أنا فاكر مرة كنت قاعد في أمان الله في الشغل لقيت واحد صاحبي من اللي إنت بتلاقيهم دايماً بيحطوا كومنتات علي Health Keepers و عامل فورمة الساحل و لسبب ما دايماً بيلبس تي شيرتات ضيقة في شركة أغلب اللي شغال فيها رجاله مش بنات عشان أقول إنه بيعمل كده عشان يلفت نظر بنت عاجباه .. المهم إني الصبح زيي زي أي موظف مصري طبيعي بطلع كيس ساندوتشات الفول اللي إشتريتها من علي عربية الفول اللي علي أول الشارع عشان أفطر لقيته بيبصلي بقرف و بيطلع من شنطته إزازة فيها سايل لزج لونه أخضر .. بما إني مثقف يعني فقلت أستغل الموقف و سألته ده سموزي مش كده؟ .. رد عليا اه .. واحد تاني زميلنا سأله و ده فيه إيه ده .. لقيناه بيشرب نص الازازة علي بقي و بيقولنا مياه و خس و سبانخ و كرفس و تفاح و كمثري و نعناع و موز .. اللي هو بمجرد ما قال سبانخ حسيت إني حجيب اللي في بطني .. السموزي ده إختراع أنا شايفه بيعبر جداً عن اللي بيحصل في فلسطين بقاله أكتر من سنة .. شوية مقادير ملهاش علاقة ببعض و إتحطوا كلهم مع بعض و إتضربوا في الخلاط عشان يطلعلونا مصيبة سودا كلنا عايشينها بنفسنا دلوقتي بس يمكن بفارق بسيط .. صاحبي شرب السموزي عشان يخس .. اللي بيحصل في فلسطين ده حيدفع ثمنه كل اللي ساهم في المقادير بتاعته.
الوضع علي الأرض إنك لو رحت سألت أي حد من اللي جوه الخناقة سواء الإسرائيليين أو الفلسطينيين أو حتي حكومات الدول العربية هو أنتوا عايزين الدنيا تولع عن كده؟ فحتكون الإجابة هي قطعاً لا .. محدش فيه دماغ و محدش فاضي لده دلوقتي و كل طرف عنده أسبابه علي فكره .. الإسرائيليين مثلاً مش عايزين الدنيا تفلت منهم عشان معلش يعني (جو بايدن Joe Biden) اللي هو رئيس أميركا دلوقتي موقفه لا يسمح بأي حال من الأحوال إنه يقف في صف إسرائيل اليومين دول لإن الوضع السياسي الأميريكي فيه حالة إستقطاب و شحن ولا جو الشتيمة اللي بين الأهلاوية و الزملكاوية دلوقتي .. زود علي كده إن التارجيت اللي مركز عليه (بايدن) دلوقتي هو إعادة إحياء الإتفاق النووي الإيراني اللي هو صباح النكد يعني علي الإسرائيليين .. الحكومات العربية خصوصاً الخلايجة مش عايزين ده يحصل لإنهم مش عايزين يخسروا البيزنس اللي بيحاولوا يعملوه مع شركات السلاح الإسرائيلية .. السلطة الفلسطينية مش عايزة الدنيا تبوظ عشان حيبقي باين أوي قدام الناس إن خلاص السلطة الفلسطينية بقيادة الرئيس (محمود عباس أبومازن) بقي زيه زي خيال المأته و محدش في الشارع دلوقتي بيعمله حساب و هي دي المشكلة .. المشكلة إن المقادير اللي إتعمل منها السموزي بتاع الأزمة الأخيرة مخلي الحل صعب أوي أوي أوي بشكل إنت لا تتخيله.
أول المقادير اللي عايز أتكلم عنها هو الإنترنت و أخص بالذكر البتاع اللي حيجيب أجلنا كلنا .. تيك توك TikTok:
أحسن حد عبر عن ده كان (جاك خوري Jack Khoury) و ده واحد من أكتر الناس اللي بتفهم في تفاصيل الصراع العربي الإسرائيلي و اللي كتب مقالة محترمة جداً في جرنان هاارتز الإسرائيلي شرح فيها إنك محتاج تفهم هو الشارع الفلسطيني في الضفة الغربية دلوقتي مين بيحركه؟ .. الشارع الفلسطيني دلوقتي هو هو الشارع المصري قبل ثورة 25 يناير .. شارع أغلبه شباب في إيدهم أهم سلاح في إيد أي حد حاسس إنه مظلوم .. الإنترنت .. شباب مش مستني حاجة من حد .. لا مستني دعم من السلطة الفلسطينية ولا حتي بقي فارق معاه بيانات الإدانة و الشجب اللي بتطلع من الحكومات العربية .. و أكيد مش فارق معاه حركة حماس .. مهم أوي أكدلك علي حقيقة إن أيا كان رأيك في حركة حماس سواء إنت شايفها بعبع أو شايفها ملاك فهي صدقني ملهاش أي دور ولا نفوذ في اللي بيحصل في الضفة الغربية .. الشباب اللي بيدافعوا عن المسجد الأقصي دلوقتي مش فارق معاهم الكلام اللي يطلع من بق حماس و حماس عارفه ده كويس و إسرائيل كمان شايفاه بنفسها.
علي فكرة الموضوع مش جديد .. في إبريل 2021 شباب فلسطيني غاضب ضربوا مستوطن يهودي في الشارع و صوروا اللي حصل و نشروه علي TikTok كمحاولة إنهم يخلوا شباب تانيين يعملوا كده .. المستوطنين الصهاينة ردوا عليهم بإنهم عملوا مظاهرة لحد بوابة دمشق اللي هي واحدة من بوابات القدس و هم بيهتفوا بشعارات عنصرية من ضمنها مثلاً إن العرب لازم يمشوا من القدس.
ثاني المقادير هو فكرة أرضي بتاعتي و أرضك كمان بتاعتي اللي عايش بيها المتطرفين و المستوطنين الصهاينة في إسرائيل:
دي المقادير اللي إنت متخيل إنها السبب الوحيد للأزمة اللي بتحصل دلوقتي و اللي بتدور حول حي الشيخ جراح .. عشان مدخلش في خناقة قانونية طويلة حتوهك علي الفاضي فاللي حصل بمنتهي البساطة إن ناس من التيارات اليمينية المتطرفة رفعت قضية و كسبوها عشان يمشوا 6 عائلات فلسطينية من بيوتهم في حي الشيخ جراح في القدس الشرقية .. إيه المنطق ورا الحكم ده؟ .. قالك أصل دي أرض يهودية من قبل تقسيم فلسطين بعد النكبة .. طبعاً الفلسطينيين رفعوا قضية في المحكمة الدستورية العليا في إسرائيل و لسه مطلعش حكم بس إنت فاهم الفكرة .. فكرة إن أرضي اللي أنا واخدها بالدم بتاعتي و أرضك كمان دي بتاعتي.
ثالث المقادير هو الدين .. البهارات اللي بتولع أي خناقة:
أنا مقتنع جداً بفكرة إن المصايب مش بتيجي لوحدها .. المصايب زي ما تكون عامله جروب واتس بيتجمعوا فيه مع بعضيهم زي ما يكونوا شلة بنات .. يوم 9 مايو من كل سنة اللي هو صادف يوم الأحد كان يوم عيد عند الصهاينة بيسموه يوم القدس Jerusalem Day .. يطلع إيه البتاع ده؟ .. ده اليوم اللي إسرائيل أعلنت فيه سيطرتها علي القدس الشرقية بعد نكسة يونيو 1967 و بالتالي الصهاينة شايفين اليوم ده علي إنه يوم توحيد القدس .. طبعاً عيد يعني صلاة يعني يهود يروحوا حائط المبكي اللي هو أساساً فردة كعب من المسجد الأقصي عشان يصلوا هناك .. شوف يا أخي يصادف يعني إن اليوم ده الأحد 9 مايو كان هو يوم 27 رمضان يعني ليلة وترية من الأيام العشر الأواخر .. أنا مش عايز أقول عنها إنها ليلة القدر لإن تقنياً يعني ده غلط بس خلينا مجازاً نقول عليها ليلة القدر .. طبعاً حيبقي سهل عليك تستوعب إن حصلت مواجهات عنيفة بين المصلين في المسجد الأقصي و بين المستوطنين الصهاينة و معاهم البوليس الإسرائيلي أدت لجرح المئات من الفلسطينيين و إصابة عشرين ضابط بوليس إسرائيلي.
رابع المقادير هو رغبة البني أدمين إن يتحط في إيدهم سلطة و هنا إنت محتاج تبقي فاهم الوضع اللي في فلسطين أو إسرائيل:
حركة حماس عايزة تبقي هي سيدة القرار وسط الفلسطينيين لإنها عايزة تستغل حالة الضعف اللي فيها السلطة الفلسطينية في الضفة الغربية حالياً .. رئيس الوزراء الإسرائيلي (بنيامين نتنياهو) عايز بأي شكل من الأشكال يهرب من الكلابشات اللي حتتركب في إيده بمجرد ما يمشي من السلطة بسبب تهم الفساد اللي هو مُدان فيها حتي لو كان ده ثمنه إنه يحرق قطاع غزة كله .. علي الناحية الثانية السلطة الفلسطينية خلاص معادش ليها وجود .. زمان سواء في إنتفاضة 1987 أو إنتفاضة 2000 لما الوضع كان قلب علي سواد الإسرائيليين كانوا بيرفعوا سماعة التليفون يكلموا حد من السلطة الفلسطينية يتفقوا علي وقف إطلاق نار .. دلوقتي الإسرائيليين بيرنوا بس مفيش حد بيرد.
علي الناحية الثانية و بشكل أنا مش شايف إن له أي معني الحقيقة الإسرائيليين زي ما يكونوا نسوا إنهم محتلين الضفة الغربية .. من المعلومات اللي أنا عايزك تبقي عارفها إن إسرائيل خلال سنتين عملت أربع إنتخابات برلمانية و في طريقهم إنهم يعملوا الإنتخابات الخامسة .. المشكلة إن كل إنتخابات بتتعمل مش بتطلع حزب واحد معاه أغلبية فكل شوية بعد كل إنتخابات يختاروا حد يتقاله شكل حكومة فميعرفش فيتقال ل(نتنياهو) خليك في منصبك مؤقتاً لحد ما نعمل إنتخابات جديدة يمكن ربنا يفكها علينا .. سنتين علي الحال الواقف ده .. الغريبة إن في الأربع إنتخابات اللي فاتوا و في كل المناظرات اللي بتتعمل محدش كان بيجيب سيرة الضفة الغربية ولا الصراع العربي الإسرائيلي ولا حل الدولتين .. الإسرائيليين زي ما يكونوا نسيوا إنهم محتلين شعب تاني .. زي ما يكونوا أقنعوا نفسهم إن خلاص الفلسطينيين زهقوا و حيرضوا و يقبلوا حقيقة إن خلاص مبقاش ولا حيبقي ليهم دولة تلمهم .. يمكن إتفاقيات إبراهيم اللي مضتها إسرائيل مع حكومات الإمارات و البحرين و السودان و المغرب زودت شوية الإحساس الغلط ده.
بعد كل اللي أنا حكيته ده فأحب أختم و أقولك إن الحل في إيد (نتنياهو) و حماس .. اه والله زي ما بقولك كده .. علي إيدك اليمين (نتنياهو) بعد 12 سنة في الحكم فالأيام دي هي أهم أيام في حياته .. مصلحته إن تتعمل إنتخابات برلمانية خامسة و ده معناه إنه محتاج يخلي الوضع يولع أوي لدرجة إن التيارات اليمينية المتطرفة في إسرائيل تقف في ظهره و تقوله إنت حامينا إنت حبيبنا إنت قائدنا .. (نتنياهو) مصلحته إن تراب غزة و القدس يتملي بدم الفلسطينيين عشان البرلمان الإسرائيلي يقول طب نعمل إنتخابات جديدة و يفضل (نتنياهو) في السلطة بعيد عن كلبشات السجن .. من وجهة نظره في داهية الأطفال اللي تموت المهم متسجنش .. في نفس الوقت من مصلحة حماس إن الدنيا تولع .. حاول تفهم إن عينهم علي تارجت إن المواطن الفلسطيني اللي عايش في القدس يشوف إن حماس خايفه عليه و واقفه في ظهره أكتر من السلطة الفلسطينية.
الأمل الوحيد هو إن مصر و الأردن يقدروا يقنعوا كل الأطراف إنها تستهدي بالله و تبطل ضرب .. لكن يبقي السؤال .. (نتنياهو) و حماس يسمعوا كلامنا ليه؟ .. لو الوضع باظ أكتر و قلب علي إنتفاضة جديدة فأحب أقولك إنك بلاش تتفرج علي العربية او الجزيرة .. إفتح TikTok عشان حتلاقي عليه بث مباشر من قلب الأحداث.
المصدر:
مقالة بعنوان Israelis, Palestinians and Their Neighbors Worry: Is This the Big One? نشرت في جريدة The New York Times وده لينك المقالة الأصلية:
https://www.nytimes.com/2021/05/11/opinion/jerusalem-rockets-israel.html
