في واحدة من أحلي المشاهد في مسرحية الواد سيد الشغال كان الفنان (عادل إمام) بيجسد دور شاب علي باب الله شغال خدام في فيلا ناس معاهم فلوس .. في أول يوم شغل ليه بيجيله تليفون من الإنتركوم إن بنت صاحب الفيلا عايزة تفطر فبتبلغ (سيد) يحضرلها فطار إيه فيا عيني إتفاجيء إن الناس دي بتفطر كل يوم و ده واحد من أحلي الإيفيهات اللي في المسرحية .. الناس الغلابة اللي علي باب الله بيكون صعب عليهم أحيانا استيعاب حياة أو Life Style بتاع الناس اللي ربنا كرمها و معاها قرشين .. يمكن عشان كده أنا دايماً بقول إن الإنترنت دخل البيوت في مصر سنة 2010 و الثورة قامت في 2011 .. في عصر ما قبل الإنترنت في مصر كل طبقة مجتمعية كانت عايشة بين أربع حيطان محدش حاسس بيها بحيث الفقراء مكانوش بيشوفوا هم الأغنياء عايشين إزاي إلا من خلال الأفلام و المسلسلات و حتي وقتها كان الفقراء دايماً بيتقالهم حتي Life Style اللي بتشوفوه في التليفيزيون ده مبالغ فيه .. الإنترنت فتح الحيطان دي كلها علي بعض .. الطبقة المتوسطة زعلت من الفرق الكبير بين حياتهم و بين اللي فوقيهم و الأهم إنهم إترعبوا من إن إزاي الفقراء متداس علي وشهم .. الهدف من المقدمة دي إنك تفهم نقطة و هي إن عشان إنت غلبان فبيكون صعب عليك أحيانا استيعاب هي تفاصيل الحياة اليومية للناس اللي معاها فلوس عاملة إزاي و ده حيخلينا نتكلم النهاردة عن ولاد الناس بتوع القوات المسلحة علي مستوي العالم .. الأمريكان.
مش عايز أقول إننا فقراء بس علي الأقل إحنا الطبقة المتوسطة بتاعة القوات المسلحة .. خد عندك القوات البحرية مثلاً .. علي حسب إنت بتقرأ لأنهي موقع عسكري بس القوات البحرية المصرية بتتصنف إنها ما بين المركز السابع و الثالث عشر علي مستوي العالم .. إنت عندك حاملتين طائرات هم صحيح حاملات طيارات هليكوبتر مش طيارات مقاتلة بس مش مشكلة إحنا حنشبط في شلة الدول اللي بتقول لنفسها عندها حاملات طائرات بس عمرك سألت نفسك هم الأمريكان اللي عندهم 11 حاملة طائرات عايشين إزاي؟ .. أنا حقولك هم عايشين إزاي و بعد كده حنفهم هو السواد اللي هم عايشين فيه ده سببه إيه .. لك أن تتخيل إن واحدة من ال11 حاملة طائرات دول اللي هي يو إس إس نيتيمز USS Nimitz فضلت في البحر بتشارك في مهام ورا بعضها لمدة 10 شهور كاملة .. في يناير 2020 حاملة الطائرات يو إس إس إبراهام لينكولن USS Abraham Lincoln بسم الله ما شاء الله قفلت 295 يوم ورا بعض في البحر .. في نفس السنة حاملة الطائرات يو إس إس دوايت دي إيزنهاور USS Dwight D. Eisenhower قعدت 200 يوم متواصلين في البحر .. الرقم القياسي محجوز باسم الحاملة يو إس إس ثيودور روزفيلت USS Theodore Roosevelt اللي كملت سنة كاملة.
طب هم إيه اللي غاصبهم علي الهم ده؟ .. أنا كضابط في القوات البحرية إيه اللي يخليني أفضل في البحر بعيد عن أهلي و بيتي بالست شهور و بالسنة .. بتدفعولي كام أنتوا علي كل ده .. الفكرة بمنتهي البساطة إن القانون في أميركا بيقول إن القوات البحرية بأي حال من الأحوال مينفعش يبقي تحت إيدها أقل من 11 حاملة طائرات .. طب ما ده حلو .. هو حد لاقي يبقي عنده 11 حاملة طائرات .. بس هي الفكرة في نقطة .. هم مش 11 أوي يعني .. الحاملة رقم 11 تبقي يو إس إس جيرالد فورد USS Gerald Ford و دي مصيبة هندسية إتكلمنا عنها قبل كده و قولنا إن كان التارجيت اللي محطوطلها إنها تخش الخدمة سنة 2018 بس اللي حصل إنها مش حتبدأ تنفذ أول مهمة عسكرية ليها قبل سنة 2024 فإنت صحيح علي الورق معاك 11 حاملة بس هم بحق و حقيقي يعني 10 .. بس حتي لو عشرة حاملات هو حد برده لاقي.
زمان في الثمانينات و التسعينات أيام ما كان فيه بعبع اسمه الإتحاد السوفيتي مخلي الأمريكان مرعوبين كانت القوات البحرية الأميريكية معاها من 13-15 حاملة طائرات فكانت كل حاملة تطلع من الميناء أخرها تفضل في البحر 6 شهور و ترجع فكان الموضوع منطقي .. شوية و الإتحاد السوفيتي وقع فمبقاش فيه البعبع بتاع زمان اللي يخلينا عايزين نبني حاملات طائرات عشان نحمي نفسنا منه .. شوية و حربي أفغانستان و العراق بقت بتبلع جزء مش بطال من الميزانية العسكرية فمبقاش فيه فلوس تكفي إن الأمريكان يبنوا حاملات طائرات جديدة .. سنة ورا سنة و الحاملة اللي تطلع معاش مفيش واحدة بتخش تحل محلها .. سنة ورا سنة و عدد الأيام اللي البحار أو الطيار بيقضيها في البحر بقت بتزيد .. سنة 2019 مثلاً لو جيت جمعت كل الأيام اللي كل حاملات الطائرات قضتها في المياه حتلاقيهم 258 يوم .. لك أن تتخيل يا مؤمن إن الرقم ده وصل سنة 2020 بقي 855 يوم .. الكلام ده في سنة إنت متخيل؟ .. بس برده كل ده ليه؟ .. ليه مش بس البني أدمين إنما السفن و الطيارات كمان بتتسحل السحلة السودا دي؟ .. هي الناس دي م عارفة تعمل جدول أو Time Sheet علي الإيكسيل يظبطلهم عدد أيام الشغل؟
الفكرة إن أي أسطول في الدنيا بيشتغل بقاعدة إسمها قاعدة التلت و التلتين .. يعني إيه الكلام ده .. المفروض إن في أي يوم من أيام ربنا تلاقي إن تلت القطع البحرية اللي تحت إيدك تكون في المياه بتنفذ مهماتها من دوريات لمهام قتالية لمراقبة .. التلت التاني من القطع البحرية بتاعتك يا إما لسه راجع من البحر أو بيستعدوا عشان ينزلوا المياه بحيث يبدلوا مع التلت الأولاني اللي في البحر دلوقتي .. التلت التالت قاعد في الورش بيتعمله الصيانة الدورية بتاعته .. طب إفرض الحرب قامت دلوقتي و البلد أعلنت التعبئة العامة و الدنيا باظت .. ساعتها التلت الأولاني اللي في البحر بيتقاله خليك في البحر مترجعش و التلت التاني اللي في الميناء بيستعد ينزل المياه بيتقاله إنزل بسرعة فبقي عندك تلتين قطعك البحرية في البحر و ده زي ما قلت في حالات الطواريء المنيلة بستين نيلة .. طب لو طبقنا ده علي القوات البحرية الأميريكية حنلاقي إن في الظروف العادية فيه 4 حاملات طائرات دايماً في البحر بحيث في حالات الطواريء ممكن يبقوا 6 حاملات .. خد بقي عندك المصايب اللي حصلت خلال السنتين اللي فاتوا .. عندك سنتين سود بتوع جائحة فيروس كورونا .. كل شوية الوضع مع إيران يسخن فتلاقي إن الأمريكان يترعبوا و ينزلوا حاملتين طائرات زيادة .. كل شوية يحصل توتر بين الصين و تايوان يقوم برده الأمريكان يقلقوا .. طبعاً الغزو الروسي لأوكرانيا بوظ الدنيا .. فوق ده كله إن فيه حاملة اللي هي USS Gerald Ford لسه مش في الخدمة بشكل كامل .. فده خلق وضع غريب جداً .. القوات البحرية الأميريكية عندها 11 حاملة طائرات بس برده مش كفاية.
المصادر:
- مقالة بعنوان Why 11 Navy Aircraft Carriers Simply Aren’t Enough نشرت في مجلة Popular Mechanics و ده لينك المقالة الأصلية:
https://www.popularmechanics.com/military/navy-ships/a35928241/navy-aircraft-carriers/
