلومة عندي وأنا مقدرها وفاهمها .. بس إن قيادة القوات المسلحة تكفي علي الخبر ماجور لأكتر من سنة وحتي لما الفضيحة إتعرفت ميتقدمش للمحاكمة العسكرية غير عسكري واحد ويوم ما يتحكم عليه يتحكم عليه ب3 سنين إقامة جبرية في بيته .. لو دي مش طريقة تعامل دولة استعمارية يبقي تسميها إيه .. مشكلة حرب فيتنام من اليوم الأول كان المفروض تبقي واضحة للكل وهي إن زيها زي الحرب علي الإرهاب هي مواجهة ضد عدو بيستخبي وسط المدنيين فإنت عسكري لابس زي مموه مش بتبقي عارف هو مين العدو ومين الصديق ودي أكتر حاجة بتخلي العسكري مش طايق نفسه .. إنت مش بس راميني في حرب ملهاش نهاية ده أنا أساساً مش شايف مين بيضرب عليا نار.

المرحلة الثالثة .. ولابد من يوم موعود تترد فيه المظالم:

يوم 30 يناير 1968 صحي الأمريكان مفجوعين نفس فجعتك لما مراتك تشوف الشات بينك وبين زميلتك بسلسلة من الهجمات اللي إتنفذت في وقت واحد وقام بيها عناصر من القوات المسلحة الفيتنامية الشمالية وعناصر من الفييت كونج ضد أهداف في فيتنام الجنوبية وبعد كده إتعرف الهجوم ده باسم هجوم تيت Tet Offensive .. خدامك أنا والعربية إن القوات المسلحة الأميريكية عرفت تحبط الهجوم وأجبرت الفيتناميين الشماليين علي الإنسحاب تاني بس خلينا نبقي متفقين إن الهجوم ده خلي الأمريكان يبقوا عارفين كذا حاجة:

• أول حاجة إن الحقيقة الواضحة زي الشمس إن القدرات القتالية للفيتناميين الشماليين ولعناصر الفييت كونج أعلي بكتير من اللي كانت وكالة المخابرات المركزية الأميريكية CIA متخيلاها وبناء عليه الإنطباع العام جوه المؤسسة العسكرية الأميريكية إن لما مؤسسة المخابرات متبقاش عارفه تقيم صح قدرات العدو فأنا كمؤسسة عسكرية محدش يقولي أعملي من الفسيخ شربات وأكسبي الحرب دي .. المؤسسة العسكرية بقت بتقولها صراحة في وش الرئيس إننا مش سحرة عشان نقلب الطرابيزة في فيتنام .. الحرب دي مينفعش نكسبها.
• ثاني حاجة إن التأييد الشعبي جوه أميركا للحرب مبقاش موجود خلاص .. الناس مستعدة تهتف تحيا أميركا 3 مرات لحد ما بتيجي اللحظة إنهم يلاقوا جثث عيالهم جايه ملفوفة بعلم البلد .. وقتها أميركا كانت لسه فيها نظام التجنيد الإجباري واللي عشان يلاقوا عساكر تكفي يرموها للتهلكة كانوا بياخدوا أي حد تقع عنيهم عليه .. زي ما بيحصل في التجنيد عندنا دلوقتي كده .. التجنيد الإجباري كان بيشفط أي حد في سكته .. أبيض .. أسمر .. أسيوي .. عربي .. مش حتفرق .. شوية والبيض الأمريكان بقوا بيلاقوا عيالهم بيرجعولهم جثث ملفوفة بعلم أميركا زيهم زي الأمريكان السمر زيهم زي الأمريكان الأسيويين زيهم زي الأمريكان من الهنود الحمر .. دي كانت اللحظة اللي الشعب الأميريكي بكل طوائفه وكل أعراقه بدأ يسأل نفسه السؤال اللي بيخلي أي بلد تخسر أي حرب .. هو أنا ليه إبني يموت هناك؟

سنة 1969 بيجي للرئاسة الأميريكية أكتر بني أدم عليها خناقة بين المؤرخين من وسط كل اللي حكموا البلد دي .. (ريتشارد نيكسون Richard Nixon) .. (نيكسون) كسب الإنتخابات الرئاسية بوعد رئاسي إنه هو حيبقي أبوالعريف اللي مجابتوش ولادة اللي حيجيب حرب فيتنام دي في شوال .. خطة (نيكسون) لخروج أميركا من الباكابورت بتاع فيتنام هو سماه الفتنمة أو Vietnamization ودي بإختصار إن الحرب دي بتاعة الفيتناميين وخليهم هم يحاربوها وإحنا ملناش دعوة بيها وطبعاً (نيكسون) كان كداب كدب الإبل لإن الحرب دي أساساً بدأها الأمريكان لما خافوا تتعمل إنتخابات في فيتنام يكسبها الشيوعين .. المهم إن خطة (نيكسون) كانت عشوائية بشكل غريب لإنها إعتمدت علي 3 حاجات عكس بعض في وقت واحد .. أولاً حتتعمل مفاوضات سلام في باريس يوم 25 يناير 1969 .. وفي نفس الوقت عشان الأمريكان يعرفوا ينسحبوا بأمان لازم خطوط الإمداد بتاعة الفييت كونج اللي زي ما قلنا قبل كده بتمتمد جوه بلدين اللي هم لاوس وكامبوديا تتضرب بالطيران ودي الخطوة اللي هيجت الرأي العام ضد (نيكسون) .. وفي نفس الوقت برده إن إنسحاب أميركا من فيتنام حيبدأ في يوليو 1969 .. لأكتر من 3 سنين والأمريكان بيلموا شنطهم من فيتنام لحد ما جت سنة 1972 وأغلب القوات الأميريكية هناك كانت مشيت .. بس طبعاً الفيتناميين الشماليين مش حيسيبوا الأمريكان يمشوا كده إيديهم فاضية .. تيجي إزاي.

يوم 30 مارس 1972 الأمريكان بيصحوا مفجوعين برده نفس فجعتك كده لما مراتك تشوف الشات بتاعك مع زميلتك بعد ما إنت وعدتها إنك حتقطع علاقتك بيها لما القوات الفيتنامية الشمالية عبرت خط عرض 17 درجة في هجوم عسكري إتسمي بعد كده هجوم الفصح أو هجوم الربيع Easter Offensive أو Spring Offensive عشان تبدأ القوات الفيتنامية الشمالية غزوها البري لفيتنام الجنوبية .. يوم 27 يناير 1973 بيتمضي إتفاق وقف إطلاق نار في باريس من ضمن شروطه إن مش حتتضرب ولا طلقة لحد ما القوات الأميريكية تتم إنسحابها من فيتنام يوم 29 مارس 1973 عشان الأمريكان يسيبوا فيتنام الجنوبية مخضرة للفيتناميين الشماليين ياخدوها وده اللي حصل فعلاً يوم 30 إبريل 1975 .. يوم 2 يوليو 1976 بيتم توحيد فييتنام تحت مسمي جمهورية فييتنام الإشتراكية عشان ينتهي الفيلم بنفس النهاية اللي الأمريكان مكانوش عايزينها سنة 1956 .. عشرين سنة والأمريكان بيحاولوا منع فيتنام إنها تبقي بلد شيوعية وفي الأخر فشلوا .. عشرين سنة مات فيهم 58,000 عسكري أمريكاني وفوق ال3 مليون فيتنامي نصهم مدنيين وفي الأخر برده حصل اللي الأمريكان مكانوش عايزينيه .. مش حبقي ببالغ لو قلت إن الحرب دي هي أكتر حرب مكنش ليها لازمة في تاريخ البني الأدمين.

مفيش حاجة بتشقلب حياة البني أدمين اللي عايشين في بلد زي الحرب .. البني أدم بيخش الحرب حمادة و بيطلع منها حمادة تاني خالص .. وفي الأخر كله بيتنسي و الغريب إن البشر مبيتعلموش .. نفس الدروس السودا اللي المفروض الأمريكان إتعلموها في فيتنام كان المفروض يستفيدوا منها في العراق و أفغانستان بس نقول إيه .. حسبي الله و نعم الوكيل.

المصادر:

• مقالة بعنوان A Short Guide to the Vietnam War نشرت علي موقع ThoughCo وده لينك المقالة الأصلية:
  https://www.thoughtco.com/vietnam-war-s2-1779964
• مقالة بعنوان Vietnam War: Causes, Facts & Impact نشرت في موقع History Channel وده لينك المقالة الأصلية:
  https://www.history.com/topics/vietnam-war/vietnam-war-history