يا تري ايه اكتر شعور بيحرك البشر؟ .. خليني أسألك السؤال بشكل تاني .. إيه اللي بيخليك كل يوم تصحي الصبح تروح الشغل تستحمل وش ناس إنت مش طايقها عشان خاطر يجيلك مرتبك أخر الشهر؟ .. هل سعيك إنك تثبت نفسك في شغلانة إنت غالباً مش عايز تكمل فيها؟ .. إحساسك بالمسئولية ممكن؟ .. أو يمكن خوفك من إنك متلاقيش فلوس تصرف علي نفسك .. لو فكرت فيها حتلاقي خوفك من شيء ما هو اللي غالباً الدافع الحقيقي ورا كل شيء إنت بتعمله في حياتك اليومية .. إنت بتخلص التاسكاية المقرفة اللي معاك عشان خايف من إن مديرك يقولك كلمة وحشة .. إنتي شقيانة في المطبخ بالساعات عشان تعملي أكل عشان خايفة إن جوزك وعيالك يقلبوها مناحة لو رجعوا ملاقوش حاجة ياكلوها .. إنت بتقرر تغير كاوتشات عربيتك عشان خاطر خايف الكاوتشات القديمة تفرقع بيك وإنت سايق بعيالك لا قدر الله .. الخوف هو البنزين اللي بيحركنا كبني أدمين .. الكلام ده يمشي عليك سواء كنت مواطن غلبان بتجري ورا أكل عيشك أو كنت رئيس وزراء قوة عظمي.
خد مثلاً واحد زي (وينستون تشرشل) .. في حالة إنك أول مرة تسمع اسم الرجل ده فده كان رئيس وزراء بريطانيا وقت الحرب العالمية الثانية وفيه فيلم حلو جداً بيحكي قصة الفترة الأولانية من الحرب العالمية الثانية وتوليه رئاسة الوزراء اسمه Darkest Hour حيعجبك أوي .. أنا عايزك تقدر تستوعب الناس كانت شايفه الرجل ده ازاي في الشهور الأخرانية من الحرب .. الناس كانت بتبص ل(تشرشل) نفس بصتها للرئيس (محمد أنور السادات) الله يرحمه بعد حرب أكتوبر 1973 .. في أول الحرب لما أمريكا نفدت بجلدها وأعلنت حيادها مكنش فيه حد واقف في صف بريطانيا قصاد ألمانيا النازية .. (تشرشل) وقف لوحده قدام ألمانيا النازية وقدام إيطاليا الفاشية .. (تشرشل) لوحده اللي صمد لحد ما (موسوليني) اتقبض عليه ولحد ما (هتلر) انتحر .. الانجليز حرفياً كانوا شايفين الرجل ده هو الزعيم المُلهم الدكر اللي عدي ببريطانيا من كابوس نكسة دانكيرك لحد عبور سقوط برلين .. يوم 8 مايو 1945 وأعلان انتصار الحلفاء علي ألمانيا النازية كان (تشرشل) بيتشال علي الاكتاف كبطل قومي المفروض يتحط مكانه علي الجنيه الاسترليني.
الخوف .. هو احنا اتضحك علينا ولا ايه؟
وسط كل مشاعر الفرحة والنصر كان (تشرشل) حاسس بحاجة تانية خالص .. الخوف .. الخوف اللي بدأ يتزرع في قلبه في فبراير 1945 يعني 3 شهور قبل ما الحرب تخلص .. في الشهر ده اتعملت جلسة في مدينة يالطا الروسية هي تعتبر الجلسة الثانية من ضمن 3 جلسات اللي يحضرها ثلاثي أضواء المسرح .. زعماء الدول الثلاثة المنتصرة في الحرب .. (فرانكلين روزفيلت) رئيس أمريكا .. (تشرشل) رئيس وزراء بريطانيا .. (جوزيف ستالين) زعيم الإتحاد السوفيتي .. الحقيقة اللي إنت لازم تبقي عارفها كويس إن (ستالين) دخل الاجتماع ده وهو شايل ومعبي .. هو اتوعد قبلها إن الانجليز حيخشوا ايطاليا ومحصلش .. هو اتوعد إن الأمريكان حيعملوا عملية انزال بري في نورماندي ومحصلش .. هو داخل وفي دماغه شبه اقتناع إنه اتضحك عليه .. هو شايف إن الإنجليز والأمريكان مأجلين حسمهم للحرب لحد ما السوفييت والألمان يفشخوا بعض وبعد ما يطلعوا عين بعض ساعتها غزو إيطاليا وتحرير فرنسا حيحصلوا بعد ما تكون روسيا دفعت الثمن غالي بأرواح شبابها .. حاول تبص للدنيا من عيون (ستالين) .. أنا خسران فوق 25 مليون بني أدم .. إنت متخيل الرقم .. مستوعبه .. أنا خسران فوق ثلث ثروة البلد .. من وجهة نظره هو حالف مية يمين إنه حياخد حقه تالت ومتلت ومحدش يقدر يلوي دراعي .. أنا بولندا كلها معايا وحنعرف كمان شوية إن بولندا هي كلمة السر في كل اللي بيحصل .. أنا ليا فوق 2.5 مليون عسكري في شرق ألمانيا وخلاص قواتي محاصرة برلين.
في الجلسة دي كل واحد من الثلاثة رمي بياضه لإن كل واحد فيهم كان عايز حاجة من الإتنين الثانيين .. يعني مثلاً .. (روزفيلت) كان عايز (ستالين) يخش معاه بجد في تأسيس الأمم المتحدة وكان عايز كمان (ستالين) يعلن الحرب علي اليابان لإن لحد اللحظة دي كانت لسه اليابان مستسلمتش ولحد اللحظة دي اليابان والإتحاد السوفيتي مأعلنوش الحرب علي بعض فهو كان عايز ده يتغير عشان يبقي ورقة ضغط علي اليابان اللي يمكن تغير موقفها بتاع لا تراجع ولا استسلام القبضة الدامية .. (تشرشل) عايز يطلع بكلمة رجولة من (ستالين) بإن دول شرق أوروبا اللي لحد دلوقتي تحت سيطرة السوفييت حيتعمل فيها انتخابات حرة ونزيهة وبالذات بولندا .. (ستالين) عايز وعد من (روزفيلت) إن حيبقي فيه منطقة عازلة بينه وبين الأمريكان في أوروبا وفي نفس الوقت برده هو عايز يبقي له رأي في اللي حيحصل في بولندا علي أساس إن بولندا هي عتبة الباب اللي بتودي للإتحاد السوفيتي .. الجلسة بتخلص إن الثلاثة بيوعدوا بعض إن طلباتهم حتتحقق .. كل اللي أي واحد فيهم عايزه من الثاني حيحصل .. كلام رجاله.
بتعدي الأيام ومفيش حاجة بتحصل .. مفيش انتخابات حصلت في بولندا .. الوفد البولندي اللي راح يتفاوض مع (ستالين) بخصوص مستقبل البلد لقوا نفسهم بيتقبض عليهم وبيترموا في معتقل الجولاج في سيبريا .. باختصار شديد (ستالين) ادي (تشرشل) مقلب .. بلا انتخابات بلا وجع دماغ .. بولندا بتاعتي وشرق أوروبا بتاعي جزرة وجطمها جحش .. حتي الأمريكان خدوا علي قفاهم من (ستالين) .. لحد ما القنبلة النووية اترمت فوق هيروشيما وبعدها ناجازاكي هو مأعلنش الحرب علي اليابان .. من وجهة نظر الأمريكان (ستالين) كان ندل معاهم بس هم مش فايقين ليه دلوقتي لإن هسهس اليابان كان مسيطر علي دماغهم .. اللي كان عمال يزعق إن (ستالين) ده شيطان وإن المد الشيوعي حيكسحنا كلنا كان (تشرشل) .. (تشرشل) كان فاهم إن تحالف بريطانيا مع أمريكا مع الاتحاد السوفيتي ضد ألمانيا النازية كان ماشي بمبدأ عدو عدوي صديقي بس إيه اللي يحصل لما عدوي يروح في داهية .. مع كل يوم بيعدي وبطن (تشرشل) بتكركب أكتر .. هو محتاج يتصرف .. لازم حاجة تتعمل بس إيه هي؟
لما تيجي تبص علي الوضع في أوروبا من فوق في مايو 1945 حتلاقي إن الوضع من وجهة نظر (تشرشل) زي الزفت:
- القوات البرية لوحدها اللي تحت ايد الأمريكان والانجليز في أوروبا كانت حوالي 80 فرقة قتالية قصاد إن السوفييت تحت إيدهم 224 فرقة قتالية .. الفرقة القتالية أو Division في وقت الحرب العالمية الثانية كانت ما بين 10,000-20,000 عسكري يعني لو خدت المتوسط بتاعهم اللي هو 15,000 فالانجليز والأمريكان تحت ايدهم مليون و200 ألف عسكري قصاد 3 مليون و 360 ألف عسكري سوفيتي .. إنت مستوعب الفرق؟
- الفرق المدرعة اللي كانت تحت إيد الإنجليز والأمريكان كانوا 23 قصاد 36 فرقة مدرعة سوفيتية .. المفروض إن كل فرقة فيها 3 كتايب دبابات وكل كتيبة فيها 36 دبابة كحد أدني يعني بتتكلم إن الانجليز والأمريكان معاهم 828 دبابة قصاد 1,296 دبابة سوفيتية.
- القوات الجوية هي كمان فيها تفوق رهيب في العدد لصالح السوفيت اللي معاهم 12,000 طيارة قصاد 6,800 طيارة تابعة لسلاح الجو الإنجليزي والأمريكاني .. يمكن الحاجة الوحيدة اللي الحلفاء متفوقين فيها من حيث العدد هي القاذفات وهي الطيارات اللي بتقدر تشيل قنابل كتير .. الإنجليز والأمريكان معاهم 2,800 قاذفة قصاد 980 قاذفة سوفيتية.
عشان متتوهش وسط الأرقام الكتير ففي الأخر خالص عدد القوات المسلحة السوفيتية كأفراد ومعدات يعتبر 3 أضعاف القوات البريطانية والأمريكية في أوروبا .. السؤال دلوقتي .. لو (ستالين) كمل في حركة الندالة بتاعته وقرر يخش ألمانيا الغربية ومش بس كده قرر ياكل تورتة أوروبا كلها لوحده مين حيقوله سلامات يا أم أحمد؟ .. يا مؤمن ده حتي الدانمرك كانت تحت عين السوفييت وطمعانين فيها .. بقوتهم العسكرية دي مين حيقدر يقف قدامهم لو قرروا ياخدوا كل حاجة بالعافية؟ .. إنت متخيل الخوف اللي كان (تشرشل) حاسس بيه؟ .. إنت متخيل إنه مرعوب من فكرة إن خلال خمس سنين بتوع الحرب العالمية الثانية ميزانية بريطانيا اتفشخت والبلد ضحت بخيرة شبابها عشان يخلصوا من (هتلر) تقوم الحرب تخلص ويجيلهم اللي انيل منه؟
في أواخر مايو 1945 (تشرشل) بيطلب من قيادة القوات المسلحة البريطانية انها تحطله خطة تحت فكرة What if? .. تخيلوا معايا إن القوات البريطانية والأمريكية في أوروبا قررت توجه ضربة استباقية للاتحاد السوفيتي .. في 3 أسابيع كانت الخطة جاهزة مع امكانية البدء في تنفيذها في يوليو 1945 .. الخطة بمنتهي البساطة هي هي خطة بارباروسا اللي النازيين نفذوها عشان يضربوا السوفييت بس يمكن الإنجليز حيتعلموا من الدرس القاسي بتاع النازيين إن لازم الضرب يخلص قبل ما الشتاء يجي .. الخطة اتحطلها اسم Operation Unthinkable أو عملية شيء لا يصدقه عقل واللي بمنتهي البساطة بتقول الأتي .. حيتم تقسيم قوات الحلفاء لنصين .. نص في الشمال ونص في الجنوب بحيث النصين حيستخدموا نفس تكتيك الحرب الخاطفة Blitz Krieg اللي النازيين كانوا بيستخدموه عشان يخشوا ألمانيا الشرقية ويسيطروا علي بولندا .. بمجرد ما بولندا تبقي تحت إيدهم حيتعمل خط دفاعي ماسك من أول مدينة دانزينج في شمال بولندا لحد مدينة بريسلاو في جنوب بولندا .. جدير بالذكر إن الخطة اعتمدت علي إن بولندا نفسها فيها حوالي 4 فرق قتالية يعني فيها 60,000 عسكري ممكن ينضموا للعملية وحيكونوا مؤثرين في نجاحها .. مهم بالنسبة لي تفهم إن الهدف ورا عملية شيء لا يصدقه عقل وكل الصداع بتاعها كان هو ضمان استقلال بولندا .. جواز السوفييت من بولندا باطل ومينفعش يكمل.
الغريب في العملية واللي يضحك ويخليك مستغرب في نفس الوقت هو إن الأنجليز مكنش عندهم مشكلة إنهم يقولوا طب ليه لا نطلع العساكر الألمان اللي كانوا محبوسين في معسكرات الأسري ونديهم سلاح ونطلقهم علي السوفييت .. إنت متخيل المنطق؟ .. نفس العسكري الألماني النازي اللي قتل واغتصب وسرق البولنديين حيتقاله البس زيك العسكري تاني وامسك سلاح تاني بس المرة دي حتحارب مع البولنديين ضد السوفييت .. أسري الحرب النازيين في السجون بتاعة الحلفاء كانوا لو جمعتهم علي بعض يدولك نفس القدرة القتالية ل10 فرق يعني 150,000 ألف عسكري .. جمعهم علي 60,000 بولندي بقي تعداد قوات الحلفاء وصل مليون ونص تقريباً .. الخطة نفسها حطها رئيس أركان حرب القوات المسلحة البريطانية الجنرال (جيوفري تومسون) وده رجل اساساً يعني بتاع مدفعية وكان قائد سلاح المدفعية .. لما تيجي تبص علي تفاصيل الخطة تلاقي الرجل ده كان متخيل إن اللي حيحصل هو معارك دبابات شبه اللي حصلت في كورسك في الحرب العالمية الثانية لما أكتر من 6,000 دبابة طاحوا في بعض زي التيران الهايجة وهو كان متوقع إن عملية شيء لا يصدقه عقل دي حتشوف معارك دبابات بتشارك فيها فوق 8,000 دبابة من بريطانيا وأمريكا وبولندا وكندا قصاد الدبابات السوفيتية الوحشة الشريرة المتوحشة
ليه Operation Unthinkable عملها شوية بهايم؟
مبدأياً إنت لو ناوي تشف نفس اللي عمله النازيين لما دخلوا روسيا فإنت لازم تفهم كويس هم ازاي النازيين داسوا علي وش السوفييت في النص الأولاني من عملية بارباروسا واللي الحقيقة معتمدة علي حاجتين:
- أولاً إن دي كانت أول مرة العالم يلاقي نفسه بيتعامل مع حاجة اسمها دبابات بتجري في كل حتة ووراها عساكر مشاة بيتحاموا فيها والدبابات دي بتدوس علي وش أي حد يقف قدامها .. تكتيك الحرب الخاطفة Blitz Krieg كان عامل زي ما الناس اتصدمت من فكرة تيكي تاكا بتاعة برشلونة 2009 .. يعني إيه فرقة يبقي معاها استحواذ يعدي 70% .. هو يعني ايه نبني الهجمة من حارس المرمي .. ايه الكلام الغريب ده .. جري الشريط كام سنة والناس بقت فاهمة كويس إن عشان تكسر هيمنة الاستحواذ دي يا تلعب علي الهجمة المرتدة يا تضغط علي اللاعيب اللي معاه الكورة .. الوقت بيعلم .. إذا كانت Blitz Krieg جابت نتيجة مع النازيين وقتها فمش معني كده إن السوفييت بهايم أوي للدرجة إن ياخدوا علي قفاهم مرتين بنفس التكتيك .. أكيد يعني حيكونوا اتعلموا الدرس وحيبقوا عارفين كويس إزاي يصدوا الهجوم ده.
- ثانيا وده المهم إن النازيين كانوا متفوقين فشخ في قواتهم الجوية علي السوفييت .. إنت دلوقتي العكس .. السوفييت معاهم ضعفين عدد الطيارات اللي معاك.
- ثالثا وده المهم هو إنت متخيل إن المواطن الإنجليزي البسيط حيبلع الكلام ده بالساهل؟ .. يعني مواطن عاش 4 سنين حرب عالمية أولي وراها 5 سنين حرب عالمية ثانية ودلوقتي إنت عايز تجرجر رجله لحرب عالمية ثالثة .. لا وإيه المرة دي إنت عايزه يحارب جنب النازيين اللي هو فضل يحارب فيهم عشان إنت خايف من سيطرة الشيوعيين علي أوروبا .. طب معلش يعني متنساش نقطة إن لحد اللحظة اللي Operation Unthinkable اتحطت علي الطرابيزة مكنتش لسه اليابان استسلمت .. طب إنت لو خنت السوفييت إيه اللي يمنع السوفييت انهم يخونوك ويتحالفوا مع اليابان ضدك؟ .. يمكن أكتر حد من ضمن القيادة البريطانية اللي كان معترض علي عملية شيء لا يصدقه عقل بسبب حتة الاعتماد علي النازيين دي بالذات كان الجنرال (هيستينجز إيزماي) وده كان المستشار العسكري ل(تشرشل) وكان رأيه عن حاجة زي دي ممكن تدمر الروح المعنوية للعساكر الإنجليز .. ده زي إنك بعد حرب أكتوبر 1973 تقول للعساكر المصريين استعدوا بقي عشان احنا حنتحالف مع الصهاينة واللي احنا لسه فاشخينهم عشان نروح نحارب أثيوبيا مثلاً.
القنبلة النووية .. كل حاجة اتغيرت:
يوم 1 يوليو 1945 الأمريكان بيفجروا أول قنبلة نووية تجريبية ضمن اختبار Trinity Test أو الإختبار الثلاثي اللي إنت يمكن شفت قصته في فيلم Oppenheimer .. ليه اليوم ده مهم؟ .. معاك وخدامك أنا والعربية إن محدش كان متخيل أو مستوعب مدي تدمير وفعالية القنبلة النووية بس علي الأقل خالص الأمريكان كانوا مستنيين قنبلة بتعمل بوووم كبيرة .. حتي السوفييت .. السوفييت كانوا عارفين إن الأمريكان قربوا أوي يبقي تحت إيدهم قنبلة نووية بس هو يعني القنبلة النووية دي بتعمل إيه .. محدش شاف قدرتها التدميرية قبل كده .. هم كمان كانوا متخيلين إن القنبلة النووية دي بتعمل بوووم كبيرة .. ده السبب إن الأمريكان مكانوش خايفين من السوفييت نفس الخوف اللي عند (تشرشل) .. وجهة نظرهم إن لو السوفييت قلوا أدبهم حنرمي عليهم كام قنبلة نووية وخلاص ويمكن ده السبب اللي خلي الأمريكان لما اتعرضت عليهم خطة عملية شيء لا يصدقه عقل رفضوها.
لما الأمريكان رموا القنبلتين علي هيروشيما وناجازاكي فيه كذا حاجة حصلت .. واحد (ستالين) بص لرجالته وقالهم أنا عايز واحدة من دول .. اتنين إن اليابانيين كانوا بيفكروا إن حتي لما اتضربنا بالنووي فاحتمال كبير الأمريكان ميكونش تحت إيدهم غير القنبلتين دول فاحنا برده ممكن منعلنش الاستسلام .. (ستالين) بعد ضرب ناجازاكي أعلن بشكل رسمي الحرب علي اليابان عشان خاطر ميزعلش الأمريكان وخلي بالك إن مفيش عسكري سوفيتي واحد اتسحب علي الجبهة مع اليابان هو بس (ستالين) أعلن الحرب بس الناس كلها كانت عارفه إن ده كان إعلان فشنك .. اليابانيين مكنش عندهم رفاهية إنهم ياخدوا Risk زي دي .. إنت كان ممكن تقول صعب الأمريكان يبقي عندهم قنبلة نووية تالتة بس مستحيل يبقي الأمريكان معندهمش قنبلة تالتة وكمان (ستالين) بيهوش .. هو إحنا اه ممكن تكون أمنا داعية لينا بس مش للدرجة دي .. هنا بتقرر اليابان إنها تستسلم عشان رسمياً Operation Unthinkable تترمي في الزبالة.
في مارس 1946 بتتدفن عملية شيء لا يصدقه عقل بالحيا وجنازتها تجسدت في الخطاب اللي القاه (تشرشل) يوم 5 مارس في مدينة فولتون بولاية ميزوري الأمريكية بحضور الرئيس الأمريكي وقتها (هاري ترومان) .. بالمناسبة في الوقت ده كانت اتعملت الانتخابات البرلمانية البريطانية و(تشرشل) خسرها .. بطل الحرب اتشال من منصبه في واحدة من سخريات القدر وفي الخطاب ده قال فيه إن فيه ستارة حديدية اتفردت في أوروبا .. والغريب مش في كده .. الغريب إن هم هم الامريكان اللي في يوليو 1945 رفضوا خطة Operation Unthinkable هم هم نفس الامريكان في 1946 يعني بعد سنة بالضبط اكتشفوا إن (تشرشل) كان عنده حق وبدأوا يعملوا الخطة بتاعتهم لازاي يضربوا السوفييت في أوروبا.
خليني أختم معاك بالنقطة اللي بدأتها في الأول وهي إن في السياسة الخارجية للدول غالباً الموتور اللي بيحرك كل حاجة هو الخوف .. بص علي اللي بيحصل في المنطقة حولينا دلوقتي .. تفتكر ليه الحكومة المصرية مش عارفه تاخد قرارات قوية توقف الحرب في قطاع غزة؟ .. الإجابة بمنتهي البساطة هي الخوف .. الخوف من رد فعل أمريكا والغرب .. الخوف من التصعيد إن إيه اللي يحصل لو حد مجنون زي (بنيامين نتنياهو) قرر إن ياخد تدخل مصر حجة إنه يوسع من دايرة الحرب خصوصاً إن السبب ورا أصلاً جوعه للدم ده كله جاي من خوفه إنه يخش السجن بمجرد ما يتشال عنه حصانة منصبه .. نفس احساس الخوف ده اللي خلي (تشرشل) يسأل نفسه انا ممكن أعمل ايه عشان افرمل الاتحاد السوفيتي وده نفس الخوف اللي خلي الأمريكان في الأول يشوفوه مجنون أو رجل أدمن السلطة وبقي عايز دايماً يحس إنه شخص مهم ومؤثر والناس كلها بتسمع كلامة حتي لو كان الثمن هو حرب تاكل الاخضر واليابس .. وهو برده نفس الخوف اللي خلي الامريكان بعدها بسنة واحدة يرجعوا يقولوا ل(تشرشل) احنا اسفين يا صلاح.
المصادر:
- فيديو بعنوان Operation Unthinkable: Would it Have Caused World War 3? Churchill’s Secret Plan to Defeat Stalin نشر علي YouTube وده لينك الفيديو:
Operation Unthinkable: Would It Have Caused World War 3? Churchill’s Secret Plan To Defeat Stalin - مقالة بعنوان Operation Unthinkable: Churchill’s Postwar Contingency Plan نشرت في موقع History Hit وده لينك المقالة الأصلية:
Operation Unthinkable: Churchill’s Postwar Contingency Plan | History Hit - مقالة بعنوان Operation Unthinkable-Inside Churchill’s Abortive Plan to Drive the Red Army from Eastern Europe نشرت في موقع Military History Now وده لينك المقالة الأصلية:
Operation Unthinkable – Inside Churchill’s Abortive Plan to Drive the Red Army From Eastern Europe – MilitaryHistoryNow.com
