لنفترض إن حضرتك لسه متخرج من كلية هندسة و بتدور علي شغل زيك زي شباب كتير .. بيتقالك إن عشان تخش سوق العمل لازم تتعلم شوية برامج كومبيوتر من ضمنها برنامج إبن تييييت إسمه ريفيت Revit .. بتقول لنفسك بسيطة أنا حتعلم البرنامج عشان أحطه في CV بتاعي .. ساعتها إنت بتتحط في موقف غريب جداً و هو إنك تجاوب علي سؤال إزاي تتعلم حاجة جديدة عليك؟ .. بتقول لنفسك أنا ممكن أروح أتمرن كام شهر في مكتب إستشارات هندسية يكونوا شغالين ببرنامج Revit و أبدأ أتعلم إزاي أشتغل بالبرنامج و أنا هناك .. فيه حل تاني إنك تروح تاخد كورس في أي سنتر .. فيه حل ثالث إنك تخش علي YouTube و تبدأ تتفرج علي فيديوهات و تتعلم بنفسك من غير ما تدفع فلوس ولا تاخد كورسات .. شفت الموقف اللي أنا حكيته ده اللي أي مهندس حديث التخرج بيتعرضله؟ .. أهو الموقف ده هو هو المؤسسة العسكرية في أي بلد في العالم بتعيشه و عشان عارف إن كلامي صادم و غريب فخليني بلاش أتكلم بشكل عام و أمسك حالة محددة أتكلم عنها و الحالة دي هي إزاي القوات المسلحة الصينية إتعلمت كتير أوي و هي بتتفرج علي إزاي الأمريكان داسوا علي وش العراق في حرب الخليج الثانية سنة 1991 المعروفة أكتر بإسم حرب تحرير الكويت.
مهم تبقي فاهم إن قبل حرب الخليج الثانية القوات المسلحة الصينية حالها كان حمادة و بعد الحرب دي بقت حمادة تاني خالص .. قبل سنة 1991 كانت التجربة الوحيدة لحرب تخشها القوات المسلحة الصينية كانت حاجة إسمها الحرب الصينية الفيتنامية سنة 1979 و دي بإختصار شديد حرب تعتبر النسخة الصينية من حرب فيتنام و من غير ما أطول عليك الصين إتفشخت في الحرب دي .. القيادة العسكرية الصينية بعد الحرب دي بقت عارفة إن إحنا مش فاهمين أوي هي الحروب دي بتتعمل إزاي .. نفس موقفك أول ما تتخرج .. إنت بيتقالك إن فيه حاجة إسمها Revit و غالباً إنت جربت تعمله Setup علي الكومبيوتر بتاعك و لقيت نفسك مش فاهم أي حاجة .. ده كان حال القيادة العسكرية الصينية .. هم كانوا قدام وضع غريب أوي اللي هو اللهم صلي علي سيدنا النبي عليه الصلاة و السلام هي الحروب دي الناس بتكسبها إزاي؟
كان ممكن يعملوا زيك إنك تقول حروح أخد فترة تدريب في أي مكتب هندسي إتسحل فيها بس حتعلم اللي هو إن الصين تقول لنفسها أنا حنقي أي بلد ضعيفة جنبي أخترع أي خناقة معاها عشان أخلي القوات المسلحة بتاعتي تتعلم يعني إيه حرب .. زي ما إنت قعدت تدور و ملقتش مكتب هندسي مستعد يشغلك عنده حتي لو بمرتب قليل فالصين برده بعد تجربة حربها مع فيتنام الحل ده مكنش مناسب أوي .. فكرة إنك تروح تاخد كورس في أي سنتر دي هي إن الصين تروح لأي بلد قواتها المسلحة عندها خبرة كويسة في الحروب تقولها إبعتيلي ضباط من عندك يمرنوا العساكر بتوعي .. مشكلة الحل ده إن مفيش دول عندها الخبرة دي إلا أميركا و روسيا .. طبعاً أميركا عمرها ما حتعمل كده و الروس رفضوا فكرة إنهم يمرنوا الصينيين علي الحروب .. ده مخلاش قصاد الصين غير الحل الثالث .. إنها تتفرج.
سنة 1991 فعلياً مستوي تسليح القوات المسلحة العراقية كان أعلي بكتير من القوات المسلحة الصينية .. سلاح الجو العراقي مثلاً كان تحت إيده أحدث مقاتلات سوفيتية في السوق .. العراقيين كان عندهم مقاتلات MiG-23 و MiG-25 و MiG-29 .. خلي بالك إحنا لسة شاريين الMiG-29 دي من كام سنة في حين إن العراقيين إشتروها أول ما نزلت .. ده في الوقت اللي سلاح الجو الصيني مكنش حيلته غير MiG-21 و الأقدم منها كمان MiG-19 اللي إحنا دخلنا بيهم حرب أكتوبر 1973 .. الدفاع الجوي العراقي اللي صحيح معرفش يصد الطيارات الأميريكية بس علي الأقل كان أحدث و أقوي بكتير من إمكانيات الدفاع الجوي الصيني .. الدبابة الروسي T-72 اللي كانت العمود الفقري لسلاح المدرعات العراقي و اللي دبابات M1A1 Abrams الأميريكية داست علي وشها كانت فعلياً أقوي بسنين ضوئية من أجدعها دبابة في الخدمة في سلاح المدرعات الصيني .. الصينيين شافوا إزاي القوات المسلحة العراقية و هي بتنهار بالشكل ده و قلبهم وقع بين رجليهم لإنهم كانوا عارفين إن المشكلة مش بس إن تسليح العراق كان أقوي من تسليح الصين .. المشكلة إن تكتيك العراق في الحرب كان هو هو تقريباً التكتيك اللي الصين كانت حتعتمد عليه لو هي كانت مكان العراق و برده العراق إتداس علي وشها .. التكتيك ده كان يتلخص في كلمتين اللي هم إحنا كتير .. كتير أوي.
الصين كانت فرحانة بنفسها أوي بعد الحرب الكورية .. في الحرب الكورية كانت القوات الأميريكية خلاص علي عتبة العاصمة الكورية الشمالية بيونج يانج بس الصين إتدخلت عسكرياً و كانت بترمي عساكرها يموتوا قصاد المدافع و الطيارات الأمريكاني .. صحيح إن الأمريكان تسليحاً و عتاداً كانوا أقوي بكتير من الصين إلا إن الأعداد الرهيبة اللي كانت بتترمي عليهم أجبرتهم إنهم ينسحبوا تاني و الصين خدت اللي هي عايزاه .. إحساس إحنا جامدين أوي سيطر علي المؤسسة العسكرية الصينية .. إحساس إن لو حصل و الأمريكان جم عندنا يحاربونا حنعرف نكسبهم لإننا كتير .. كتير أوي .. في حرب الخليج الثانية العراقيين قالوا نفس البق الحمضان ده برده بس لقوا إن لأول مرة من سنين التكنولوجيا العسكرية كانت أهم من التفوق العددي .. الصينيين شافوا العراق و هي بتتفشخ و قالوا لنفسهم أحيه يا أبو سوسو أحيه إحنا مصيرنا حيبقي زيهم إلا إذا إحنا كمان بقينا نهتم بالتفوق التكنولوجي لقواتنا المسلحة مش بس بالتفوق العددي .. دي كانت بداية إن الصين تبدأ تروح تشتري سلاح حديث من روسيا و تعمله Reverse Engineering عشان تعمل زيه .. دي كانت بداية إن القوات المسلحة الصينيه تبدأ تبقي ليها شركات تصنيع سلاح و تحط فلوس كتير في قسم البحث و التطوير Research and Development .. دي كانت بداية إن البساط يتسحب من تحت رجل القوات البرية الصينية .. زمان كانت القوات البرية هي أهم فرع من الأفرع الرئيسية للقوات المسلحة بس حرب الخليج الثانية غيرت كل ده .. فجأة القوات الجوية و البحرية بقوا أهم .. بقوا يتصرف عليهم أكتر .. و بقت الصين هي الصين.
المصادر:
مقالة بعنوان Why Chinese military leaders cannot get over the 1991 Gulf War نشرت في مجلة The National Interest:
https://nationalinterest.org/blog/buzz/why-chinese-military-leaders-cannot-get-over-1991-gulf-war-150516#:~:text=In%201991%2C%20the%20PLA%20lacked,exercises%20necessary%20for%20modern%20war.
