لما صحينا علي خبر إن إيران ردت علي إغتيال أميركا ل(قاسم سليماني) بإنهم ضربوا قاعدة جوية عراقية قاعد فيها عساكر أمريكان وإن في نفس التوقيت فيه طيارة مدنية طراز بوينج 737-800 تابعة للخطوط الجوية الأوكرانية وقعت فوق إيران فأكيد الموضوع مش صدفة .. بعدها بشوية طلع بيان من الحكومه الإيرانية بإن أيوه إحنا وقعنا الطيارة بالغلط وإحنا السبب في موت 176 بني أدم منهم إيرانيين وكنديين وأفغان وجنسيات تانية .. اللي حصل ده مأساة كبيرة وزي ما إنت غالباً مش حتسمع في الأخبار إن أي ضابط في الدفاع الجوي الإيراني إتقدم للمحاكمة فأنا بس حابب أفكرك بإن نفس الكارثة دي حصلت هي هي في إيران برده بس بالعكس يوم 3 يوليو 1988 في أخر أيام حرب الخليج الاولي بين إيران والعراق واللي إتكلمنا عنها في مقالة قديمة .. في اليوم ده أميركا وقعت طيارة مدنية إيرانية رقم 655 كانت طالعة من مطار بندر عباس رايحة دبي ومات ركابها ال290 ومن ضمنهم 66 طفل .. تفاصيل إسقاط الطيارة الإيرانية مرعبة بس في نفس الوقت حتوريك ليه الحكومة الإيرانية عامله نفسها من بنها لما حد يسألها عن الطيارة الأوكرانية اللي هم وقعوها؟
في اليوم ده اللي هو 3 يوليو 1988 كانت فيه مدمرة أميريكية إسمها فانسان Vincennes بتنفذ مهمة قتالية ضد القوات البحرية الإيرانية في الخليج العربي .. بناء علي الكلام اللي طلع من رئيس هيئة الأركان المشتركة الأميريكية الأدميرال (وليام جيه كرو جونيور William J. Crowe Jr.) واللي أكده بيان الرئيس الأميريكي وقتها (رونالد ريجان Ronald Reagan) فضابط الرادار علي المدمرة إفتكر إن الطيارة الإيرانية اللي كانت طراز إيرباص Airbus A300 إنها طيارة مقاتلة إيرانية طراز F-14 عشان كانت بتطير علي إرتفاع منخفض ولما بعتلها كذا تحذير علي الراديو محدش من الطيارين بتوعها رد عليه وبناء عليه قبطان المدمرة النقيب بحري (ويل سي روجرز الثالث Will C. Rogers III) أمر بإطلاق صاروخ أرض- جو علي الطيارة .. قيادة القوات البحرية الأميريكية عملت تحقيق طلعت فيه قبطان المدمرة وضابط الرادار زي الشعرة من العجين وقالت إنهم ملهمش ذنب وإن الغلطان هو إيران غن كان المفروض إن برج المراقبة بتاع مطار بندر عباس يقول للطيار يبعد خالص عن منطقة الإشتباك .. مش كده وبس .. بعدها بكام شهر القوات البحرية الأميريكية عطت لقبطان المدمرة نوط الشجاعة وكتبوا في الجواب الرسمي اللي إتنشر بإنهم كرموه مخصوص عشان يشكروه علي حسن قيادته وتقييمه المنطقي للموقف.
في ديسمبر 1988 إتعمل تحقيق تاني بس بحق ربنا طلع القوات البحرية الأميريكية هي الغلطانة بإنها مش حاطة خطوات واضحة يمشي عليها طاقم الدفاع الجوي عشان يتأكد هي الطيارة اللي باينه عنده علي الرادار دي طيارة مدنية ولا مقاتلة؟ .. مش كده وبس .. إيران رفعت قضية علي أميركا بسبب إسقاطها للطيارة وأميركا دفعت تعويض لركاب الطيارة .. نستفيد إيه من الي حصل؟ .. الكارثة حيتطرمخ عليها .. ضابط الدفاع الجوي الإيراني مش بس مش حيتحاكم ده إحتمال يتكرم .. مفيش حد في المؤسسة العسكرية الإيرانية حيطلع يقول إحنا غلطانين .. هو مش الإمريكان ملايكة؟ يبقي إحنا أكيد مش شياطين.
المصدر:
- مقالة بعنوان Iranian jet crash has eerie historical parallel نشرت في جريدة The New York Times وده لينك المقالة الأصلية:
https://www.nytimes.com/2020/01/11/world/middleeast/iran-air-flight-655-history.html
