في أكتوبر 2020 وسط حالة الهلع اللي كلنا كنا عايشين فيها بسبب جائحة فيروس كورونا فطلع خبر معرفش هو عدي عليك ولا لا إن فيه مشروع إتقدم للكونجرس الأميريكي من أعضاء بينتموا للحزبين الجمهوري والديموقراطي إنهم يدوا إسرائيل قنابل GBU-57 واللي فيه ناس بتسميها Massive Ordnance Penetrator وإختصاراً تبقي MOP ودي معناها قنبلة ضخمة ليها القدرة علي إختراق الدفاعات الحصينة .. الخبر لما نزل جه معاه بشكل تلقائي التكملة بإن ده أكيد لو حصل فالإسرائيليين حيستخدموا القنابل دي لضرب المفاعلات النووية الإيرانية .. جوه أميركا لما الخبر ده إتقال الناس فكرت في كذا حاجة .. فيه ناس قالت إن ده غلط عشان القانون الأميريكي أساساً بيمنع بيع النوع ده من القنابل لأي حد أيا كان هو إبن مين .. ناس تانية قالت أيوه لازم أميركا تضمن التفوق العسكري لإسرائيل علي جيرانها العرب الوحشين المتوحشين .. فيه ناس تانية قالت ودي الحقيقة اللي أنا ناوي أتكلم بإسمهم النهاردة قالوا ثواني بس يا جماعة نفهم هو أنتوا فاهمين أنتوا بتقولوا إيه ولا بتهبدوا وخلاص لإن إسرائيل حتي لو معاها القنابل دي فهي معندهاش الطيارات اللي ينفع ترميها فوق إيران أصلاً .. مستغرب صح؟
مبدأياً لازم تبقي عارف إن قنبلة GBU-57 دي كبيرة .. كبيرة أوي .. دي عبارة عن إسطوانة طولها 6 متر وعرضها 80 سنتيمتر .. بس مش دي المشكلة .. المشكلة إن وزنها 2385 كيلوجرام .. أيوه .. قنبلة واحدة وزنها فوق الإتنين طن .. ده معناه إن لا طيارات F-35I Adir ولا F-15I Ra’am ولا F-16I اللي تحت إيد سلاح الجو الإسرائيلي ينفعوا إنك تركب علي أي واحدة فيهم قنبلة بالوزن ده عشان تروح ترميها فوق إيران .. طب أزيدك من الشعر بيت .. مفيش في سلاح الجو الأميريكي غير طيارة واحدة يتيمة هي اللي تقدر تشيل قنبلة بالوزن ده ودي تبقي الطيارة الشبح B-2 Spirit و اللي حتي ده مش المذهل في الموضوع .. اللي فعلاً حيخليك تهرش في شعرك و إنت بتحاول تستوعب اللي حصل إن الأمريكان من سنة 2007 و دي السنة اللي هم عملوا فيها القنبلة GBU-57 كانوا بيحاولوا يدوروا علي طريقة يركبوا بيها القنبلة دي علي الطيارة الشبح و فين و فين سنة 2019 ربنا كرمهم و عرفوا يلاقوا حل .. إنت مستوعب إنهم قعدوا 12 سنة بيحاولوا يلاقوا طريقة يرموا بيها القنبلة اللي هم عملوها فوق الهدف اللي هم عايزين يدمروه و مكانوش عارفين .. طبعا هو مش عرض البلاك فرايداي بتاع أمازون عشان أميركا تدي إسرائيل طيارة شبح و قنبلتين MOP فوق البيعة .. الحل إن لو إسرائيل إستلمت فعلاً القنابل دي إنها ترميها فوق إيران مش بطيارة مقاتلة إنما بطيارة نقل زي C-130 اللي هي الطيارة بتاعة النقل الكبيرة اللي هم عندهم منها.
مهم تبقي فاهم ليه الحل ده ينفع وليه مينفعش:
- هو ينفع عشان إتعمل قبل كده لما في سنة 2017 الرئيس الأميريكي وقتها (دونالد ترامب Donald Trump) أمر بإن طيارة نقل MC-130 Talon ترمي قنبلة GBU-43 فوق أفغانستان .. قنابل GBU-43 فيه ناس تانية بتسميها MOAB ودي إختصار Massive Ordnance Air Blast و دي كانت فعلياً أضخم قنبلة في العالم عشان كده ناس تالتة خدت إسم MOAB ده و سموها Mother of All Bombs يعني أم القنابل .. قنبلة GBU-43 طولها 9 متر و وزنها 10,170 كيلوجرام يعني دخلت في 10 طن.
- هو مينفعش عشان لو سماء أفغانستان سداح مداح للي رايح و اللي جاي فالإيرانيين عندهم منظومة دفاع جوي محترمة فطيارة بطيئة زي C-130 وش حتتلقط و وش الدفاع الجوي الإيراني حيوقعها .. رغم كده فيه أمريكان كتير عندهم ثقة أنا معرفش هم جابوها منين الحقيقة إن سلاح الجو الإسرائيلي زي ما دمر المفاعل النووي العراقي سنة 1981 و زي ما دمر المفاعل النووي السوري سنة 2007 فهم يقدروا يعملوا الهاتريك و يخلصوا من البرنامج النووي الإيراني.
و إن كان فيه حل بلدي شوية إترمي كده و معرفش الحقيقة هل فعلاً ينفع يتنفذ ولا لا بس نظرياً أه ينفع .. دلوقتي طياراة F-15I Ra’am اللي تحت إيد الإسرائيليين لو بصيت علي Specs بتاعتها حتلاقيها بتقول إن دي طيارة اخرها تشيل حمولة 8100 كيلوجرام و ده تقريباً نص وزن القنبلة GBU-57 بس الرقم ده يبقي أقصي وزن الطيارة حتشيله و في نفس الوقت تقدر تجري و تناور و تشارك في Dogfighting و إشتباكات جوية و الكلام ده .. لو عايز تعتبر الطيارة F-15I Ra’am كإنها طيارة نقل بتشيل حاجة من مكان لمكان و خلاص فهي تقدر تشيل 36,450 كيلوجرام .. تاني .. نظرياً ينفع طيارة زي دي ترمي قنبلة GBU-57 بس الموضوع مش حيبقي سهل و حيحتاج تخطيط كتير بس أرجع و أقولك إنهم عملوها قبل كده مرتين .. فهل حيجيبوا الهاتريك بشرط إن الأمريكان يدوهم القنابل دي؟
المصدر:
مقالة بعنوان Could the Israelis really drop a massive ordnance penetrator bomb on Iran? The answer maybe yes .. نشرت في مجلة Forbes و ده لينك المقالة الأصلية:
https://www.forbes.com/sites/erictegler/2020/10/30/could-the-israelis-really-drop-a-massive-ordinance-penetrator-bomb-on-iran-the-answer-may-be-yes/?sh=456cd8c1326c
