أكبر جريمة ممكن تعملها في حق نفسك لما تيجي تقرأ عن أي حرب أهلية في أي حتة في العالم إنك تشغل بالك أوي بالتفاصيل بتاعة الحرب .. الحروب الأهلية عامله زي المسلسلات بتاعة (يوسف الشريف) كده بالضبط .. أولها بيبقي حلو جداً تتابعه .. في النص بتزهق من كتر الهري اللي ملوش لازمة .. في الأخر بيهمك بس الدنيا خلصت علي إيه؟ و مين كسب؟ .. فعلياً مفيش حد بيفتكر التفاصيل حتي أهل البلد نفسهم .. طبيعة البشر بتخليهم ينسوا الحاجات اللي بتحرق دمهم و بتنكد عليهم عيشتهم .. دي الغلطة اللي انا مش عايز أقع فيها لو جيت فتحت سيرة الحرب الأهلية الليبية .. الحرب دي فيه ناس بتقول إنها بدأت مع الثورة الليبية سنة 2011 اللي أطاحت بحكم (معمر القذافي) الله يرحمه وفيه ناس بتقول إنها بدأت في إبريل 2019 لما (خليفه حفتر) أعلن تمرده علي الحكومة المعترف بيها دولياً .. سميه إستسهال أو سميه تفكير منطقي براحتك الإتنين صح بس خلينا نعتبر مجازاً إن الحرب دي بدأت لما (خليفه حفتر) طلبت معاه يبقي هو الجزء الثاني من (القذافي) و خلينا نسأل أهم سؤالين: ليه الحرب الأهلية بدأت؟ .. و الحرب دي شكلها حتخلص علي إيه؟
تعالوا مع بعض نفهم بسرعة بس هي الخناقة دي حصلت ليه في الأول؟
ثورات الربيع العربي في 2011 بدأت في تونس بس ليبيا وطت و الثورة عدت من فوق دماغها وجت عندنا مصر خبطت فينا وهي راجعه تاني لتونس ليبيا مخدتش بالها وموطتش زي المرة الأولانية و الثورة جت فيها .. يمكن الفرق بين ليبيا و اللي حصل في مصر و تونس إن أولاً ليبيا عندها بترول و بترول كتير كمان و ثانياً إن (القذافي) الله يسامحه كان مفتري حبتين .. المهم الثورة قامت و الأمريكان ضربوا ليبيا بالطيران لحد ما (القذافي) مات .. من 2011 لحد 2014 و ليبيا عامله زي فصل في KG2 كل عيلين فيه ماسكين في خناق بعض و محدش فاهم هم بيتعاركوا ليه أصلاً؟ .. شوية و طلع الكابوس بتاع تنظيم داعش و ده خلي 2014 هي فعلاً السنة اللي ليبيا وصلت فيها لقعر الكنيف .. في السنة دي بان أوي إن البلد بقت مقسومه 3 حتت .. حكومة الوفاق الوطني في طرابلس العاصمة واللي الغرب بيحب يسميها GNA ودي إختصار Government of National Accord ودي ماسكها رجل إسمه (فايز السراج) .. شوية و طلعت حكومة تانية معارضة للحكومو بتاعة الوفاق الوطني دي و حكومة المعارضة إختارت مدينة طبرق في شرق ليبيا عشان تبقي عاصمة ليها و إختاروا كمان واحد إسمه (خليفه حفتر) عشان يقود ما يسمي بالجيش الوطني الليبي اللي الغرب بيحب يسميه LNA ودي إختصار Libyan National Army .. الحتة التالتة هي اللي تحت إيد داعش.
عشان لو تهت فخلينا نبسطلك الدنيا .. سنة 2014 ليبيا كان ماسكها حكومة إسلامية بتاعة (فايز السراج) في طرابلس واللي علي سبيل التقريب تقدر تشبهها بإنها شبه حكومة الإخوان المسلمين في مصر .. لإن زي ما انت عارف سمعة الإسلاميين و الإسلام السياسي عموماً مش قد كده وسط ناس كتير فالناس الكتير دول قالوا إن الإسلاميين مينفعش يحكموا و عملوا لنفسهم حكومة تانية في طبرق و إختاروا (خليفه حفتر) يبقي هو القائد بتاعهم .. وسط الخناقة دي متنساش إن فيه خازوق إسمه داعش.
الحق يتقال إن حكومة (فايز السراج) هي اللي الأمم المتحدة معترفه بيها بس في الحروب الأهلية محدش بيسأل نفسه الصح فين .. اللي بيحكم أي حاجه هي المصالح خصوصاً إن زي ما قلت ليبيا عندها بترول و بترول كتير كمان .. أي دولة ليها مصلحة في ليبيا سألت نفسها مين في الطرفين اللي حيضمنلي مصالحي و بالتالي حقف وراه .. ده مش معناه إن واحد في الإتنين سواء (فايز السراج) أو (خليفه حفتر) هو الأجدر للحكم .. انا معرفش ولا واحد فيهم معرفة شخصية بس إحتمال إن الإتنين يبقوا ولاد تيييت أصلاً .. الأتراك و القطريين و الطليان واقفين ورا (فايز السراج) .. الروس و المصريين و الإماراتيين و السعوديين و كمان الفرنساويين و الأردنيين واقفين ورا (خليفه حفتر) .. تاني .. مش معني إن السعوديين واقفين ورا (خليفه حفتر) إنهم شايفينه هو الرجل المناسب إنه يخلي ليبيا تبقي سويسرا العالم العربي .. نفس الكلام مع (فايز السراج) .. اللعبة هي لعبه مصالح .. مش لعبة مين الأجدر و الأحق إنه يحكم ودي نقطة مهم تكون في دماغك.
زي أي حرب أهلية في الدنيا بتبقي عامله زي Dish Party اللي هو كل واحد يجيب معاه من البيت اللي يقدر عليه .. صحيح إن الأمم المتحدة علمياً فارضه حظر بيع سلاح لليبيا بس عملياً بقي اللي يقدر يجيب حاجه بيجيبها .. الروس بعتوا مرتزقة .. السعوديين ودوا مسلحين سودانيين عشان يحاربوا .. الأتراك بعتوا مسلحين سوريين .. ده غير السلاح و الطيارات بدون طيار .. أقفلي بقي عند حتة الطيارات بدون طيار دي إلهي يكرمك.
دلوقتي بمنتهي البساطة الإماراتيين بيدوا (خليفه حفتر) طيارات بدون طيار صيني رخيصة إسمها Wing Loong II الواحدة ثمنها تقريباً 1-2 مليون دولار اللي هو ولا حاجه قصاد ثمن الطيارة بدون طيار الأمريكاني MQ-9 Reaper اللي ثمنها بيبدأ من 15 مليون دولار .. وفي نفس الوقت الأتراك بيدوا (فايز السراج) طيارات بدون طيار تركي رخيصة برده إسمها Bayraktar BT2 .. بناء علي أرقام الأمم المتحدة فليبيا إتنفذ فيها أكتر من 900 غارة جوية بطيارات بدون طيار وهي دي المشكلة .. الليبيين مش مؤهلين ومش مدربين علي إستخدام النوع ده من الطيارات .. عشان طيارة بدون طيار تطلع لازم يبقي تحت إيدك معلومات مخابراتية متخرش المياه إن الهدف اللي انت عايز تقتله موجود في الحتة الفلانية الساعة كذا ومفيش مدنيين حوليه حيموتوا في الإنفجار .. ده كتير مبيكونش متاح و أكبر مثال علي ده لما طيارة بدون طيار Wing Loong II إماراتي تحت إيد قوات (خليفه حفتر) قتلت 45 مدني في غارة جوية مكنش متخططلها كويس.
انا عارف إن تبسيط الأمور لدرجة إنك تقول إن فيه حاجه معينة هي السبب إن الحرب الأهلية تكمل طول المدة دي كلها ممكن ميبقاش صح بس صدقني لو قلتلك إن في رأيي سبب أساسي إن الحرب الأهلية تبقي عامله زي الصداع النصفي اللي مش عايز يروح بالشكل ده هو الطيارات بدون طيار .. الأتراك بيتعاملوا مع ليبيا زي ما الروس بيتعاملوا مع سوريا .. معرض تجريب للأسلحه بتاعتهم .. حكومة (فايز السراج) إشترت من تركيا 20 طياره TB2 .. قبلها قطر كانت إشترت 6 منهم و السنة دي بعد ما الطيارة إتجربت بنجاح في ليبيا فالأوكرانيين عايزين يشتروا منها 12 طيارة .. طيارات رخيصة شبه الطيارات اللعبة اللي كنا بنلعب بيها واحنا صغيرين و في إيد الطرفين سواء (خليفه حفتر) أو (فايز السراج) و الإتنين فرحانين بيها .. علي رأي الست Wonder Woman لما قالت Boys with Toys.
الحق يتقال برده عشان أخلص ضميري قدام ربنا إن مش بس الإماراتيين و الأتراك اللي فاشخين الوضع في ليبيا بالطيارات بدون طيار لإن عندك الأمريكان كمان .. في نوفمبر 2018 طيارة بدون طيار أمريكاني قتلت 11 مدني من قبيلة الطوارق في غارة جوية جنوب ليبيا .. في سبتمبر 2019 لوحده الأمريكان نفذوا 4 غارات جوية في ليبيا قتلت 43 بني أدم .. هم بيقولوا إنهم مسلحين من داعش بس فعلياً مفيش حد بيراجع وراهم .. اه نسيت أقولك .. هو مش ليبيا مقسومه شرق تبع (خليفه حفتر) و غرب تبع (فايز السراج)؟ أهو جنوب ليبيا بقي تبع قبيلة الطوارق وده خازوق لوحده محدش بيجيب سيرته بس أياً كان اللي حيكسب الحرب الأهلية دي حيلبس فيه.
أرجع تاني و أقولك إن الحكاية حكاية مصالح مش أكتر ولا أقل .. خد عندك تركيا مثلاً .. دي بلد عايزه بترول و ليبيا فيها إحتياطي بترول محترم .. يبقي المنطق من وجهة نظرهم إنهم لازم يضمنوا إن اللي يحكم ليبيا هي حكومة تتمني للأتراك الرضا يرضوا .. ده السبب إن في نوفمبر 2018 الأتراك مضوا مع حكومة (فايز السراج) إتفاق إنهم حيبعتوا أي سلاح هو يحتاجه في مقابل إن الأتراك يحطوا إيدهم علي أبار البترول اللي تحت إيده .. لو تكلم الأتراك تسألهم إيه اللي بتعملوه ده؟ يقولولك هو مش حكومة (فايز السراج) دي معترف بيها دولياً؟ تقولهم اه .. يقولك طب حلو أهو إحنا بقي واقفين في ظهرها قصاد واحد ثورجي زي (خليفه حفتر) اللي واقف وراه الإمارات و مصر و روسيا و فرنسا .. تروح تسأل الإماراتيين هو أنتوا ليه مقويين (خليفه حفتر) علي حكومة شرعية معترف بيها دولياً؟ يقولولك إن (خليفه حفتر) هو الدكر اللي حيعرف يقفل حنفية الإرهاب اللي عمال يجي من الصحراء الكبري .. ولا انتوا مش عايزين تحاربوا الإرهاب ولا إيه.
حتي الأوروبيين سواء فرنسا أو إيطاليا هم الإتنين عايزين نفس الحاجه .. الإتنين عايزين حنفية المهاجرين غير الشرعيين اللي مفتوحة في ليبيا تقفل .. ده كل اللي هم عايزينه .. الفرنسيين شايفين إن (خليفه حفتر) هو اللي يقدر يحققلهم ده و الطليان شايفين إن (فايز السراج) هو الرجل المناسب .. لما الإتنين لقوا إن الحرب الأهلية دي شكلها مطوله ومحدش عارف يحسمها فالطليان و الفرنساويين تحت مظلة الإتحاد الأوروبي قالوا إحنا حنفرض حصار بحري علي ليبيا في عملية عسكرية سموها إيريني Irini .. تيجي تسألهم هو الحصار البحري ده أنتوا عاملينه ليه؟ يقولولك عشان نطبق حظر بيع الأسلحة المفروض علي ليبيا .. لا يا راجل .. يعني مش عشان الهجرة الغير شرعية؟ يقولولك يمين طلاق تلاتة أبداً .. الأتراك مش عاجبهم الحصار البحري ده لسببين: أول سبب إن العملية دي مشارك فيها فرنسا و اليونان و البلدين واقفين في ظهر (خليفه حفتر) .. ثاني سبب هي إن أساساً السلاح اللي بيجي ل(خليفه حفتر) بيوصله عن طريق حدود ليبيا البرية مع مصر وبالتالي فالحصار البحري ده مش حيعمل حاجه غير إنه يمنع وصول أي مساعدات تركية ل(فايز السراج) .. الدنيا بتلف تلف و ترجع تاني لنقطة المصالح.
وزي أي حرب أهلية برده أخر حاجه الناس بتسألها طب و الناس اللي بتموت و اللي بتسيب بيوتها حنعمل فيهم إيه؟ .. بناء علي أرقام الأمم المتحدة فيه أكتر من 200,000 بني أدم إترحلوا من بيوتهم و زود عليهم 1.3 مليون بني أدم محتاجين مساعدات غذائية .. الناس دي إتحولت من ناس عايشه في أعلي مستوي معيشة في أفريقيا أيام حكم (القذافي) لناس مش لاقيه تاكل .. طب دول الي عايشين .. اللي ماتوا بقي محدش عارف يحسب عددهم كام لإن كل طرف بيقول أرقام غير الثاني .. يكفي إني أقولك عدد القتلي سنة 2011 بس بيتراوح ما بين 2,500-25,000 قتيل .. خلال سنة 2019 لوحدها مات أكتر من 1,000 بني أدم في معارك السيطرة علي العاصمة طرابلس .. علي فكرة السواد مخلصش علي كده .. ليبيا تعتبر ترانزيت للهجرة الغير شرعية لأوروبا .. دي بلد فيها بالميت خالص 636,000 لاجيء أفريقي قاعدين في ليبيا لا هم عارفين يهاجروا لأوروبا ولا عارفين يرجعوا بلدهم.
ودلوقتي جه معاد السؤال الثاني .. هي الحرب دي شكلها كده حتخلص علي إيه؟
لو خدت بالك انا صغت السؤال بطريقة تحسسك إني مش متؤكد إن دي النهاية فعلاً لإن دي حقيقة .. الحروب الأهلية مش مسألة فيزياء حيبقي ليها ناتج محدد لو جبته صح يبقي انت كده حليت المسألة .. الحروب الأهلية بتحكمها الإحتمالات لإن الله أعلم بكره إيه اللي ممكن يحصل لكن أغلب الإحتمالات رايحه في سكة إن (فايز السراج) حيوافق علي إنه يفضها سيرة و يمضي علي إتفاق السلام اللي حيكون برعاية مصرية .. في حالة إنك متعرفش أو مسمعتش ففي يوم السبت 6 يونيو 2020 أعلن في القاهرة بإن الحرب الأهلية الليبية خلاص خلصت و الإعلان ده ضمن مؤتمر حضره الرئيس (عبدالفتاح السيسي) و (خليفه حفتر) و معاهم رئيس البرلمان الليبي (عجيله صالح) .. لكن .. وزي ما حد أعرفه كان دايماً بيقولي إن كلمة لكن دي مشكلتها إنها بتخليك ترمي أي حاجه إتقالت قبلها في الزبالة فانت تبقي غلطان لو تخيلت إن الليبيين بكره الصبح حيقولوا لبعض صافي يا لبن حليب يا قشطة.
ليبيا زي ما قلت في البداية إتقسمت نصين كبار .. صحيح فيه أجزاء تانية تحت إيد ناس تانية بس خلينا في النصين الكبار .. النص الشرقي تحت إيد (خليفه حفتر) .. (خليفه حفتر) رجل تحت إيده ناس شايله سلاح .. ده رجل مدعوم من الإمارات و روسيا و مصر .. ده معناه إنه لسه فيه الرمق .. النص الغربي تحت إيد (فايز السراج) وده رجل دلوقتي الدنيا ماشيه معاه زي السكينة في الجاتوه .. رجل تحت إيده ناس معاها سلاح و مدعوم دولياً و بالأخص من تركيا .. وهي دي المشكلة .. المشكلة إن إعلان وقف إطلاق النار ده محضروش حد من الناس بتوع (فايز السراج) .. (فايز السراج) دلوقتي لو انا مكانه انا مفيش حاجه تخليني أرضي إني أمضي علي الإتفاق ده ولا إني أخش في مفاوضات مع (خليفه حفتر).
نقطة التحول في الحرب الأهلية الليبية كانت لما قوات (فايز السراج) خدت قاعدة الوطية الجوية ضمن عملية عسكرية هم سموها بركان الغضب .. قاعدة الوطية الجوية دي علي بعد 144 كيلومتر بس من العاصمة طرابلس و فضلت من سنة 2014 وهي تحت إيد قوات (خليفه حفتر) و أي غارة جوية تتعمل علي طرابلس بتطلع من القاعدة دي .. الروس كانوا باعتين ل(خليفه حفتر) أنظمة دفاع جوي بانتسر اس Pantsir-S و اللي إتدمرت كلها وكتير مننا شافوا صور الأنظمة دي وهي متدمرة علي سوشيال ميديا .. (خليفه حفتر) محلتوش غيرها في غرب ليبيا .. لما العملية العسكرية اللي هو بدأها في إبريل 2019 شدت حيلها كان كل أمله إن قاعدة الوطية دي تبقي هي موقف الميكروباصات اللي قواتها حيركبوا منه لطرابلس و معني إنها تروح منه يبقي كده حلم سيطرته علي ليبيا إترمي في الزبالة.
في حالة إنك بتسأل نفسك إيه الصح اللي يتعمل فانا للأسف حصدمك و أقولك إن الحل إنك متعملش حاجه .. في السياسة دايماً لازم تسأل نفسك طب و بعدين؟ .. يعني دلوقتي لو عملنا زي ما ناس كتير بتقول إننا نتدخل عسكرياً عشان نخلي (خليفه حفتر) يكسب .. جميل .. طب وبعدين؟ .. القوات دي حتبقي تحت سيطرة مين؟ .. متنساش إن (خليفه حفتر) لا الشهادة لله يعني (ايروين روميل) زمانه .. الرجل علاقته بالتخطيط العسكري زي علاقتك بالأكل الصيني كده .. طب إفرض تركيا بعتت هي كمان قوات هل ساعتها حنمسك في خناق تركيا؟ .. هل أصلاً (خليفه حفتر) هو الرجل المناسب عشان يحكم ليبيا؟ .. الرجل ده الحاجه الوحيدة في CV بتاعه اللي مخليه الإماراتيين واقفين وراه إنه ضد حكومة الإسلاميين بتاعة (فايز السراج) فهل ده كفاية؟ .. أسئلة كتير بتخليني في الأخر بقول إن الحل المتاح هو اننا منعملش حاجة لإن حتي لو قررنا نبقي حمامة السلام مش حيبقي لينا أي مصداقية للأسف.
المصادر:
مقالة بعنوان War in Libya: How did it start, who is involved and what happens next? نشرت في جريدة The Guardian وده لينك المقالة الأصلية:
https://www.theguardian.com/world/2020/may/18/war-in-libya-how-did-it-start-what-happens-next
مقالة بعنوان UN-baked Libyan forces take key airbase from rebel general نشرت في جريدة The Guardian وده لينك المقالة الأصلية:
https://www.theguardian.com/world/2020/may/18/forces-allied-to-libyan-government-retake-key-al-watiya-airbase
مقالة بعنوان ‘Libya is ground zero’: Drones on frontline in bloody civil war نشرت في جريدة The Guardian وده لينك المقالة الأصلية:
https://www.theguardian.com/news/2019/nov/27/libya-is-ground-zero-drones-on-frontline-in-bloody-civil-war
مقالة بعنوان Strongman Haftar accepts initiative to end Libya’s civil war نشرت في مجلة Bloomberg وده لينك المقالة الأصلية:
https://www.bloomberg.com/news/articles/2020-06-06/libya-s-haftar-accepts-political-initiative-after-battle-losses
