تابعونا

سناكس ما بين المقالات

مساعدات حلف شمال الأطلنطي لأوكرانيا .. لعنة المال السايب.

مفيش بلد تقدر تقول تلت التلاتة كام لبلد عضوة في NATO خوفاً من أميركا فده خلي الحلف هو زي ما قلت الشلة اللي حولين أميركا اللي بتستخدمهم عشان تخدم مصالحها وده يفسرلك ليه بعد إنهيار الإتحاد السوفيتي كل الدول اللي إنضمت للحلف كانت دول زمان جزء من الإتحاد السوفيتي وبسم الله ما شاء الله كلهم جيران روسيا.

1 أكتوبر، 2023 759

اللي ملوش كبير يشتريله كبير .. المثل ده أنا الحقيقة فضلت لسنين مش عارف أفهم معناه .. هو فيه حد ممكن يتنازل طواعية كده عن إرادته الحرة ويجيب حد يسيطر عليه؟ .. الحقيقة اللي إكتشفتها لما كبرت هي اه .. أسوأ حاجة ممكن تعملها لأي حد إنك تسيب قدامه مينيو مفتوحة يختار منها .. البشر بطبيعتهم مبيحبوش فكرة إن يتقالهم تاكل إيه النهاردة .. مش مصدقني صح؟ .. عايزك في أي خروجة ليك مع صحابك لما تخشوا المطعم اللي حتاكلوا فيه إتفرج علي كم التخبط وعدم القدرة علي إتخاذ القرار .. علي فكرة الموقف ده وإن كان يبدوا تافه بس هو تصغير للنفس البشرية والمجتمع اللي إنت عايش فيه .. إنت حتلاقي ناس بتروح للأكيلة اللي في الشلة يسألوهم ها أطلب إيه وفيه منهم لاغي شخصيته جداً وبيسأل هل ممكن يشير معاهم في كذا حاجة؟ .. موقف تافه جداً بس لما تتأمل فيه حتشوف بعنيك إن البشر نوعين .. فيه بشر قادرة تاخد قرار وفيه بشر عايزة اللي ياخد القرار بالنيابة عنها اللي هو بمعني أخر اللي ملوش كبير يشتريله كبير .. في العالم اللي إنت فيه دلوقتي مفيش كبير أكبر من حلف شمال الأطلنطي اللي إنت يمكن عارفه باسم NATO أو النيتو ودي إختصار North Atlantic Treaty Organization واللي يعتبر أكبر قوة عسكرية في تاريخ البني أدمين واللي حنتكلم عنه النهاردة.

بداية ظهور NATO كان سنة 1949 لما فيه 12 بلد علي مستوي العالم من ضمنهم أميركا وفرنسا وبريطانيا وكندا بدأوه عشان هدف واضح وصريح وسهل يتفهم .. مواجهة خطر المد الشيوعي .. بمعني أخر إحنا عملنا الحلف ده عشان نضرب الإتحاد السوفيتي .. جري الشريط لدلوقتي والحلف بقي فيه 31 دولة وبعد إنهيار الإتحاد السوفيتي تحول الحلف من كيان له هدف لكيان ملوش حاجة يعملها غير إنه يعيش دور البلطجية أو بلاش بلطجية دي عشان فيه دول في الحلف لا ليها في الثور ولا في الطحين إنما خلينا نقول الشلة اللي في ظهر أميركا .. دول المشجعين .. دول الألتراس بتوع أميركا .. صحيح الإتفاقية اللي إتبني عليها الحلف بتقول إن أي هجوم مسلح علي أي بلد منضمة للحلف يعتبر هجوم علي كل الدول الأعضاء فيه بس خلينا نكون منطقيين .. مفيش بلد تقدر تقول تلت التلاتة كام لبلد عضوة في NATO خوفاً من أميركا فده خلي الحلف هو زي ما قلت الشلة اللي حولين أميركا اللي بتستخدمهم عشان تخدم مصالحها وده يفسرلك ليه بعد إنهيار الإتحاد السوفيتي كل الدول اللي إنضمت للحلف كانت دول زمان جزء من الإتحاد السوفيتي وبسم الله ما شاء الله كلهم جيران روسيا .. من أول ألبانيا للمجر لبلغاريا لبولندا لجمهورية التشيك لسلوفاكيا لرومانيا وليتوانيا ولاتفيا وأستونيا.

قصة حياة التوسع الأوروبي لحلف شمال الأطلنطي في خريطة من أول تأسيسه سنة 1949 لحد دلوقتي.

المنطق ده فيه ناس بترفضه علي أساس إن فيه مشكلة صغيرة متمثلة في أوكرانيا .. سنة 2008 طلع بيان رسمي من الحلف قال إن الحلف علي قلبه زي العسل إن أوكرانيا تنضم للحلف في المستقبل إن شاء الله بس في سبتمبر 2022 الحلف رفض الطلب الرسمي اللي قدمته أوكرانيا للإنضمام للحلف بشكل عاجل .. عشان كده أنا عند رأيي إن الحلف مش بيتحرك غير في الإتجاه اللي أميركا عايزاه وده كان واضح جداً في قمة حلف شمال الأطلنطي اللي إتعملت في ليتوانيا في يوليو 2023 لما الرئيس الأوكراني (فلاديمير زيلينسكي Volodmyr Zelenskyy) كان شوية وحيبوس إيد رؤساء الدول الأعضاء في الحلف يقبلوا عضوية بلده بس كلهم ردوا عليه إن القرار مش في إيدهم إنما في إيد البربق اللي هناك ده وشاوروله علي الرئيس الأميريكي (جو بايدن Joe Biden) .. اللي الناس كلها عارفاه إن أميركا مش شايفة روسيا أولولية ليها ومركزة علي الصين دلوقتي ولو الحلف قبل دخول أوكرانيا فده مش معناه غير إن أميركا لازم تبعت قوات مسلحة لأوكرانيا يعني إعلان حرب ضد روسيا .. دي حاجة ممكن الأمريكان يعملوها في لعبة Call of Duty أو في الجزء الجديد من سلسلة The Expendables بس مش في الحقيقة .. بس لو إنت شايف إني ظالم الحلف بإني مقتصر دوره علي إنه يشجع أي حاجة بتعملها أميركا فإنت محتاج تفهم حاجتين:

  • أول حاجة إن لايحة الحلف بتقول إن عشان بلد تنضم ليه لازم كل الدول الأعضاء بلا استثناء توافق وده كان سبب تأخير إنضمام السويد وفنلندا للحلف .. البلدين قدموا طلب رسمي إنهم ينضموا للحلف في إبريل 2022 بس تركيا اللي وقفت ليهم في الزور رغم إن دخول فنلندا الحلف كان حيبقي خبر زي الزفت علي دماغ الروس لإن فنلندا ليها حدود مشتركة مع روسيا بطول 1,340 كيلومتر .. الفكرة إن الأتراك شايفين إن السويد مقدمة حق اللجوء السياسي لناس أعضاء في حزب العمال الكردستاني وراسهم وألف سيف إن السويد متخشش الحلف غير لما تطرد الناس دي من أرضها .. الوضع زي الزفت لدرجة إن تركيا قبلت إن فنلندا تنضم والسويد لا ولحد دلوقتي لا السويد عارفه تخش الحلف ولا حد عارف يقول للأتراك سلامات يا أم أحمد.
  • ثاني حاجة ودي اللي حنركز عليها كلامنا إن عدم إنضمام أوكرانيا للحلف ومساعدة NATO ليها يقتصر علي إمدادها بالسلاح أفضل بكتير لأميركا من إن كانت أوكرانيا عضوة وكانت أميركا مضطرة إنها تخش في حرب مفتوحة ضد روسيا .. ليه؟ .. لإن الفلوس اللي راحت أوكرانيا في شكل سلاح يستخدم ضد روسيا أكبر من قدرة مخك علي الإستيعاب.
إنضمام فنلندا لحلف شمال الأطلنطي أنا شايفه واحد من أسوأ القرارات علي روسيا لإن فلنلندا بتشترك مع روسيا في حدود برية أطول من الليلة السودا .. حدود برية علي إمتداد 1340 كيلومتر بحيث حرفياً مدينة سانت بطرسبرج تاني أكبر المدن الروسية علي بعد فردة كعب من الحدود الروسية الفنلندية.
الرسم البياني ده بيوريك حجم المساعدات اللي خدتها أوكرانيا من أميركا خلال الفترة من 24 يناير 2022 لحد 31 مايو 2023 واللي زي ما إنت شايف متقسم ل3 حتت: مساعدات إنسانية ودي حوالي 5% من إجمالي الفلوس اللي راحت بقيمة 3.9 مليار دولار .. مساعدات مالية بتمثل 34% بقيمة 26.4 مليار دولار .. و نصيب الأسد رايح للمساعدات العسكرية بنسبة 61% وبقيمة 46.6 مليار دولار .. المساعدات العسكرية دي نفسها متقسمة 3 حتت: فلوس رايحة للتدريب ودول 18.3 مليار دولار .. سلاح كان تحت إيد القوات المسلحة الأميريكية وإتبرعت بيه لأوكرانيا ودول بقيمة 23.5 مليار دولار .. سلاح جديد لانج راح أوكرانيا تحت مظلة برنامج المعونة العسكرية وده بقيمة 4.7 مليار دولار.
دي حضرتك لستة الدول اللي بتاخد فلوس من أميركا تحت ما يسمي برنامج المعونة العسكرية .. المبالغ اللي مكتوبة عندك إنها راحت لأفغانستان وإسرائيل والأردن ومصر وأثيوبيا والعراق متاخدة من ميزانية وزارة الدفاع الأميريكية لسنة 2020 كنوع من المقارنة مع حنفية المال السايب المفتوحة في أوكرانيا.
الرسم البياني ده مهم جدأً لإنه بيحطلك حنفية المال السايب المفتوحة في أوكرانيا في سياقها التاريخي عشان تقدر تستوعب حجم اللي إتصرف .. كلنا فاكرين هنا الجسر الجوي الأميريكي اللي إتعمل لإنقاذ إسرائيل خلال حرب أكتوبر 1973 .. عايزك تعرف إن إجمالي الفلوس اللي بعتتها أميركا لإسرائيل و اللي بدأت تتسجل سنة 1979 يعني بعد الحرب بخمس سنين كانت يدوبك بتشكل 0.18% من GDP بتاع أميركا قصاد إن الفلوس اللي صرفتها أميركا علي أوكرانيا بتمثل 0.33% من GDP بتاعها .. بمعني أخر .. اللي صرفته أميركا علي أوكرانيا عشان تنقذها من روسيا يعتبر ضعف اللي صرفته علي إسرائيل عشان تحميها من مصر و سوريا.
كنوع من أنواع جلد الذات عايزك تعرف إن حجم المساعدات الأميريكية لأوكرانيا من أول ما الغزو الروسي بدأ وصل حوالي 77 مليار دولار و دول أساساً أكتر من ميزانية وكالة الفضاء و الطيران القومية NASA خلال سنة 2022.

الحلف بيتعامل مع أوكرانيا زي ما الناس اللي بتروح تصيف في مراسي و هايسيندا بيتعاملوا مع عيالهم .. دي أخر 5,000 جنيه تاخدها النهاردة يا بودي .. قنابل عنقودية Cluster Bombs راحت .. دبابات إبرامز Abrams أمريكاني راحت .. دبابات تشالينجر Challenger 2 بريطاني راحت .. دبابات ليوبارد Leopard 2 ألماني و ماله .. صواريخ هيمراس HIMRAS ميضرش .. بس زي ما أهالي العيال المتدلعين دول بيدوا فلوس فهم عايزين يسمعوا ميرسي يا مامي أو ثانكس دادي .. الشكوي اللي بتطلع من الحلف إن الأوكرانيين مش بيقولوا حتي شكراً إنما كل اللي بيطلع منهم هو يا إما هات فلوس أو حتدخلني الحلف إمتي .. ده قصاد حقيقة إن الغرب عطي لأوكرانيا سلاح و فلوس كتير .. كتير أوي:

خلال الفترة من 24 يناير 2022 لحد 15 يناير 2023 أميركا بعتت سلاح لأوكرانيا بقيمة 46.6 مليار دولار .. بريطانيا بعتت سلاح بقيمة 5.1 مليار دولار .. دي أرقام خزعبلية بس عشان تستوعبها لازم تحسب نسبة المبلغ ده من GDP أو الناتج الوطني الإجمالي للبلد .. بمعني .. جيت أنا وإنت ماشيين في الشارع لقيتك شفت حد فقير قاعد علي جنب مستني حد يساعده بصدقة فإنت تصدقت من جيبك ب40 جنيه .. 40 جنيه في صدقة مبلغ مش قليل بس في نفس الوقت لما يكون حضرتك مرتبك في الشهر مثلاً 20,000 جنيه ففعلياً 40 جنيه دي 0.2% من مرتبك الشهري فهي فعلياً ولا حاجة .. الفلوس اللي بعتتها أميركا وبريطانيا خلال الفترة دي صحيح كبيرة بس هي يدوبك بتمثل 0.2% من GDP بتاع البلدين .. المشكلة إن فيه دول تانية في الحلف بتُجبر إنها تبعت مساعدات عسكرية لأوكرانيا صحيح مش بأرقام كبير بس بتعتبر جزء محترم من GDP بتاع البلد يعني أستونيا مثلاً بعتت سلاح بفلوس تعادل 1.1% ولاتفيا بعتت سلاح بفلوس تعادل 0.9% .. من بداية الغزو الروسي لأوكرانيا والكونجرس الأميريكي وافق إنه يبعت فوق 75 مليار دولار علي شكل مساعدات من كل شكل ولون .. فيه منها الإنسانية والمالية والعسكرية .. بس يمكن المُبهر إنك لما تيجي تشوف نوعية وحجم السلاح اللي راح أوكرانيا وخلينا نمسك فترة محددة وهي من 20 يناير 2020 لحد 27 يونيو 2023 اللي هو تقريباً من قبل حتي ما أول طلقة تتضرب في الغزو لحد دلوقتي:

  • تعالي نمسك السلاح اللي راح للقوات البرية الأوكرانية مثلاً .. الناس دي استلمت فوق 10,000 صاروخ جافلين Javelin المضاد للدبابات .. خدوا فوق 1,700 صاروخ ستينجر Stinger المضاد للطيارات .. ميضرش يبقي معاهم فوق 4,000 صاروخ TOW المضاد للدبابات .. عشان نحمي عساكرهم لازم يبقي معاهم فوق 100,000 وحدة دروع و خوذ.
  • لو جيت تبص لسلاح المدفعية تلاقي الأوكرانيين استلموا لحد دلوقتي فوق 160 مدفع هاوتزر Howitzer عيار 155 مليمتر بالذخيرة بتاعتهم .. خدوا 72 مدفع هاوتزر عيار 105 مليمتر برده بالذخيرة بتاعتهم .. جالهم 47 مدفع هاون Mortar عيار 120 مليمتر و 10 مدافع هاون عيار 81 مليمتر .. معاهم 38 منصة صواريخ HIMRAS .. استلموا 60,000 صاروخ جراد عيار 122 مليمتر.
  • سلاح المدرعات بتاعهم إتروق عليه الصراحة .. جالهم 154 مدرعة برادلي .. استلموا 31 دبابة إبرامز .. جمهورية التشيك بعتتلهم 45 دبابة T-72B روسي .. 125 مدرعة سترايكر Stryker و 500 مدرعة MRAP .. فوق 2000 عربية هامفي Humvee.
منظومة صواريخ HIMRAS مستخبية وسط الشجر في شرق أوكرانيا.
كنسبة من الناتج الوطني الإجمالي GDP اللي هو مجموع كل الفلوس اللي بتخش البلد أول كل سنة .. بمعني أخر مصروف البيت بتاع البلد .. حتلاقي إن بولندا صارفة علي ميزانية حلف شمال الأطلنطي 3.9% من إجمالي GDP بتاعها يمكن أعلي من أميركا .. صحيح إن المبلغ اللي دفعته أميركا أعلي بكتير من المبلغ اللي دفعته بولندا بس كنسبة و تناسب الفلوس اللي دفعتها بولندا عورتها جامد .. قصاد إن فيه دول تانية زي بريطانيا وفرنسا وألمانيا وإيطاليا وإسبانيا ولوكسمبورج بيساهموا بأقل من 2% من GDP بتاعهم اللي هو أساساً أقل من الكوتة الرسمية المتحددة في لايحة الحلف.
كم الفلوس اللي صرفتها أميركا علي تسليح أوكرانيا إنت ممكن متقدرش تستوعبها .. خلال الفترة من 24 يناير 2022 لحد 15 يناير 2023 يعني بتتكلم عن حوالي سنة إلا كام يوم أميركا بعتت سلاح بقيمة 46.56 مليار دولار و دول تقريباً قد ميزانية مصر .. يمكن اللي أنا عايز أقف قدامه شوية هي أرقام دول زي كندا وألمانيا .. الدولتين دول بالذات هاريين ودانا بقضية الدفاع عن الحريات بس لما تيجي تشوف هم فعلياً بيساهموا بقد إيه من قوت يومهم للدفاع عن القضية الأوكرانية تلاقي البولنديين صارفين أكتر منهم.
تأكيداً علي حتة إن فيه دول علي الله حكايتها دفعت من قوت يومها للدفاع عن أوكرانيا أكتر من دول تانية مصدعانا بقد إيه هم واقفين في صف الحريات بص علي ترتيب كندا وألمانيا من الدول اللي دفعت فلوس لأوكرانيا .. الترتيب ده بناء علي نسبة الفلوس اللي هم دفعوها مقارنة بالناتج الوطني الإجمالي GDP للدولة .. حتلاقي دول زي أستونيا ولاتفيا وبولندا وسلوفاكيا وجمهورية التشيك دافعين أكتر من الكنديين و الألمان.

ودي حضرتك لستة مفصلة بالسلاح الأمريكاني اللي راح أوكرانيا خلال الفترة من 20 يناير 2020 لحد 27 يونيو 2023:

وعلي فكرة لسه حنفية المال السايب مفتوحة ومش حتتقفل قريب .. زي ما قلت قبل كده الغزو الروسي لأوكرانيا أكل شركات السلاح الأميريكية الشهد لدرجة إن ما يسمي Military Industrial Complex وده الاسم السيكسي لتكتل شركات السلاح الأميريكية بقي ما أحب ما عليه إن الحرب دي تستمر لسنين وده اللي مخليني حاسس إن الحرب دي مش حتخلص بكره مش لسبب غير إن الأطراف اللي عايزينها تكمل و بيسترزقوا منها أكتر بكتير من الأطراف اللي عايزين سيل الدم يقف.

المصادر:

مهندس ميكانيكا بحب الصحافه و الكتابه .. مؤمن بان من حق كل بني ادم انه يعرف الحقيقه ورا الخبر .. رسالتي انك تفهم حقيقه اللي بيحصل عشان لما تقرر رايك تكون فاهم انت بتقرر علي اي اساس

اترك تعليق

بريدك الالكتروني لن ينشر. يجب ملئ الخانات بعلامة *

من فضلك ادخل التعليق!

من فضلك ادخل الأسم!

من فضلك ادخل البريد الالكتروني!من فضلك ادخل بريد الكتروني صحيح!