أنا شبه متؤكد إن كتير من الدحيحة و النيردات اللي قاريين شوية في تاريخ الحرب العالمية الثانية عندهم إقتناع إن فرنسا ملحقتش تقول أحيه حتي .. هم شايفين إن القوات المسلحة الفرنسية مش بس طلعوا شوية نسوان مش رجاله إنما كمان خطتهم الجهنمية إنهم يبنوا خط دفاعي جاحد إسمه خط ماجينو Maginot Line علي طول حدودهم مع ألمانيا عشان قال إيه إن الخط الدفاعي ده حيحميهم فرقعت في وشهم .. ده الإنطباع المتاخد عن خط ماجينو .. خط ملوش لازمة و إتصرف عليه ملايين زيه زي خط بارليف كده .. بس أنا النهاردة عايز أسالك سؤال يبان سطحي أوي .. هو حضرتك عارف الفرنساويين بنوا خط ماجينو ده ليه أساساً؟
حقولك معلومة دلوقتي و أراهنك بالخمسين جنيه اللي في جيبي إنها حتصدمك .. هل تعلم إن تعداد سكان فرنسا سنة 1939 ودي السنة اللي بدأت فيها الحرب العالمية الثانية كان 40 مليون بني أدم في الوقت اللي تعداد سكان ألمانيا كان 70 مليون؟ .. الحروب بيكسبها حاجتين اللي هم الفلوس و البني أدمين .. الفرنساويين كانوا شايفين تعداد سكانهم وهو عمال يقل من قبل حتي الحرب العالمية الأولي بس لما الحرب دي قامت تعداد سكان فرنسا حرفياً و بدون أي مبالغة إتداس علي وشه .. فرنسا في الحرب الكئيبة دي خسرت 1.4 مليون قتيل .. صحيح ألمانيا مات ليها 2 مليون بس كان تعداد سكان ألمانيا ضعف تعداد سكان فرنسا .. بعد الحرب العالمية الأولي ما خلصت سنة 1918 قيادة القوات المسلحة الفرنسية بدأت تدرس هو لو قامت حرب تانية بينهم و بين الألمان فياتري هم حيبقي تحت إيدهم كام عسكري قصاد الألمان؟ .. أجابة السؤال ده خلت الفرنساوين يبصوا لبعض و بصوت واحد يقولوا زي الفنان (سعيد صالح) الله يرحمه في مسرحية العيال كبرت .. أحية يا أبوسوسو أحية.
كان فيه كذا حل .. كان ممكن الفرنساويين يروحوا يتحالفوا مع السوفييت عشان يخلوا الألمان مرعوبين و قلقانين علي طول بس الألمان سبقوهم و كرمشوا نص بولندا و فنلندا في جيب السوفييت عشان يضمنوا سكوتهم علي الأقل في النص الأول من الحرب ودي كانت بندود معاهدة ريبينتروب Ribbentrop Pact .. كان ممكن الفرنساويين يطلبوا من الإنجليز يبعتوا قوات برية تفضل قاعدة في فرنسا بس عشان القوات دي تيجي مش حتبقي حاجة سهلة .. طب و العمل؟ .. مبقاش فاضل غير حل واحد .. جاروف و خلاطة أسمنت.
ميزة الخطوط الدفاعية إنها بتبقي مفيدة جداً لو إنتي دولة عدد عساكرك أقل بكتير من الدولة اللي بتهاجمك .. ليه؟ .. عشان إنت ممكن ترص عساكرك اللي معندهمش أي خبرة و ميعرفوش حاجة عن الحروب جوه الخط الدفاعي ده و تسيب قواتك المدربة و اللي عندها خبرة عشان تضرب بيها عدوك في الحتة اللي توجعه .. ده يفسرلك ليه خط ماجينو فعلياً كان مقسوم نصين .. نص جامد زحليقة و نص علي قد حاله .. النص الجامد زحليقة كان من الجنوب من أول حدود فرنسا مع سويسرا لحد حدود فرنسا مع لوكسمبورج .. النص اللي علي قد حاله كان من أول حدود فرنسا مع ألمانيا لحد حدود فرنسا مع بلجيكا .. السؤال دلوقتي اللي المفروض يتسأل هو ليه؟ .. ليه خط ماجينو إتبني علي هذا الأساس؟ .. إشمعني النص الجامد إتبني في الجنوب و النص التعبان إتبني في الشمال؟
الفرنساويين بصوا للي حصل في الحرب العالمية الأولي و قالك باااااس لو الألمان حاربونا تاني حيعملوا نفس المناورة إن قواتهم البرية حتخش بلجيكا ومن بلجيكا تخش فرنسا .. عشان كده إحنا حنرص قواتنا الجامدة في شمال فرنسا عشان هي كمان تخش بلجيكا و تبقي المواجهة بينا و بين الألمان تحصل علي أرض البلجيك مش علي أرضنا .. وفي نفس الوقت عساكرنا التعبانين اللي علي قد حالهم حيبقي مطلوب منهم يأمنوا الجبهة الجنوبية .. لحد هنا و منطق الفرنساويين مفهوم بس هي المشكلة إن الألمان كان تحت إيدهم تعلب إسمه (إيرفين روميل Erwin Rommel) اللي قدر يشوف الثغرة في الخطة الفرنساوي .. نقطة الضعف في نقطة الوصل بين النصين بتوع خط ماجينو .. القوات المدرعة بتاعة (روميل) يوم 10 مايو 1940 قدرت تخش لوكسمبورج و تدخل فرنسا من خرم إبره .. خرم إبره كان بسهولة يتسد بس الفرنساويين محطوش في دماغهم إحتمالية إن حد يفكر يخش بلدهم منه .. خلال شهر و نص كان الألمان دخلوا العاصمة باريس.
الجنرال الأمريكاني (جورج باتون George Patton) اللي كان قائد القوات البرية الأميريكية في الحرب العالمية الثانية و يمكن واحد من أهم القادة العسكريين في تاريخ البني أدمين كان عنده مشكلة حقيقية مع الحصون الدفاعية .. هو كان عامل زي (بيب جوارديولا Pep Guardiola) كده مبيحبش ركنة الأتوبيس .. لو حنتخيل إن الحروب زيها زي كرة القدم فالجنرال (باتون) كان بيعشق السيكسي فوتبول و مبيكرهش في حياته قد الأجلي فوتبول .. من الأقول المأثورة عن الجنرال ده إنه مرة قال إن الخطوط الدفاعية دي تجسيد للغباء البشري .. في رأيه إن ربنا خلق الجبال و المحيطات و برده البشر قدروا إنهم يتغلبوا عليهم فإيه اللي يخليك كبني أدم متخيل إنك تقدر تخلق خط دفاعي محدش يخترقه؟ .. بس زي ماتشات الكورة تفاصيل صغيرة هي اللي بتحسم الماتش مش مين لعب أحسن من مين أو مين ضيع فرص أكتر أو مين كان معاه إستحواذ أكتر.
التفاصيل الصغيرة في الحرب العالمية الثانية كتير بس منها مثلاً لو كان الفرنساويين صرفولهم كام مليون زيادة و مدوا شوية النص الجاحد من خط ماجينو لحد حدودهم مع لوكسمبورج لكان زمانا بنقول دلوقتي يا سلام علي العقلية العسكرية الفرنساوية .. لو كان الألمان مكنش عندهم (روميل) لكان زمانا دلوقتي قصاد نسخة مختلفة خالص من التاريخ .. يمكن لو القيادة العسكرية الفرنسية كانت مرنة أكثر و عندها سرعة إستجابة كانوا لحقوا يسدوا الثغرة اللي إستغلها (روميل) .. بس اللي أنا أقدر أبصملك بالعشرة عليه إن لو الفرنساويين مكانوش بنوا خط ماجينو كانوا حرفيا و بدون أدني شك كانوا شالوا أوبح برده يمكن بشكل أسرع و بهزيمة قاسية أكتر من كده.
خط ماجينو زيه زي أفكار عسكرية كتير المشكلة مكانتش في المبدأ قد ما كانت في التنفيذ .. تفاصيل صغيرة هي اللي أدت لهزيمة فرنسا و إستسلامها بدري بدري في الحرب العالمية الثانية .. خط ماجينو ده في رأيي إتظلم كتير و ناس كتير شايفاه بشكل مش صح أوي .. تاني الخط نفسه مش غلط .. تنفيذه هو اللي كان كارثة.
المصدر:
مقالة بعنوان Your History Book is Wrong: Why France’s Maginot Line Really Failed نشرت في مجلة The National Interest وده لينك المقالة الأصلية:
https://nationalinterest.org/blog/reboot/your-history-book-wrong-why-frances-maginot-line-really-failed-166287
