دي داي .. لا تحسبن المجد سوبيا بالمانجا أنت شاربها .. الجزء الثاني.

لينك التسجيل الصوتي علي ساوند كلاود:
https://on.soundcloud.com/HqJZA

جزء من شغل لجنة العشرين كمان إنهم يضمنوا إن مفيش حد يفتح بقه أو ينطق باللي بيحصل .. الحقيقة إني عايز أديلك كام مثال بس بقد إيه الناس دي كانت مش بس ماشية بالمثل بتاع داري علي شمعتك تقيد .. دول مكانوش قايلين لحد إن فيه شمعة أساساً:

• جزء من شغل الإستطلاع إن طيارات تابعة لسلاح الجو البريطاني و الأمريكاني تنفذ مئات طلعات التصوير لساحل نورماندي .. لما المخابرات البريطانية لقت إن الصور دي مش كفاية بقوا بيطلبوا من الناس اللي راحت صيفت أو قضت أجازة في نورماندي إنهم يبعتوا صورهم اللي هو حاجة كده شبه إنهم يخشوا علي أنستجرام الناس يتفرجوا علي الصور عشان يشوفوا هي نورماندي دي شوارعها عامله إزاي .. كل الداتا دي راحت لواحد إسمه (تشاد فالي Chad Valley) و ده رجل شغلته إنه بيعمل لعب أطفال و جندوه عشان يعمل خريطة كاملة لطول شط نورماندي بس زي Jigsaw Puzzle اللي هي اللي الصور المتفرقة اللي الأطفال بيلعبوها عشان يجمعوها تاني .. المخابرات البريطانية طلبت من (تشاد فالي) يقسم المكعبات دي علي نصين بحيث يبعت إتنين من عنده بصندوقين كل صندوق فيه نص الخريطة لمقر المخابرات البريطانية .. الإتنين موظفين دول مطلعوش من جوه مقر المخابرات إلا بعد العبور ما خلص.
• الناس دي جندت 30 ست من سلاح الجو و لبسوهم زي مدنيين و قالولهم ينزلوا البارات اللي بيقعد فيها عناصر المظلات و القوات الخاصة اللي حيترموا خلف خطوط العدو قبل العبور بليلة عشان يحاولوا يغروا العساكر و يخلوهم يسربوا أي معلومات سرية عن العملية و العسكري اللي يغلط و يفتح بقه بيتم إستبعاده.
• هوس المخابرات البريطانية بالسرية وصل لمرحلة مرضية .. فاكر العبور الفاشل عند ميناء دييب اللي حصل في أغسطس 1942؟ .. قبلها بيوم قسم الكلمات المتقاطعة في جرنان Daily Telegraph البريطاني كان فيه واحدة من الحلول كلمة دييب Dieppe .. يوم 2 مايو 1944 نفس قسم الكلمات المتقاطعة في نفس الجرنان واحد من الحلول كان كلمة يوتاه Utah و ده كان واحد من الأكواد السرية للشواطيء اللي العساكر بتاعة الحلفاء حتعبر عندها .. يوم 22 مايو 1944 برده في نفس الجرنان و نفس الكلمات المتقاطعة واحد من الحلول كان أوماها Omaha و برده ده كان واحد من الأسماء الكودية للشواطيء اللي حيتم العبور عندها .. بعدها بكام واحد من الحلول كان كلمة Overloard و ده كان الإسم الكودي لعملية العبور كلها .. المخابرات البريطانية طبت في يوم علي بيت (ليونارد داو Leonard Dawe) المحرر في الجرنان المسئول عن قسم الكلمات المتقاطعة و فضلوا يحققوا معاه لحد ما إتاكدوا بعد ساعات من التحقيق معاه إن الموضوع مجرد صدفة .. مريبة .. بس صدفة.

فضل السؤال اللي شاغل دماغ الناس بتوع لجنة العشرين دول هو يا تري كل التعب ده حيجيب نتيجة؟ .. هل إحنا ماشيين صح؟ .. هو إحنا فعلاً عارفين نضحك علي الألمان؟ .. تفتكر إزاي تقدر تعرف ده؟ .. لو فكرت فيها مش حتلاقي حل غير إنك بطريقة ما تقدر تشوف هم الألمان بيقولوا إيه لبعض .. تقدر تقرأ الرسايل المشفرة بينهم و بين بعض .. بمعني أخر إنك تقدر تفك شفرة الإتصالات العسكرية الألمانية اللي الألمان كانوا بيسموها إنيجما Enigma و اللي كانت صعبة لدرجة إن في اللغة الإنجليزية كلمة إينيجما بقت معناها الطلاسم اللي محدش فاهمها .. عشان بس تقدر تستوعب مدي تعقيد الشفرة دي فإنت عشان تفكها لازم تحل مسألة تباديل و توافيق ليها 150 ترليون إحتمال .. اللي منكوا إتفرج علي فيلم The Imitation Game حيشوف إزاي المخابرات البريطانية كانت متخيلة إنها لو جندت ناس بتفهم وجامدين زحليقة في الرياضيات فهم يقدروا يفكوا الشفرة دي .. ناس زي (ألان تورينج Alan Turing) و (بليتشلي بارك Bletchley Park) .. بس الناس دي ولا عملت حاجة .. مخبيش عليك دور (ألان تورينج) في فك شفرة إنيجما كان مبالغ فيها بشكل أوفر و مش مفهوم الحقيقة .. اللي خلي الحلفاء يقدروا يفكوا شفرة إنيجما كان الحظ .. مجرد حظ.

يوم 8 مايو 1941 حصلت معركة في المحيط الأطلسي بين شوية غواصات ألمانية من ضمنهم الغواصة U-110 و مدمرات بريطانية .. وسط المعركة اللي حصل زيها الالاف في سنين الحرب فيه مدمرة بريطانية عرفت تجبر الغواصة الألمانية U-110 إنها تطلع علي سطح المياه .. في البروتوكول بتاع البحرية النازية و أي قوات بحرية الحقيقة كان لازم قبطان الغواصة يفجر شحنة متفجرة فيها عشان الغواصة تغرق و البحارة اللي فيها يطلعوا منها لمجرد إن العدو ميعرفش يأسر الغواصة نفسها لإن الغواصة بتعتبر سر حربي مينفعش يقع في إيد العدو عشان ميفهمش سر الخلطة بتاع هم الألمان بيصنعوا غواصاتهم إزاي .. القبطان النازي فجر القنبلة و الغواصة بدأت تغرق فعلاً .. في الدقايق قبل غرقها بحارة إنجليز غامروا بحياتهم و نطوا للغواصة الألمانية و دخلوها عشان يلحقوا ياخدوا جهاز التشفير و كتاب الشفرات بتاع إنجيما .. ده كان أعظم إنتصار حققته بريطانيا علي ألمانيا في الحرب العالمية الثانية كلها .. مع كامل إحترامي للطيارين اللي ضحوا بحياتهم في معركة بريطانيا أو العساكر اللي ماتوا في العالمين أو العساكر اللي نجوا بحياتهم من مأساة حصار دانكيرك .. شجاعة البحارة الإنجليز اللي عرفوا ياخدوا مكنة التشفير و معاها كتاب الشفرات هي اللي وفق تقديرات كتير قالت إنها ساهمت إن الحرب العالمية الثانية تخلص سنتين بدري .. إنت مش متخيل إنبهار الناس بتاعة لجنة العشرين لما بدأوا يقروا الرسايل العسكرية السرية النازية و يكتشفوا قد إيه هم عارفين يضحكوا علي النازيين .. الخطة كانت ماشية زي السكينة في الجاتوه .. بس كل ده مش كفاية.

واحد من الأسئلة اللي البشر عموماً مبيعرفوش يجاوبوا عليها هو سؤال طب و بعدين .. يا عيني بتبقي في الكلية بتحلم باليوم اللي تتخرج فيه بس عمرك ما بتبقي متخيل نفسك بتسأل بعد ما إتخرجت طب و بعدين؟ حشتغل فين؟ .. هنا برده الإنجليز و أخص بالذكر الباشاوات بتوع لجنة العشرين كانوا بيسألوا نفسهم طب يا سيدي حنفترض إن العبور تم علي خير .. طب و بعدين؟

من ضمن الشغل اللي عملته المخابرات البريطانية إن لما العبور يتم و القوات تعدي بحر المانش حيحتاجوا أكيد إن يبقي ليهم ناس جوه المدن و القري الفرنساوية عشان تساعدهم .. دور المقاومة الفرنساوية في المرحلة دي في اليومين الأولانين اللي بعد العبور عامل زي ما يجيلك شغلانة في الخليج و يتقالك إن إبن عمك قاعد هناك حتبات عنده يومين لحد ما تلاقي مكان .. المقاومة الفرنساوية كانت هي إبن عمك اللي في الخليج .. عشان يبقي فيه إتصال بين المخابرات البريطانية و المقاومة الفرنسية إتعمل راديو لندن .. دي محطة راديو ناطقة بالإنجليزية عشان قال إيه تحفز جهود المقاومة الفرنساوية ضد الإستعمار النازي .. إزاي ده بيحصل؟ .. البث اليومي للمحطة دي بيتقسم 3 مراحل .. أول و أخر مرحلة يعني أول ما البث يبدأ في اليوم و قبل ما ينتهي هو عبارة عن رسايل صوتية شخصية زي مثلاً إن من ضمن الرسايل دي إن (فرانك) إبن (إيمانويل) الحلاق بيسلم علي صاحبه (ريمون) إبن (ميشيل) الفرارجي .. تبان رسالة مكانها مهرجان عمله (فيجو الدخلاوي) بس الحقيقة دي كانت رسالة مشفرة معناها إن النهاردة بليل أفراد لجنة معينة من لجان المقاومة الفرنسية لما يروحوا للمكان السري المتفق عليه حيلاقوا إن فيه شحنة أسلحة و ذخيرة رمتها ليهم طيارة بريطانية بالباراشوت و هكذا .. يوم العبور راديو لندن بعت رسالة صوتية مشفرة زي دي لعناصر المقاومة الفرنساوية إن العبور بكره .. هنا كل فرد في المقاومة الفرنساوية كان عارف دوره كويس.

الجبهة الألمانية .. شغل بهايم مش عايز:

علي الناحية الثانية في أواخر سنة 1943 (هتلر) عين الفيلدمارشال (إيروين روميل Erwin Rommel) قائد عام للقوات الألمانية في شمال فرنسا .. (روميل) كان أشهر جنرال في القوات المسلحة الألمانية .. ده بطل العالمين .. ده كان رجل فاهم و ملو هدومه فالعساكر كان عندها إحساس إن الدنيا حتبقي كويسة طول ما هو صاحب القرار .. (روميل) لما إستلم حائط الأطلنطي لقي إن عنده مش بس مشاكل دي مصايب .. مبدأيا تعالي نتكلم عن العساكر .. هو أصلاً مكنش تحت إيده عساكر مؤهلة إنها تدافع عن فرنسا في حالة لو الحلفاء عبروا المانش .. كل العساكر اللي بتفهم إتاخدت بهدومها علي الجبهة الشرقية المفتوحة في الإتحاد السوفيتي .. ده خلي المتاح تحت إيد (روميل) يا إما عيال صغيرة أول مرة تمسك بندقية في حياتها يا إما العساكر اللي إتصابت في الجبهة الشرقية و سحبوها علي فرنسا اللي هم أصلاً عساكر مش بس فقدوا الشغف دول مبقاش عندهم دافع للحياة أصلاً بعد اللي شافوه في روسيا .. القوات الجوية النازية حرفياً و من غير مبالغة ملهاش طيارة في فرنسا .. معركة بريطانيا خلصت علي كل الطيارات الألمان المتاحين .. رغم كل ده .. خط دفاعي صدي من قلة الصيانة .. عساكر يا مش مُدربة يا مش عايزة تحارب أصلاً .. مفيش غطاء جوي يحميك .. رغم كل ده .. (روميل) شمر دراعاته و هو بيزعق في رجالته المستحيل ليس ألمانياً.

• أول مشكلة كانت لازم تتحل هي العساكر .. (روميل) كانت علاقته ب(هتلر) مريبة لناس كتير .. متفهمش هو (هتلر) كان بيحبه أوي كده ليه بس لما (روميل) طلب إن شوية قوات عندها الخبرة الكافية تتسحب من الجبهة الشرقية عشان تعوض شوية النقص الرهيب في الموارد البشرية لحماية حائط الأطلنطي (هتلر) قال ل(روميل) إنت تؤمر يا قلب الفوهرر.
• تاني مشكلة هي الدفاعات نفسها .. المشكلة كانت واضحة .. هو دلوقتي لو الحلفاء عبروا المانش حيعبروا إزاي؟ .. حيبقي عندهم مثلاً 100 سفينة حربية متركب عليها لانشات أو قوارب يركبها العساكر و اللانشات دي تنزلهم علي الشط .. جميل .. عشان اللانشات دي تعرف تنزّل العساكر علي الشط يبقي لازم توقيت العبور يكون المد فيه مناسب .. حلو أوي .. تعالي إنت علي الشط نفسه ركب خوازيق خشب بحيث علي طرف الخازوق حتركب لغم بحري .. ليه؟ .. اللانش و هو بيقرب من الشط اللي بيسوقه مش حيبقي شايف هو تحت المياه فيه إيه فأول ما يقرب من الشط اللغم يفرقع اللانش.
• تالت مشكلة و دي كانت مشكلة عويصة الحقيقة .. الهجمة المرتدة .. عشان تفهم المشكلة دي تخيل نفسك بتتفرج علي ماتش كورة .. خد عندك مثلاً الأداء البطولي للمنتخب المغربي في كأس العالم 2023 .. نجاح المغرب إتبني علي إن دي فرقة بتركن الأوتوبيس و تلعب علي الهجمة المرتدة أو Counterattack .. (روميل) بيلعب بنفس التكتيك .. هو راكن الأوتوبيس و مستني الحلفاء يهجاموه بس هو عشان يبدأ يخطط لهجمته المرتدة لازم يبقي الأول عارف هي الضربة حتيجي منين؟ .. بدأت تقول لنفسك اهاااا أنا عارف.

هنا يجي دور لجنة العشرين .. المخابرات البريطانية كانت شاطرة أوي في لعبة إنها تقنع المخابرات الألمانية إن العبور حيتم عند كاليه .. من وجهة نظر (روميل) مش حيفرق الهجوم جاي منين .. من كاليه من نورماندي من المعادي مش حتفرق .. المهم إن الحلفاء يفضلوا عطلانين علي الشط لحد ما الهجمة المرتدة تتعمل .. كل اللي القوات الألمانية محتاجة تعمله إنها تصمد 24 ساعة بس .. 24 ساعة لحد ما سلاح المدرعات يجي يلحقهم .. و هي دي المشكلة أو خلينا نقول شغل البهايم.

خطة (روميل) زي ما إنت شايف معتمدة علي إنه مش بس قائد عام القوات المسلحة النازية في فرنسا إلا إنه كمان قائد قوات المدرعات الإحتياط اللي بإشارة منه حتجري تلحق ساحل فرنسا أيا كانت بقي الحتة اللي العبور حيتم عندها .. الكلام ده مكنش بياكل عيش مع (هتلر) .. (هتلر) زيه زي أي ديكتاتور في الدنيا عنده مشكلة حقيقية في التعامل مع القوات المسلحة بتاعته .. هو صحيح (هتلر) وصل للحكم بالإنتخابات بس بمجرد ما قعد علي الكرسي ضرب كرسي في الكلوب و قالك محدش حيقعد علي الكرسي ده غيري .. فالسؤال دلوقتي إيه اللي يمنع جنرال معاه شوية عساكر و كام دبابة إنه يرميني في السجن أو يضربي طلقة و يرميني في القبر .. كان فيه كذا حل .. كان ممكن يبقي Selective أوي في إختياره لجنرالاته بحيث اللي يوصل للمناصب الكبيرة يكونوا الناس اللي عندهم ولاء و طاعة عمياء ليه اللي هم الناس اللي شايفين (هتلر) ده رجل صح الصح و كل اللي بيعمله صح الصح .. ميزة الحل ده إنه حيبقي حلو لو إنت سقف طموحاتك كديكتاتور إنك تفضل قاعد علي الكرسي و تقمع شعبك و خلاص و بسم الله ما شاء الله وطنا العربي مليان بأمثال الناس دي .. عيبه إنه مينفعش لو كان طموحك هو السيطرة علي العالم .. في الحالة دي إنت محتاج قواتك المسلحة يبقي فيها كريمة الكريمة .. وش القفص من الكوادر .. طب السؤال دلوقتي .. تسيطر علي ناس بتفهم أوي في شغلها إزاي؟

الحل اللي كان عبقري في رأيي الصراحة و لازم أي ديكتاتور في الدنيا يبصله و يتعلم منه هو إنه بقي بيوقع الجنرالات في بعض .. لنفترض مثلاً يعني إن معاليك رتبتك في الجيش لواء و حضرتك مسئول عن حماية مثلاً يعني طريق مصر إسكندرية الصحراوي .. ده مجرد مثال للتقريب .. يقوم (هتلر) مخلي اللواء اللي مسئول عن تأمين القاهرة بدأية شغله قبل بوابة القاهرة بعشرة كيلو .. ده خلي إن فيه عشرة كيلو من طريق مصر إسكندرية الصحراوي إتوزع دمهم بين القبائل .. إتنين لواءات و كل واحد فيهم شايف إن الحتة دي بتاعته .. و لإن الرجاله في المجمل شبه الكلاب في حتة إنهم كائنات Territorial اللي هي أقرب تشبيه ليها هي المخلوقات اللي ربنا خلقها طبيعتها إنها بتشبط في الحاجة و تقول دي بتاعتي و محدش حياخدها مني فتلاقي يا عيني الإتنين لواءات كل شوية يتخانقوا مع بعض علي العشرة كيلومتر اللي ملهومش أي لازمة .. طب لما تحصل خناقة؟ .. الإتنين بيقفوا قدام المعلم الكبير (إبراهيم سردينة) عشان يفصل ما بينهم .. شوية بشوية و المؤسسة العسكرية النازية بقت شايفة (هتلر) هو الكبير اللي بيفصل بين الجنرالات لما يتخانقوا .. و هوبا بقي عندك بني أدم أخر اللي وصله في السلم الوظيفي للقوات المسلحة كانت رتبة شاويش قدر يسيطر علي لواءات بشنبات .. حقيقي شابو.

المهم نرجع ل(روميل) .. العشرة كيلومتر اللي كانت الخناقة عليها كانت دبابات قوات الإحتياط اللي محطوطة في فرنسا .. (روميل) عايزهم .. في نفس الوقت الفيلدمارشال (جيرد فون رونشتيد Gerd von Rundstedt) اللي كان رتبته فريق يعني أعلي من رتبة (روميل) و كان مسئول عن الدفاع عن باريس عايز الدبابات دي تبقي تحت إيده .. (فون رونشتيد) وجهة نظرة إن موقع باريس جغرافياً بيخلي الدبابات دي تقدر تتحرك بسرعة لإي حتة علي ساحل فرنسا بمجرد ما يتعرف إن الحلفاء عبروا عندها .. قصاد إن (روميل) بيقول إن سلاح الجو النازي متداس علي وشه فأول ما الدبابات دي تتحرك طيارات الحلفاء حتصطادها زي ما عينك كده بتلقط البنات الحلوة في أول يوم ليك في الجامعة فهو مش عايز الدبابات دي تفضل في باريس و عايزها تكون قريبة من ساحل فرنسا علي بحر المانش .. طب و الحل؟ .. نروح للمعلم (سردينة) يفصل ما بينا.

مصيبة (هتلر) و اللي بيشترك فيها مع أي ديكتاتور في تاريخ البني أدمين إنه بطيعته هبيد .. مينفعش تلاقي ديكتاتور يطلع بكل سلام نفسي يقول زي الست (بلقيس) ملكة سبأ لما قالت لمستشاريها أفتوني في أمري ما كنت قاطعة أمراً حتي تشهدون .. (هتلر) مكنش عارف يحلها إزاي فقرر يهبد إنه قسم دبابات الإحتياط بالنص .. 3 فرق حيبقوا تحت تصرف (روميل) و الباقي تحت تصرف (فون رونشتيد) .. و مش بس كده .. الفرق اللي تحت إيد (فون رونشتيد) مينفعش بأي من حال من الأحوال حد يدور مفتاح الكونتاكت بتاع واحدة فيهم إلا بأمر مباشر من (هتلر) شخصياً و دي التقسيمة اللي جابت ألمانيا الأرض.

صباح يوم العملية .. دي مش سيمفونية .. دي فرقة حسب الله:

المعاد إتحدد .. العبور حيتم يوم 4 يونيو .. قبلها بيوم الطيارات كانت جاهزة في المطارات .. العساكر إتحملوا علي السفن .. كل حاجة جاهزة .. فجأة المطر نزل .. المطر بقي سيول .. السيول بقت عاصفة .. إتقال وقتها كل تأخيرة و فيها خيرة .. أجل العملية 24 ساعة لحد 5 يونيو .. المطر مبيوقفش .. الطيارات مش حتعرف تطير في الجو ده .. المشكلة إن لو العبور متمش بكره اللي هو يوم 6 يونيو فالعملية كلها حتتأجل شهر كامل كمان .. ليه؟ .. إنت محتاج يوم العبور ده يكون يوم متجمع فيه كذا حاجة مش بتحصل إلا كل فين و فين .. إنت عايز يوم يكون الليلة اللي قبلها القمر بدر عشان الطيارات اللي حترمي القوات الخاصة خلف خطوط العدو تبقي شايفة هي طايرة فين .. عايز يوم يكون فيه تيار المياه في بحر المانش حنين .. متنساش كمان نقطة .. العساكر قاعدين في ميتين أم الطيارات و السفن بقالهم يومين مستنيين عشان في الأخر تقولهم معلش حنضطر نأجلها شهر كمان .. إنت متخيل ده ممكن يعمل إيه في دماغهم و نفسيتهم و روحهم المعنوية .. طب إحنا ربنا سترها معانا و خبر العملية متسربش للألمان فعايز تفهمني إن لو العساكر دي كلها قعدت شهر كامل بتتشمس المخابرات الألمانية مش حتشم خبر عن اللي بيحصل .. إنت لا تتخيل حجم التوتر اللي كان مسيطر علي دماغ القيادة العليا للقوات المسلحة بتاعة الحلفاء من إنهم ميبقاش قدامهم غير حل التأجيل .. لحد ما ربنا سترها معاهم.

في وسط الإجتماع اللي كان مشحون و الجنرالات أعصابها قربت تفلت بيجيلهم نقيب في القوات الجوية البريطانية إسمه (جيمس مارتن ستاج James Martin Stagg) و في إيده تقرير أرصاد جوية يمكن كان أهم تقرير أرصاد جوية في تاريخ تقارير الأرصاد الجوية .. الأخ توقع إن الجو حيحلو يوم 6 .. (إيزنهاور) زي ما يكون ما صدق و عطي الأمر إن العملية تبدأ.

واحدة من الأقوال المأثورة للفريق (سعد الدين الشاذلي) الله يرحمه اللي كان رئيس أركان حرب القوات المسلحة المصرية وقت حرب أكتوبر 1973 لما حب يوصف عبور قناة السويس فهو قال إنها كانت سيمفونية شارك فيها الألاف من العساكر .. كل عسكري بيعبر كان عارف دوره كويس أوي .. كم الإهتمام بالتفاصيل كان مرعب .. يمكن (الشاذلي) مكنش حقق النجاح ده في العبور لولا إنه قرأ و ذاكر كم العك اللي حصل في عبور نورماندي .. حرفياً مفيش حاجة حصلت صح .. نهائي:

• كان قبل العبور بأسابيع سلاح المدفعية البريطاني كان بيستهدف المطارات الحربية الألمانية في نورماندي فإنت إلي حد ما شبه متؤكد إن سلاح الجو الألماني مش حيبق عنده طيارات كافية إنهم يصطادوا لانشات عبور العساكر ولا الطيارات اللي حترمي قوات المظلات و القوات الخاصة خلف خطوط العدو في الليلة اللي قبل صباح العبور.
• في نص الليل تقريباً أربع طيارات بتعدي بحر المانش عشان ترمي طليعة قوات المظلات اللي بيسموها كاشفي الطريق أو Pathfinders .. دول عناصر المظلات اللي دورهم إنهم يبقي معاهم أجهزة لاسلكي عشان يحددوا نقط الهبوط بتاعة قوات المظلات اللي حتنزل وراهم .. حلو .. من الأربع طيارات دول فيه واحد رمت القوات اللي فيها في مكان بعيد حبة حلوين عن المكان اللي المفروض ينزلوا فيه .. طيارة تانية عطلت في الجو و إضطرت ترجع تاني المطار قبل ما تعبر بحر المانش أصلاً .. كده بقي فاضل طيارتين .. العساكر و هم بينزلوا بالباراشوت نسوا ياخدوا معاهم أجهزة اللاسلكي بتاعتهم .. فإنت الناس اللي كان دورها إنها تحدد لقوات المظلات تنزل فين معرفتش تعمل شغلها .. رايح فين لسه النكد مخلصش.
• قوات المظلات اللي نزلت خلف خطوط العدو حرفياً إتفحتت .. أنصحك أوي تتفرج علي مسلسل إسمه Band of Brothers و اللي جسد المرحلة دي من الحرب بشكل واقعي أوي .. الدفاع الجوي الإلماني كان بيجبر الطيارين الأمريكان يا إما يرموا قوات المظلات من علي إرتفاع عالي أوي فالعسكري مبيبقاش عارف يسيطر علي مكان هبوطه و هو نازل بالباراشوت فممكن تلاقيه نازل في حضن العساكر الألمان .. يا إما الطيارين كانوا بينزلوا علي إرتفاع واطي أوي فلما عسكري المظلات ينط من الطيارة مبببقاش معاه وقت كافي إن الباراشوت يبطأ من هبوطه و بينزل يا عيني رجليه تتكسر.
• فيه قوات من المظلات اللي إترمت خلف خطوط العدو في ليلة قبل العبور عرفت تتجمع و تنفذ المطلوب منها .. مش حبقي ببالغ لو قلت إن القوات دي هي السبب في إن عبور نورماندي نجح .. دي القوات اللي قدرت تصد الهجوم المضاد أو Counterattack النازي عشان يلحقوا نورماندي .. دي القوات اللي قدرت تدمر بطاريات دفاع جوي كتير و خلت الطيارات الأمريكاني تعرف تنفذ مهماتها.
• قبل الفجر بكام ساعة و لسه الشمس مطلعتش بدأت الغارات الجوية .. طبعاً إحنا بنتكلم في وقت ما قبل الرؤية الليلية و التوجيه بالليزر .. مفيش قنبلة إترمت في الغارات دي صح .. كل القنابل إترمت علي الأحياء السكنية .. مفيش عسكري ألماني إتعور حتي .. فين و فين لما الشمس طلعت الطيارين الأمريكان بقوا شايفين هم بيرموا قنابلهم علي مين و بدأوا يختاروا أهدافهم صح.
• فجر العملية كاسحات ألغام بتجري عشان تفجر أي ألغام بحرية يكون النازيين زرعوها في المياه .. ورا كاسحات الألغام دي 6,000 سفينة حربية شايلة لانشات عبور العساكر بتتحرك .. الساعة 6:30 الصبح لانشات العبور بدأت تتحرك عشان الدفاعات الألمانية تخترتقهم زي ما يكونوا بيلعبوا لعبة البطة بالأتاري بتاعة زمان اللي كنا بنلعبها و إحنا صغيرين.
• اللي منكوا إتفرج علي فيلم Saving Private Ryan و فاكرين المشهد الإفتتاحي المرعب في الفيلم فعايزك تعرف إن ده كان في حتة من الشط بتاع نورماندي الأمريكان سموه أوماها Omaha Beach .. كم الخساير في الأرواح اللي العساكر الأمريكان إتعرضولها كان صعب تستوعبه .. لحد أخر اليوم الأول للعبور و كان شط أوماها مكنش لسه الأمريكان مسيطروش عليه لحد ما الذخيرة بتاعة العساكر الألمان خلصت و السفن الحربية الأميريكية كسرت الأوامر اللي جاتلها و قربت من الشط أوي عشان تقدر تضرب الدفاعات الألمانية.
• علي عكس ما إنت ممكن تكون متوقع الأمريكان مش بس هم اللي عبروا في نورماندي .. الإنجليز كان مخصص ليهم شطين إسمهم الكودي كان جولد Gold و سورد Sword يعني سيف .. الكنديين كان مخصص ليهم شط إسمه الكودي جونو Juno.
• مفيش فشل قد الهبل اللي كان بيحصل في الحتة من ساحل نورماندي اللي الأمريكان إدوها الإسم الكودي شاطيء يوتاه Utah Beach .. لك أن تتخيل إن العساكر لقوا نفسهم راكبين اللانشتات بتاعتهم و مفيش طلقة بتتضرب عليهم .. العساكر تنزل الشط و مش لاقيين عسكري ألماني مستنيهم .. يفتحوا الخرايط بتاعتهم يلاقوا إن فيه حاجة غلط .. إحنا مش المفروض نبقي هنا .. إحنا المفروض نبقي هناك .. العساكر عبروا في المكان الغلط .. من وسط القوات اللي عبرت في الحتة دي كان الجنرال (تيدي رزوفلت الإبن Teddy Roosevelt Jr.) .. ده كان الجنرال الوحيد ضمن القوات اللي عبرت .. اللي حصل ده بقي بعد كده الأساس أو المنهج اللي مش بس القوات المسلحة الأميريكية إنما الإسرائيلية كمان بقت ماشية عليه.

(تيدي روزفيلت) قال لرجالته فككوا بقي خالص من الأوامر اللي جيالكوا من القيادة بتاعة القوات المسلحة و خليكوا معايا .. الجنرالات اللي قاعدين في التكييف دول مش حينفعونا دلوقتي .. (تيدي روزفيلت) قال إن المكان اللي هم نزلوا فيه ده رغم إنه كان غلط بس كان مناسب أكتر فبدأ يعيد توجيه رجالته و باقي القوات اللي نزلت في شاطيء يوتاه .. الفكرة إن القائد الميداني علي الأرض بيبقي عنده فرصة إنه ياخد قرارت أحسن و أسرع من القائد اللي قاعد بعيد في مركز القيادة .. ده السبب إن مثلاً في حرب أكتوبر (أرييل شارون) خد قراره إنه يحرك قواته و يخلق الثغرة من غير ما ياخد أمر مباشر من وزير دفاعه (موشيه دايان) .. فيه قوات مسلحة كتير في العالم بتمرن الضباط بتوعها علي الفكرة دي إنك تاخد قرار في لحظتها من غير ما تستني أمر من الضابط اللي فوقيك .. (تيدي روزفيلت) كان رجل كبير في السن و في الكشف الطبي اللي قبل العبور هو كذب علي الدكتور بتاعه إن عنده مشاكل في القلب عشان يوافقوله إنه يعبر مع العساكر بتوعه .. بعد العبور ب36 يوم (تيدي روزفيلت) بيموت بأزمة قلبية بعد ما إتكرم بميدالية الشرف Medal of Honor أعلي وسام عسكري في القوات المسلحة الأميريكية.

إنت لا تتخيل إزاي نجاح لجنة العشرين ساهم إن العبور يتم علي خير .. حتي بعد عبور الحلفاء لما الإنجليز بقوا بيسمعوا الإتصالات الاسلكية بين القوات الألمانية لقوا إن الألمان بيعتبروا عبور نورماندي ده مجرد عبور ضمن سلسلة جاية .. ده خلاهم حتي لمدة أيام بعد العبور مش عايزين يسحبوا قواتهم من كاليه و من مناطق تانية عشان يصدوا القوات اللي عماله تعبر من نورماندي .. وفي نفس الوقت متنساش دور المقاومة الفرنساوية .. خلال أول 24 ساعة من العبور عناصر المقاومة دمروا 577 خط سكة حديد .. 30 طريق أسفلت .. 32 كابل تليفونات .. صدقني لو قلتلك إن دور المقاومة الفرنساوية خلال أول 24 ساعة هو اللي كلف القوات النازية كتير أوي لدرجة إنها أخرت Counterattack بتاعها لكذا يوم لحد ما الطرق و خطوط التليفونات تتصلح .. فاكر ال3 فرق مدرعات اللي كانوا تحت تصرف (روميل)؟ مفيش غير واحدة بس فيهم هي اللي وصلت نورماندي و الباقي معرفش يوصل عشان الطرق إتنسفت.

قصة عبور نورماندي يمكن لو حابب تطلع منها بحكمة معينة هي إن محدش بياكلها بالساهل .. دايماً خليك عارف إن في العمليات العسكرية بالذات مفيش حاجة بتمشي زي ما إنت مخططلها .. خالص .. لك أن تتخيل إن أكبر عملية عسكرية إتعملت في تاريخ البني أدمين كانت فيه ملايين التفاصيل الصغيرة اللي كان ممكن تبوظها و ساعتها كنا حنقول يااااه علي عظمة العسكري الألماني .. إنت أخرك تعمل اللي عليك و الباقي علي ربنا و قصة عبور نورماندي توريك ده كويس.

المصادر:

• فيديو بعنوان D-Day: The Great Crusade-Extra History: #1 نشر علي YouTube و ده لينك الفيديو الأصلي:
  https://www.youtube.com/watch?v=-KY1pDLulF4
• فيديوو بعنوان D-Day: The Secret War-Extra History: #2 نشر علي YouTube و ده لينك الفيديو الأصلي:
  https://www.youtube.com/watch?v=a3w9pmvpyDM
• فيديو بعنوان D-Day: La Resistance-Extra History: #3 نشر علي YouTube و ده لينك الفيديو الأصلي:
  https://www.youtube.com/watch?v=EyPLDItxGgA
• فيديو بعنوان D-Day: The Atlantic Wall-Extra History:#4 نشر علي YouTube و ده لينك الفيديو الأصلي:
  https://www.youtube.com/watch?v=KxFliX-w6kI