لينك التسجيل الصوتي علي ساوند كلاود:
https://on.soundcloud.com/e21px
إحنا كمصريين مبقيناش نطيق أثيوبيا ولو بصيت جوا كل واحد فينا حتلاقي عند أغلبنا إحساس إن لو بكره الصبح أثيوبيا دي كلها ولعت بجاز محدش فينا حيزعل .. ليه إحنا حاسين بده؟ .. الكوميديان الأميريكي الأسمر (ديف شابيل Dave Chappelle) له جملة مشهورة أوي يقولك إنك تقطع عيش رجل ده كأنك بتقتله بالضبط .. إحنا كمصريين شايفين إن بناء أثيوبيا لسد النهضة بتاعنا ملوش غير تفسير واحد وهو إنها بتحاربنا في أكل عيشنا .. كل ده منطقي وأقدر أفهمه بس النهاردة أنا عايز أخدك من إيدك أوريك دروس مستفادة غالية أوي من اللي بيحصل ولسه حيحصل هناك .. أثيوبيا بينها وبين الحرب الأهلية زلطة وأنا مش دوري إني أقولك تحس ناحيتهم بشماته أو لا .. أنا دوري إني أفهمك هي مشكلة البلد دي إيه؟ .. ليه هم بيحاربوا في بعض؟ .. ولو نقدر نتوقع الدنيا حترسي علي إيه؟ .. من غير ما نطول أكتر من كده في مقدمات خلينا نخش في الموضوع علي طول.
خلينا نبدأ بالسؤال الأولاني .. مين بيضرب في مين؟ وليه؟
أنا عارف إن التريند بيقول إني لازم أبدأ كلامي ببطل القصة اللي هو رئيس الوزراء (أبي أحمد) بس إنت عارفني كويس مش بمشي ورا التريند ودايماً بسعي إني أفهمك الأصل ورا الأمور وعشان كده معلش أنا لازم أرجعك بالزمن شوية لفترة ما قبل (أبي أحمد) .. متقلقش مش لدرجة إني أكلمك عن (أصحمة النجاشي) ملك الحبشة وقت سيدنا النبي (عليه الصلاة والسلام) .. إحنا عايزين نرجعك بالزمن لسنة 2018 وعايزك لما تيجي تبص علي أثيوبيا تبقي فاهم إنها بلد أولاً كبيرة أوي .. ثانياً عدد سكانها كتير .. ثالثاً وده الأهم إن سكانها مش طايقين بعض .. أثيوبيا بلد متقسمة علي 10 أقاليم كل إقليم فعلياً مستقل شكلاً وموضوعاً عن الباقي .. كل إقليم له البوليس بتاعه .. كل إقليم له حكومته .. أيوه تقدر تقول عليه نظام فيدرالي زي اللي موجود في أميركا أو ألمانيا بس مش أوي يعني.
زمان اللي هو زي ما إتفقنا قبل سنة 2018 كان بيحكم أثيوبيا حكومة مركزية جايه من واحد من الأقاليم العشرة اللي بتتكون منها أثيوبيا وكان إقليم التيجراي رغم إن التيجراي دول كعدد يعني يدوبك 7% بس من السكان .. الإخوة بتوع التيجراي كان ليهم حزب سياسي إسمه جبهة تحرير شعب التيجراي Tigray People’s Liberation Front وإختصاراً بيتسمي TPLF وزي ما إنت شايف الحزب بتاعهم إسمه شعب التيجراي .. مش إقليم التيجراي .. مش أهل التيجراي .. إنما شعب التيجراي .. التفاصيل الصغيرة دي بتفرق خلي بالك .. الفكرة إن حكومة التيجراي المستقلة دي صحيح كانت سايبه كل إقليم يحكم بدماغه بس في نفس الوقت أي حد تسول له نفسه إنه يعترض أو يطمع في الكرسي أو يقول عايزين ديموقراطية والكلام الفاضي ده مش حيطلع عليه صبح .. حكومة التيجراي كانت حكومة ديكتاتورية زي الكتاب ما بيقول .. حكومة إقتصادها صحيح بينمو بمعدل ثابت بس مش أحسن حاجة في الدنيا ومع زي ما قلتلك إن أثيوبيا بلد كبيرة أوي وعدد سكانها كتير أوي أوي فاللي حصل في التيجراي كان كلاكيت تاني مرة من اللي حصل في الرئيس (محمد حسني مبارك) الله يرحمه وده حيودينا للي حصل سنة 2018.
في السنة دي قامت ثورة شعبية شبه ثورة يناير 2011 كده خلت رئيس الوزراء وقتها (هايلي مريام ديسالين) يقدم إستقالته .. ده كان معناه إن الكرسي راح من التيجراي لكن وخلي بالك من اللي جاي دلوقتي .. الأقاليم العشرة قعدوا مع بعض وقالوا إنهم عاجبهم الطريقة اللي كان التيجراي ممشيين بيها البلد إن كل إقليم يحكم نفسه بنفسه من غير تدخل صارخ في شئون الحياة اليومية من الحكومة بس يمكن التغيير اللي هم عايزينه إن بدل ما الحكومة يمسكها ناس بتشمشم علي حد يرموه في السجن فهم عايزين حد يكون طيب وحنين ومش بتاع مشاكل يمسك البلد .. ومن هنا بيظهر (أبي أحمد).
نقول كمان .. الأثيوبيين إختاروا (أبي أحمد) عشان كانوا فاكرينه كيوت وطيب ومش بتاع مشاكل .. هم كانوا متخيلينه حيقضيها طبطبة ويسيب الأقاليم ماشية بدماغها .. الحقيقة إن فترة الهدوء الفجائية اللي حلت علي أثيوبيا بمجرد ما (أبي أحمد) أُختير يبقي رئيس وزراء هي السبب ورا إنه ياخد جايزة نوبل للسلام سنة 2019 .. االرجل ده هو اللي أنهي الحرب مع أريتريا ولغي كل القوانين القمعية اللي TPFL كانوا بيحكموا بيها وطلّع المعتقلين السياسيين من السجون .. المشكلة إن محدش خد باله من المقولة بتاعة لو عايز تعرف معدن حد عينه مدير .. يدوبك هو إتعين من هنا وعينك ما تشوف إلا النور من هنا.
إتفقنا إن تنحي (هايلي مريام ديسالين) عن الحكم كان معناه ضمنياً إن TPLF اللي هي جبهة تحرير شعب التيجراي اللي هو الحزب اللي كان بيحكم أثيوبيا لحد سنة 2018 مصيره بقي زي مصير الحزب الوطني الديموقراطي بعد تنحي (مبارك) بالضبط .. شوية و(أبي أحمد) إتفق مع أربع أقاليم من العشرة اللي بيكونوا أثيوبيا عشان الأربعة يتحدوا سوا في حزب سياسي اللي هو الجبهة الثورية للشعب الأثيوبي Ethiopian People’s Revolutionary Front وإختصاراً بيسموه EPRDF وزي ما إنت شايف الحزب إسمه طويل أوفر يعني فغيروا إسمه بقي حزب الإزدهار Prosperity Party اللي هو حزب اللي معانا حيتنغنغ واللي ضدنا حيتفشخ.
شوية وباقي الأقاليم بدأت تحس إن الحبل بقي بيلف حول رقبتها .. إحنا جايبينك عشان تبقي واجهة مش إن الكرسي يعجبك وتقول لنفسك طب ما أحكم بحق وحقيقي وزي أي حد عايز يحس إنه بيحكم بحق وحقيقي مش مجرد فاترينة وخلاص بيجي اليوم اللي بيحتاج فيه يدبح القطة لحد عشان يبان إنه في الشدة شديد وفي القوة قوي أوي أوي .. الموقف ده حصل في سبتمبر 2020 ولأجل حظ (أبي أحمد) يعني الموقف ده حصل مع أكتر ناس بتكرهه ومش طايقاه اللي هم التيجراي .. اللي حصل إن كان المفروض في الشهر ده تتعمل إنتخابات برلمانية للأقليم وأرجوك متنساش إننا إتفقنا إن أثيوبيا بلد فيدرالية بحيث كل إقليم له حكومته وبرلمانه وبوليسه وسلطاته وبابا غنوجه.. طب المشكلة فين؟ ما الإقليم يعمل الإنتخابات بتاعته عادي يعني .. المشكلة إن وقتها فيروس Covid-19 كان طايح في العالم كله و(أبي أحمد) كان مطلع قرار من الحكومة المركزية بإلغاء التجمعات وطبعاً إنتخابات برلمانية طبيعي ومنطقي إنها تتحط تحت مظلة التجمعات وبالتالي الإنتخابات دي لازم تتأجل .. التيجراي لإنهم بيشمشموا هم كمان علي خناقة رفضوا التأجيل .. (أبي أحمد) قام مصعد الموضوع إنه قال إن البرلمان اللي حيجي من الإنتخابات دي مش شرعي وكمان وقف تمويل حكومة التيجراي .. المفروض وفق النظام الفيدرالي إن كل إقليم له ميزانيته اللي بياخدها من الحكومة المركزية فدلوقتي كأنه بالضبط منع عنهم المصروف.
أرجع تاني وأفكرك بالجملة اللي قالها (ديف شابيل) .. إنك تقطع عن رجل أكل عيشه كأنك بالضبط بتقتله .. قرار وقف تمويل حكومة التيجراي ده ناس شافته إعلان حرب وده اللي حصل فعلاً يوم 4 نوفمبر 2020 لما وحدة عسكرية في مدينة ميكيلي اللي هي تبقي عاصمة إقليم التيجراي والوحدة دي تابعة للقوات الفيدرالية إتعرضت لهجوم .. لما الناس سألت التيجراي إنتوا ليه ضربتوا الأول كانت الإجابة إننا مش عبط .. إحنا شايفين إزاي القوات الحكومية عمالة تتجمع في الأقاليم جيرانا وعارفين إن (أبي أحمد) بيخطط يضربنا فإحنا قررنا نتغدي بيه قبل ما يتعشي بينا .. يدوبك ولسه بتوع المطافي بيحاولوا يسيطروا علي النار في المعسكر اللي إتضرب كان (أبي أحمد) طلع قرار ببدء عملية عسكرية ضد TPLF.. جري الشريط 3 أسابيع وكانت القوات الفيدرالية دي بتدخل مدينة ميكيلي و(أبي أحمد) بيعين حاكم عشان يمشي الدنيا في الإقليم .. ناس كتير وقتها قالت خلاص بح كده الحرب خلصت والأثيوبيين إستبدلوا حكومة ديكتاتورية بحكومة ديكتاتورية ولففينا يا دنيا دوخينا يا دنيا.
طب لو الدنيا هديت في نوفمبر 2020 ليه أثيوبيا ولعت تاني؟
هي الفكرة في الطريقة اللي القوات الفيدرالية سيطرت بيها علي إقليم التيجراي .. سيبك من إن أغلب القوات الحكومية اللي دخلت إقليم التيجراي كانت من إقليم الأمهرة اللي هم جيران التيجراي .. أنا عارف إن ده كفيل لوحده يخلق حساسيات كتير بس في نفس الوقت أنا أقدر أفهمه .. المشكلة فعلاً إن جزء من القوات اللي دخلت التيجراي كانت من أريتريا وهنا إنت محتاج تقف شوية بقي .. أريتريا دولة أجنبية .. أريتريا لسنين كانت في حالة حرب مع أثيوبيا واللي كان بيحكم أثيوبيا طول سنين الحرب دي كانوا التيجراي .. ده بالضبط عامل زي لما الوضع في شبه جزيرة سيناء يخرج عن السيطرة وتلاقي الحكومة بتاعتنا طلبت مساعدة عسكرية من إسرائيل فطبيعي يعني إن العساكر الإسرائيليين مش حيطبطبوا علي أهل سيناء .. تاريخ العداوة والدم اللي بينهم حيخلي العساكر الإسرائيليين أقل واجب يعني يرتكبوا إنتهاكات ضد حقوق الإنسان ومش حستغرب لو الموضوع وصل لحد جرايم الحرب والإبادة الجماعية وده اللي حصل فعلاً.
في الأول (أبي أحمد) طلع قال إن يا جماعة مفيش قوات من أريتيريا بتشارك في الهجوم ضد التيجراي أصلاً وإن العساكر بتاعته بيوزعوا ورد وحلويات علي أهل التيجراي والناس صدقت .. شوية والمصايب بدأت تظهر .. الأمم المتحدة وصفت اللي حصل في التيجراي من أول نوفمبر 2020 إنه أسوأ كارثة إنسانية تعدي علي أثيوبيا من أكتر من 20 سنة .. في فبراير 2021 تقريرين طلعوا واحد من وكالة أنباء CNN والثاني من منظمة العفو الدولية قالوا إن القوات الأريترية إرتكبت مذابح ضد سكان التيجراي وده لوحده يوريك قد إيه (أبي أحمد) ده بني أدم وسخ .. لو إنت يا سيدي بتكره التيجراي أوي كده تعالي إنت بنفسك وقواتك وموتهم بس متجيبش جيش أجنبي يقتلهم هو عشان متوسخش إيدك .. بناء علي التقارير اللي بتطلع فالقوات الأريترية كانوا لابسين الزي العسكري القديم بتاع القوات المسلحة الأثيوبية والقوات الحكومية سايباهم يعملوا اللي هم عايزيهم في التيجراي .. قتل .. سرقة .. إغتصاب .. منع وصول مساعدات غذائية للمدنيين .. في سبتمبر 2021 الأمم المتحدة قالت إن الوضع في التيجراي وصل إن بقي عندك 5 مليون بني أدم اللي هم حوالي 90% من سكان التيجراي بقوا في حاجة عاجلة للمساعدات الغذائية .. من ال5 مليون دول فيه 400,000 بني أدم عايشين في ظروف مجاعة فعلاً .. لما الأمم المتحدة إشتكت قررت حكومة أثيوبيا طرد موظفي الأمم المتحدة من البلد .. الرسالة واضحة .. التيجراي مش حيطلع عليهم شمس .. الناس دي حتموت لحد أخر بني أدم فيهم.
محدش كان متخيل إن التيجراي حيبقوا عاملين زي شخصية (روكي Rocky) اللي قدمها (سالفستر ستالون) اللي هم يفضل يتضرب طول الماتش ولما اللي قدامه يتعب يديله بالقاضية في وشه .. أنا قلتلك إن في نوفمبر 2020 الهجوم علي التيجراي بدأ .. أخر الشهر كانت القوات الحكومية دخلت مدينة ميكيلي اللي هي العاصمة بتاعة التيجراي .. جري الشريط لحد يونيو 2021 وكان التيجراي إستعادوا ميكيلي تاني وبدأوا مش بس يطردوا القوات الحكومية بره أرضهم دول بدأوا يصطادوا كل الأقاليم اللي ضمن الحزب بتاع (أبي أحمد) وبدأوا بالأمهرة وعفار اللي هم جيرانهم اللي شاركوا في الهجوم عليهم .. لما ده حصل (أبي أحمد) عرض علي التيجراي إتفاق سلام فهم بصوله كده وقالوله تحب نقولك تحط العرض ده فين؟
اللي حصل بعد كده محدش كان فعلاً يتوقعه .. دلوقتي الأخ (أبي أحمد) أساساً يعني من إقليم إسمه أورومو وعشان هو زي ما إنت شايف بني أدم إبن و@$& فكان طبيعي إن ناس من شعبه مبيقوش طايقينه وعشان أثيوبيا زي ما إنت شايف الإختلافات السياسية بتاعتهم بتتحل بالخناق مش بالكلام فالمعارضة بتاعة (أبي أحمد) جوه الإقليم بتاعه اللي هو جاي منه واللي إسمها جيش تحرير الأورومو تحالفت مع قوات التيجراي وأعلنوا الحرب علي (أبي أحمد) وبدأوا يزحفوا سوا علي أديس أبابا اللي هي العاصمة في أكتوبر 2021 وده السبب في إنك سمعت علي السوشيال ميديا خبر إن (أبي أحمد) طلع يوم 2 نوفمبر 2021 قال لشعبه يشيل سلاح عشان يحمي حكومته .. الفكرة إن الطرفين عارفين إن دخول أديس أبابا حيبقي صعب وعشان كده إحتمالات كتير رايحه في سكة إن الطرفين حيقعدوا مع بعض علي طرابيزة يتكلموا وده اللي حصل فعلاً ويوم 2 نوفمبر 2022 بيتمضي إتفاق سلام بين الحكومة الأثيوببية وبين الجبهة الشعبية لتحرير شعب التيجراي.
إنت خلال سنة لقيت بلد دخلت في حرب أهلية و اللي كان مضروب بقي هو اللي بيضرب .. شفت رئيس السلطة عجبته ولعبت في كيمياء مخه وخلته مش حقول ينسي مكانه بس خلته عايز أكتر .. علي فكرة .. (أبي أحمد) كان ضابط مخابرات سابق وده يوريك إن مش كل ضباط المخابرات بيكونوا من نفس خامة (فلاديمير بوتين) بيبقوا عارفين إزاي يتبتوا في الكرسي.
المصادر:
- مقالة بعنوان Ethiopia is at war with itself. Here’s what you need to know about the conflict نشرت علي موقع وكالة أنباء CNN و ده لينك المقالة الأصلية:
https://edition.cnn.com/2021/11/03/africa/ethiopia-tigray-explainer-2-intl/index.html - مقالة بعنوان Ethiopia’s Tigray War: The short, medium and long story نشرت في موقع هيئة الإذاعة البريطانية BBC وده لينك المقالة الأصلية:
https://www.bbc.com/news/world-africa-54964378 - مقالة بعنوان Why is Ethiopia at war with itself? نشرت في جريدة The New York Times الأميريكية وده لينك المقالة الأصلية:
https://www.nytimes.com/article/ethiopia-tigray-conflict-explained.html
