خليني أبقي صريح معاك رغم إني بعتبر نفسي شجيع السيما و بحب السينما و الأفلام جداً بس في نفس الوقت أنا حبقي متفهم إن إنت كرجل عندك مشغوليات كتير تبقي شايف إن رغبتي إني أتفرج علي حفلة توزيع جوايز الأوسكار إنها تضييع وقت و إن إيه الهبل اللي إنت بتتفرج عليه ده .. من بره يبان إن عندك حق .. إيه اللي يخليني أنا مواطن كادح بجري ورا أكل عيشي أقضي 3 ساعات من عمري بتفرج علي ناس مليونيرات لابسين لبس عمري ما حعرف أجيب ثمنه بيهنوا بعض علي شغل هم واخدين ثمنه فلوس عمري ما حعرف أجيب جزء منها مهما إشتغلت و تعبت .. بس نعمل إيه الكيف بيذل .. ناس كتير بقت لو يعني مهتمة بإنها تعرف مين خد أوسكار أحسن ممثل تستني البوست المجمع اللي بينزل علي سوشيال ميديا للناس اللي فازت ولو هم مهتمين يعني يسيبولهم كومنت يقولوا رأيهم بس استحالة حد فيهم يكون مهتم يعرف إيه هي فئات جوايز الأوسكار و يا تري مين خد أوسكار أحسن موسيقي تصويرية السنة دي .. المقدمة الطويلة العريضة دي هدفها إني أقولك إني حبقي متفهم جداً إنك متهتمش لو قلتلك خبر إن الأكاديمية الوطنية لعلوم السينما اللي بتدي جوايز الأوسكار بتدرس حالياً إنهم يزودوا فئة جديدة من فئات الجوايز و اللي حتروح لأحسن مشهد أكشن و ده في رأيي أنا الشخصي خبر يستحق إننا نقف قدامه شوية.
إنت ممكن تبقي مخرج سينما جامد زحليقة .. ممكن تبقي شاطر جداً في إنك تنقي زاوية تصوير مشهد المفروض إنه عادي جداً زي إتنين رجاله بيتكلموا مع بعض في قهوة و بسبب إن (مايكل مان Michael Mann) مخرج شاطر في صنعته قدر يخلي مشهد زي ما قلت عادي جداً يبقي واحد من أيقونات السينما في تاريخها زي ما حصل في فيلم Heat في مشهد المطعم بين (أل باتشينو Al Pacino) و (روبيرت دي نيرو Robert Di Nero) .. بس ده مش معناه إن (مايكل مان) هو اللي حيعرف يخرج مشهد ضرب النار اللي حصل في الشارع بعد السطو المسلح علي البنك في الفيلم .. دي بتبقي شغلة ما يسمي مخرج الوحدة الثانية Second Unit Director و اللي بيكون واحد شاطر في إخراج مشاهد الأكشن في الفيلم .. ده اللي بيقول مين يضرب نار علي مين و إزاي و بيختار السلاح و وقت التصوير و زاوية الكاميرا و عشان كده أحسن مخرجي الوحدة الثانية بيكون أصلهم و بداية الكاريير بتاعتهم كانوا دوبلير في أفلام أكشن بحيث زي ما بنقول كده بدأوا الشغلانة من تحت خالص .. دي الناس اللي بدأت بغسيل الصحون و دلوقتي بسم الله ما شاء الله بقي عندهم المطعم بتاعهم .. من الناس دي (تشاد ستاهلسكي Chard Stahelski) مخرج سلسلة أفلام John Wick.
(تشاد ستاهلسكي) بدأ حياته كدوبلير للمثل (كيانو رييفز Keanu Reeves) في سلسلة The Matrix و كمل شغله مع المخرجين بتوع الفيلم اللي هم الاخين (واتشوسكي Wachowskis) اللي بعد كده بقوا الأختين (واتشوسكي) و دي قصة طويلة بس مش وقتها دلوقتي .. المهم هو بدأ معاهم كدوبلير و بعد كده بقي مخرج وحدة تانية في افلامهم وهو مثلاً اللي كان المسئول عن تصوير مشاهد الأكشن الخزعبلية بتاعة فيلم V for Vendetta لحد ما ربنا كرمه و أخرج أول أفلامه John Wick .. بحكم الكاريير بتاعته (تشاد ستاهلسكي) فهو فاهم كويس أوي هم الدوبليرات والناس المسئولة عن تصوير مشاهد الأكشن بالذات بيطلع ميتينهم إزاي عشان الفيلم يطلع بالشكل اللي إنت بتشوفه في السينما ده .. من (توم كروز Tom Cruise) وهو متشغلق زي الدبانة علي إزار برج خليفة في فيلم Mission: Impossible-Ghost Protocol لتقريباً كل مشاهد فيلم Mad Max: Fury Road .. و لسنين الحقيقة هو كان ضمن شلة من الناس اللي شايفين إن الأوسكار مش بتعبرهم و مش بتديهم التقدير اللي هم يستحقوه بإن تتعمل فئة من جوايز الأوسكار تكرم شغلهم .. (تشاد ستاهلسكي) بدأ فعلاً يتكلم مع الناس بتوع الأكاديمية و اللي وصلوا مع بعض إن خلال السنين الأربعة الجاية حتضاف فئة جديدة من فئات الأوسكار مخصوص للناس دي.
فيه أسئلة كتير محتاجة تتجاوب عليها قبل ما الجايزة دي تبقي رسمي جزء من جوايز الأوسكار زي مثلاً مين اللي حيستلم الجايزة؟ هل الدوبلير؟ ولا مخرج الوحدة الثانية؟ ولا مخرج الفيلم؟ اسم الجايزة نفسه حيبقي إيه؟ .. واحد زي (توم كروز) اللي بيعمل كل مشاهد الأكشن بتاعته زيه زي (كيانو رييفز) هل هو اللي حيترشح للجايزة؟ .. اللي أنا عايز أوصله ليك إن الكلام معلهوش ضرايب المشكلة في التنفيذ .. أيا كانت الطريقة اللي الجايزة حتتعمل بيها فخليك عارف و متؤكد إن فيه حد حيحس إنه إتنسيت أكني ماجيت علي رأي (مسلم) .. وفي نفس الوقت الجايزة دي يمكن تخلي الأوسكار ترجع تاني الناس تهتم بيها .. خلينا نكون متفقين إن إختيارات الأوسكار للفائزين في السنين اللي فاتت كانت غريبة بشكل مستفز من أول Everything, Everywhere, all at Once بتاع السنة اللي فاتت لفيلم Coda بتاع السنة اللي قبلها .. تحس إنك عايز تسألهم هو فيه حد إتفرج علي الأفلام دي أساساً؟ .. يمكن لما تتعمل جايزة تلاقي الفايز بيها مشهد مطاردة شوارع باريس في فيلم John Wick 4 أو مشهد ضرب النار في فيينا في فيلم Extraction 2 يخليك كمشاهد بدأت ترجع تهتم تاني إيه يا تري اللي حصل في الاوسكار السنة دي.
المصادر:
مقالة بعنوان Academy, take action: Why there should be an Oscar for best stunts نشرت في جريدة The Guardian و ده لينك المقالة الاصلية:
https://www.theguardian.com/film/2023/jun/22/oscars-best-stunts-john-wick
